1 मूसे इस्राएलिया खे बोलेया, "जो प्रदेश तुसा रे बुजुर्गा रे परमेशर यहोवा तुसा खे अक्को दे लणे खे देई राखेया, तिदे जदुओ तक तुसे तरतिया पाँदे जिऊँदे रओ तदुओ तक इना बिदिया ओर नियमा रे मानणे दे चौकसी करनी।"

2 जेते जगा रे तुसे मालक ऊणे तिना रे लोक ऊच्चे-ऊच्चे पाह्ड़ा पाँदे, टिलेया पाँदे या केसी बी किस्मा रे अरे डाल़ो निठे, जितणी जगा दे आपणे देवतेया री पूजा करोए, सेयो तुसे पूरी तरअ ते काडी की नाश करी देणे; 3 तिना रिया बेदिया टाल़ी देणियां, तिना रे पात्थरा रे खम्बे तोड़ी देणे, तिना री अशेरा नाओं रिया मूर्तिया आगी रे फूकी देणियां ओर तिना रे देवतेया रिया कअड़ी रिया मूर्तिया तोड़ी की सेटी देणियां, ताकि तेते प्रदेशो बीचा ते तिना रा नाओं-नशाण तक मिटी जाओ।

4 जिंयाँ सेयो हर केथी पूजा करने री जगा बणाओए, तुसे आपणे परमेशर यहोवे रिया तँईं तेड़ा नि करना। 5 पर जो जगा तुसा रा परमेशर यहोवा तुसा रे सारे गोत्रा बीचा ते चूणी लओगा कि तेती से आपणा नाओं बणाया रा राखो, तेसरी तेथी रणे रिया जगा रे नेड़े जाया करना। 6 ओर तेथी तुसे आपणे होमबलि, मेलबलि, दशमांश, पेंट जो तुसे चढ़ाओए, मान्नता रिया चीजा, इच्छा रे मुताबिक बलि, गाय-बल़द ओर पेडा-बाकरिया रे पईले बच्चे लई जाया करने; 7 तुसे तेथी आपणे परमेशर यहोवे सामणे रोटी खाणी ओर आपणे-आपणे करानेया समेत आपणी मईणती रिया तँईं खुशी मनाणी जेते पाँदे तुसा रे परमेशर यहोवा आशीष देई राखी।

8 जिंयाँ आसे आजकाल जो काम जेसखे ठीक लगोआ सेई करूँए, तेड़ा तुसे नि करना। 9 तुसे एबुए तक राम करने रिया जगा पाँदे, आपणी जमीना पाँदे जो तुसा रा परमेशर यहोवा तुसा खे देओआ, तेती नि पऊँची रे। 10 जेबे तुसे यरदन नदी टपी लओगे ओर तेते प्रदेशो दे बसी जाओगे जेतेखे आपणे अक्को रे करने रिया तँईं तुसा रा परमेशर यहोवा तुसा खे देणे वाल़ा ए ओर तुसा रे चऊँ कनारले सबी दुश्मणा ते तुसा खे शान्ति देओ ताकि तुसे बेफिकर ऊई की रई सको, 11 तेबे जेते जगा खे तुसा रा परमेशर यहोवा आपणे नाओं री रणे री जगा ठईराणे खे चूणी लओ तिदे ई तुसे आपणे होमबलि, मेलबलि, दसुआ इस्सा, पेंट जो तुसे चढ़ाओए, मान्नता रिया सब खरिया-खरिया चीजा जो तुसा यहोवे खे संकल्प करनिया, मतलब जितणी चीजा री आज्ञा आऊँ तुसा खे देऊँआ सेयो सब तेथी निया करनिया।

12 तेती तुसे आपणे परमेशर यहोवे री मौजुदगिया रे आपणे माठे-बेटिया, दास-दासिया ओर तुसा रे शईरो रे पीतरे रणे वाल़े लेविया साथे खुशी मनाणी कऊँकि तिना रा तुसा साथे कोई अंश या बाओ री जायदाता रा इस्सा नि ऊणा। 13 तूँ सावधान रएया, एड़ा नि ओ कि जो-जो जगा तूँ देखे तेथी आपणी होमबलिया खे चढ़ाई देओ;* 14 पर जो जगा तेरे केसी गोत्रो रे यहोवा चूणी लओ, तेथी आपणे होमबलि चढ़ाया करने ओर सेयो सब काम तेथी करेया करने जिना री आज्ञा आऊँ ताखे देऊँआ।

15 फेर बी तूँ आपणे प्रवेश द्धारो ते पीतरे आपणी इच्छा ओर आपणे परमेशर यहोवे री दित्ती री आशीषा रे मुताबिक डांगर काई की खाई सकेया, शुद्ध ओर अशुद्ध दोनो माणूं खाई सकोए, जेड़ा कि बारासींगे ओर ईरणो रा मास। 16 पर तेसरा खून नि खाणा, से पाणिए जेड़ा जमीना पाँदे लटी देणा।

17 तेबे आपणे नज्ज, अंगूरा रा रस, शुद्ध तेल, आपणे गाय-बल़द या पेडा बाकरिया रे जेठे ओर आपणी मान्नता री कोई चीज, आपणी इच्छा रे मुताबिक बलि ओर पेंटा जो तुसे चढ़ाओए आपणे सबी प्रवेश द्धारो ते पीतरे नि खाणी; 18 सेयो आपणे परमेशर यहोवे सामणे तेथी जगा पाँदे जेतेखे से चुणो, आपणे माठे-बेटिया ओर दास-दासिया रे ओर जो लेवी तेरे डेरे ते पीतरे रणे तिना साथे खाणे ओर तैं आपणे सबी मईणती रे कामा रिया तँईं परमेशर यहोवे रे सामणे खुशी मनाणी 19 ओर तूँ सावधान रएया! जदुओ तक तूँ तरतिया पाँदे जिऊँदा रये, तदुओ तक लेविया खे नि पूलेया।

20 तेरा परमेशर यहोवा आपणे वचनो रे मुताबिक तेरा देश बढ़ाओ ओर तेरा जिऊ मास खाणे खे बोलो ओर तूँ सोचणे लगे कि मां मास खाणा, तेबे जेतेरा मास खाणे खे तेरा जिऊ बोलोगा सेई खाई सकणा। 21 जेते जगा खे तेरा परमेशर यहोवा आपणा नाओं बणाई राखणे खे चूणी लओ से जे तांते बऊत दूर ओ, तो जो गाय-बल़द, पेडा बाकरिया परमेशरे ताखे देई राखिया, तिना बीचा ते जो कुछ तेरा जिऊ चाओ, तिजी खे मेरी आज्ञा रे मुताबिक काई की आपणे डेरे ते पीतरे खाई सकेया।* 22 जिंयाँ बारासींगे ओर ईरणो रा मास खाया जाओआ तिंयाँ ई तिना खे बी खाई सकणे, शुद्ध ओर अशुद्ध दोनो डांगरा रा मास माणूं खाई सकोए। 23 पर तिना रा खून नि खाणा, कऊँकि जो खून ए से प्राण ईए ओर तैं मासो साथे खून कदी नि खाणा। 24 तिजी खे नि खाणा, से पाणिए जेड़ा जमीना पाँदे लटी देणा। 25 तैं से नि खाणा; ताकि से काम करने ते जो यहोवे रिया नजरा दे ठीक ए तेरा ओर तांते बाद तेरे वंशो रा बी पला ओ।

26 पर जेबे तूँ कोई चीज पवित्र करे, या मान्नत मांगे, तो एड़िया चीजा लई की तेते जगा दे जाणा जेतेखे यहोवा चूणी लओगा। 27 तेती आपणे होमबलिया रे मास ओर खून दोनो आपणे परमेशर यहोवे रिया बेदिया पाँदे चढ़ाणे ओर मेलबलिया रा खून बेदिया पाँदे लटी की तिना रा मास खाणा। 28 इना गल्ला खे जिना री आज्ञा आऊँ ताखे देऊँआ त्यानो साथे सुण, ताकि जेबे तूँ से काम करे जो तेरे परमेशर यहोवे रिया नजरा रे पला ओर ठीक ए, तेबे तेरा ओर तांते बाद तेरे वंशो रा बी सदा पला ऊँदा रओ।

29 जेबे तेरा परमेशर यहोवा तिना जातिया खे जिना रा मालक ऊणे खे तूँ जाणे लगी रा तेरे आगे ते काडी की नाश करो ओर तूँ तिना रा मालक ऊई की तिना रे प्रदेशो दे बसी जाए, 30 तेबे तूँ सावधान रया, केथी एड़ा नि ओ कि तिना रे नाश ऊणे ते बाद तूँ बी तिना जेड़ा जाल़ो रे फसी जाए, मतलब ये बोली की तिना रे देवतेया रे बारे दे पूछताछ नि करना कि तिना देशा रे लोक आपणे देवतेया री पूजा किंयाँ करो थे? मां बी तिंयाँ ई करनी। 31 तैं आपणे परमेशर यहोवे साथे एड़ा बर्ताव नि करना, कऊँकि जितणे कामा ते से नफरत करोआ ओर बैर राखोआ, सेयो सब तिने आपणे देवतेया रिया तँईं करी राखे, एथो तक कि आपणे माठे-बेटिया खे बी आपणे देवतेया खे आगी रे सेटी की बलि चढ़ाई देओ ए।

32 जितणी गल्ला री आऊँ तुसा खे आज्ञा देऊँआ सेयो चौकस ऊई की मानेया करनिया ओर ना तो तिना रे कुछ बढ़ाणा ओर ना ई कटाणा।*