Ezequiel 23

ላኡ ሻርሙጽያ ምቼቱዋ ሌምሱዋ

1 መና ጎዳ ቃላይ ታኮ ሀዋዳን ያጊደ ዬዳ፤ 2 "ላ አሳ ናአዉ፥ እት አትፐ የለቴዳ ላኡ ማጫ አሳቱ ደኢኖ። 3 ኡንቱንቱ ግብጼን ደኢድ፥ ባረንቱ ያላጋተፐካ ዶሚደ፥ ሻርሙጻ ግዴድኖ። ሄ ቢታን ኡንቱንቱ ንን አቱማ አሳይ ካኤዳ፤ ኡንቱንቱ ዎዶሮተይካ አከቴዳ። 4 ኡንቱንቱፐ ባይራት ሱንይ ኦሆሎ*23:4 ኦሆሎ፦ ሀ ሱን ብለይ እብራዌዋን፥ "እ ጌሻ ጎልያ" ግያዋ። ቃይ እ ምቻት ቴፋት ሱንይ ኦሆልቦ*23:4 ኦሆልቦ፦ ሀ ሱን ብለይ እብራዌዋን፥ "ታ ጌሻ ጎሊ እዝና" ግያዋ። ኡንቱንቱ ላኡዋካ ታን አክና፥ ታዉ አቱማነ ማጫ ናናቱዋ የሌድኖ። ኦሆላ ሳማራቶ፤ ኦሆልባ ቃይ የሩሳላሞ።

5 "ኦሆላ ታዉ ማቻቶ ግዳደ ደኣደካ ሻርሙጻዱ፤ እዛ ባረ ላገት አሶረ ዎታዳራቱዋ አሙዋን ጹገታደ ካላዱ። 6 ኡንቱንቱ ሳሉዋ ማላትያ ማዩዋ ማዬዳ ኦላንቻቱዋ፥ ቢታ ሞድያዋንታነ ኦላ ጋዳዋቱዋ፤ ኡንቱንቱ ኡባይካ ማልሳሳ፥ ያላጋ አቱማ አሳቱዋነ ፓራ ቶግያ ፓራ አሳቱዋ። 7 እዛ ባረና ሻርሙጻ ኦደ፥ ኡባፐ ሎእያ አሶረ አቱማ አሳቶ እማዱ። እ ሻርሙጻተይ አሶረ ቢታ ኤቃቶ ጎይናደ፥ ቱናናዳን እዞ ኦዳ። 8 አ ግብጼን ዶሜዳ ሻርሙጻተ ሀእካ አጋ በይኩ፤ እ ያላጋተፐ ዶሚደ፥ አቱማ አሳቱ እ ን ካኢኖነ ኢናና ሻርሙጺኖ።

9 "ሄዋ ድራዉ፥ እዛ ምንሳደ አሙዋን ሲቅያ አሶረ ቢታ ላገቶ ታን እዞ አደ እማድ። 10 ኡንቱንቱ እዞ ቃሪደ ካሎዬድኖ፤ እዝ አቱማነ ማጫ ናናቱዋ ኦሞድ ኦይቄድኖ፤ እዞካ ማሻን ዎድኖ። ባረና ጋኬዳ ፕርዳ ጋሱዋን፥ ማጫ አሳቱዋ ግዶን ቅሊጭያዋ ግዳዱ።

11 "እ ምቻታ ኦሆልባ ሀዋ በኣዱ፤ እዛ ባረ አሙዋንነ ባረ ሻርሙጻን ባረ ምቻትፐ ቱና ዳራዱ። 12 አካ ቃይ አሶረ ቢታ ሞድያዋንታ፥ ኦላ ጋዳዋቱዋ፥ ሎኦ ማዩዋ ማዬዳ ኦላንቻቱዋነ ፓራ ቶግያ ፓራ አሳቱዋ፥ ኡባቱካ አሞይያ፥ ያላጋ አሳቱዋ ምንሳደ ሲቃዱ። 13 አካ ባረና ቱንሴዳዋ በኣዱ፤ ኡንቱንቱ ላኡካ እት ኦግያ ቢኖ።

14 "እዛ ባረ ሻርሙጻተ ያ ዳርሳዱ፤ እዛ አቱማ አሳቱዋ ምስሊ ጎዳ ቦላን ዎጨት መቴዳዋ፥ ዞኦ ቃላምያን ኦከት ኡቴዳዋ በኣዱ። 15 ኡንቱንቱ ባረንቱ ጼሳን ዝናርያ ዳንጬዳዋንታነ ባረንቱ ሁጲያንካ ሎእያ ጫርቂያ ጻጼዳዋንታ። ኡንቱንቱ ኡባይካ ካላዳዋናቱዋ ቢታፐ ዬዳ ባብሎነ ካፖቱዋ ማላቲኖ። 16 እዛ ኡንቱንቱ ምስለቱዋ በኦሳናካ ዳሮ አሙዋ ጹገታደ፥ ኡንቱንታ ጼሳናዉ ባብሎነ ቢታ አሳ ኪታዱ። 17 ያትና፥ ባብሎነቱ ኢኮ ዪደ፥ ኢናና ሻርሙጺደ፥ እዞ ቱንሴድኖ። ቱኔዳዋፐ ጉይያን፥ እዛ ኡንቱንታካ ሸነታደ፥ ዎራ ስማዱ። 18 እዛ ባረ ሻርሙጻተ ቆንጭያን ኦዳ ዎደነ ባረ ካሉዋ ቃራ በሴዳ ዎደ፥ ታን እ ምቻትፐ ዎራ ስሜዳዋዳን፥ ኢፐካ ሸነታደ ዎራ ስማድ። 19 ሽን እዛ ግብጼን ሻርሙጻ ግዳደ ደእያ፥ ባረ ያላጋተ ዎድያ ሀሳያደ፥ ባረ ሻርሙጻ ካሰዋፐ ያ ዳርሳዱ። 20 ኡንቱንቱ አቱማተይ ሀርያዋ ማላ፥ ኡንቱንቱፐ ከስያ ዘረይካ ፓራዋ ማላ ግዴዳ ባረ ላገቱዋ አሙዋን ካላዱ። 21 (ኔኖ፥ ኦሆልቤ፥ ነ ያላጋተ ዎደ፥ አቱማዋንቱ ነ ንን ካእሽና፥ ነ ዎዶሮተካ አክሽና፥ ኔን ፖሌዳ ሻርሙጻተ ዛራደካ ሀእ ኦናዉ አሞታሳ።)

መና ጎዳይ ላኡ ምቼቱዋ ቦላ ፕርዴዳ

22 "ሄዋ ድራዉ፥ ኦሆልቤ፥ ኡባ ሞድያ መና ጎዳይ ሀዋዳን ያጌ፤ ‘ታን ነ ላገቱዋ፥ ሄ ኔን ሸነታደ ዎራ ስሜዳዋንታ ነ ቦላ ደንና፤ ታን ኡንቱንታ ነ ቦላ ኡባ ሳና አሀና። 23 ኡንቱንቱካ ባብሎነቱዋነ ካላዳዌቱዋ ኡባ፥ ፓቆዳ፥ ሾአነ ቆኣና አቱማ አሳቱዋ፥ አሶረቱዋ ኡባ፥ አሞይያ ያላጋ አሳቱዋ፥ ቢታ ሞድያዋንታ፥ ኦላ ጋዳዋቱዋ፥ ኦላንቻቱዋ፥ ካፓቱዋነ ፓራ ቶግያ ፓራ አሳቱዋ። 24 ኡንቱንቱ ኦላ ፓራ ጋረቱዋና፥ ጫና ጋረቱዋናነ ዳሮ ኦላንቻቱዋና ሁጲሳ ባጋፐ ህንተ ቦላ ያና። ኡንቱንቱ ዎጋ ጎንዳልያነ ቄር ጎንዳልያ ኦይቂደ፥ ብራታ ቆብያ ዎደ፥ ነ ዩሹዋን ሳልፓና። ታን ኔና ኡንቱንቱን ፕርድሳና፤ ኡንቱንቱካ ኔና ባረንቱ ዎጋዳን ፕርዳና። 25 ሀንቁዋ ነ ቦላ የዳና፤ ኡንቱንቱካ ኔናና ሀንቁዋ ሱሉዋን ጋከታና። ኡንቱንቱ ነ ሲያነ ነ ሀይ ቃንጻና፤ ኔፐ አቴዳዋንቱካ ማሻን ቡሳከታና። ኡንቱንቱ ነ አቱማ ናናቱዋነ ነ ማጫ ናናቱዋ ኦይቃና፤ ኔፐ አቴዳዋንታካ ታማን ጹጋና። 26 ኡንቱንቱ ነ ማዩዋ ኡባ ኔፐ ቃር አካና፤ ነ አሌቆ ኡባካ ኔፐ ከስ አካና። 27 ሄዋዳን ኦደ፥ ኔን ግብጼፐ አሄዳ ሻርሙጻተ ቃቃነ ነ ሻርሙጻተ ኡባ ታን ኔና አግሳና። ኔን ላኤን ግብጼቱዋ ኤቃ ምስለቱዋ ቁ ጋደ ጼለናዳን፥ ዎይ ኡንቱንታ ሀሳየናዳን፥ ታን ኔና ኦና’ ያጌ።

28 "ኡባ ሞድያ መና ጎዳይ ሀዋዳን ያጌ፤ ‘ታን ኔና ኔን እጽያዋንቶ፥ ኔን ሸነታደ፥ ኡንቱንቱፐ ዎራ ስሜዳዋንቶ አደ እማና። 29 ኡንቱንቱ ኔና እጻናነ ኔን ዳቡራደ ደሜዳዋ ቦንቂ ድጊደ፥ ኔና ካሎ ጺራ አሻና። ነ ሻርሙጻተ ፖኩ ቆንጫናዳን ኦና። ነ ዚታይነ ነ ሻርሙጻተ አሙ፥ 30 ሀዋ ነ ቦላ አሄዳ። አያዉ ጎፐ፥ ኔን ካዉተቱዋና ሻርሙጻዳ፤ ኡንቱንቱ ኤቃቱዋን ኔና ቱንሳዳ። 31 ነ ምቻታ ቤዳ ኦግያ ኔንካ ባዳ። ሄዋ ድራዉ፥ ኔናካ ታን እ ጹኣ ኡሻና’ ያጌ።

32 "ኡባ ሞድያ መና ጎዳይ ሀዋዳን ያጌ፤ ‘ኔን ነ ምቻት ጹኣፐ ኡሻና፤ ሄ ጹአይካ ዎልቃማነ ጭንአ። እ ትግና፥ ዳሩዋ አክያ ድራዉ፥ ነ ቦላ ቅያነ ሚቻ አሀና። 33 ኔን ማዋ ጆላናነ ካዮታና። ሄዌ ሄ ነ ምቻት ሳማርያ ጹአይ ዳጋማነ ባየ ጹኣ። 34 ነ አ ጭንግርሳደ ኡሻና፤ ጹኣካ መንና፤ መንዳ ኮንአንካ ነ ን ጋራና። ኡባ ሞድያ መና ጎዳይ ሀዋ ኦዳይ’ ያጌ።

35 "ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ ‘ኔን ታና ዶጌዳ ድራዉነ ታዉ ዞክያ ዛሬዳ ድራዉ፥ ኔን ነ አሙዋነ ነ ሻርሙጹዋ ጋትያ አካና’ ያጌ" ያጊደ ዬዳ።

36 መና ጎዳይ ታና ሀዋዳን ያጌዳ፤ "ላ አሳ ናአዉ፥ ኦሆል ቦላነ ኦሆልብ ቦላ ፕርዲቴ? ፕርዶፐ፥ ኡንቱንቱ ኦዳ ቱና ኦሱዋ ኡንቱንቶ ኦዳ። 37 ኡንቱንቱ ላኡካ ሻርሙጼድኖነ ሸምፑዋ ዎድኖ። ኡንቱንቱ ባረንቱ ኤቃዉ ጎይኔድኖ። ሀራይ አትና፥ ኡንቱንቱ ታዉ የሌዳ ባረንቱ አቱማ ናናቱዋካ ባረንቱ ኤቃቶ ቁማ ኦደ ያርሼድኖ። 38 ሄዋፐካ ሀራባ ኡንቱንቱ ታ ቦላ ኦድኖ፤ ኡንቱንቱ ታ ጌሻ ጎልያ ቱንሴድኖ፤ ኤቃቶ ያርሼዳ ጋላስ ታ ሳምባታካ ሻሬድኖ። 39 ኡንቱንቱ ባረንቱ ናናቱዋ ኤቃቶ ያርሼዳ ጋላስ፥ ሄ ጋላስ ኡንቱንቱ ታ ጌሻ ጎልያ ገሊደ ቱንሴድኖ። ኡንቱንቱ ታ ጎልያን ኦዳዌ ሀዋ።

40 "ሄዋዳንካ ቃይ፥ ኡንቱንቱ ሃኮ ሳፐ አቱማ አሳቱ ያናዳን፥ አሳ ኪቴድኖ፤ ኡንቱንቱካ ዬድኖ። ህንተ ላኡ ምቼቱ ህንተ ቦላ ሜጨቴድታ፤ ህንተ አይፍያካ ቃላምያ ኦኬድታ፤ አሌቁዋካ ዎድታ። 41 ጻርጴዛይ ስንን ደእያ ሎኦ አርሳ ቦላ ኡቴድታ፤ ህንተ ሄ ጻርጴዛ ቦላን ታ እጻናነ ታ ዎጋራ ዛይትያ ዎድታ። 42 ህርግ ባይና አሳ ኮሻይ ህንተ ማታን ስሰቴ፤ ማቴዳዋንቱካ ማራይ ባይና አሳና ባዙዋፐ ዬድኖ። ህንተ ኩሽያን ሳጋየቱዋ ዎድኖ፤ ቃይ ሎእያ ካላቻቱዋካ ህንተ ሁጲያን ዎድኖ።

43 "ታን ታ ዎዛናን፥ ‘ሀዋንቱ አቱማ አሳቱ ሀ ቦላይ ሻርሙጻን ዉር ክቼዳ ማጫ አሳቱዋና ደኡካ አ ግዴዳዋንቱና ሻርሙጻና ጊደ ሀኒኖ?’ ያጋድ። 44 አቱማ አሳይ ሻርሙጻትና ሻርሙጽያዋዳን፥ ኡንቱንቱ ኡንቱንቱና ሻርሙጼድኖ። ኤ፥ ኡንቱንቱ ሄ ሻርሙጻናዉ ቃቃትያ ኦሆሊናነ ኦሆሊብና ሻርሙጼድኖ። 45 ኡንቱንቱ ሻርሙጻ ግድያ ድራዉነ ሸምፑዋ ዎያ ድራዉ፥ ጽሎ አሳቱ ሻርሙጻቱዋ ቦላነ ሸምፑዋ ዎያዋንቱ ቦላ ፕርድያ ፕርዳ ኡንቱንቱ ቦላ ፕርዲኖ" ያጌዳ።

46 ኡባ ሞድያ መና ጎዳይ ሀዋዳን ያጌ፤ "ኡንቱንቱ ቦላ ዳሮ አሳቱዋ ደን አካደ ያ። ኡንቱንታ ሻቢርስያነ ኡንቱንታ ቦንቂያ አሳቶ አደ እማ። 47 ሀ ሻቢርያ አሳቱ ዪደ፥ ኡንቱንታ ሹቻን ጫድኖነ ማሻን ቡሳክኖ፤ ኡንቱንቱ ኡንቱንቱ አቱማነ ማጫ ናናቱዋ ዎና፤ ኡንቱንቱ ጎልያካ ታማን ጹግኖ። 48 ማጫ አሳይ ኡባይ ህንተና ቁለናዳን ዱናዉ፥ ታን ቢታ ኡባፐ ሻርሙጻተ ኤሳና። 49 ህንተ ላኡ ምቼቱ ህንተ ሻርሙጻተ ሙሩዋነ ኤቃቶ ህንተ ጎይኔዳ ናጋራ ጋትያ አካና። ሄ ዎደ ታን ኡባ ሞድያ መና ጎዳ ግድያዋ ህንተ ሄዋን ኤራና" ያጌ።