1 "ላ አሳ ናአዉ፥ እስራኤልያ ደረቶ ትምቢትያ ሀዋዳን ያጋደ ኦዳ፤ ‘ህንተኖ፥ እስራኤልያ ደረቶ፥ መና ጎዳ ቃላ ስስተ! 2,3 ኡባ ሞድያ መና ጎዳይ ህንተ ሞርከቱ፥ ሀሹ! "በን ቃ ደረቱ ኡባይ ኑዉ ላታ ግዴድኖ!" ያጌድኖ። ሄዋ ድራዉ ያግ ትምቢትያ ኦድተ፥ ኡንቱንቱ ህንተና ኡባ ሳኣና መንሬደ መላ ኦዳ ድራዉ፥ ህንተ ጮራ ካዉተቱዋን ሞደታናዳን ኦዳ ድራዉ፥ ህንተ ዳሮ ቦረትያባነ ቅሊጨትያባ ኦሰቴድታ ያጌ ኡባ ሞድያ መና ጎዳይ። 4 መና ጎዳ ቃላ ስስተ! ኡባ ሞድያ መና ጎዳይ ደረቶነ ዞዘቶ፥ ዛንጋራቶነ ዎምባቶ፥ ዩሹዋን ደእያ ሀራ ካዉተቱ ኦይቄዳነ ቅሊጬዳ ሳአቶነ ባዬዳነ መላ ግዴዳ ካታማቶ ሀዋዳን ያጌ። 5 ኡባ ሞድያ መና ጎዳይ ቱሙዋፐ ሀዋዳን ያጌ፤ "ታን ታ ኤጽያ ሀንቁዋን ሀራ ካዉተቱዋ ቦላነ ኤዶማ ኡባ ቦላ ሃሳያድ። ኡንቱንቱ ዎዛናፐ ናሸቲደነ ካደ፥ ታ ቢታ ባረንቶ አኬድኖ፤ ሄን ጋደቱዋካ ላቴድኖ። 6 ሄዋ ድራዉ፥ እስራኤልያ ቢታባ ትምቢትያ ኦዳ። ካዉተቱዋ ቦርያ ድራዉ፥ ኡባ ሞድያ መና ጎዳይ ሀንቁዋን ምሸታደ ግያዋ ኡባ ደረቶ ዞዘቶ፥ ዛንጋራቶነ ዎምባቶ ኦዳ። 7 ዩሹዋን ደእያ ካዉተቱ ኡባይ ቦረታናዋ ታን ኡባ ሞድያ መና ጎዳይ ቱሙዋፐ ጫቃደ ኦዳይ።

8 " ‘ "ሽን ህንተኖ፥ እስራኤልያ ደረቶ፥ ህንተ ዳሻና፤ ታ አሳዉ እስራኤልያዉ አይፋና። አያዉ ጎፐ፥ ኡንቱንቱ ኤለካ ባረንቱ ቢታ ስማና። 9 ታን ህንተናና ደአይ፤ ታን ህንተኮ ስማና፤ ህንተ ቢታይ ጎሸታናነ ዘረታና። 10 ታን እስራኤልያ አሳ ፓይዱዋ ሀ ቢታን ዳርሳና፤ ካታማቱዋን አሳይ ደአና፤ ላለቴዳ ሳአቱ ስሚደ ግምበታና። 11 ታን አሳካ መህያካ ህንተ ቦላ ዳርሳና፤ ኡንቱንቱ የለታናነ ጮራታና። በንዋዳንካ ህንተ ቦላ አሳይ ደአናዳን ታን ኦና። ታን ህንተዉ ካሰዋፐ አያ ሎኦባ ኦና። ታን መና ጎዳ ግድያዋ ህንተ ሄዋን ኤራና። 12 ታን ታ አሳይ እስራኤሊ ህንተ ቦላን ዛር ደአናዳን ኦና። ላኤን ሄ ቢታይ ህንተ ናናቱዋ ይሰና። ኡንቱንቱ ህንተና ላታና፤ ህንተካ ኡንቱንቶ ላታ ግዳና" ያጌ።

13 " ‘ኡባ ሞድያ መና ጎዳይ ሀዋዳን ያጌ፤ አሳይ ሄ ቢታ፥ ህንተ ካዉተይካ ናአይ ባይናዋ ኦዳ ህንተ ቢታይካ አሳ ምያዋ ያግያዌ ቱማ። 14 ሄዋ ድራዉ፥ ሀዋፐ ስንናዉ ሀ ቢታቱ አሳ ሚክታነ ህንተ ካዉተ ናአይ ባይናዋ ከስክታ። ታን ኡባ ሞድያ መና ጎዳይ ሀዋ ኦዳይ። 15 ቃይ ካዉተቱዋ ቦርያ ሀዋፐ ስንናዉ ታን ህንተና ስስከ፤ ህንተ አሳ ዬላካ ሀዋፐ ስንናዉ ቶክክታ፤ ቃይ ሄ ቢታይ ህንተዉ በ ግዳና። ኡባ ሞድያ መና ጎዳይ ሀዋ ኦዳይ ያጌ’ ያጋ" ያጊደ ዬዳ።

16 ቃይካ መና ጎዳ ቃላይ ታኮ ሀዋዳን ያጊደ ዬዳ፤ 17 "ላ አሳ ናአዉ፥ እስራኤልያ አሳቱ ባረንቱ ቢታን ደእያ ዎደ፥ ኡንቱንቱ ባረንቱ ኦግያንነ ባረንቱ ኦሱዋን ቢታ ቱንሴድኖ፤ ታ ስንን ኡንቱንቱ ኤሻይ ማጫ አሳ ፒላ ቱናተ ማላ። 18 ኡንቱንቱ ቢታን ሱ ጉሴዳ ድራዉነ ባረንቱ ኤቃን ቢታ ቱንሴዳ ድራዉ፥ ታ ሀንቁዋ ኡንቱንቱ ቦላን ጉሳድ። 19 ታን ኡንቱንታ ካዉተቱዋ ግዶን ላላድ፤ ኡንቱንቱካ ቢታ ኡባን ላለቴድኖ። ታን ኡንቱንታ ኡንቱንቱ ኤሻዳንነ ኡንቱንቱ ኦሱዋዳን ፕርዳድ። 20 ኡንቱንቱ ቤዳ ሳኣ ኡባን አሳይ ኡንቱንታ፥ ‘ሀዋንቱ መና ጎዳ አሳቱዋ፤ ሽን ኡንቱንቱ አ ቢታፐ ከሴዳዋንታ’ ያጌ፤ ሄዋን ኡንቱንቱ ታ ጌሻ ሱን ቱንሴድኖ። 21 ሽን እስራኤልያ አሳይ ቤዳ ካዉተቱዋ ኡባ ግዶን ቱንሴዳ ታ ጌሻ ሱንባይ ታና ምቼ።

22 "ሄዋ ድራዉ፥ ኔን እስራኤልያ አሳዉ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ "ህንተኖ፥ እስራኤልያ አሳቶ፥ ታን ሀዋ ኦያዌ፥ ህንተ ቤዳ ካዉተቱዋ ኡባ ግዶን ቱንሴዳ ታ ጌሻ ሱን ድራሳፐ አትና፥ ህንተ ድራሳ ግደና። 23 ህንተ ቱንስና፥ ካዉተቱዋ ግዶን ቱኔዳ ታ ዎልቃማ ሱን ጌሻተ ታን በሳና። ኡንቱንቱ ጼልሽን፥ ህንተ ባጋና ታን ታ ጌሻተ በስያ ዎደ፥ ታን መና ጎዳ ግድያዋ ኡንቱንቱ ኤራና። ታን ኡባ ሞድያ መና ጎዳይ ሀዋ ኦዳይ።

24 " ‘ "አያዉ ጎፐ፥ ታን ህንተና ካዉተቱዋ ግዶፐ ከሳና፤ ቢታ ኡባፐካ ሺሻና። ህንተ ቢታ ዛራደ አሀና። 25 ታን ህንተና ጽሎ ሃን ፑሻካና፤ ህንተካ ጌያና፤ ያታደ ህንተና ህንተ ቱናተ ኡባፐነ ህንተ ኤቃ ኡባፐ ጌሻና።

26 " ‘ "ታን ህንተዉ ኦራ ዎዛና እማና፤ ኦራ አያናካ ህንተ ግዶን ዎና፤ ቃይ ሹቻ ዎዛና ህንተፐ ከሳደ፥ አሹዋ ዎዛና እማና።✝ 27 ታን ታ አያና ህንተ ግዶን ዎና፤ ያታደ ህንተ ታ ዎጋ ካላናዳንነ ታ ህግያ ምንሲደ ናጋናዳን ኦና። 28 ታን ህንተ ማይዛ አዋቶ እሜዳ ቢታን ህንተ ደአና፤ ህንተ ታ አሳ ግዳና፤ ታንካ ህንተ ጾሳ ግዳና። 29 ህንተ ቱናተ ኡባፐ ታን ህንተና አሻና፤ ካይ ህንተዉ ዳራናዳን ኦና፤ ኮሻካ ላኤን ህንተ ቦላ አህከ። 30 ኮሻ ጋሱዋን ህንተ ካዉተቱዋ ግዶን ካዉሸናዳን፥ ታን ህንተ ም አይፍያነ ህንተ ሾይቃ ካ ዳርሳና። 31 ሄ ዎደ ህንተ ህንተ ኢታ ኦግያነ ህንተ ሎኦ ግደና ኦሱዋ ሀሳያና፤ ህንተ ናጋራነ ህንተ ቱና ኦሱዋ ድራዉ፥ ህንተ ህንተና ሸነታና። 32 ታን ሀዋ ኡባ ኦያዌ ህንተ ድራሳ ግደናዋ ኤርተ። ህንተኖ፥ እስራኤልያ አሳቶ፥ ህንተ ህንተ ሀኖታን ዬላትተነ ካዉሽተ። ታን ኡባ ሞድያ መና ጎዳይ ሀዋ ኦዳይ" ያጌ።

33 " ‘ኡባ ሞድያ መና ጎዳይ ሀዋዳን ያጌ፤ "ታን ህንተና ህንተ ናጋራ ኡባፐ ጌሽያ ጋላስ፥ ህንተ ካታማቱዋን ዛረደ አሳይ ደአናዳን ኦና፤ ኮለቴዳዋንቱካ ስሚደ ግምበታና። 34 አ ማታና አያ አሳ ስንን መላ ግዲደ ደእያ ቢታይ መላ ግድያዋ አጊደ ጎሸታና። 35 አሳይ ሃሳዪደ፥ ሀዌ ካሰ መላ ግዴዳ ቢታይ ሀእ ኤደነ ገነትያ ማላ ግዴዳ፤ ካሰ ኮለቴዳ፥ አሳይ ደኤናነ መላ ካታማቱካ ሀእ ዩሹ ግምበቴዳነ አሳይ ደእያ ካታማቱዋ ግዴድኖ ያጋና። 36 ሄ ዎደ ህንተ ዩሹዋን ደእያ አቴዳ ካዉተቱ፥ ታን መና ጎዳይ ኮለቴዳ ካታማቱዋ ዛራደ ኬጼዳዋነ መላ ቢታይ ስሚደ ካ ሞካናዳን ኦዳዋ ኤራና። ታን መና ጎዳይ ሀዋ ኦዳድ፤ ታን ኦዴዳዋ ታንካ ኦና" ያጌ።

37 " ‘ኡባ ሞድያ መና ጎዳይ ሀዋዳን ያጌ፤ "እስራኤልያ አሳይ ቃይካ እት ገደነ ታና ማዱዋ ኦቻናዳን ኦና፤ ያታደ ኡንቱንቱ ፓይዱዋ ዉድያዳን ጮርሳና። 38 ያርሽያ መህያ ዉድያዳን፥ የሩሳላመን ባላ ጋላሳን ያርሾ ሺሼዳ ዉድያዳን፥ ኡንቱንቱ ኮለቴዳ ካታማቱዋን አሳ ዉዲ ኩማና። ታን መና ጎዳ ግድያዋ ኡንቱንቱ ሄ ዎደ ኤራና" ያጌዳ’ ያጋ" ያጊደ ዬዳ።