Ezequiel 39

ጎግ ጾነታና

1 "ኡባ ሞድያ መና ጎዳይ ሀዋዳን ያጌ፤ ‘ላ አሳ ናአዉ፥ ጎገ ቦላ ትምቢትያ ኦዳ። ሀዋዳን ያጋ፤ "መሸካነ ቱባላ አሳዉ ዋና ካፖ ጎጋ፥ ታን ነዉ ሞርከ። 2 ታን ኔና ጉየ ዛራና፤ ሁጲሳ ሃኮ ቢታፐ ጎቻ ከሳደ፥ እስራኤልያ ደረቱዋ ቦላ ታን ኔና አሀና። 3 ሄዋፐ ጉይያን፥ ታን ነ ሀድርሳ ኩሽያፐ ዎንዳፍያ፥ ነ ኡሸቻ ኩሽያፐ ዎንዳፍያ ፖ ሾጫደ ኦልሳና። 4 ኔን፥ ነ ኦላንቻቱነ ኔናና ደእያ ካዉተቱ ኡባይ እስራኤልያ ደርያ ቦላን ኩንድ አታና። ታን ህንተ አሹዋ ምያ ካፎቶነ ባዙዋ ዶአቶ ቁማ ኦደ እማና። 5 ታን ኡባ ሞድያ መና ጎዳይ ኦዴዳ ድራዉ፥ ህንተ ምልጽ ጌዳ ደምባን ኩንድ አታና። 6 ማጎጋ ቢታንነ አባ ዶናን፥ ህርግ ባይናን ኡቴዳ አሳ ቦላን ታን ኤጽያ ታማ የዳና። ታን መና ጎዳ ግድያዋ ኡንቱንቱ ሄዋን ኤራና። 7 ታን ታ ጌሻ ሱንይ ታ አሳ እስራኤልያ ግዶን ኤረታናዳን ኦና። ሀዋፐ ስንናዉ ታ ጌሻ ሱንይ ሸቀተና። ሄዋፐ ጉይያን፥ ካዉተቱ ታን መና ጎዳ፥ እስራኤልያ ጌሻ ግድያዋ ኤራና" ያጋ’ ያጌ።

8 "ኡባ ሞድያ መና ጎዳይ ሀዋዳን ያጌ፤ ‘ "ሄ ጋላሳይ ያና፤ አተና" ያጋደ ታን ኦዴዳ ጋላሳይ ሀዋ። 9 ሄ ዎደ እስራኤልያ ካታማቱዋን ደእያ አሳይ ከሲደ፥ ኦላ ሚሻቱዋ ኡባ ታማን ኤና፤ ሄዋንቱካ ዎልቃማነ ጉ ጎንዳለቱዋ፥ ዎንዳፈቱዋነ ማሻቱዋ፥ ቶራቱዋነ ዱላቱዋ። ላፑን ላይ ኩመን ኡንቱንቱ ሄዋንታ ኤያ ም ከሲደ ጎኤታና። 10 ኡንቱንቱ ም ምጻናዉ ዎይ ዎራፐ ኤያ ም ቃንጻናዉ ኮሸና። አያዉ ጎፐ፥ ኡንቱንቱ ሺሼዳ ኦላ ሚሻቱዋ ኤያ ም ኦደ ጎኤታና። ባረንታ ቦንቄዳዋንታ ኡንቱንቱ ቦንቃና፤ ባረንቱባ አኬዳዋንቱፐ ኡንቱንቱዋ አካና። ታን ኡባ ሞድያ መና ጎዳይ ሀዋ ኦዳይ።

11 " ‘ሄ ጋላስ ጎግ ሞገትያ ሳኣ ታን አዉ እስራኤልያ ቢታን እማና። ሄ ሳአይ አባፐ አዋይ ዶልያ ባጋና ደእያ ኦግያ አሳቱዋ ዎምባ ግያ ዎምባ ግዶና ግዳናዋ። ጎግነ አ ኦላንቻቱ ኡባይ ሄዋን ሞገትያ ድራዉ፥ ኡንቱንቱ ዱፉ ሄዋና ሀመትያ አሳዉ ኦግያ ጎርዳና። ሄ ሳአይካ ቃይ፥ "ጎጋ ኦላንቻቱዋ ዎምባ" ጌተቲደ ጼገታና። 12 ሄዋፐ ጉይያን፥ እስራኤልያ አሳይ ቢታ ጌሻናዉ፥ ላፑን አግና ኩመን ሄ አሃ ሞጊደ ጋምአና። 13 ሄ ቢታን ደእያ አሳይ ኡባይ አሃ ሞግያዋን ማደታና፤ ሄዋ ድራዉ፥ ታን ታ ቦንቹዋ ቆንጭስያ ዎደ ኡንቱንቶ ቦንቾ ሱን ግዳናዋ። ታን ኡባ ሞድያ መና ጎዳይ ሀዋ ኦዳይ። 14 ላፑን አግናፐ ጉይያን፥ አቴዳ አሃይ ደኦፐ፥ ቢታይ ጌያናዳን፥ ዩይ ዩዪደ አቴዳ አሃ ኮይ ሞጋናዉ፥ አሳይ ዶረታና። 15 ኡንቱንቱ ቢታን ዩይሽና፥ አሳ መቀይ ቤቶፐ፥ ሄ መቀ ምይያን ማላታ ዎና። ሞግያዋንቱ ዪደ፥ ጎጋ ኦላንቻቱዋ ዎምባን ሞጋና። 16 ሄዋዳን ኦና ቢታይ ስሚደ ጌያና። ሄዋ ሄራን፥ "ኦላንቻቱዋ ካታማ" ጌተት ጼገትያ ካታማይ ደአና’ ያጌ።

17 "ኡባ ሞድያ መና ጎዳይ ሀዋዳን ያጌ፤ ‘ላ አሳ ናአዉ፥ ካፉዋ ዛረ ኡባነ ሳኣ ዶአቱዋ ኡባ ሀዋዳን ያጋደ ጼሳ፤ "ታን ህንተዉ እስራኤልያ ደረቱዋ ሁጲያን ጊግሴዳ ዎልቃማ ያርሹዋ ኡባ ሳፐ ሺቂደ፥ እትፐ ሃይተ። ሄዋን ህንተ አሹዋ ማና፤ ሱካ ኡሻና።✝39:17-20 ሳፃ 19:17-18 18 ህንተ ምኖ አሳቱዋ አሹዋ ማና፤ ቢታ ካፖቱዋ ሱካ ኡሻና። ኡንቱንቱ ህንተዉ ዶርሳ ጋልሳ፥ አንቃራ ዶርሳ፥ ዴሻ ኮልያነ ኦርዶ ቦራ ማላ ግዳና። ኡንቱንቱ ኡባይካ ከቴዳ ባሳነ መሄቱዋ ማላ። 19 ታን ህንተዉ ጊግስያ ያርሹዋፐ ካላና ጋካናዉ፥ ሞዋ ህንተ ማና፤ ቃይ ማታና ጋካናዉ፥ ሱ ህንተ ኡሻና። 20 ታን ህንተዉ አያ ማዳፐ ፓራቱዋ፥ ፓራ አሳቱዋ፥ ምኖ አሳቱዋነ ዱማ ዱማ ቆሞ ዎታዳራቱዋ ህንተ ጋንጂ ካላና ጋካናዉ ህንተ ማና" ያጋደ ጼሳ። ኡባ ሞድያ መና ጎዳይ ሀዋ ኦዳይ።

21 " ‘ታን ካዉተቱዋ ግዶን ታ ቦንቹዋ ቆንጭሳና። ቃይ ታን ሙርያ ሙሩዋነ ታን ኡንቱንቱ ቦላን ደንዳ ታ ኩሽያ ካዉተቱ ኡባይ በአና። 22 ሄ ጋላሳፐ ዶሚደ፥ እስራኤልያ አሳይ ታን መና ጎዳ ኡንቱንቱ ጾሳ ግድያዋ ኤራና። 23 ቃይ እስራኤልያ አሳይ ኦሞዱዋን ቤዳዌ ባረንቱ ናጋራ ጋሱዋና ግድያዋ ሀራ ካዉተቱ ኤራና። ኡንቱንቱ ታዉ አማነተናን እጼዳ ድራዉ፥ ታን ታ ሶምኡዋ ኡንቱንቱፐ ገንደ፥ ኡንቱንታ ኡንቱንቱ ሞርከቶ አደ እማድ፤ ኡንቱንቱ ኡባይካ ኦላን ሀይቂ ዉሬድኖ። 24 ኡንቱንቱ ቱናተነ ኡንቱንቱ ኢታተ ኬሻ ኡንቱንቶ በስያ ሙሩዋ ሙራድ፤ ታ ሶምኡዋካ ኡንቱንቱፐ ገንድ’ ያጌ።

25 "ኡባ ሞድያ መና ጎዳይ ሀዋዳን ያጌ፤ ‘ሀእ ታን ያቆባ ዛራቱዋ ኦሞዱዋፐ ዛራደ ዱረያና፤ ቃይ እስራኤልያ አሳ ኡባዉ ቃረታና። ታን ታ ጌሻ ሱንይ ሸቀተናዳን ኦና። 26 ኡንቱንቱ ኡንቱንታ ያሽያዌ እቱነ ባይና ሳን፥ ባረንቱ ቢታን ሳሮ ደኡሳ ዶምያ ዎደ፥ ካሰ ባረንቱ ዬላነ ታዉ ኡንቱንቱ አማነተናን እጼዳዋ ዶጋና። 27 ታን ኡንቱንቱ ካዉተቱዋ ኡባ ግዶፐ ዛራደ አሀና፤ ቃይ ኡንቱንቱ ሞርከቱዋ ቢታፐካ ኡንቱንታ ሺሻና። ሄዋዳን ኦደ፥ ታን ጌሻ ግድያዋ ኡንቱንቱ ባጋና ካዉተቱዋ ኡባ በሳና። 28 ታን ኡንቱንቱ ካዉተቱዋ ግዶ ኦሞዶ የዴዳ ድራዉነ ኡንቱንታ ሺሻደ፥ ኡንቱንቱ ቢታ ዛሬዳ ድራዉ፥ ታን መና ጎዳ ኡንቱንቱ ጾሳ ግድያዋ ኡንቱንቱ ኤራና። ታን ኡንቱንቱፐ እቱዋነ ካዉተቱዋ ግዶን አግከ። 29 ታን ታ አያና እስራኤልያ አሳ ቦላ ጉሳና፤ ላኤን ታ ሶምኡዋ ኡንቱንቱፐ ኡባካ ገንከ። ታን ኡባ ሞድያ መና ጎዳይ ሀዋ ኦዳይ’ ያጌ" ያጊደ ዬዳ።