Paulus en Korint
1 No dit veleet Paulus Ateen un kjeem no Korint 2 un funk eenen Jud met Nomen Aquila, een en Pontus Jebuarna, dee korz met siene Fru Priscilla ut Italien jekomen wia (wiels Klaudius befolen haud, daut aule Juden ut Rom veloten sullen) un kjeem no äant; 3 un wiels hee von dautselwje Hauntwoakj wia, bleef hee bie äant un oabeid, wiels see wieren von Hauntwoakj Zeltmoaka. 4 Un hee unjahilt sikj jieda Sabat en de Synagoge un äwazeijd beid, de Juden un Griechen.
5 Aus oba Silas un Timotäus ut Mazedonien raufkjeemen, wort Paulus derch dän Jeist jedrenjt, de Juden to bewiesen, daut Jesus de Christus es. 6 Aus see oba jäajenaun wieren un lastaden, scheddad hee sikj de Kjleeda auf un säd to äant: Jun Bloot saul äwa junen Kopp komen! Ekj sie rein; von nu aun go ekj no de Heiden! 7 Un hee jinkj von doa wajch un kjeem en daut Hus von eenem, met Nomen Justus, dee wia gottesferchtich un däm sien Hus stad aun de Synagoge. 8 Oba Krispus, de Synagogen-Väastona, jleewd aun dän Harn met sien gaunzet Hus; un väle von de Korinta, dee doa toohieeden, jleewden un worden jedeept.
9 Dan säd de Har en de Nacht derch eene Vision to Paulus: Fercht die nich, oba räd, un sie nich stell! 10 Wiels Ekj sie met die, un kjeena woat die äwakomen, die Schoden aun to doonen, wiels Ekj hab väl Menschen en dise Staut. 11 Un hee bleef doa een Joa un sas Moonat un lieed mank äant Gott sien Wuat.