Daut Jebäd fa Friemoot
23 Un aus see äant hauden gonen loten, kjeemen see no de Äaje un säden äant aules, waut de Huagepriesta un de Eltestasch to äant jesajcht hauden. 24 Un see, aus see daut hieeden, hoowen eenstemmich äare Stemm opp no Gott un säden: Har, Du best de Gott, dee Himmel un Ieed un daut Mäa un aules, waut doabennen es, jemoakt haft; 25 dee Du derch dien Kjnajcht David sien Mul jesajcht hast: "Wuarom tooben de Heiden, un de Menschen plonen Nutzlooset? 26 De Kjennichs von de Ieed stonen sikj toop, un de Bowaschte vesaumlen sikj jäajen dän Harn un jäajen sienen Christus." 27 Werkjlich, see haben sikj vesaumelt jäajen dien heiljet Kjint Jesus, dän Du jesaulft hast, beid, Herodes un Pontius Pilatus, met de Heiden un de Menschen von Israel, 28 to doonen, waut diene Haunt un dien Rotschluss verhäa beschloten haud, daut et passieren sull. 29 Un nu, Har, kjikj no äa Dreiwen un jeff diene Kjnajchts, daut see met aulem Friemoot dien Wuat räden, 30 wäarent Du diene Haunt utstrakjst fa de Heelunk, un daut Tieekjens un Wunda passieren derch dän Nomen von dien heilja Sän Jesus. 31 Un aus see jebät hauden, scheddad de Städ, wua see vesaumelt wieren; un see worden aula met däm Heiljen Jeist jefelt un räden Gott sien Wuat met Friemoot.