Dadatikaa 11

Baabiloonika Qeerraaka Mine

1 Sirende’ni buttate’n hedhemmak manni duuchchi mitte laagadinni mitte haaso’a haaso’a’nemman. 2 Kunni manni borot ga’ma’ni godaane me’a’ni Sina’oor*11:2 Yookaan Borotena’ni, borote’ni abixxine me’ina’ni, Sina’oori’ni*11:2 Baabiloni’i akeekkan insa’nenna diida mitte’ni genneexxi ookko ofolle. 3 Mitte barra insa’nenna weli’aanni weli, «Amme buttina wodi’ik shanshine qabando; jabaato’aanna giirat gunbo» hine; insa’nenna hinemmashshanni kinjiinxa bakka qabademee buttinna isoo mitteba abidisateenna faara la’oonfante. 4 Ookkoneechchi udumi’a insa’nenna «Amme boga duuchcha’n xexxeerema waalle qachcha giissinennexxi ookkonenna qeeredhe iima geyaaka mine ijaarre gurra fullo» hine. 5 Yaane kinni Duuchchi Woddik Gootti manni giissaammaxxa qachchiinxa bakkanna ookko ijaarrammaka mine uudo’a iimii’n dirre. 6 Duuchchi Woddik Goottinna, «Kunnise insa’ne mitte ardinsha mitte laagada haaso’ati tenne huja sanfechchinni konnechchinn edi’a hunjo’a hendeexxa duuchcha huja insa’ne dhibbabaan. 7 Tennexxee amme dirrine mitti hiyyeexxi mitteke’n aaggabaashsha laagada insa’neeka gorsino.» 8 Tennexxee Duuchchi Woddik Gootti insa’ne ookkoo’n butta duuchcha’n xeere; insa’nenna qachcha ookkone ijaara uurrinse. 9 Duuchchi Woddik Goottinna ookko butta duuchchaka laagada gorsemmaxxee ookkoneechchi uduma qachchik summi Baabiloon*11:9 Baabilooni’i akeekan. Baabeli Hiyyeeki hiyyichchi Dommi Hitaaxxa tika afe’eeke Ibritotek hiyyichchinn welti afemaake ye’injo afe’een. hiyyeme. Ookko’ni Duuchchi Woddik Gootti insa’ne butta duuchcha’n xeere.

Seeminaa’ni Abrihaami Qico’ni Hexxeexa Horte

10 Seemixxe horte konnechchinni butti’a hexxeexxe; baallessatiki wodi’i sa’eexxe lame wogga uduma Seemi ilemeexxe 100 wogga’n Arfaakiisid hiyyemeeka belto i’le. 11 Seemi Arfaakiisid i’le uduma 500 wogga tureexxi wele labbaxxannaa meyyaxxa oose i’le.

12 Arfaakiisid ilemeexxe 35*11:12 Ibritotixx tika 35 hita wodda Torbane Tomme beekolexxi tika 135 hittaan. Wogga’n Saalahi i’le. 13 Arfaakiisid Saalaahi i’le 403 wogga tureechchi uduma wele labbaxxannaa meyyaxxa oose i’le.

14 Saalaahi ilemeexxe 30*11:14 Ibritotixxi tika 30 hita wodda Toraane Tomme beekolexxi tika 130 hittaan. Wogga’n Eebori i’le. 15 Saalaahi Eboori i’leechchi uduma 403 tureexxi wele labbaxxanna meyyaxxa oose i’le. 16 Eboori ilemeexxe 34*11:16 Ibritotixxi tika 34 hita wodda Torbane Tomme beekolexxi tika 134 hitaan. wogga’n Faaleeqi i’le. 17 Eboorinnaa Faaleeqi’i i’leechchi uduma 430 wogga tureexxi wele labbaxxannaa meyyaxxa oose i’le. 18 Faaleeqi ilemeexxe 30*11:18 Ibritotixxe tika’n 30 hiyyendaa wodda Torbane tomme beekolexxe’n 130 hiyyende’een. wogga’n Raagiwwu i’le. 19 Raagiwwu i’leechchi uduma Faaleeqi 209 wogga tureexxi wele labbaxxannaa meyyaxxa oose i’le.

20 Raagiwwu ilemeexxe 32*11:20 Ibritotixxi tika 32 hitaa wodda Torbaane Tomme beekolexxi tika 132 hittaan. wogga’n Seruginii’i i’le. 21 Raagiwwu Serugini i’leeechchi uduma 207 wogga tureexxi wele labbaxxannaa meyyaxxa oose i’le. 22 Serugini ilemeexxe 30*11:22 Ibritotixx tika 30 hitaa wodda Torbane Tomme beekolexxi tika 13o hitaan. Wogga’n Naakoor i’le. 23 Naakoori i’leechchi uduma Serugin 200 wogga tureexxi wele labbaxxannaa meyyaxxa oose i’le.

24 Naakoori ilemeexxe 29*11:24 Ibritotixxi 24 hitaa wodda Torbaane Tomme beekolexxi tika 109 hitaan. wogga’n Taara i’le. 25 Taaraa’a i’leechchi uduma Naakoori 119*11:25 Ibritotixxi tika 119 hitaa wodda Torbaane Tomme beekolexxi tika 129 hitaan. wogga tureexxi wele labbaxxanna meyyaxxa oose i’le. 26 Taara ilemeexxe 70 wogga uduma Abiraamii’i, Naakooriinna, Haraani’i i’le. 27 Taaraaxxi horte konneechchinni butti’a hexxeen. Taara Abiraamii’i, Naakooriinna Haraani’i i’le. Haraaninna Looxi’i i’le. 28 Harani anni ifik Taara hedhondinni hedhee’naa Keleditotike boga’n hedheeke Uuri hiyyemaake ilemeemmange qachchi giddo reye. 29 Abiraaminnaa Naakoori lamiingi aa’ne; Abiraamixxe arek summi Soora, Naakoorixxe are summinna Milkatemman; Milkaki gode dayyi Yosiikan hiyyemaa wodda insa’ne lamiing Haranixxe oosemman. 30 Soorayi ila affeemmabaaxxe manjomman.

31 Taaraa belto ifika Abiraami, ifike dayyika Haranika belto Looxiinna ifike beltixxa Abiraamixxa are Soora’a adhdheexxi Kenaani’a me’o’aa Kaladanitoke bogika Uuri hiyyemeeka qachchinaa’n welt fule; yaane kinni Kaaraan genneexxi okko ofolle. 32 Taara Kaaran giddo ilemeexxe 205 wogga’n lummedhe.