Lucas 1

Yesuusixxi Ilensha Edisse Kulendeexxa

26 Jiyak agenjo’n Magen ifika iimika erganjo Gebiri’eelii’i Geliila giddo hedheeke Naazireetike qachchibaa erge. 27 Ergemeebinna Daawwitxxe sanneke kade’eeke Yooseefi hiyyemaake manjo’n heerundo’a uwwendeexxe dubarchobaatemman. Dubarchotik summinna Maaramitemman.✝1:27 Mat. 1:18. 28 Iikk iimik erganjinna isebaa dageexxi ise’e, «Tee lumoshsha eeyyendeettexxee nage’i ati’a kadowwaal; Gootti atinni hedheen; ati melaalle giddii’n eebbisendeettexxen*1:28 Ati melaaleti giddii’n eebisendetexxen. Hiyyak hiyyichchi edike mirqisanjo maxafuwwa’n afamabaan» hiyye.

29 Maariyaminna konne Iimike erganjik haaso’inni lumoshsha alalteexxi, «Kunni hittatta hedheeke nage’ixxe aadhaa?» hita’ni saadde. 30 Iikki iimik Erganjinna Maaramii hiyyee qici, «Maaramii mee sodaat! Magenokenaa’n elle alfite’eetten. 31 Kunnise siila’witatton, labbaka beltonna ildatton; summa isikanna Yessuus hite’e fulchitatton.✝1:31 Mat. 1:21. 32 Isinna lumoke kadaan; Lumoke Goottik Beltonna hiyyemaan. Gootti Mageninna isike annixxa Daawwitixxa mootenna isi’a uwwaan. 33 Isinna Ya’iqoobixxe sanne’n duuchchi woddi’a moyaan; mootumma isixxinna muuxama affaba’a.»✝1:33 2 Sam. 7:12-13, 16; Isa. 9:7.

34 Maaraminna ookkone iimika erganjo, «Ani heeruma gopheennaxxee tinni hitta kada dandeetta?» hita’n qorte? 35 Iimmik erganjinna hiyya’n ise’n hiisse haaso’ee qici, «Woyyichchi Hafuur ate’n hana dagaan; Lumoke Magenixxi hunna ate’n daggaan; tennexxee ilemaak woyyichchi beltinna Mageniinke Belto hiyyemaan. 36 Kunnise firi atik Elsabeexi ildabaaxxen hiyyenda’n turteexxi cimo giddo labbaka siila’witeexxenni kunni jiyake agenjon. 37 Magenokee dandeessissabaaxxi yaane hexxebaan.»✝1:37 Dada. 18:14.

38 Maaraminna, «Kunnise ani Mageniinxe garibbitten; hitetteshshanni ani’a kaddaqqata!» hite. Iimik erganjinna ise birii’n me’e.