Lucas 5

Yessuusii Siretixxa Hordofeeyye Ye’eexxa

1 Ardikinna dowwe isixxe’n weli dhiiba’n isi barsiisaammaka Mageniinka hiyyichcho laqaama wodda Yessuusi Geensareexxixxe abbaayya bira uurreemman. 2 Eettene yanna lame hobolo abbaayyati qarqara uurrite’na’a afe; qulxu’me abidammak manni hobolo giddii’n fuleexxi marabe anshedha’emman. 3 Yessuusi eettene hoboluwwa giddii’n Simi’oonixxe hobolo kaddeexxi giddi’a e’ye; Simi’ooniinna, koo Simi’ooni! Tenne Hobolo shiixxo qico buttinakenaa’n abaayyatiba’a shikki assaashsha laqe. Ookkonneechchi uduma eettene hobolo giddo ofo’leexxxi arda barsiisa safe.✝5:3 Mat. 13:1-2; Mar. 3:9-10; 4:1.

4 Haaso’a bireechchi uduma Simi’oonii’i, «Hobolo atixxa dhi’mote’n shikki assi; marabe ha’nooxxanna qulxu’me abidino’a darbe» hiyye.

5 Simi’ooninna «Barachchiisalloo, hashsha duuchcha eloonna’n gallennexxi mittelchonna abindebe’noni. Yaane kinni ati hitettexxe’e marabe darbina’ennen» hiyye.✝5:5 Yoh. 21:3.

6 Marabe darbinee wodda marabe insa’neexxi qurubbi qurubbi hutaa qico’n hara bira saxxeexxa qulxu’me abinde.✝5:6 Yoh. 21:6. 7 Tennexxe wele hobolo’n hedheeki insa’neeki jaaluwwi dangeexxi insa’ne gargarro’a qinphe ye’ne; insa’nenna dangeexxi iitti lame hoboluwwa lixxa shiqa qico’n qulxumuwwa itti wonshine. 8 Simi’ooni Pheexiroosinna tennee uude wodda Yessuusi edo guluffateexxi, «Goottaa! Ani cubbaleessa manjo kadeennaxxe’e ani birii’n me’i» hiyye.

9 Tenne hiyyeechchi isinna isinni welti hedhemmak isiki jaaluwwi abindeexxe qulxu’mexxe bira sa’ne’n saandeemmaxxeeten. 10 Simi’oonike jaaluwwa kadde’exxi Zebidewoosixxi labbaxxi oose, Ya’iqoobinna Yohaannisi iittanni saande’emma.

Yessuusinna Simooni’i, «Mee sodaati; konneechchi edi’a manjo bukki assitattoke kaddaton» hiyye.

11 Insa’nenna hoboluwwa ifi ifixxa woddi’i qarqari’a shikki assineechchi uduma duuchchingechcho waalleexxi Yessuusi’i hordonfe.