Lucas 8

49 Yesû lwabele ûkyakûbanga, kusile mwingili gûmo kuima kû nsese. "Gya mukûlû wa nsese gya milombelo gya Bayuda," kumulombola; "Nsongwa kasi obe wa wakûkya. Noka gililili kumudjembya mulangi."

50 Yesû lwategelele mwanda gûgo, umulombwele Yailo, "No katudjuki; gitabêsha ya, noge musike obe shahande." 51 Kyaba kyaikile mu nsese gya Yailo, hatakêshe muntû kûtwela amo nage nambo Petelo, Yoano, Yakobo, amo no tata no madjû wa gûlya nsongwa kasi. 52 Kyaba kyonka kikyo bantû bonse babele balêla no kûtompola kibalo kya gûdjo nsogwa kasi. Yesû wêbalombwele, "Namukalili kibalo gûdjû nsongwa kasi enelikye; nambo mulale!"

53 Nobo bamusekile kwa kûbedja, bamanyine sitê kwana wa wakûkya. 54 Mone Yesû umukwatile gûlya nsongwa kasi kûkûboko wêsambile, "Nsongwa kasi, byûka!" 55 Muntêma gwage gumwibwêlêle, noge ubyukile lûkwe lûmo, Yesû ûtakêshe haebwe kyakûlya. 56 Babyali bage begalagenie biiko, mone Yesû wêbatakêshe nabakamulomboli muntû gegense bilya bilongekile.