1 ଅନନ୍ତ ମିସର୍ ଦେଶତାଗ୍‌ ସଦାପ୍ରବୁ ମୋଶାଙ୍କ୍‍ ନୁ ହାରୋଣତିଙ୍କ୍‌ କେତ୍‍ତଣ୍ଡ୍‌, 2 ଇ ନେଲ୍‌ଞ୍ଜ୍‌ ମିୟାଦ୍‌ ପ୍ରତୁମ୍‌ ନେଲ୍‌ଞ୍ଜ୍‍ ନୁ ୱାଡ଼୍‌ସାତେ ପ୍ରତମ୍‍ ନେଲ୍‌ଞ୍ଜ୍‍ ଆଦ୍‌ତେ । 3 ମିଡ଼୍ ଇସ୍ରାଏଲ୍‌ତେ ସାରେ ମଣ୍ଡଲିତିଙ୍କ୍‌ ଇ ଗଟ୍‍ କେଲ୍‌ମୁଟ୍‍, ଇ ନେଲ୍‌ଞ୍ଜ୍‍ ଦଶ୍‌ଦିନ୍‍ତେ ମିଇ ସାରେ ନାରୁଡ଼୍‍ ଆନିଦାଦିଡ଼୍ ଲତ୍‍ତେ ଅନୁସାର୍‌ତେ ସାରେ ପରିବାର୍‌ ସେଙ୍ଗେ ୱେର ୱେର ମେଣ୍ଢାପିଲା ଅଦ୍‌ତିଡ଼୍‍। 4 ମେଣ୍ଡେ, ୱେରଡ଼୍‌ ମେକାପିଲା ଇଦାନ୍‌ ମାଇଦିଙ୍କ୍‌ ଯଦି ବେନ୍‍ ଇସୁର୍‍ ଆଦ୍‌ତେ, ଆଲେକେ ଅଣ୍ଡ୍‌ ନୁ ତାନ୍‍ ଲତ୍‌ତେ ଗାରେ ମାନ୍ଦାନଡ଼୍, ଜିୱାକିନ୍‌ ସଂଖ୍ୟାଲେକାମ୍ ୱେରଡ଼୍‌ ମେଣ୍ଢାପିଲା ଅଦ୍‍ତିଡ଼୍‌; ମିଡ଼୍ ସାରେତଡ଼୍‍ ତିନ୍ଦାନ୍‍ ଶକ୍ତି ଲେକାମ୍‌ ମେକାପିଲା ନେଃତିତିଡ଼୍। 5 ମିଡ଼୍ ମେଣ୍ଢାମାନ୍ଦେ ବା ପିଲେମାନ୍ଦେ ତାଗାଙ୍କ୍‌ ମେକା ଅଦ୍‌ତିଡ଼୍‍; ଆଦ୍‍ କାନିଲ୍‌ କି କୁଟଲ୍‌ ଆୟିୱେ ମାନ୍‌ତେ, ଅଣ୍ଡୟ୍‍ ଏଣ୍ଡେକ୍‌ତାଦ୍‌ ନୁ ବକ୍‌ଡେ ପିଲା ଆଦ୍‌ତା; 6 ଆଦ୍‍ ନେଲ୍‌ଞ୍ଜ୍‍ତେ ଚଉଦ ଦିନ୍‌ଯାକ୍‍ ଆଦିଙ୍କ୍‌ ବନ୍ଦ୍ ମାଡ଼ି ନେଃତିତିଡ଼୍; ତାନ୍‌ପେର୍କେ ଇସ୍ରାଏଲ୍‌ ମଣ୍ଡଲିତେ ସାରେ ସମାଜତେ ନାରୁଡ଼୍‌ ମୁଲୁପୁଟ୍‍ ଆଦ୍‍ ମେକ୍‍ପିଲେତିଙ୍କ୍‌ ଆୱୁକିତଡ଼୍। 7 ମେଣ୍ଡେ, ନାରୁଡ଼୍ ଆଦିନ୍‌ ଇସୁର୍‌ ନେତୁର୍‌ଅସ୍‍ ବେନ୍‍ ବେନ୍‍ ଲକିନାଗ୍‌ ମେକା ତିନ୍ଦ୍‌ତଡ଼୍, ବେନ୍‌ ବେନ୍‌ ଲକିନ୍‍ ଦୁୱାର୍‍କିନ୍‌ ରେଣ୍ଡ୍‌ ମୁଲା ନୁ ମୂର୍ସିନ୍‌ ପରୁ ଆଦ୍‍ ତମିତଡ଼୍। 8 ମେଣ୍ଡେ ଆ ନାର୍କେ ଆଦିନ୍‌ ଆୱୁଙ୍ଗ୍‍ ତିନ୍ଦ୍‌ତଡ଼୍; କିସ୍‍ତାଗେ ପଡ଼୍‍ସି ତାଡ଼ି କାଇଲ୍‌ତେ ରୋଟି ନୁ କାୟିତେ କୁସିର୍‌ ତଡ଼୍ ଆଦ୍‍ ତିନ୍ଦ୍‌ତଡ଼୍। 9 ମିଡ଼୍ ଆ ଆୱୁଗିଙ୍କ୍‌ ପଡ଼୍‌ସି କି ଏର୍‍ଦେ ଆଟି ଆୱିଙ୍କ୍‌ ତିନ୍‍ମାଟ୍‍, ମାତର କିସ୍‍ତେ ଆଦିନ୍‌ ତାଲ୍‌ଲେ ନୁ କୁରୃର୍କ୍ ମେନ୍ଦୁଲ୍‌ତେ ଲୋପେତାଦିଙ୍କ୍‌ ବା କିସ୍‍ତଡ଼୍ ପଡ଼୍‍ସି ତିନ୍‍ତିଡ଼୍। 10 ମେଣ୍ଡେ ନାର୍କୁକ୍‍ ଆୟିନା ଆଦିନାଦ୍‌ ବାତେବା ନେମାଟ୍‌; ବେସୁଙ୍କ୍‍ ନାର୍କୁକ୍‍ ଆୟିନା ବାତ୍‍ ମାନ୍ତେ, ଆଦ୍‍ କିସ୍‍ତାଗ୍‍ ପଡ଼୍‍ସିମୁଟ୍‌। 11 ଇଦ୍‌ ଲେକାମ୍‌ ମିଡ଼୍ ଆୱୁ ତିନ୍‍ତିଡ଼୍, ବାତେଙ୍କ୍‌ଇତ୍କେ ମିଡ଼୍‌ ପାଡ଼୍‌ ଗାଟ୍‌ ତଃସ୍‌ ଡ଼େକ୍‍ତେ ଏର୍‍ପୁମ୍‌ ଇସ୍‍ କାଇଦାଗ୍‌ ଡ଼ୁଡ଼୍ ପୟିସ୍ ଆଦାନ୍‌ ମାଇଦିଙ୍କ୍‌ ତିଆର୍‌ ଆଦ୍‌ତିଡ଼୍‌; ଇଦି ସଦାପ୍ରବୁନ୍‍ ନିସ୍ତାର୍‌ ପାଣ୍ଡୁମ୍‌ ।

12 ବେଲାକି ମାନାଡ଼୍ ନେଣ୍ଡ୍‌ ନାର୍କା ମିସର୍ ଦେଶ୍‌ମିକା ଇସ୍‍ ଆଞ୍ଜ୍‌ ମିସର୍‍ ଦେଶତେ ନାରୁଡ଼୍ ନୁ ଜିୱାକିନ୍ ସାରେ ପ୍ରତମ୍‌ ଜନ୍ମତିଙ୍କ୍‌ ନଷ୍ଟ ମାଡ଼ିକାଡ଼୍‌; ମେଣ୍ଡେ, ମିସ୍ରୀୟତେ ସାରେ ଦେୟାକିଙ୍କ୍‌ ବିଚାର୍‍ ମାଡ଼ି ଦଣ୍ଡ ଇଦିକାଡ଼୍; ମାମେ ସଦାପ୍ରବୁ । 13 ଆଦିନ୍‌ମାଇଦିଙ୍କ୍‌ ମିଡ଼୍ ବେନ୍‍ ବେନ୍‍ ଲକିନାଗେ ମାନ୍‌ତିଡ଼୍‌, ବେନ୍‌ ବେନ୍‌ ଲକିନାଗେ ଆ ନେତୁର୍‌ତେ ଚିହ୍ନେଲେକାମ୍ ମାନ୍‌ତେ; ମେଣ୍ଡେ ମାନାଡ଼୍‌ ମିସର୍‍ ଦେଶତିଙ୍କ୍‌ ଦଣ୍ଡ ଇଦାନ୍‌ ସମୟତେ ଆ ନେତୁର୍‌ ଉଡ଼୍‍ତଡ଼୍‌, ମିକିଙ୍କ୍‌ ୱିଡ଼୍‌ସି ମୁନେ ଆଦିକାଡ଼୍‌, ମେଣ୍ଡେ, ନଷ୍ଟ ମାଡ଼ାନାଦ୍‌ ନୁ ରେଃତାଦ୍‌ ମି ପରୁ ଗଟେମ୍‌ ଆୟ। 14 ମେଣ୍ଡେ ଆଦ୍‌ ଦିନେ ମିକିଙ୍କ୍‌ ଏର୍କେ ମାଡ଼ାଙ୍କ୍‌ ଆଦ୍‌ତେ, ମେଣ୍ଡେ, ମିଡ଼୍ ଆଦ୍‌ ଦିନେତିଙ୍କ୍‌ ସଦାପ୍ରବୁନ୍‍ ପାଣ୍ଡୁମ୍‍ ଲେକାମ୍‌ ପାଲନ୍‍ ମାଡ଼ିତିଡ଼୍; ଆନିଦାଦିଡ଼୍‍ତେ ତେରୱମାନ୍ଦାନ୍‍ ନିୟମ ଇଦ୍‌ ପାଣ୍ଡୁମ୍‌ ମାଡ଼ିତିଡ଼୍।

15 ମିଡ଼୍ ସାତ୍‍ ଦିନ୍‍ ଯାକ୍‍ ତାଡ଼ି କାଇଲ୍‌ତେ ରୋଟି ତିନ୍‍ତିଡ଼୍; ପ୍ରତମ୍‌ ଦିନେ ନିଜର ନିଜର ଲକିନାଗ୍‌ ତାଡ଼ିତ୍‍କନ୍‍ ଦୂର୍‍ ମାଡ଼ିତିଡ଼୍, ବାତେଙ୍କ୍‌ଇତ୍କେ ବେନ୍‍ ନାରୁଣ୍ଡ୍‌ ପ୍ରତମ୍‌ ଦିନ୍‍ତାଗାଙ୍କ୍‌ ସାତ୍‍ ଦିନ୍‍ଜାକ ତାଡ଼ି କାଇଲ୍‌ତେ ରୋଟି ତିନ୍‍ତଣ୍ଡ୍‌, ଆ ପଶୁ ଇସ୍ରାଏଲତାକ୍‌ ମିରିତେ। 16 ମେଣ୍ଡେ ପ୍ରତମ୍‌ ଦିନେ ମିୟାଦ୍‍ ପବିତ୍ର ମିଟିଙ୍ଗ୍‌ ଆଦ୍‌ତେ, ମେଣ୍ଡେ ସାତ୍ ଦିନେତେ ଲୋପେ ବା ମିୟାଦ୍‍ ପବିତ୍ର ମିଟିଙ୍ଗ୍‌ ଆଦ୍‌ତେ; ମେଣ୍ଡେ ଆ ରେଣ୍ଡ୍‌ ଦିନା ସାରେ ପଶୁତେ କାଦ୍ୟ ତିଆର୍‌ତେ ବିନା ମେଣ୍ଡେ ବେନ୍‍ ପାଡ଼ିୟିମାଡ଼ାଙ୍କ୍‍ ଆୟ୍‍, ମାତର୍‌ ଆ ପାଡ଼ିୟି ମିଡ଼୍ ମାଡ଼େ ପାର୍‌ତିଡ଼୍‌। 17 ଇ ଲେକାମ୍‌ ମିଡ଼୍ ତାଡ଼ି କାଇଲ୍‌ତେ ରୋଟି ପାଣ୍ଡୁମ୍‌ ପାଲନ୍‍ ମାଡ଼ିତିଡ଼୍, ବାତେଙ୍କ୍‌ଇତ୍କେ ଆଦେନାଣ୍ଡ୍‌ ଏକେ ମାମ୍‍ ମି ସୈନ୍ୟନଡ଼୍‌କିଙ୍କ୍‌ ମିସର୍ ଦେଶ୍‌କନ୍‍ ପେସ୍ପିତାତିକାଡ଼୍; ଆଦିନ୍‌ମାଇଦିଙ୍କ୍‌ ମିଡ଼୍ ଆନିଦାଦିଡ଼୍‍କଞ୍ଚ୍‌ ତେର୍‍ଅୱେଲେତ୍‍ ନିୟମ୍‌ତିଙ୍କ୍‌ ନାକିଙ୍କି ଇଦ୍‌ ଦିନେ ପାଲନ୍‍ ମାଡ଼ିତିଡ଼୍। 18 ମିଡ଼୍ ପ୍ରତମ୍‍ ନେଲ୍‌ଞ୍ଜିନ୍‍ ଚଉଦ ଦିନେତେ ମୁଲୁପୁଟ୍‍ ସମୟତେ ଏକୁଶ୍‌ ଦିନେତ୍‌ ମୁଲ୍‌ପୁଟ୍‍ତେ ୱେଲେ ତାଡ଼ି କାଇଲ୍‌ତେ ରୋଟି ତିନ୍‍ତିଡ଼୍। 19 ଅଣ୍ଡୟ୍‌ ଆଟ୍‌ ଏୱୁନା ଇନା ମିଇ ଲତ୍‌ତେ ତାଡ଼ି କାଇଲ୍‌ତାଦ୍‌ ମାନ୍‌ମାକି, ବାତେଙ୍କ୍‌ଇତ୍କେ ବିଦେଶି ବା ୱେରେ ଦେଶତେ ପ୍ରବାସି ବେନ୍‍ ନାରୁଣ୍ଡ୍‌ ଇଦିନାଗାଙ୍କ୍‍ ତାଡ଼ି କାଇଲିତା ଜିନିଷ ତିନ୍ଦ୍‌ତିଡ଼୍‌, ଆ ପଶୁ ଇସ୍ରାଏଲ୍‌ ମଣ୍ଡଲିତେକଞ୍ଜ୍‌ ୱିଡ଼୍‌ସି ଆଦ୍‍ତଡ଼୍‌ । 20 ମିଡ଼୍ ତାଡ଼ି କାଇଲିତେ ବେନ୍‌ବା ଜିନିଷ ତିନ୍‌ମାଟ୍‍, ମିଡ଼୍ ନିଜେ ନିଜର ସାରେ ମାନ୍ଦାନ୍‍ ପଡ଼ିୟେ କଞ୍ଜ୍‌ ତାଡ଼ି କାଇଲ୍‌ତେ ରୋଟି ତିନ୍ଦ୍‌ତିଡ଼୍।

21 ଆସୱେଲେ ମୋଶାଲ୍ ଇସ୍ରାଏଲତେ ସାରେ ବେଡ଼ିୟ୍‌ ନାରୁଡ଼୍‌କିଙ୍କ୍‌ କାର୍‍ଙ୍ଗି କେତ୍‍ତଣ୍ଡ୍‌, ମିଡ଼୍‍ ନିଜର୍‍ ମାଇଦିଙ୍କ୍‌ ନିଜର ନିଜର ତିନ୍ଦାନ୍‍ ଅନୁସାର୍‍ତେ ଅଣ୍ଡୟ୍‍ ଅଣ୍ଡୟ୍‍ ଲକିନାଗାଙ୍କ୍ ମେକାପିଲା ପେସ୍ପିଅସ୍‍ ନିସ୍ତାର୍‌ ପାଣ୍ଡୁମ୍‌ ଆୱୁକାଟ୍‌। 22 ମେଣ୍ଡେ ମୁଟେଣ୍ଡ୍‌ ବୁଗ୍‌ଜିଲର୍‌ କମେ ଅସ୍‍ ଗିନେତ୍‌ ନେତୁର୍‌ତାଗ୍‍ ଲିଇସ୍‌ ଦୁୱାର୍‍ ବନ୍ଦ୍‌ତେ ପରୁ ଗିନେତ୍‌ ନେତୁର୍‌ ଉସାଟ୍‍; ମେଣ୍ଡେ ନାର୍କୁକେ ମିଡ଼୍ ବେନ୍‍ ଦୁୱାର୍‍ତାଗାଙ୍କ୍‍ ବାଇଦେ ଆନ୍‍ମାଟ୍‍। 23 ବେଲାକି ସଦାପ୍ରବୁ ମିସ୍ରୀୟଡ଼୍‍କିଙ୍କ୍‌ ରେଃତାନଙ୍କ୍‌ ଅଡ଼୍‍ ଆଲାଇସ୍‍ ଆଦ୍‍ତଡ଼୍‌; ଆସୁଟ୍‌ ଦୁୱାର୍‍ ବନ୍ଦ୍‌ତେ ମୁର୍ସିନାଗ୍‌ ନୁ ରେଣ୍ଡ୍‌ ମୁଲାନ୍‍ ପର ଆ ନେତୁର୍‌ ଉଡ଼୍‍କେ, ସଦାପ୍ରବୁ ଆ ଦୁୱାର୍‍ ୱିଡ଼୍‌ସି ମୁନେ ଆଦ୍‌ତଣ୍ଡ୍‌, ମିଇ ଲକିନାଗ୍‌ ଆୱୁକାନଙ୍କ୍‌ ଇୱଡ଼୍‌। 24 ମେଣ୍ଡେ ମିଡ଼୍ ନୁ ମିଇ ପିଲା ନିୟମ୍‌ତେ ଇଦ୍‌ ରୀତି ପାଲନ୍ ମାଡ଼ିତିଡ଼୍। 25 ମେଣ୍ଡେ ସଦାପ୍ରବୁ ନିଜର ଉଦେଶ୍‌ତେ ମିକିଙ୍କ୍ ବେନ୍‍ ଦେଶ୍ ଇଦ୍‍ତଣ୍ଡ୍‌, ଆଗେ ନେଙ୍କ୍‌କେ, ଇଦ୍ ନିୟମ ପାଲନ୍‌ ମାଡ଼ିତଣ୍ଡ୍‌। 26 ମେଣ୍ଡେ ମିକିଙ୍କ୍ ମିଇ ପିଲା ପାଚ୍‌ରିଞ୍ଚକେ ଇ ସେବାତେ ଅର୍ଥ ବାତେ ? 27 ମିଡ଼୍‌ କେତ୍‌ତିଡ଼୍‌ ଇଦି ସଦାପ୍ରବୁନ୍‍ ଉଦ୍ଦେଶ୍ୟତେ ନିସ୍ତାର୍‌ ପାଣ୍ଡୁମ୍‌ତେ ବଲିଦାନ୍‌; ବାତେଙ୍କ୍‌ଇତ୍କେ ମିସ୍ରୀୟଡ଼୍‍କିଙ୍କ୍‌ ରେଃତାନ୍ ୱେଲେ ଅଣ୍ଡ୍‌ ମିସର୍‍ତେ ପ୍ରବାସି ଇସ୍ରାଏଲିୟତେ ପିଲାକିନ୍‍ ଲକିଙ୍କ୍‌ ସାରେ ୱିଡ଼୍‌ସି ମୁନେ ଆଞ୍ଜ୍‌ ମା ଲକିଙ୍କ୍‌ ରକ୍ଷା ମାଡ଼ିମାତ୍‍ତଣ୍ଡ୍‌। ଆସ ୱେଲେ ନାରୁଡ଼୍‍ ତାଲେ ମଦଲ୍‍ ମାଡ଼ି ନମସ୍କାର୍‍ ମାଡ଼୍‍ତଡ଼୍। 28 ଆସୁଟ୍‌ ଇସ୍ରାଏଲିୟଡ଼୍ ନାରୁଡ଼୍‌ ଆଞ୍ଜ୍‌ ଆଲେନେ ମାଡ଼୍‌ତା; ମେଣ୍ଡେ ଅଡ଼୍ ମୋଶାଙ୍କ୍‍ ନୁ ହାରୋଣତେ ପରୁ ସଦାପ୍ରବୁନ୍‍ ଆଜ୍ଞାନୁସାର୍‌ତେ ପାଡ଼ିୟ୍‌ ମାଡ଼୍‍ତଡ଼୍।

29 ତାନ୍‌ପେର୍‌କେ ନାଡ଼୍‍ନାର୍କା ସମୟତେ ସଦାପ୍ରବୁ ସିଂହାସନ୍‌ଦାଗ୍‌ କୁଦିମାନ୍ଦାନ୍ ଫାରୋଙ୍କ୍‍ ପ୍ରତମ୍‍ ଜନ୍ମ ପିଲାନାଗ୍‍କନ୍‍ ଜେଲ୍‌ଦାଗାଙ୍କ୍‍ ବନ୍ଦିତେ ପ୍ରତମ୍‍ ଜାତ୍‍ ପିଲାକନ୍‍ ମିସର୍‍ ଦେଶ୍‌ତେ ଗାରେ ସାରେ ପ୍ରତମ୍‌ ଜନ୍ମ ପିଲାକିଙ୍କ୍‌ ନୁ ପଶୁକିନ୍‍ ପ୍ରତମ୍‌ ଜନ୍ମ ପିଲାକିଙ୍କ୍‌ ଆୱୁକ୍‌ତଡ଼୍‌। 30 ଆସୁଟ୍‌ ଫାରୋ ନୁ ତାନ୍ ଦାସଡ଼୍ ନୁ ମିସ୍ରିୟଡ଼୍ ନାରୁଡ଼୍ ସାରେତଡ଼୍ ନାର୍କା ତେଦ୍‌ତଡ଼୍‌; ମେଣ୍ଡେ ମିସର୍ ଦେଶତେ ବାଡ଼େୟେ ଅସୁବିଦା ଆତ୍‌ତେ; ବାତେଇତ୍କେ ଇଦ୍‌ ଲେକେତ୍‌ ଲନ୍‍ ଇଲ୍‌ୱେ ମାତ୍‌ତେ ବେନ୍‍ ଲନ୍‌ ବେନ ଡଲ୍‌ୱେ ମାତ୍‌ତଡ଼୍‌। 31 ଆଦ୍‍ନାଣ୍ଡ୍‌ ନାର୍କା ଫାରୋ, ମୋଶାଙ୍କ୍‍ ନୁ ହାରୋଣତିଙ୍କ୍‌ କାର୍ଙ୍ଗିକେତ୍‍ତଣ୍ଡ୍‌, ମିଡ଼୍ ନୁ ଇସ୍ରାଏଲତେ ବଂଶ ତେଦି ମା ନାରୁଡ଼୍‍ଆଗାଙ୍କ୍‍ ପେୟେମୁଟ୍‌, ମିଇ ବାକ୍ୟଲେକାମ୍‌ ସଦାପ୍ରବୁନ୍‍ ସେବା ମାଡ଼ାନ୍‍ ମାଇଦିଙ୍କ୍‌ ପେୟେମୁଟ୍‌। 32 ମିଇ ବାକ୍ୟଲେକାମ୍‌ ଗଡ୍‌କିନ୍‌ ମେକାନ୍ ଗୁଡ଼ୁସେ ମାନ୍ଦେକନ୍‍ ସାରେ ଅସ୍‍ ପେୟିସ୍‍ଆନୁଟ୍‌ ନୁ ମାକିଙ୍କ୍‌ ଆଶିର୍ବାଦ୍‌ ମାଡ଼ାଟ୍।

33 ଆସୱେଲେ ମିସ୍ରିୟଡ଼୍ ନାରୁଡ଼କିଙ୍କି ଜାପେ ଦେଶ୍‌କନ୍‍ ରଅତାନ୍‍ ମାଇଦିଙ୍କ୍‌ ଦାନ୍ଦେ ଆତ୍‍ତଡ଼୍; ବାତେଙ୍କ୍‌ଇତ୍କେ ଅଡ଼୍ କେତ୍‍ତଡ଼୍, ମାମେ ସାରେ ଡଲିତମ୍‌। 34 ଆସୁଟେ ପିସ୍କ୍‍ତେ ମଇଦା ତାଡ଼ି କାଇଲିତେ ମୁନେନ୍‌, ନାରୁଡ଼୍ ଆଦ୍‍ ଅସ୍‍ ମଇଦା ପିସ୍କ୍‍କାନ୍‍ ଗିନେ ସାରେ ନିଜର ନିଜର ସିଲେ ନାଗ୍‍ ତଃସ୍ ଆଟେତାଗ୍‌ ୱାଟିଆତ୍‌ତେ। 35 ମେଣ୍ଡେ ଇସ୍ରାଏଲତେ ପିଲା ମୋଶାନ୍‍ ବାକ୍ୟଲେକାମ୍‌ତେ ମିସ୍ରିୟଡ଼୍‍କ୍‍ ରୁପା ନେଡ଼େକ୍‌ ନୁ ସନ୍‌ତେ ନେଡ଼େକ୍‌ ନୁ ଚିଲେ ତାଲ୍‍କ୍‍ତଡ଼୍। 36 ଆଗାକନ୍‌ ସଦାପ୍ରବୁ ମିସ୍ରିୟଡ଼୍ କଣ୍ଡ୍‌ତେ ନାରୁଡ଼୍‍କିଙ୍କ୍‌ ଅନୁଗ୍ରହତେ ପାତ୍ର ମାଡ଼ାତାଙ୍କ୍‍ ଅଡ଼୍ ଅଡ଼୍‍କିଙ୍କି ବାତେ ତାଲ୍‍କ୍‍ତଡ଼୍‍ ଅଡ଼୍‍ ଆଦ୍‍ ଇତ୍‍ତଡ଼୍। ଇ ଲେକାମ୍‌ ଅଡ଼୍ ମିସ୍ରିୟଡ଼୍‍ ଦନ୍‍ ଲାଗିଅତ୍‌ତଡ଼୍‍।

37 ତାନ୍‌ପେର୍‌କେ ଇସ୍ରାଏଲତେ ପିଲାକି ପେକଡ଼୍‍କ୍‌ ୱିଡ଼୍‌ସି ପ୍ରାୟ୍‍ ଚଅ ଲକ୍ଷ୍ୟ ମାନେୟି ତାକି ରାମିଷେଷ୍‌ତାଗାଙ୍କ୍‌ ସୁକ୍‌କୋତତା ଆତ୍‍ତଡ଼୍‍। 38 ମେଣ୍ଡେ, କାଇଲିତେ ନାରୁଡ଼ାଦ୍‌ ୱେରଡ଼୍‌ ବେଡ଼ିୟେ ମାନ୍ଦେ ନୁ ଗଡ୍‌ ମେକା ନାର୍ଗେ ପଶୁ ଅଡ଼୍‌ ତଡ଼୍‌ ଆତ୍‌ତା । 39 ତାନ୍‌ପେର୍‌କେ ଅଡ଼୍ ମିସର୍‍କନ୍‍ ତାତ୍‍ତେ ପିସ୍କ୍‍ତେ ମଇଦାତେ ତାଡ଼ି କାଇଲ୍‌ତେ ରୋଟି ତିଆର୍‍ ମାଡ଼୍‍ତଡ଼୍; ବାତେଙ୍କ୍‌ଇତ୍କେ ଆଦ୍‍ ତାଡ଼ି କାଇଲ୍‌ୱେ ମାତ୍‌ତେ; ବେଲା ଅଡ଼୍ ମିସର୍‍କନ୍‍ ତାଡ଼ିତ ଆସ୍‍ ମାତ୍‍ତଡ଼୍, ଆଦିନିମାଇଦିଙ୍କ୍‍ ଲେଟ୍‍ ମାଡ଼ାଙ୍କ୍‍ ପାର୍‌ୱଡ଼୍‌ ଆତ୍‍ତଡ଼୍। 40 ଇସ୍ରାଏଲତେ ନାରୁଡ଼୍‌ ଚାରିଶହ ତିରିଶ୍‍ ବର୍ଷ ଯାକ୍‍ ମିସର୍‍ ଦେଶ୍‌ତାଗ୍‍ ନେଙ୍ଗିମାତ୍‍ତଡ଼୍ 41 ଆ ଚାରିଶହ ତିରିଶ୍‍ ବର୍ଷତ୍‌ ପେର୍କେ ସଦାପ୍ରବୁନ୍‍ ନାରୁଡ଼୍‌ ମାନ୍ଦେ ମିସର୍‍କନ୍‍ ପେୟିସ୍‍ ଆତ୍‍ତଡ଼୍। 42 ମିସର୍‍ ଦେଶ୍‌କନ୍‍ ଅଡ଼୍ ପେୟ୍‍ତାଙ୍କ୍‍ ଆ ସଦାପ୍ରବୁନ୍‍ ଉଦ୍ଦେଶ୍ୟତେ ଅଦିକ୍‍ ପାଲନ୍‌ ମାଡ଼୍‍ନ୍ ନାର୍କେ; ଆଦ୍‌ ସଦାପ୍ରବୁନ୍‍ ନାର୍କେ ଇଞ୍ଜ୍‍ ଇସ୍ରାଏଲତେ ପିଲାକି ଆନିଦାଦିଡ଼୍‍କଞ୍ଚ ପାଲନ ମାଡ଼୍‍ନାଦ୍‌ ଆତ୍‌ତେ ।

43 ମେଣ୍ଡେ ସଦାପ୍ରବୁ ମୋଶାଙ୍କ୍‍ ନୁ ହାରୋଣତିଙ୍କ୍‌ କେତ୍‍ତଣ୍ଡ୍‌, ନିସ୍ତାର୍‌ ପାଣ୍ଡୁମ୍‌ତେ ଇଦ୍‌ ନିୟମ୍‌; ବେନ୍‌ ଆୟି ବିଦେଶି ନାରୁଣ୍ଡ୍‌ ଆଦ୍‍ ତିନ୍‌ମାଟ୍‌। 44 ମାତର ରୁପା ଡାବ୍‌କିନ୍‌ତଡ଼୍‌ ଆସ୍‌ତେ କ୍ରିତଦାସ ସାରେ ନାରୁଡ଼୍‌ ସୁନ୍ନତ ଆତ୍କେ ତିନ୍ଦେ ପାର୍‍ଦ୍‌ତଣ୍ଡ୍‌; 45 ବେନ୍‌ଆୟି ପ୍ରବାସି ବା ବେତନ୍‌ତେ ଦାସ ଆଦ୍‍ ତିନ୍ଦେ ପାର୍‍ୱଣ୍ଡ୍‌। 46 ଅଣ୍ଡୟ୍‍ ଲତ୍‌ତାଗ୍‌ ଆଦ୍‍ ତିନ୍ଦାଙ୍କ୍‍ ଆଦ୍‌ତେ; ମିଡ଼୍ ଆ ଆୱୁଙ୍ଗିଙ୍କ୍‌ ସୁଦୁର୍‌ ବା ଲତ୍‌ତେକନ୍‍ ବାୟିଦେ ଆୟମାଟ୍‍; ବା ଆଦ୍‍ ଅଣ୍ଡୟ୍‍ ବୁଲେବା ଉମାଟ୍‍। 47 ଇସ୍ରାଏଲତେ ସାରେ ମଣ୍ଡଲି ଆଦ୍‍ ପାଲନ୍‌ ମାଡ଼ିତଡ଼୍। 48 ମେଣ୍ଡେ ମିଇତଡ଼୍ ପ୍ରବାସି ବେନ୍‌ଆୟି ବିଦେଶି ନାରୁଣ୍ଡ୍‌ ବେସୁଙ୍କୁ ସଦାପ୍ରବୁନ୍‍ ନିସ୍ତାର୍‌ ପାଣ୍ଡୁମ୍‌, ପାଲନ୍‍ ମାଡ଼ାନ୍‍ଙ୍କ୍‍ ଇଚ୍ଛା ଆତ୍କେ, ଆସୁଟ୍‌ ତାନ୍‍ ପରିବାର୍‌ଦେ ସାରେ ମାନେୟି ସୁନ୍ନତ୍‍ ଆୟିଡ଼୍, ଆସୁଟ୍‌ ଅଣ୍ଡ୍‌ ନାର୍ଗେ ୱାସ୍‍ ପାଣ୍ଡୁମ୍‍ ପାଲନ୍‌ ମାଡ଼ିଣ୍ଡ୍; ଆସୁଟ୍‌ ଅଣ୍ଡ୍‌ ଦେଶ୍‌ତାଗ୍‌ ଜନ୍ମ ଆତ୍‌ତେ ନାରୁଣ୍ଡ୍‌ ଇନା ଆଦ୍‌ତଣ୍ଡ୍‌; ମାତର୍‌ ବେନ୍‍ ଅସୁନ୍ନତ୍‍ ନାରୁଣ୍ଡ୍‌ ଆଦ୍‍ ତିନ୍ଦାଙ୍କ୍‍ ପାର୍‍ୱଣ୍ଡ୍‌। 49 ମେଣ୍ଡେ ଦେଶ୍‌ତାଗ୍‍ ଜାତ୍‍ ଆତ୍‌ତେ ନାରୁଙ୍କୁ ନୁ ମିୟାଗାଙ୍କ୍‍ ନେଙ୍ଗ୍‌ତେ ପ୍ରବାସି ବିଦେଶିଡ଼୍ ନାରୁଡ଼୍‌ ପର ଅଣ୍ଡୟ୍‍ ନିୟମ୍‌ ଆଦ୍‌ତେ । 50 ଆସୁଟ୍‌ ଇସ୍ରାଏଲତେ ସାରେ ପିଲା ଇଦ୍‌ ଲେକାମ୍‌ ମାଡ଼୍‍ତା; ମୋଶାଙ୍କ୍‍ ନୁ ହାରୋଣତେ ପର ସଦାପ୍ରବୁନ୍‍ ଆଦେଶ୍‌ ବେଲା ମାତ୍‍ତେ, ଆ ଲେକାମ୍‌ ଅଡ଼୍ ମାଡ଼୍‍ତଡ଼୍। 51 ଇ ଲେକାମ୍‌ ସଦାପ୍ରବୁ ଆଦ୍‍ନାଣ୍ଡ୍‌ ସୈନ୍ୟମାନ୍ଦେ ଇସ୍ରାଏଲତେ ପିଲାକିଙ୍କ୍‌ ମିସର୍‍ ଦେଶ୍‌କଞ୍ଜ୍‌ ପେସ୍ପିତାତଡ଼୍‌।