1 ଅନନ୍ତ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ୍‌, 2 ମିଡ଼୍‌ ଇସ୍ରାଏଲତେ ମାର୍ରକିଡ଼୍‌କିଙ୍କ୍‌ କେଲ୍‌ମୁଟ୍‌, ମିଡ଼୍‌ ମାଲ୍‌ସ୍‌ ପୀହହୀରୋତ୍‌ତେ ମୁନେତ୍ ପାକ୍‌ ମିଗ୍‌ଦୋଲ ନୁ ସମୁଦ୍ରତାଗ୍‌ ୱେସାନାଦ୍‍ ତିୟାର୍‌ ମାଡ଼ାଟ୍‌; ମିଡ଼୍‌ ବାଲ ସଫୋନତେ ମୁନେ, ଇତ୍କେ ଅନ୍‌ ମୁନେ ସମୁଦ୍ରତେ ଗାରେ ୱେସାନାଦ୍‌ ତିୟାର୍‌ ମାଡ଼ାଟ୍‌। 3 ଆସୁଟ୍‌ ଫାରୋ ଇସ୍ରାଏଲତେ ନାରୁଡ଼୍‌ ବିଷୟ୍‌ତେ କେତିତଣ୍ଡ୍‌, ଅଡ଼୍‌ ଦେଶତାଗ୍‌ ବୁଲ୍‌କା ଆସ୍‌ମିନ୍ଦେଡ଼୍ ନୁ ସାରେ ଅଡ଼ାଦ୍‌ ଆର୍ ବନ୍ଦ ମାଡ଼ିମିନ୍ଦେ। 4 ମେଣ୍ଡେ ମାମ୍‌ ଫାରୋନ୍‌ ହୃଦୟତିଙ୍କ୍‌ ଡୁଟାଙ୍କ୍‌ ମାଡିତାଡ଼୍‌, ଆସୁଟ୍‌ ଅଣ୍ଡ୍‌ ଅଡ୍‌ ପେର୍କେ ପେର୍କେ ମିରିତଣ୍ଡ୍‌, ମେଣ୍ଡେ ମାମ୍‌ ଫାରୋନ୍‌ ନୁ ତାନ୍‌ ସାରେ ସୈନ୍ୟଡ଼୍‌ ତଡ଼୍‌ ଗୌରବ୍‌ ପାହେମ୍‌ ଆଦ୍‌ତଣ୍ଡ୍‌, ଆସୁଟ୍‌ ମାମ୍‌ ଯେ ସଦାପ୍ରବୁ ଇଦ୍‌ ମିସ୍ରୀୟ ନାରୁଡ଼୍‌ ପୁନ୍‌ତଡ଼୍‌। ଆସୁଟ୍‌ ଅଡ଼୍‌ ଆଲେନେ ମାଡ଼୍‌ତଡ଼୍‌। 5 ତାନ୍‌ପେର୍‌କେ ମିସ୍ରିୟ ନାରୁଡ଼୍‌ ମିରି ମିନ୍ଦେଡ଼୍‌, ଇଦ୍‌ କାବୁର୍‌ ମିସ୍ରିୟ ରାଜାଙ୍କ୍‌ କେପ୍ସୱାନାକେ, ନାରୁଡ଼୍ ବିଷୟତେ ଫାରୋନ୍‌ ନୁ ତାନ୍‌ ଦାସଡ଼୍‌ ଅନ୍ତର୍‌ତାଗ୍‌ ପରିବର୍ତ୍ତନ୍‌ ଆତ୍‌ତେ; ଆସୁଟ୍‌ ଅଡ଼୍ କେତ୍‌ତଡ଼୍‌, ମାନାଡ଼୍‌ ଇଦ୍‌ବାତ୍‌ ପାୟିଡ଼୍ ମାଡ଼ିତାଡ଼୍‌ ? ବାତାଙ୍କ୍‌ ଇସ୍ରାଏଲ୍‌ନଡ଼୍‌ ନିଜର ୱିଡ଼୍‌ସିତ୍‌ତମ୍‌ ? 6 ଆସୁଟ୍‌ ରାଜାଲ୍‌ ନିଜର୍‌ ରତ୍‌ ତିଆର୍‌ ମାଡ଼୍‌ତଣ୍ଡ୍‌ ନୁ ନିଜର୍‌ ନାରୁଡ଼୍‌କିଙ୍କ୍‌ ତଡ଼େକେ ଅତ୍‌ତଣ୍ଡ୍‌। 7 ମେଣ୍ଡେ ଛଅଶହ ଏଞ୍ଚତେ ରତ ନୁ ମିସ୍ରିୟଡ଼୍‌ ସାରେ ରତ ନୁ ଅଣ୍ଡ୍‌ ସାରେ ରତ୍‍କିନାଗ ଯୁଦ୍ଦ୍‌ ମାଡ଼ାନଡ଼୍‌କିଙ୍କ୍‌ ଅତ୍‌ତଡ଼୍‌। 8 ମେଣ୍ଡେ ସଦାପ୍ରବୁ ମିସ୍ରିୟ ରାଜାଲ୍‌ ଫାରୋନ୍‌ ହୃଦୟ ଡୁଟାଙ୍ଗ୍‌ ମାଡ଼ୱାନାକେ, ଅଣ୍ଡ୍‌ ଇସ୍ରାଏଲତେ ମାର୍‍କିଡ଼୍‌କିଙ୍କ୍‌ ପେର୍କେ ପେର୍କେ ତଲ୍‌ତଡ଼୍‌; ଆସୁଟ୍‌ ଇସ୍ରାଏଲ୍‌ତେ ନାର୍କୁକ୍‌ ଗାଡ଼୍‌ସ୍‌ତେ କାଇ ତେସ୍‌ ଆଞ୍ଜ ମାତ୍‍ତଡ଼୍‌। 9 ଆସୁଟ ମିସ୍ରୀୟଡ଼୍‌, ଇତ୍କେ ଫାରୋନ୍‌ ସାରେ ଗୁରାକ୍‌ ନୁ ରତ୍‌ ନୁ ଗୁରାତେ ବପୁ ନୁ ସୈନ୍ୟୟଡ଼୍‌ ଅଡ଼୍‌ ପେର୍କେ ପେର୍କେ ମିରି ବାଲ ସଫୋନ ଅଗ୍ରତେ ପୀହହୀରୋତ୍‌ ଗାରେ ସମୁଦ୍ର ଆଞ୍ଚିନାଗ୍‌ ଇସ୍ରାଏଲ୍‌ ନାରୁଡ଼୍‌ ଗୁଡ଼ୁସା ତିଆର୍‌ ମାଡ଼ାନ୍‌ ସମୟତେ ଆୱିକିନ୍‌ ଗାରେ ଆଞ୍ଜ ହେୱ୍‌ତଡ଼୍‌। 10 ମେଣ୍ଡେ ଫାରୋନ୍‌ ଗାରେ ଆସୱାନାକେ, ଇସ୍ରାଏଲତେ ମାର୍କିଙ୍କ୍ ଉଡ଼ି ନିଜର ପେର୍କେ ପେର୍କେ ଆଦାନଡ଼କିଙ୍କ୍‌ ମିସ୍ରିୟଡ଼୍‌କିଙ୍କ୍‌ ଉଡ଼ି ୱେର୍‌ତଡ଼୍‌, ମେଣ୍ଡେ ଇସ୍ରାଏଲ୍‌ତେ ମାର୍‍କ୍‍ ସଦାପ୍ରବୁଙ୍କ୍‌ କାର୍ଙ୍ଗ୍‌ତଣ୍ଡ୍‌। 11 ମେଣ୍ଡେ ମୋଶାଙ୍କ୍‌ କେତ୍‍ତଣ୍ଡ୍‌, ମିସରତାଗ୍‌ କାବୁର୍‌ ଇଲକଟ ମାତ୍‌ତେ ଇଞ୍ଜ ଉସ୍କବୁମ୍‌କଞ୍ଜ୍‌ ମିଡ଼୍‌ ମିକିଙ୍କ୍ ରେଃତାନଙ୍କ୍‌ ତାତ୍‌ତିଡ଼୍‌ ? ମା ତଡ଼୍‌ ଇଲା ବ୍ୟବହାର୍‌ ମାଡ଼ି ମିକିଙ୍କ୍ ମିସରତାଗାଙ୍କ୍‌ ବାତାଙ୍କ୍‌ ପେସ୍ପପି ତାତ୍‌ତିଡ଼୍‌ ? 12 ମାକିଙ୍କ୍‌ ମାନ୍ଦାନଙ୍କ୍‌ ଇମୁଟ୍‌, ମାମ୍‌ ମିସ୍ରିୟଡ଼ିକ୍‌ ଦାସ୍ୟପାଡ଼ିୟ୍‌ ମାଡ଼ିତମ୍‌, ବାତେଙ୍କ୍‌ଇତ୍କେ ଆଞ୍ଚିନାଗ୍‌ ଡଲାନ୍‌ ଅପେକ୍ଷା ମିସ୍ରିୟଡ଼ି ସେବା ମାଡ଼ାନାଦ୍‌ ମାୟାଦ୍‌ ଇଚ୍ଛା, ମାମ୍‌ ବାତେ ମିସରତାଗ୍‌ ମିକିଙ୍କ୍‌ ଇ ଗଟ୍‌ କେଲ୍‌ୱ ମାତ୍‌ତମ୍‌ ? 13 ଆସୁଟ୍‌ ମୋଶାଲ୍‌ ନାରୁଡ଼୍‌କିଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ୱେର୍‌ମାଟ୍‌ କଟମାନୁଟ୍‌, ସଦାପ୍ରବୁ ନେଣ୍ଡ୍‌ ବେନ୍‌ ଲେକାତ୍ ମିକିଙ୍କ୍‌ ପରିତ୍ରାଣ ମାଡ଼ିତଣ୍ଡ୍‌, ଆଦ୍‌ ଉଡ଼୍‌, ମିଡ଼୍‌ ନେଣ୍ଡ୍‌ ବେଲା ମିସ୍ରିୟଡ଼୍‌କିଙ୍କ୍‌ ଉଡ଼ୁତି, ଆଲାନେ ସାରେ ଦିନା ଏୱୁନା ବେସୁଙ୍କୁ ଉଡ଼୍‌ୱିନ୍‌। 14 ସଦାପ୍ରବୁ ମିଇ ମାଇଦିଙ୍କ୍‌ ଯୁଦ୍ଦ ମାଡ଼ିତଣ୍ଡ୍‌, ମିଡ଼୍‌ କଟମାନୁଟ୍‌। 15 ଅନନ୍ତ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ମିକିଙ୍କ୍ ବାତେଙ୍କ୍‌ କାର୍ଙ୍ଗୁତିନ୍‌ ? ଇସ୍ରାଏଲ୍‌ ନାରୁଡ଼୍‌ କେଲ୍‌ମୁଟ୍‌ ଅଡ଼୍‌ ଅଗ୍ରସର୍‌ ଆଇଡ଼ି। 16 ମେଣ୍ଡେ ମିଡ଼୍‌ ନିଜର ଡ଼ୁଡ଼୍‌ ତେମ୍‌ ନୁ ସମୁଦ୍ର ପର କାଇ ଆସ୍‌ ତାଙ୍କି ରେଣ୍ଡେ ବାଗ୍‌ ମାଡ଼େ; ଆସୁଟ୍‌ ଇସ୍ରାଏଲତେ ନାରୁଡ଼୍‌ ୱାସ୍‌ତେ ଆର୍‍ ଇସ୍‌ ସମୁଦ୍ର ଲପେଙ୍କ୍‌ ଆଦ୍‍ତଡ଼୍‌ । 17 ମେଣ୍ଡେ ମାମ୍‌, ଉଡ଼୍‌, ମାମ୍‌ ମିସ୍ରିୟଡ଼୍‌ ହୃଦୟ ଗାଡ଼୍‌ସ୍‌ ମାଡ଼ୱାନାକେ, ଅଡ଼୍‌କିଙ୍କ୍‌ ଅଡ଼୍‌ ପେର୍କେ ପେର୍କେ ଆଦ୍‍ତଡ଼୍‌, ଆସୁଟ୍‌ ମାମ୍‌ ଫାରୋନ୍‌ ନୁ ଅନ ସାରେ ସୈନ୍ୟ ନୁ ରତ ନୁ ଗୁରାକ୍‌କିନାଗ୍‌ କୁଦ୍‌ତେ ନାରୁଡ଼୍‌ ଆଗାଙ୍କ୍‌ ଗୌରବ୍‌ ଆଦ୍‌ତାଡ଼୍‌। 18 ମେଣ୍ଡେ ଫାରୋ ନୁ ଅନ୍‌ ରତ ନୁ ଅନ୍‌ ଗୁରାକ୍‌କିନାଗ୍‌ କୁଦ୍‌ତେ ନାରୁଡ଼୍‌ତଡ଼୍‌ ଗୌରବ୍‌ ପାହେମ୍‌ ଆତ୍‌ତେ ପେର୍କେ ମାନାଡ଼୍‌ ଯେ ସଦାପ୍ରବୁ, ଇଦି ମିସ୍ରିୟ ନାରୁଡ଼୍‌ ପୁନ୍‌ତଡ଼୍‌। 19 ଆସୁଟ୍‌ ଇସ୍ରାଏଲିୟଡ଼୍‌ ମାନ୍ଦେତଡ଼୍‌ ପାକେତ୍‌ ପରମେଶ୍ୱରଦେ ଦୂତ୍‌ ମାୟି ଆସ୍‌ ଅଡ଼୍‌ପାକେ ଆତ୍‌ତେ, ମେଣ୍ଡେ, ମୟଲ୍‌ତେ ଗୁଞ୍ଜେ ଇନା ଅଡ଼୍‌ ମୁନେକନ୍‌ ତନ୍ଦକଟ୍‌ ଆସ୍‌ ଅଡ଼୍‌ ପେର୍କେ ୱାସ୍‌ ନିତ୍‌ତେ। 20 ଆ ମୟଲ୍‌ତେ ଗୁଞ୍ଜେ ମିସ୍ରିୟଡ଼୍‌ ଦଲ ନୁ ଇସ୍ରାଏଲିୟତେ ମାନ୍ଦେତାଗ୍‌ ୱାତ୍‍ତେ, ମେଣ୍ଡେ ମୟଲ୍‌ ନୁ ଇକାଡ଼୍‌ ଆତ୍‌ତାଙ୍କ୍‌ ଆଦ୍‌ ନାର୍କେତିଙ୍କ୍‌ ୱେସ୍‌ମାଡ଼ିତେ; ଇଦି ମାଇଦିଙ୍କ୍‌ ସାରେ ନାର୍କା ଅଣ୍ଡୟ୍‌ ଦଲ ୱେରେ ମେଣ୍ଡେ ମାନ୍ଦେତ୍ ଗାରେ ୱାଦାଙ୍କ୍‌ପାର୍‌ୱଡ଼୍‌ ଆତ୍‌ତଡ଼୍‌। 21 ତାନ୍‌ପେର୍‌କେ ମୋଶାଲ୍‌ ସମୁଦ୍ର ପର ନିଜର କାଇ ଆସୱାନାକେ, ସଦାପ୍ରବୁ ଆ ନାର୍କା ନାର୍ଗେ ମୁନେତ୍‌ ପାକାଙ୍କ୍‌ ଗାଲ୍‌ଦଡ଼୍‌ ସମୁଦ୍ରତିଙ୍କ୍ ରେଣ୍ଡ୍‌ ପାକା ଅଟ୍‌କାମାଡ଼ି ଏର୍‌ଦିଙ୍କ୍‌ ୱାସ୍ପିପିତ୍‌ତଣ୍ଡ୍‌ ନୁ ଏର୍ର୍‌ ରେଣ୍ଡ୍‌ ବାଗ୍‌ ଆତ୍‌ତେ। 22 ଆସୁଟ୍‌ ଇସ୍ରାଏଲତେ ନାରୁଡ଼୍‌ ୱାସ୍‌ତେ ଆର୍ ଇସ୍ ସମୁଦ୍ର ନାଡ଼୍‌ମେଙ୍କ୍‌ ଆତ୍‌ତେ, ମେଣ୍ଡେ, ଅଡ଼୍‌ ତିନ୍‌ପାକ୍‌ ନୁ ଡ଼େବ୍‌ପାକ୍‌ ଏର୍ ନେଟେଲେକାମ୍‌ ଆତ୍‌ତେ। 23 ତାନ୍‌ପେର୍‌କେ ମିସ୍ରିୟନଡ଼୍‌, ଇତ୍କେ, ଫାରୋନ୍ ସାରେ ଗୁରାକ୍‌, ରତ, ଗୁରାକ୍‌ ଚାଲାମାଡ଼୍‌ନ୍‌ ନାରୁଡ଼୍‌ ସାରେ ତଡ଼୍‌ ଅଡ଼୍‌ ପେର୍କେ ପେର୍କେ ମିରି ସମୁଦ୍ର ଲପେ ନେଙ୍ଗ୍‌ତଡ଼୍‌। 24 ମାତର୍‌ ନାର୍କୁକ୍‌ ତେରାନ୍‌ ୱେଲେ ସଦାପ୍ରବୁ କିସ୍‌ ନୁ ମୟଲ୍‌ତେ ଗୁଞ୍ଜେ ଇସ୍‌ ମିସ୍ରିୟଡ଼୍‌ ସୈନ୍ୟଡ଼୍‌କ୍‌ ଉଡ଼୍‌ତା ନୁ ମିସ୍ରିୟଡ଼୍‌ ସୈନ୍ୟଡ଼୍‌କ୍‌ ଦାନ୍ଦେ ମାଡ଼ତଡ଼୍‌। 25 ଅଣ୍ଡ୍‌ ଅଡ଼୍‍କିଙ୍କ୍‌ ରତ୍‌ତେ ଚକ୍ର ପେସ୍ପୱାନାକେ, ଅଡ଼୍‌ ଅଦିକ୍‌ କଷ୍ଟତେ ରତ୍‌ ଚାଲାମାଡ଼୍‌ତଡ଼୍‌; ଆସୁଟ୍‌ ମିସ୍ରିୟନାରୁଡ଼୍‌ କେତ୍‌ତଡ଼୍‌, ୱାଡ଼ାଟ୍‌ ମାନାଡ଼୍‌ ଇସ୍ରାଏଲତେ ମୁନେ ମିରିକାଡ଼୍‌; ବାତେଙ୍କ୍‌ଇତ୍କେ ସଦାପ୍ରବୁ ଅଡ଼୍‌ପାକ୍‌ ଆସ୍‌ ମିସ୍ରିୟଡ଼୍‌ ବିରୁଦ୍ଦତେ ଯୁଦ୍ଦ୍‌ ମାଡ଼ୁତଣ୍ଡ୍‌। 26 ତାନ୍‌ପେର୍‌କେ ସଦାପ୍ରବୁ ମୋଶାଙ୍କ୍‌ କେତ୍‌ତଣ୍ଡ୍‌ ନିମେ ସମୁଦ୍ର ପର ନିଜର କାଇଆମ୍‌; ଆସୁଟ୍‌ ମିସ୍ରିୟଡ଼୍‌କିଙ୍କ୍‌ ନୁ ଅଡ଼୍‌ ରତ ନୁ ଗୁରାକ୍‌ ଚାଲାମାଡ଼ାନଡ଼୍‌ ପର ମେଣ୍ଡନ୍‌ଦାମ୍ ଏର୍‌ ୱାଦ୍‌ତେ। 27 ଆସୁଟ୍‌ ମୋଶାଲ୍‌ ସମୁଦ୍ରପର୍‌ କାଇ ଆତ୍‌ତଣ୍ଡ୍‌, ମେଣ୍ଡେ ନାର୍‌କୁକ୍‌ ସମୟତେ ସମୁଦ୍ର ମେଣ୍ଡନ୍‌ଦାମ୍ ସାମାନ୍‌ ଆଦାନଙ୍କ୍‌ ପସ୍ପ୍‌ତେ, ଆସୁଟ୍‌ ମିସ୍ରିୟଡ଼୍‌ ତେସ୍‌ ମିରୱାନାକେ, ସଦାପ୍ରବୁ ସମୁଦ୍ର ତାଗାଙ୍କ୍‌ ଅଡ଼୍‌କିଙ୍କ୍‌ ମୁଃଚିତଣ୍ଡ୍‌। 28 ମେଣ୍ଡେ ଏର୍ ମେଣ୍ଡନ୍‌ଦାମ୍‌ ୱାତ୍‌ତେ ଅଡ଼୍‌ ରତ୍‌ ନୁ ଗୁରାକ୍‌ ଚାଲାମାଡ଼ାନଙ୍କ୍‌ ମୁଃଚିତେ; ଆସୁଙ୍କ୍‌ ଫାରୋନ୍‌ ବେନ୍‌ ସାରେତଡ଼୍‌ ସୈନ୍ୟଡ଼୍‌ ଅଡ଼୍‌ ପେର୍କେ ପେର୍କେ ସମୁଦ୍ରତାଗ୍‌ ନେଙ୍ଗି ମାତ୍‌ତଡ଼୍‌, ଅଡ଼୍‌ ଆଗାଙ୍କ୍‌ ୱେରଣ୍ଡ୍‌ ମିକା ମାନଡ଼୍‌ ଆତ୍‌ତଡ଼୍‌। 29 ମାତର୍‌ ଇସ୍ରାଏଲତେ ମାର୍‌କ୍‌ ୱାସ୍ତେ ଆର୍ ଇସ୍‌ ସମୁଦ୍ର ନାଡ଼୍‌ମେଙ୍କ୍‌ ଇସ୍‌ ଆତ୍‌ତଡ଼୍‌; ମେଣ୍ଡେ ଏର୍‌ ଅଡ଼୍‌ ଡ଼େବ୍‌ପାକେ ନୁ ତିନ୍‌ପାକେ ନେଟେଲେକାମ୍‌ ଆତ୍‌ତେ। 30 ଇଦି ଲେକାମ୍‌ ଆଦ୍‌ନାଣ୍ଡ୍‌ ସଦାପ୍ରବୁ ମିସ୍ରିୟଡ଼୍‌ କାଇଦେକନ୍‌ ଇସ୍ରାଏଲ୍‌ତିଙ୍କ୍‌ ଉଦ୍ଦାର୍‌ ମାଡ଼୍‌ତଣ୍ଡ୍‌ ନୁ ଇସ୍ରାଏଲ ମିସ୍ରିୟଡ଼କିଙ୍କ୍‌ ସମୁଦ୍ର ଆଞ୍ଚିନାଗ୍‌ ଡଲ୍‌ତାଦ୍‌ ଉଡ଼୍‌ତଡ଼୍‌। 31 ସଦାପ୍ରବୁ ମିସ୍ରୟ ବିରୁଦ୍ଦତେ ଇଦି ବେନ୍‌ ବାଡ଼ିୟ୍‌ କାମ୍‌ ମାଡ଼୍‌ତଣ୍ଡ୍‌, ଆଦ୍‌ ଇସ୍ରାଏଲ୍‌ ଉଡ଼୍‌ତେ, ଆସୁଟ୍‌ ନାରୁଡ଼୍‌ ସଦାପ୍ରବୁଙ୍କ୍‌ ୱେର୍‌ସ୍‌ ସଦାପ୍ରବୁନାଗ୍‌ ନୁ ତାନ୍‌ ଦାସ ମୋଶାନାଗ୍‌ ବିଶ୍ୱାସ ମାଡ଼୍‌ତଡ଼୍‌।