କାଲ୍ଦେକଞ୍ଜ୍ ଏର୍
1 ତାନ୍ପେର୍କେ ଇସ୍ରାଏଲତେ ମାର୍କିଡ଼୍ ସାରେ ମଣ୍ଡଲି ସିନ୍ ଆଞ୍ଚିନା ଆଞ୍ଜ୍ ସଦାପ୍ରବୁନ୍ ଆଜ୍ଞାନୁସାର୍ତେ ଏଞ୍ଚତେ ସାରେ ଉତ୍ତର ପୟିଡ଼୍ ଇସ୍ ରଫୀଦିମତେ ଗୁଡ଼ୁସା ମାଡ଼୍ତଡ଼୍; ମାତର୍ ଆ ପଡ଼ିୟ୍ତେ ନାରୁଡ଼୍କିଙ୍କ୍ ଏର୍ ଉନ୍ଦାନଙ୍କ୍ ଇଲିୱମାତ୍ତେ। 2 ଆଦିନ୍ମାଇଦିଙ୍କ୍ ନାରୁଡ଼୍ ମୋଶାନ୍ ତଡ଼୍ ରାମ୍କ୍ ମାଡ଼ି କେତ୍ତଡ଼୍, ମାକିଙ୍କ୍ ଏର୍ ଇମୁଟ୍, ମାମ୍ ଉନ୍ତ୍ତମ୍। "ଆସୁଟ୍ ମୋଶାଲ୍ କେତ୍ତଣ୍ଡ୍, ମିଡ଼୍ ନାତଡ଼୍ ବାତେତିଙ୍କ୍ ସଦାପ୍ରବୁ ପରିକ୍ଷା ମାଡ଼ୁତିନ୍ ?"
3 ଆସୁଟ୍ ନାରୁଡ଼୍ ଆ ପଡ଼ିୟେତାଗ୍ ଏର୍ ଅବାବ୍ ଆତ୍ତାଙ୍କ୍ ମୋଶାଙ୍କ୍ ବିରୁଦ୍ଧ ମାଡ଼ି କେତ୍ତଡ଼୍, "ନିମେ ମିକିଙ୍କ୍ ନୁ ମା ପିଲାକିଙ୍କ୍ ନୁ ଜିୱାକିଙ୍କ୍ ଏର୍ ଉନ୍ଦାନାଗାଙ୍କ୍ ଆୱୁକ୍କାନ୍ ମାଇଦିଙ୍କ୍ ମିସର୍ ଦେଶ୍ତାଗାକନ୍ ଆଦିଙ୍କ୍ ତାତ୍ତି ?"
4 ଆସୁଟ୍ ମୋଶାଲ୍ ସଦାପ୍ରବୁନ୍ ଗାର୍ରେ ପ୍ରାର୍ତନା ମାଡ଼ି କେତ୍ତଣ୍ଡ୍, "ନାନ୍ ଇ ନାରୁଡ଼୍ ମାଇଦିଙ୍କ୍ ବାତେ ମାଡ଼ିତାନ୍ ? ଅଡ଼୍ ନାକିଙ୍କି କାଲ୍କିନ୍ତଡ଼୍ ରେଃତାନ୍ ମାଇଦିଙ୍କ୍ ଚେଷ୍ଟା ମାଡ଼ୁତଡ଼୍।"
5 ଆସୁଟ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, ନିମେ ବାତ୍ତଡ଼୍ ନୀଲ ବେଡ଼େମ୍ତିଙ୍କ୍ ରେଇସ୍ ମାତ୍ତିନ୍, ଆ ଡ଼ୁଡ଼୍ କାଇଦେଅସ୍ ବେସ୍କତୁଡ଼୍ ବେଡ଼ିୟ୍ ନାରୁଡ଼୍ତଡ଼୍ ମାଡ଼ି ଇସ୍ରାଏଲତେ ନାରୁଡ଼୍ ମୁନେ ମୁନେ ଆନ୍। 6 ଉଡ଼େ, ମାମ୍ ହୋରେବତେ ଆ କାଲ୍ଦେ ପର ନି ମୁନେ ନିତିକାଡ଼୍, ମେଣ୍ଡେ ନାରୁଡ଼୍ ଆଦ୍ ଉନ୍ତତଡ଼୍, ଆସୁଟ୍ ମୋଶାଲ୍ ଇସ୍ରାଏଲତେ ବେଡ଼ିୟ୍ ନାରୁଡ଼୍ ମୁନେ ଆଲେ ମାଡ଼୍ତଣ୍ଡ୍।
7 ମେଣ୍ଡେ ଆ ପଡ଼ିୟେତାଗ୍ ଇସ୍ରାଏଲତେ ମାର୍କିଡ଼୍କ୍ ରାମ୍କେତେ ମାଇଦିଙ୍କ୍ ନୁ ସଦାପ୍ରବୁ ମାନ୍ତଡ଼୍ ମିନ୍ଦେଣ୍ଡ୍ କି ଇଲାଣ୍ଡ୍, ଇଲାନ୍କେସ୍ ସଦାପ୍ରବୁଙ୍କ୍ ପରିକ୍ଷା ମାଡ଼ାନ୍ ମାଇଦିଙ୍କ୍ ଅଣ୍ଡ୍ ଆ ପଡ଼ିୟ୍ତେ ପେଦେର୍ ମଃସା ନୁ ମିରୀବା ନେଃତଣ୍ଡ୍।
ଅମାଲେକିୟଡ଼୍ ତଡ଼୍ ଯୁଦ୍ଦ
8 ଆ ସମୟତେ ଅମାଲେକ୍ ୱାସ୍ ରଫୀଦିମତାଗ୍ ଇସ୍ରାଏଲ୍ ତଡ଼୍ ଯୁଦ୍ଦ୍ ମାଡ଼୍ତେ। 9 ଆସୁଟ୍ ମୋଶାଲ୍ ଯିହୋଶୂୟ୍ଙ୍କ୍ କେତ୍ତଣ୍ଡ୍, ନିମେ ମା ମାଇଦିଙ୍କ୍ ନାରୁଡ଼୍ ହେଞ୍ଚି ମାଡ଼ି ଅମାଲେକ୍ ତଡ଼୍ ଯୁଦ୍ଦ୍ ମାଡ଼୍ନଙ୍କ୍ ଆନ୍, ନାଡ଼୍ ନାନେ ନିଜର କାଇଦେ ପରମେଶ୍ୱରଦେ ଡ଼ୁଡ଼୍ ପୟିସ୍ ମେଟେତ୍ ଜୁଟିନାଗ୍ ନିତ୍ତାନ୍। 10 ଆସୁଟ୍ ମୋଶାନ୍ ଆଜ୍ଞାଲେକାମ୍ ଯିହୋଶୂୟ୍ ଅମାଲେକ ତଡ଼୍ ଯୁଦ୍ଦ୍ ମାଡ଼୍ତଣ୍ଡ୍, ମେଣ୍ଡେ ମୋଶାଲ୍ ନୁ ହାରୋଣ ନୁ ହୂର୍ ମେଟେତ୍ ଜୁଟିନାଗ୍ ଆତ୍ତଡ଼୍। 11 ମେଣ୍ଡେ ମୋଶାଲ୍ ନିଜର କାଇ ପର ତେତ୍ତେ ସମୟତେ ଇସ୍ରାଏଲ୍ ଜୟି ଆତ୍ତେ ନୁ ଅଣ୍ଡ୍ ନିଜର କାଇ ଡ଼ିପ୍ତେ ସମୟତେ ଅମାଲେକ ଜୟି ଆତ୍ତେ। 12 ମାତର୍ ମୋଶାନ୍ କାଇକ୍ ଆଞ୍ଜ୍ତା, ଆଦିଙ୍କ୍ ଅଡ଼୍ ଅଣ୍ଡୟ୍ କାଲ୍ ତାସ୍ ମଦଲ୍ ୱାଟୱାନାକେ, ମୋଶାଲ୍ ତାନ୍ ପର କୁଦ୍ତଣ୍ଡ୍, ମେଣ୍ଡେ, ହାରୋଣ ନୁ ହୂର୍ ଅର୍ତତୁଣ୍ଡ୍ ଇପାକେ ମେଣ୍ଡେ ଅର୍ତତୁଣ୍ଡ୍ ଆପାକେ ଅନ୍ କାଇ ତେସ୍ ପୟିତଡ଼୍, ଆସୁଟ୍ ପଡ଼୍ଦ୍ ଆନ୍ନା ଅନ୍ କାଇକ୍ ଆଲେନ୍ ମାତ୍ତେ। 13 ଆଦିଙ୍କ୍ ଯିହୋଶୂୟ୍ ଅମାଲେକ ନୁ ଅନ୍ ନାରୁଡ଼୍କିଙ୍କ୍ ସାକୁତଡ଼୍ ରେହେସ୍ ଆରା ମାଡ଼୍ତଣ୍ଡ୍।
14 ତାନ୍ପେର୍କେ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, ଇଗଟ୍ ମନେ ନେତାନ୍ ମାଇଦିଙ୍କ୍ ବଇତାଗ୍ ଲେକି ନେଃମୁଟ୍, ମେଣ୍ଡେ ଯିହୋଶୂୟ୍ତେ କେୱୁମଦଲ୍ ଆଦ୍ କାର୍ୟିତିଡ଼୍, ମାମେ ମାବ୍ତେ ମଦଲ୍ ଅମାଲେକତେ ଏର୍କେ ନଷ୍ଟ ମାଡ଼ିତାନ୍। 15 ଆସୁଟ୍ ମୋଶାଲ୍ ଅଣ୍ଡୟ୍ ବେଦି ତିଆର୍ ମାଡ଼ି ଆଦିନ୍ ପେଦେର୍ ଯିହୋବାଃ ନିଃଷି ସଦାପ୍ରବୁ ନେଃତ୍ତଣ୍ଡ୍। 16 ମେଣ୍ଡେ ଅଣ୍ଡ୍ ସଦାପ୍ରବୁନ୍ ପତ୍କା ଜାଣ୍ଡେ କାଇହିସ୍ କେତ୍ତଣ୍ଡ୍, ଆନିଦାଦିଡ଼୍ ଅମାଲେକତେ ତଡ଼୍ ସଦାପ୍ରବୁନ୍ ଯୁଦ୍ଧ ଆଦ୍ତେ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)