1 ତାନ୍‌ପେର୍କେ ପରମେଶ୍ୱର ମୋଶାନ୍‌ ମାଇଦିଙ୍କ୍‌ ନୁ ନିଜର ନାରୁଙ୍କୁ ଇସ୍ରାଏତେ ମାଇଦିଙ୍କ୍‌ ବାତେ ବାତେ ପାଡ଼ିୟ୍‌ ମାଡ଼ିମିନ୍ଦେଣ୍ଡ୍‌, ଆଗେକ୍‌ବା ସଦାପ୍ରବୁ ଇସ୍ରାଏଲତେ ପିଲୁଡ଼୍‌ତିଙ୍କ୍‌ ମିସର୍‌ତାଗାଙ୍କ୍‌ ବେଲାନେ ପେସ୍‌ପି ତାସ୍‌ ମିନ୍ଦେଣ୍ଡ୍‌, ଇସାରେ ଗଟି ମୋଶାନ୍‌ ମାମାଲ୍‌ ମିଦୀୟନିୟ ଯାଜକ ଯିଥ୍ରୋ କେଞ୍ଜ୍‌ତଣ୍ଡ୍‌। 2 ଆସୁଟ୍‌ ମୋଶାନ୍‌ ମାମାଲ୍‌ ଆ ଯିଥ୍ରୋ ନିଜର୍‌ ଲତ୍‌ତାଗ୍‌ ମାଲ୍‌ତେନଡ଼୍‌ ମୋଶାନ୍‌ ମୁତେ ସିପ୍‍ପୋରାଙ୍କ୍‌ ନୁ ତାନ୍‌ ଇର୍‌ୱୁଡ଼୍‌ ମାର୍‌କିଡ଼୍‌ ତଡ଼େକେ ଅତ୍‌ତଣ୍ଡ୍‌। 3 ଆ ଇର୍‌ୱୁଡ଼୍‌ ମାର୍‌କିଡ଼୍‌ ଲପେ ଅର୍ତୁନ୍‌ ପେଦେର୍‌ ଗେର୍ଶୋମ୍‍ ଇଗେମାନ୍ଦାନଣ୍ଡ୍‌, ବାତେଙ୍କ୍‌ଇତ୍କେ ଅଣ୍ଡ କେତ୍‌ତଣ୍ଡ୍‌, ନାନ୍ ୱେରେଦେଶ୍‌ତେ ପ୍ରବାସି ଆତ୍‌ତାନ୍‌। 4 ମେଣ୍ଡେ ଅର୍ତୁନ୍‌ ପେଦେର୍‌ ଇଲୀୟେଜର୍ ପରମେଶ୍ୱର୍‌ ଉପକାରି, ବାତେଙ୍କ୍‌ଇତ୍କେ ଅଡ଼୍‌ କେତ୍‌ତଡ଼୍‌, ନା ବାବାନ୍‌ ପରମେଶ୍ୱର୍‌ ନା ଉପକାରି ଆସ୍‌ ଫାରୋନ୍‌ ସାକୁକନ୍‌ ନାକିଙ୍କି ଉଦ୍ଦାର୍‌ ମାଡ଼୍‌ତଣ୍ଡ୍‌। 5 ଆସୁଙ୍କ୍‌ ମୋଶାନ୍‌ ମାମାଲ୍‌ ଯିଥ୍ରୋ, ମୋଶାନ୍‌ ଆଦ୍‌ ଇର୍‌ୱୁଡ଼୍‌ ମାର୍‌କିଡ଼୍‌କ୍‌ ନୁ ଏଲାଡ଼୍‌ତିଙ୍କ୍‌ ତଡ଼େକ୍‌ ଅସ୍‌ ଆଞ୍ଚିନା ମୋଶାନ୍‌ ଗାରେ, ଇତ୍କେ, ପରମେଶ୍ୱର୍‌ଦେ ମେଟେ ବେନ୍‌ ପଡ଼୍‌ୟେ ଅଣ୍ଡ୍‌ ୱେସ୍ରାମ୍‌ ତିଆର୍‌ ମାଡ଼ମାତ୍‌ଣ୍ଡ୍‌, ଆ ପଡ଼୍‌ୟେତାଗ୍‌ ୱାତ୍‌ତଣ୍ଡ୍‌। 6 ମେଣ୍ଡେ ଅଣ୍ଡ୍‌ ମୋଶାଙ୍କ୍‌ ପୁଞ୍ଜ୍‌ପ୍‌ତଣ୍ଡ୍‌, ମିଇ ମାମାଲ୍‌ ଯିଥ୍ରୋ, ନାନ୍‌ ନୁ ନି ମୁତେ, ତାନ୍‌ ତଡ଼୍‌ ନି ଇର୍‌ୱୁଡ଼୍‌ ମାର୍‌କିଡ଼୍‌, ମାମ୍‌ ସାରେତମ୍‌ ନି ଗାରେ ୱାସ୍‌ମିନ୍ଦେମ୍‌। 7 ଆସୁଟ୍‌ ମୋଶାଲ୍‌ ନିଜର୍‌ ମାମାଲ୍‌ କାଇଲାନଙ୍କ୍‌ ବାଇଦେ ଆଞ୍ଜ୍‌ ଅକିଙ୍କ୍‌ ନମସ୍କାର୍‌ ନୁ ଚୁମା ଇତ୍‌ତଣ୍ଡ୍‌, ମେଣ୍ଡେ ତାମ୍‌ତାମ୍‌ ସାୟ୍‌ୟେତ୍‌ ଗଟ୍‌ ପାଚ୍‌ରିଞ୍ଚ୍‌ ୱାନାକେ ଅଡ଼୍‌ ଗୁଡ଼ୁସେତ୍‌ ଲପେ ନେଙ୍ଗ୍‌ତଡ଼୍‌। 8 ତାନ୍‌ପେର୍‌କେ ସଦାପ୍ରବୁ ଇସ୍ରାଏଲତେ ଲାଗି ଫାରୋନ୍‌ ପର ନୁ ମିସ୍ରିୟଡ଼୍‌ ପର ବାତ୍‌ ବାତ୍‌ ମାଡ଼ିମିନ୍ଦେଡ଼୍‌, ଆର୍‌ଦାଗ୍‌ ଅଡ଼୍‌ପର୍‌ ବେନ୍‌ ସାରେ ଦୁକାଃମ୍‌ ଗଟେମ୍‌ ଆସ୍‌ ମିନ୍ଦେ ନୁ ସଦାପ୍ରବୁ ବେନ୍‌ ପ୍ରକାର୍‌ ଅଡ଼୍‌କିଙ୍କ୍‌ ଉଦ୍ଦାର୍‌ ମାଡ଼ିମିନ୍ଦେଣ୍ଡ୍‌, ଆୱୁସାରେ ଆଙ୍ଗ୍‌ଡ଼ାମ୍‌ ମୋଶାଲ୍‌ ନିଜର ମାମାଙ୍କ୍‌ ପୁଞ୍ଜ୍‌ପ୍‌ତଣ୍ଡ୍‌। 9 ଆସୁଟ୍‌ ସଦାପ୍ରବୁ ମିସ୍ରିୟଡ଼୍‌ କାଇଦେକନ୍‌ ଇସ୍ରାଏଲ୍‌ ତିଙ୍କ୍‌ ଉଦ୍ଦାର୍‌ ମାଡ଼ି ବେନ୍‌ସାରେ ସାୟେ ମାଡ଼ି ଇସ୍‌ ମିନ୍ଦେଣ୍ଡ୍‌,ଆଦାନ୍‌ମାଇଦିଙ୍କ୍‌ ଯିଥ୍ରୋ ଅଦିକ୍‌ ୱେଡ଼୍‌କ୍‌ତଣ୍ଡ୍‌। 10 ମେଣ୍ଡେ ଯିଥ୍ରୋ କେତ୍‌ତଣ୍ଡ୍‌, ବେନ୍‌ ସଦାପ୍ରବୁ ମିସ୍ରିୟ୍‌ଡ଼୍‌ ନୁ ଫାରୋନ୍‌ କାଇଦାଗାଙ୍କ୍‌ ମିକିଙ୍କ୍‌ ଉଦ୍ଦାର୍‌ ମାଡ଼ିମିନ୍ଦେଣ୍ଡ୍‌, ମେଣ୍ଡେ ମିସ୍ରିୟଡ଼୍‌ ପାକେଙ୍କ୍‌ ନାରୁଡ଼୍‌କିଙ୍କ୍‌ ଉଦ୍ଦାର୍‌ ମାଡ଼ିମିନ୍ଦେଣ୍ଡ୍‌, ଅଣ୍ଡ୍‌ ଦନ୍ୟ। 11 ସଦାପ୍ରବୁ ସାରେ ଦେୟାକିନାଗାଙ୍କ୍‌ ବାଡ଼ିୟଣ୍ଡ୍‌, ଇଦି ଇଞ୍ଜେ ପୁତ୍‌ତାନ୍‌। ହଁ, ଅଡ଼୍‌ ବେନ୍‌ ବିଷୟ୍‌ତେ ଅଡ଼୍‌ ବିରଦ୍ଧତେ ଗର୍ବ ମାଡ଼ମାତ୍‌ତଡ଼୍‌, ଆ ବିଷୟତେ ଅଣ୍ଡ୍‌ ବାଡ଼ିୟଣ୍ଡ୍‌। 12 ତାନ୍‌ପେର୍‌କେ ମୋଶାନ୍‌ ମାମାଲ୍‌ ଯିଥ୍ରୋ ପରମେଶ୍ୱର୍‌ଦେ ପେଦେର୍‌ତେ ଦୁପାମ୍‌ ବେଦି ନୁ ନୈବେଦ୍ୟ ବଲିଦାନ୍‌ ମାଡ଼୍‌ତଣ୍ଡ୍‌, ମେଣ୍ଡେ ହାରୋଣ ନୁ ଇସ୍ରାଏଲତେ ସାରେ ବେଡ଼ିୟ୍‌ ନାରୁଡ଼୍‌ ୱାସ୍‌ ପରମେଶ୍ୱରଦେ ମୁନେ ମୋଶାନ୍‌ ମାମାଲ୍‌ ତଡ଼୍‌ ଦଡ଼୍‌ତିତ୍‌ତଣ୍ଡ୍‌।

13 ତାନ୍‌ ମେଣ୍ଡନ୍‌ ଦିନେ ମୋଶାଲ୍‌ ନାରୁଡ଼୍‌କିଙ୍କ୍‌ ବିଚାର୍‌ ମାଡ଼ାନଙ୍କ୍‌ କୁଦ୍‌ତଣ୍ଡ୍, ନାରୁଡ଼୍‌ ନାର୍କୁକଞ୍ଜ୍‌ ମୁଲ୍‌ପ୍‌ ଆଇନା ଅନ୍‌ ମୁନେ ନିସ୍‌ ମାତ୍‌ତଡ଼୍‌। 14 ବେସୁଙ୍କ୍‌ ମୋଶାଲ୍‌ ନାରୁଡ଼୍‌ ବିଷୟତେ ବାତେ ବାତେ ମାଡ଼୍‌ତଣ୍ଡ୍‌, ତାମ୍‌ ମାମାଲ୍‌ ଆଦ୍‌ ଉଡ଼୍‌ କେତ୍‌ତଣ୍ଡ୍‌, "ନିମ୍‌ ନାରୁଡ଼୍‌ ପରୁ ବେଲା ବେବାର୍‌ ମାଡ଼ୁତି ? ନିମେ ବାତେ ୱେରନି କୁଦିମାନ୍ଦ୍‌ତିନ୍‌ ? ନୁ ସାରେ ନାରୁଡ଼୍‌ ନାର୍କୁକନ୍‌ ମୁଲ୍‌ଆୟିନା ମିଇ ତିଡ଼୍‌ପାକା ବାତେଙ୍କ୍‌ ନିସ୍‌ ମାନ୍ତଡ଼୍?

15 ଆସୁଟ୍‌ ମୋଶାଲ୍‌ ନିଜର୍‌ ମାମାଙ୍କ୍‌ କେତ୍‌ତଣ୍ଡ୍‌, ନାରୁଡ଼୍‌ ପରମେଶ୍ୱରଦେ ବିଚାର୍‌ ଇଚ୍ଛା ବୁଜେମ୍ ଆଦ୍‌ଦାଙ୍କ୍‌ ନାଗାରେ ୱାଦ୍‌ତଡ଼୍‌ 16 ନୁ ଅଡ଼୍‌ ବାତ୍‌ବା ରାମ୍କ୍‌ ଆତ୍କେ, ନାଗାରେ ୱାଦ୍‌ତଡ଼୍‌; ଆସୁଟ୍‌ ନାନ୍‌ ଦୋଷି ନୁ ରାମ୍‌କିନ୍‌ ଗାରେ ବିଚାର୍‌ ମାଡ଼ିତାନ୍‌, ମେଣ୍ଡେ ପରମେଶ୍ୱର୍‌ଦେ ନିୟମ୍‌ତେ ଅଡ଼୍‌କିଙ୍କ୍‌ ପୁଞ୍ଜ୍‌ପିତ୍‌।

17 ତାନ୍‌ପେର୍କେ ମୋଶାନ୍‌ ମାମାଲ୍‌ କେତ୍‌ତଣ୍ଡ୍‌, ମିୟାଦ୍‌ ଇଦି ପାଡ଼ିୟ୍‌ ସାୟେ ଇଲେ। 18 ନିମ୍‌ ନୁ ନି ମୁତେ ଇ ନାରୁଡ଼୍‌ ଇର୍‌ୱୁଡ଼ୁ ରାଜି ଆଦ୍‍ତଡ଼୍‌; ବାତେଙ୍କଇତ୍କେ ଇ ପାଡ଼୍‌ୟି ମି ମାଇଦିଙ୍କ୍‌ ଅଦି ସାୟେ; ନିମେ ୱେରଣ୍ଡ୍‌ ଇଦି ମାଡ଼୍‌ ପାର୍‌ୱି। 19 ଆଦିନ୍‌ ମାଇଦିଙ୍କ୍‌ ନା ଗଟ୍‌ତେ ମନ୍‌ଇମୁଟ୍‌, ନାନ୍‌ ମିକିଙ୍କ୍‌ ପରାମର୍ଶ ଇଦ୍‌ତାନ୍‌, ମେଣ୍ଡେ ପରମେଶ୍ୱର୍‌ ମିଇ ତଡ଼େକ୍‌ ଆୟିଣ୍ଡ୍‌ ପରମେଶ୍ୱର୍‌ଦେ ମୁନେ ମିଡ଼୍‌ ନାରୁଡ଼୍‌କିଡ଼୍‌ ପାକ୍‌ ଆସ୍‌ ଅଡ଼୍‌ ଗଟି ପରମେଶ୍ୱରଦେ ଗାରେ ଜଣାମାଡ଼୍‌ଟ୍‌। 20 ମେଣ୍ଡେ ମିଡ଼୍‌ ଅଡ଼୍‌କିଙ୍କ୍‌ ନିତି ନୁ ନିୟମ୍‌ତେ ଆଦେଶ୍‌ ଇମୁଟ୍‌ ନୁ ଅଡ଼୍‌ ଆଦାନ୍‌ ଆର୍‌ଦେ ନୁ କର୍ତ୍ତବ୍ୟ ପାଡ଼୍‌ୟି ତମୁଟ୍‌। 21 ମେଣ୍ଡେ ନିମେ ଇ ନାରୁଡ଼୍‌ଆଗାଙ୍କ୍‌ ପାଡ଼ିୟ୍‌ ମାଡ଼୍‌ତେ, ଇତ୍କେ, ପରମେଶ୍ୱରଦେ ପର ୱେର୍‍ଦାନଡ଼୍‌, ସତ୍ୟବାଦିଡ଼୍‌ ନୁ ଅନ୍ୟାୟ୍‌ ଲାବ୍‌ ଲେକାନ୍ ନାରୁଡ଼୍‌କିଙ୍କ୍‌ ଏଞ୍ଚେ, ମେଣ୍ଡେ ଅଡ଼୍‌କିଙ୍କ୍‌ ନାରୁଡ଼୍‌କିଙ୍କ୍‌ ପର ହଜାର୍ ନାରୁଡ଼୍‌ ନେତାଲ୍‌, ଶତପତି ନେତାଲ୍‌, ପଚାଶତ୍‌ପତି ନେତାଲ୍‌ ନୁ ନିଜାମ୍‌ତେ ନେତାଲ୍‌ ଇନା ହେଞ୍ଚାଟ୍‌। 22 ଅଡ଼୍‌ ସାରେୱେଲେ ନାରୁଡ଼୍‌ ବିଚାର୍‌ ମାଡ଼ଣ୍ଡ୍‌, ମେଣ୍ଡେ ବାତେବା ବାଡ଼ିୟି ଗଟ୍‌ଆତେକେ ନି ଗାରେ ତାତିତଡ଼୍‌, ମାତର୍‌ ସୁଜୁର୍‌ ଗଟ୍‌ ସାରେ ଅଡ଼୍‌ ନିଜେ ବିଚାର୍‌ ମାଡ଼ିତଡ଼୍‌, ଆଲାକେ ନି ନିଜର୍‌ ପାଡ଼ିୟି ପାଇଙ୍ଗ୍‌ ଆଦ୍‌ତେ, ମେଣ୍ଡେ ଅଡ଼୍‌ ନି ତଡ଼୍‌ ବଜ୍‌ କାଞ୍ଜିତଡ଼୍‌। 23 ନିମେ ବେସୁଙ୍କ୍‌ ଇଲାମାଡ଼ିତି, ମେଣ୍ଡେ ପରମେଶ୍ୱର୍‌ ଇଲାମାଡ଼୍‌ନଙ୍କ୍‌ ଆଦେଶ୍‌ ଇଦ୍‌ତଣ୍ଡ୍‌, ଆସୁଟ୍‌ ନିମେ ମାନ୍ଦେ ପାର୍‌ତିନ୍‌ ? ମେଣ୍ଡେ ଇ ସାରେ ନାରୁଡ଼୍‌ ସାୟ୍‌ ନିଜର୍‌ ପଡ଼ିୟେତାଗ୍‌ ଆଦ୍‌ ତଡ଼୍‌।"

24 ତାନ୍‌ପେର୍କେ ମୋଶାଲ୍‌ ନିଜର ମାମାନ୍‌ ଗଟି କେଞ୍ଜି ଅନ୍‌ ବାକ୍ୟ ଲେକାମ୍‌ ସାରେ ପାଡ଼୍‌ୟି ମାଡ଼୍‌ତଣ୍ଡ୍‌। 25 ମେଣ୍ଡେ ମୋଶାଲ୍‌ ସାରେ ଇସ୍ରାଏଲତାଗାଙ୍କ୍‌ ପାଡ଼୍‌ୟି ମାଡ଼ାନ୍‌ ନାରୁଡ଼୍‌କିଙ୍କ୍‌ ଏଞ୍ଚି ନାରୁଡ଼୍‌ ପର ପ୍ରତୁମ୍, ଇତ୍କେ, ହଜାର୍ ନାରୁଡ଼୍‌, ଶତପତି, ପଚାଶତ୍‌ପତି ନୁ ଶତପତି ଇନା ହେଞ୍ଚ୍‌ତଣ୍ଡ୍‌। 26 ଆସୁଟ୍‌ ଅଡ଼୍‌ ସାରେ ସମୟ୍‌ତେ ନାରୁଡ଼୍‌ ବିଚାର୍‌ ମାଡ଼୍‌ତଣ୍ଡ୍‌; ପାର୍‌ୱା ବିଚାର୍‌ ମାଡ଼ାନଙ୍କ୍‌ ମୋଶାନ୍‌ ଗାରେ ତାତ୍‌ତଡ଼୍‌; ମାତର୍‌ ସୁଜ୍‌ ସୁଜ୍‌ ଗଟି ସାରେ ନିଜେ ନିଜେ ବିଚାର୍‌ ମାଡ଼୍‌ତଡ଼୍‌।

27 ତାନ୍‌ପେର୍‌କେ ମୋଶାଲ୍‌ ନିଜର୍‌ ମାମାଙ୍କ୍‌ ରସୱାନାକେ, ଅଣ୍ଡ୍‌ ନିଜର୍‌ ଦେଶ୍‌ତାକ୍‌ ଆତ୍‌ତଣ୍ଡ୍‌।