1 ଆସୁଟ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, "ଉଡ଼େ, ମାମ୍ ନିକିଙ୍କି ଫାରୋନ୍ ଗାରେ ପରମେଶ୍ୱରଦେ ଲେକ୍ମାଡି ହେଞ୍ଚିତମ୍ ନୁ ମିଇ ଦାଦାଲ୍ ହାରୋଣ ମିଇ ବବଷ୍ୟଦ୍ବକ୍ତାଲ୍ ଆଦ୍ତଣ୍ଡ୍ । 2 ମାମ୍ ନିକିଙ୍କି ବାତେ ବାତେ ଆଦେଶ୍ ମାଡ଼ିତମ୍, ଆଦ୍ ସାରେ ମିଡ଼୍ କେତ୍ତିଡ଼୍; ମେଣ୍ଡେ, ଫାରୋ ଇସ୍ରାଏଲ୍ ମାର୍କିଡ଼୍ ନିଜର ଦେଶ୍କନ୍ ୱିଡ଼୍ସିଦାନ୍ ମାଇଦିଙ୍କ୍ ମିଇ ଦାଦାଲ୍ ହାରୋଣତିଙ୍କ୍ ଅକିଙ୍କ୍ କେତ୍ତିନ୍। 3 ମେଣ୍ଡେ, ମାମ୍ମେ ଫାରୋନ୍ ହୃଦୟ ଡୁଟାଙ୍କ୍ ମାଡିକାଡ଼୍, ମେଣ୍ଡେ, ମିସର୍ ଦେଶ୍କନ୍ ବାଡ଼ିୟାଦ୍ ଚିହ୍ନେ ନୁ ବାକ୍ୱା ପାଡ଼ିୟ୍ ପିନା ମାଡିକାଡ଼୍। 4 ଆଗେ ବା ଫାରୋ ମିଇ ଗଟି କେଞ୍ଜଣ୍ଡ୍ ଆଦ୍ତଣ୍ଡ୍ ଆଦିନ୍ମାଇଦିଙ୍କ୍ ମାମ୍ମେ ମିସର୍ ଦେଶତେ ପର ନିଜର କାଇ ୱାଟିତମ୍ ବାଡ଼ିୟେ ଦଣ୍ଡ୍ ତଡ଼୍ ମିସରତାଗାଙ୍କ୍ ନିଜର ସୈନ୍ୟଡ଼୍କିଙ୍କ୍ ଆ ନାରୁଡ଼୍ ଇସ୍ରାଏଲ୍ ମାର୍କିଡ଼୍କିଙ୍କ୍ ପେସ୍ପିତାତିକାଡ଼୍। 5 ମେଣ୍ଡେ, ମାନାଡ଼୍ ମିସର୍ ବିରୁଦ୍ଧତେ ନିଜର କାଇ ଆସ ଅଡ଼ାଗାଙ୍କ୍ ଇସ୍ରାଏଲତେ ମାର୍କିଡ଼୍କ୍ ପେସ୍ପିତାତ୍ତେ ୱେଲେ ମାମେ ଯେ ସଦାପ୍ରବୁ ଆଦ୍ ଅଡ଼୍ ପୁନ୍ତଡ଼୍।" 6 ଇଦିନାଗାକନ୍ ମୋଶାଲ୍ ନୁ ହାରୋଣ ଆଲେନେ ମାଡ଼ିତଡ଼୍ ସଦାପ୍ରବୁଙ୍କ୍ ଆଦେଶ୍ ନୁ ସାର୍ ଅଡ଼୍ ପାଡ଼ିୟି ମାଡ଼୍ତଡ଼୍। 7 ଫାରୋନ୍ ତଡ଼୍ କେତାକେତି ଆଦାନ୍ ୱେଲେ ମୋଶାଙ୍କ୍ ଅଶୀ ନୁ ହାରୋଣତିଙ୍କ୍ ତେୟାଅଶୀ ୱାଡ଼୍ଷା ବୟସ ଆସମାତ୍ତେ।
ହାରୋଣତେ ଡ଼ୁଡ଼୍
8 ମେଣ୍ଡେ ସଦାପ୍ରବୁ ମୋଶାଙ୍କ୍ ନୁ ହାରୋଣତିଙ୍କ୍ କେତ୍ତଣ୍ଡ୍, 9 "ମିଡ଼୍ ନିଜର ମାଇଦିଙ୍କ୍ ବେନ୍ ଆୟି ବାକ୍ୱା ପାଡ଼ିୟ୍ ଚିହ୍ନେ ତମୁଟ୍ ଇଞ୍ଜ୍ ଫାରୋ ମିକିଙ୍କ୍ କେତ୍ତିତଣ୍ଡ୍, ଆସୁଟ୍ ମିଡ଼୍ ହାରୋଣତିଙ୍କ୍ କେତ୍ତିଡ଼୍, ମିଡ଼୍ ଡ଼ୁଡ଼୍ ଅସ୍ ଫାରୋନ୍ ଗାରେ ୱାଟାଟ୍ ଆସୁଟ୍ ଆ ଡ଼ୁଡ଼୍ ତାଡ଼ାମ୍ ଆଦ୍ତେ।" 10 ଆସୁଟ୍ ମୋଶାଲ୍ ନୁ ହାରୋଣ ଫାରୋନ୍ ଗାରେ ଆଞ୍ଜ ସଦାପ୍ରବୁନ୍ ଆଦେଶ୍ ଲେକାମ୍ ପାୟିଡ଼୍ ମାଡ଼୍ତଣ୍ଡ୍ ମେଣ୍ଡେ ହାରୋଣ ଫାରୋ ନୁ ତାନ୍ ଦାସଡ଼୍ ମୁନେ ନିଜର ଡ଼ୁଡ଼୍ ମଦଲ୍ ୱାଟୱାନାକେ ତାଡ଼ାମ୍ ଆତ୍ତେ । 11 ଆସୁଟ୍ ଫାରୋ ନିଜର ପଣ୍ଡ୍ତିତ୍ନକିଙ୍କ୍ ନୁ ୱାଡେଡ଼୍କିଙ୍କ୍ କାର୍ଙ୍ଗିକେତ୍ତଣ୍ଡ୍; ଆସୁଟ୍ ମିସ୍ରିୟ ମନ୍ତ୍ରୀନଡ଼୍ ବା ନିଜର ମାୟାତେ ଅଡ଼୍ ଲେକାମ୍ ମାଡ଼୍ତଡ଼୍। 12 ଇତ୍କେ, ଅଡ଼୍ ସାରେ ନିଜର ନିଜର ଡ଼ୁଡ଼୍ ୱାଟୱାନାକେ, ଆୱୁସାରେ ଡ଼ୁଡ଼୍ ତାଡ଼ାକ୍ ଆତ୍ତା; ମାତର୍ ହାରୋଣତେ ଡ଼ୁଡ଼୍ ଅଡ଼୍ ସାରେ ଡୁଡ଼ିଙ୍କ୍ ଗ୍ରସ ମାଡ଼୍ତେ। 13 ଆସୁଟ୍ ସଦାପ୍ରବୁ ବାକ୍ୟ ଅନୁସାର୍ଦେ ଫାରୋନ୍ ହୃଦୟ ଡ଼ୁଟାଙ୍କ୍ ଆତ୍ତେ ନୁ ଅଣ୍ଡ୍ ଅଡ଼୍ ଗଟ୍ କେଞ୍ଜଣ୍ଡ୍ ଆତ୍ତଣ୍ଡ୍ ।
ପ୍ରତମ୍ ଦଣ୍ଡ୍ ଏର୍ଦିଙ୍କ୍ ନେତୁର୍ ମାଡ଼ାନାଦ୍
14 ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, ଫାରୋନ୍ ହୃଦୟ ପେୟିସ୍ ଡ଼ୁଟାଙ୍କ୍ ଆସ୍ମିନ୍ଦେ, ଅଣ୍ଡ୍ ନାରୁଡ଼୍କିଙ୍କ୍ ଆଦାନଙ୍କ୍ ଇୱକଟ୍ ମନା ମାଡ଼ମାତ୍ତଣ୍ଡ୍। 15 ଆଦିନ୍ମାଇଦିଙ୍କ୍ ମିଡ଼୍ ନାର୍କୁକେ ଫାରୋନ୍ ଗାରେ ଆଞ୍ଜ୍; ଉଡ଼ାଟ୍ ଅଣ୍ଡ୍ ଏର୍ଦାଗ୍ ଆତ୍କେ, ମିଡ଼୍ ଅନ୍ ତଡ଼୍ କାଇଲାନ୍ ମାଇଦିଙ୍କ୍ ନୀଲ ସାଉଡ଼େତ୍ ଆଞ୍ଚ୍ଗାରେ ନିଲ୍ମୁଟ୍; ବେନ୍ ଡ଼ୁଡ଼୍ ତାଡ଼ାମ୍ ଆସ ମାତ୍ତେ, ଆଦ୍ ମିକା କାଇଦାଗ୍ ଅୟ୍ମୁଟ୍। 16 ମେଣ୍ଡେ ଫାରୋଙ୍କ୍ କେଲ୍ମୁଟ୍ ଏବ୍ରିୟନଡ଼୍ ସଦାପ୍ରବୁ ପରମେଶ୍ୱର ନାକିଙ୍କ୍ ମି ପାକେ ରସ୍ କେତ୍ତଣ୍ଡ୍, "ମିଡ଼୍ ମିଇ ନାରୁଡ଼୍କିଙ୍କ୍ ପ୍ରାନ୍ତର୍ତାଗ୍ ସେବା ମାଡ଼ାଙ୍କ୍ ୱିଡ଼୍ସିମ୍; ମାତର୍ ଉଡ଼େ, ନିମେ ଇଞ୍ଜେକ୍ ଆଇନା ଇଗଟ୍ତିଙ୍କ୍ ମନ୍ ଇୱିନ୍। 17 ସଦାପ୍ରବୁ ଇଦ୍ଲେକ୍ କେତୁତଣ୍ଡ୍ ମାମେ ଯେ ସଦାପ୍ରବୁ ଆଦ୍ ମିଡ଼୍ ଇଦିନ୍ତଡ଼୍ ପୁନ୍ତିଡ଼୍; ଉଡ଼େ, ମାମ୍ମେ ମା କାଇଦେ ପୟିତ୍ତେ ଇ ଡ଼ୁଡ଼୍ତଡ଼୍ ନୀଲ ସାଉଡ଼େତ୍ ଏର୍ଦେ ପର ରେଃତିତାନ୍, ଆସୁଙ୍କ୍ ଆଦ୍ ନେତୁର୍ ଆଦ୍ତେ ।" 18 ମେଣ୍ଡେ, ବେଡ଼େମ୍ତାଗ୍ ମାନ୍ଦାନ୍ କିକେସାରେ ଡଲିତା ନୁ ନୀଲ ବେଡ଼େମ୍ ଗାବ୍ ଆଦ୍ତେ; ଆସୁଟ୍ ମିସ୍ରିୟ ନାରୁଡ଼୍ ବେଡ଼େମ୍ତେ ଏର୍ ଉନ୍ଦାନଙ୍କ୍ ପାର୍ୱଡ଼୍ ଆତ୍ତଡ଼୍। 19 ତାନ୍ପେର୍କେ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, "ହାରୋଣତିଙ୍କ୍ ଇଗଟ୍ କେଲେମ୍, ନିମେ ନିଜର ଡ଼ୁଡ଼୍ ପୟିସ୍ ମିସର୍ ଦେଶ୍ତା ଏର୍ଦେ ପର, ଇତ୍କେ, ଆଗେତ୍ ବେଡ଼େମ୍, ଦନ୍ଦ୍, ଏର୍ୱିନ୍, ଇଡ଼୍ପାମ୍ଏର୍ ଇୱୁସାରେତେ ପରୁ ନିଜେତ୍ କାଇ ୱାଟେ, ଆସୁଟ୍ ସାରେ ଏର୍ ନେତୁର୍ ଆତ୍ତେ; ମେଣ୍ଡେ, ମିସର୍ ଦେଶ୍ତେ ମେଟା ୱେର୍କ୍ ମାଡ଼େ ଜିନିଷ୍ ନୁ ନେଟାନାଗ୍ ଇଦ୍ ସାରେ ନେତୁର୍ ଆଦ୍ତେ।" 20 ଆସୁଟ୍ ମୋଶାଲ୍ ନୁ ହାରୋଣ ସଦାପ୍ରବୁଙ୍କ୍ ଆଦେଶ୍ ଲେକାମ୍ ଆଲେନେ ମାଡ଼ିତଡ଼୍ ଆଦେ ଡ଼ୁଡ଼୍ ପହିସ୍ ଫାରୋ ନୁ ତାନ୍ ଦାସଡ଼୍ ମୁନେ ନୀଲ ବେଡ଼େମ୍ତେ ଏର୍ଦେ ପର ରେଃତଣ୍ଡ୍ ଆସୁଟେ ସାରେ ଇଲ୍କେତ୍ ଏର୍ ନେତୁରୁ ଆତ୍ତେ । 21 ମେଣ୍ଡେ ନୀଲ ବେଡ଼େମ୍ତେ ସାରେ କିକେ ଡଲ୍ତା ନୁ ଇଲକେ ଏର୍ ନେତୁରୁ ନୁ ଗାବ୍ ପେୟିତ୍ତେ ଆସୁଟ୍ ମିସ୍ରିୟନଡ଼୍ ଇଲ୍କେତ୍ ଏର୍ ଉନ୍ଦାନଙ୍କ୍ ପାର୍ୱଡ଼୍ ଆତ୍ତଡ଼୍। ମିସର୍ ଦେଶ ସାରେ ନେତୁର୍ ଆତ୍ତେ । 22 ଆସୱେଲେନେ ମିସ୍ରିୟଡ଼୍ ମନ୍ତ୍ରୀନଡ଼୍ ନିଜର ମାୟାତେ ଆଲାମାଡ଼ଡ଼୍ ଆସୁଟ୍ ସଦାପ୍ରବୁନ୍ ବାକ୍ୟ ଅନୁସାର୍ତେ ଫାରୋନ୍ ହୃଦୟ ଡ଼ୁଟାଙ୍କ୍ ଆତ୍ତେ ନୁ ଅଣ୍ଡ୍ ଅଡ଼୍ ଗଟ୍ତେ କେଞ୍ଜଣ୍ଡ୍ ଆତ୍ତଡ଼୍। 23 ଫାରୋ ମକମ୍ ମାଲ୍ପି ନିଜର ଲତ୍ତାଗ୍ ଆତ୍ତଣ୍ଡ୍ ଆଗେ ନିଜର ମନ୍ ଇୱଣ୍ଡ୍ ଆତ୍ତଣ୍ଡ୍ । 24 ମେଣ୍ଡେ, ସାରେ ମିସ୍ରିୟ ନାରୁଡ଼୍ ନୀଲ ବେଡ଼େମ୍ତେ ଏର୍ ଉନ୍ଦାଙ୍କ୍ ପାର୍ୱକଟ୍ ଉନ୍ଦାନ୍ ଏର୍ଦେ ମାଇଦିଙ୍କ୍ ଇଲ୍କେ ଏକାମ୍ ଡ଼େୱୁତଡ଼୍। 25 ସଦାପ୍ରବୁ ନୀଲ ୱେଡ଼େମ୍ତିଙ୍କ୍ ରେଃତେ ସାତ୍ ଦିନ୍ ପେର୍କେ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)