16 Na niye nowapulila kwa Tati yangu yaweng’he Mtazi imwenga yakale na mweye mazua gose galibule uhelelo. 17 Iyo ni Muhe wa kweli, wanhu wa isi hawadaha kumbokela kwa vija wanhu hawadaha kumuona hebu kummanya. Mbali mweye mommanya kwa vija kokala na mweye na kamgati yenu.

18 "Niye siwaleka wachiwa, ivo nobwela kaidi kukala na mweye. 19 Ching’hali mazua madodo, wanhu wa muuisi hawaniona niye kaidi, mbali mweye moniona, kwa vija niye namgima na mweye mokua na ugima. 20 Zua ijo dihavika, movimanya kua niye na mgati ya Tata na mweye mokua mgati yangu. 21 Waja wozibokela ndagizi zangu na kuzigoga, wao weli na wende na niye. Nayeli na wende na niye kokwing’higwa wende na Tata yangu, na niye nomwing’ha wende na kuilagusa kumwake. 22 Yuda mbali si ija Isikaliote kamlongela, "Mndewa yodahikaze gweye konda kuilagusa kumwetu na sio kwa wanhu wa isi?" 23 Yesu kalonga, "Waja waning’ha wende nie, wosang’hana gaja ganiwalongela, nayo Tata yangu komwing’ha wende, nie na Tataangu chokwiza kumwao na kukala nao. 24 Munhu yelibule wende na niye hasang’hana kama vinilonda, na usenga umuhulike si wangu, mbali ulawa kumwake Tata ija yanhumile. 25 Niwafunda mbuli zino ng’hali na mweye. 26 Mbali Mtazi ni Muhe wa Mulungu, iyo Tata kamtuma kwa zina jangu, kowafunda chila chinhu na kuwakumbusa gose ganiwalongeleni.