João 2

Zengele uko Kana

1 Mdizua da kadatu hakala na zengele uko kae ya Kana, isi ya Galilaya. Mami yake Yesu kakala uko, 2 nayo Yesu kakala yagonekigwe mdizengele hamwe na waluko wake. 3 Divai viimalile, mami yake Yesu kawalongela, "Divai imala." 4 Yesu kamwidika mami yake, "Mami nokupula sekeunongele cha kutenda saa ya kulagusa ukulu wangu ing’hali." 5 Mami yake Yesu kawalongela watumigwa, "Sang’haneni jojose dondayawalongele." 6 Baho hakala na nongo sita za mabwe, zikala zikigwa uko kama viikalile mazoela ga Wayahudi ga kuisunha, chila nongo imwe yodaha kwingila umo mazi ga madebe maidi hebu madatu. 7 Yesu kawalongela, "Zimemezeni mazi nongo izo." Nawo wazimemeza mazi mbaka ndu, 8 labaho kawalongela, "Baho deheni mumgalile mwenezengele." Bahaja wasola, wamgalila. 9 Nayo mwenezengele viyalanzile mazi gaja, katambula kua gageluka divai. Nayo haimanyile divai ija kuilawile, mbali waja watumigwa wake wagalile mazi gaja wavimanya, baho kamkema hamgwazo ija mfunga zengele, 10 kamlongela, "Wanhu wose tanhu wosonga kulava divai inogile, amala wogala ija divai izabuke. Mbali gweye kwika divai ija inogile ng’hani mbaka vino sambi!"

11 Uwo ukala ulaguso wa mosi uyatendile Yesu uko kae ya Kana isi ya Galilaya, baho Yesu kaulagusa ukulu wake na Waluko wake wamtogola.