Mateus 21

Yesu kokwingila Yelusalem kwa galigali

1 Yesu na waluko wake viwavikile habehi na Yelusalemu na wavika mchijiji cha Betifage mchigongo cha Mizeituni, kawalagiza waluko wake waidi, 2 kawalongela, "Gendeni mbaka chijiji chili kuulongozi lenu na momvika mhunda kafungigwa hamwe na mwanage. Wafunguleni na mngalile. 3 Kama munhu yahawauza habali motenda ivo mulongeleni, ‘Mndewa kowalonda, nayo bahaja kowalekeseleni." 4 Mbuli ino itendeka ili gaja galongigwe na mlagusi wa Mulungu gavikile,

5 "Walongeleni wanhu wa kae ya Yelusalemu, iyo Siyoni,

Lola mfaume wako kokwiza!

Muhole na kapapigwa na mhunda,

Mwana mhunda, mwanage mhunda."

6 Ivo, waja waluko waita na wasang’hana ivija kama Yesu viyawalagize. 7 Wamgala ija mhunda na mwanage, wayazanza vivalo vao mumgongo mwa waja mhunda na Yesu kakwela nchanha mwa mwana mhunda. 8 Bumbila kulu da wanhu wayazanza vivalo vao mnzila, na wanhu wamwenga wakanha vikwamvi va mibiki wayazanza mnzila. 9 Mabumbila ga wanhu walongole na wa hachisogo yake wenula dizi walonga,

"Yatogoligwe Mwana wa Daudi!

Yeng’higwe ganogile na Mulungu yokwiza kwa Zina da Mndewa!

Nhogolwa uchanha kwa Mulungu!"

10 Yesu viyakalile yokwingila Yelusalemu, kae yose imema yugwayugwa wakala wouza, "Ino nani?" 11 Wanhu wa mdibumbila dija walonga, "Ino mlagusi wa Mulungu Yesu kulawa muikae ya Nazaleti isi ya Galilaya."