Êxodo 14

V’aizilaeli v’ali’ki’lania nyanza ya Shamu

1 Hangi' Gu’ku' Mulungu wamuwi’laga Mose ati', 2 "V’awi’le V’aizilaeli v’asu’v’e ku' nnuma, v’atu’u’le nkambi' ha mbele ya kaya ya Pi-hahiloti, hagati' na kaya ya Migidoli na nyanza ya Shamu. V’atu’u’le nkambi' ha ngiligili ya nyanza matanda na kaya ya Baal-sefoni. 3 Haho Falao akwiganika ati', ‘V’aizilaeli v’enav’o v’ali’tuka mugati' na nsi', ku’nguno ya ibalangu' lyav’apotaga ku’v’i’ta.’ 4 Nanne nku’gu’v’ezya moyo gwamwa Falao ku’v’a mulambu, nawe aku’mulondezya. Nanne nku’pandi’ka lu’kumo ku’v’i’ti’la ku’mwa Falao na v’asilikale v’akwe v’ose. Haho V’amisili v’alamanye ku’v’a ene hu' ni' Gu’ku' Mulungu." Nav’o V’aizilaeli v’av’ezyaga vyeni’vyo.

5 Nawe Falao, mutemi wa Misili, aho wigagwa ku’v’a V’aizilaeli v’apeelaga, mweni’ki’li' na v’akumba v’akwe v’agalu’zyaga ndaka yav’o ku' V’aizilaeli na ku’yomba, "Kwav’ezya ki' mu ku’v’aleku’li’la V’aizilaeli v’aye v’aleke ku’ku’tu’mami’la hangi'?" 6 Hohene Falao wiv’angaga mukokoteni gwakwe gwa wu’lu’gu' gwa ku’kweswa na falasi na wawu’kaga na v’asilikale v’akwe. 7 Hangi' wasolaga mikokoteni magana mukaga misoga ku' wu’lu’gu', haki’mo na mikokoteni i’zyo zingi' zyose zya wu’lu’gu' zya V’amisili, na v’ahanya v’a v’asilikale mu mikokoteni zyeni’zyo. 8 Nawe Gu’ku' Mulungu wagu’v’ezyaga moyo gwamwa Falao ku’v’a mulambu, haho Falao wav’alondezyaga V’aizilaeli ku’nguno ndi' v’awu’kaga ku' wu’gaazi. 9 V’asilikale v’a Ki’misili haki’mo na falasi na mikokoteni zyav’o zyose zya wu’lu’gu' na v’asilikale v’a ku’liina falasi, v’av’alondezyaga V’aizilaeli, nav’o v’av’apandi’ki’laga aho v’av’age v’atu’u’lile nkambi' yav’o ha ngiligili na nyanza, aho hav’age ha mbele na Pi-hahiloti, matanda na Baal-sefoni.

10 V’aizilaeli aho v’ikev’elaga, v’awonaga kasinaga Falao izile na v’asilikale v’akwe. Haho v’agwaga magongofuka, na v’amuli’li’laga Gu’ku' Mulungu. 11 V’amuwi’laga Mose ati', "Vihe, ku' Misili kwali' ku’du’hu' viv’i’mbi' vya ku’ku’gelani’la mpaka waku’leta kwize ku’fwi’le ku’no ku' ibalangu'? Ku' ki' waku’fumya ku' Misili? 12 Vihe, ndi' ku’kaku’wi’lile muhayo gwenu’gu' ku’fuma ku' Misili? Ndi' kwaku’wi’la u’ku’leke kwendeleye ku’v’a v’asese v’a V’amisili. Yali' yi’li' visoga ku' wiswe ku’v’atu’mami’la V’amisili ku’ki’la ku’fwi’la ku’no ku' ibalangu'!"

13 Mose wasu’v’yaga ati', "Muleke kogoha! Inywe jaami mwi’me hi’gi'! Walelo muku’wu’wona wu’pi’zya wamwa Gu’ku' Mulungu. V’enav’a V’amisili muli’v’awona walelo, mukasye muv’awone hangi' nhananhana. 14 Gu’ku' Mulungu aku’mwigu’mi’la, na inywe muku’hu’li’ka sele."

15 Haho Gu’ku' Mulungu wamuwi’laga Mose, "Ku' ki' u’li’ndi’li’la ene? V’awi’le V’aizilaeli v’endeleye ku' mbele. 16 Nanho u’wu’sye mulanga gwako, na ku’golola mukono gwako ha igu’lya na nyanza. Minzi' gakwiki’ga u’ku' na u’ku', nav’o V’aizilaeli v’aku’v’i’ta hagati' na nyanza ha nsi' nyu’mu. 17 Nanne nku’v’av’ezya V’amisili ku’v’a na myoyo milambu, ki’gele v’ingi’le mu nyanza ku’nguno ya ku’mulondezya. Haho nku’pandi’ka lu’kumo ku’v’i’ti’la ku’mwa Falao na v’asilikale v’akwe v’ose, mikokoteni zya wu’lu’gu' zya ku’kweswa na falasi, haki’mo na v’aliina falasi v’akwe. 18 Nav’o V’amisili v’aku’manya ku’v’a ene hu' ni' Gu’ku' Mulungu, aho nku’v’a napandi’ka lu’kumo ku’v’i’ti’la ku’mwa Falao, mikokoteni zyakwe zya wu’lu’gu', na v’aliina falasi v’akwe."

19 Hangi' malaika wamwa Mulungu u’yo wav’age ali’yu’mba ha mbele na v’asilikale v’a V’aizilaeli, wawu’kaga na kwikala ku' nnuma yav’o. Hangi' i’lo ilunde li’li' ki’ti' nhi’ngi' lyahafumaga ha mbele yav’o, na lyi’maga ha nnuma yav’o, 20 na likalaga hagati' ya v’asilikale v’a Ki’misili na madale ga V’aizilaeli. Ilunde lyeni’lo lyav’aletelaga V’amisili giti, sumbwa ku' V’aizilaeli wu’ziku’pee ndi' li’v’amu’li’ki’lile. Ku’nguno yeni’yo v’akiegelile wu’ziku’pee.

21 Haho Mose wagololaga mukono gwakwe ha igu’lya na nyanza, nawe Gu’ku' Mulungu waletaga muyaga muhanya ku’fuma mu ki’ya, nago gwagatenkaga minzi' ga mu nyanza wu’ziku’pee, nago minzi' gihegaga na ku’leka nsi' nyu’mu. Minzi' gikumingaga lwandi' u’u’lu' na u’u’lu'. 22 Hohene V’aizilaeli v’av’i’taga hagati' na nyanza ha nsi' nyu’mu, na minzi' ndi' gihegaga na ku’v’ezya igelele, lwandi' lwav’o lwa ku' mumoso na lwa ku' mulyi’la. 23 Nav’o V’amisili v’av’alondezyaga V’aizilaeli, ku’v’i’ti’la ha nsi' nyu’mu i’yo ndi' yi’li' hagati' na nyanza. V’av’alondezyaga haki’mo na falasi zyav’o, mikokoteni zyav’o zya wu’lu’gu', na v’aliina falasi v’av’o v’ose. 24 Yav’age mu ikingilima, Gu’ku' Mulungu ku’fuma ku' igu’lya wali’lolaga idale lya v’asilikale lya V’amisili, ku’fuma mu ilunde lya moto i’lo li’li' ki’ti' nhi’ngi', na ku’li’hahya muno. 25 Hangi' Gu’ku' Mulungu wagapantamyaga maguludumu ga mikokoteni zyav’o, na ku’nguno yeni’yo gayaga ku' lu’duko lu’hanya. Hohene V’amisili ndi' v’ayomba ati', "Ku’v’apeele V’aizilaeli! Ku’nguno Gu’ku' Mulungu ali’v’igu’mi’la."

26 Haho Gu’ku' Mulungu wamuwi’laga Mose ati', "Wu’sya mukono gwako ha igu’lya na nyanza, ki’gele minzi' gasu’v’e na ku’v’anyumi’zya V’amisili, haki’mo na mikokoteni zyav’o zyose zya wu’lu’gu' na v’aliina falasi v’av’o." 27 Nawe Mose wawu’syaga mukono gwakwe ha igu’lya na nyanza, na yav’age mu ikingilima nyanza yasu’v’i’laga kikali’le chayo. Haho V’amisili v’agemaga ku’gapeela minzi', ali’vi Gu’ku' Mulungu wav’atenkelaga mu nyanza. 28 Minzi' gav’anyumi’zyaga v’aliina falasi v’ose na mikokoteni zyose zya wu’lu’gu', na v’asilikale v’amwa Falao av’o ndi' v’av’alondile V’aizilaeli, v’ose v’afwi’laga mwenu’mo. Akapu’lu’gu’kile ninga yu’mo mugati' nav’o. 29 Ali’vi V’aizilaeli v’asangwa v’av’i’taga hagati' na nyanza ha nsi' nyu’mu, u’ku' minzi' gi’maga ki’ti' igelele ku' lwandi' lwav’o lwa mukono gwa ku' mulyi’la na gwa ku' mumoso.

30 I’vi hu' vyene Gu’ku' Mulungu ndi' wav’api’zya V’aizilaeli ku’fuma mu makono ga V’amisili, nav’o V’aizilaeli ndi' v’aziwona milambo zya V’amisili mu ngiligili ya nyanza. 31 Yav’aga V’aizilaeli aho v’awonaga igambo lya mukono gwa nguzu, i’lo Gu’ku' Mulungu wali’v’ezyaga ha igu’lya na V’amisili, v’amogohaga Gu’ku' Mulungu na v’atu’u’laga isani’zyo ku' wakwe na ku’mwa Mose mukumba wakwe.