1 Hangi' Gu'ku' Mulungu wendeleyaga ku'muwi'la Mose ati', "Mugati' na V'aizilaeli, u'mulete ku' wanne Aloni, muku'lu'yo, haki'mo na v'ana v'akwe v'a ki'gosya Nadabu, Abihu, Eleazali, na Itamali, ki'gele v'antu'mami'le muli'mo gwa wu'hozya. 2 U'lamusumi'le muku'lu'yo Aloni vizwalo visondo ki'gele apandi'ke lu'kumo na wu'soga. 3 U'v'awi'le v'afundi v'ose av'o nav'apile loho ya wu'manyi, v'amusumi'le Aloni vizwalo ki'gele asondohiwe ku'nguno ya muli'mo gwa wu'hozya. 4 I'vi hu' vizwalo i'vyo v'alasume: kamufuko ka ha ki'kuv'a, ki'zibao, ijoho, nhanzo ya wu'lembwe, isimangi'la na mukwato gwa mu muki'mbi'li'. Vyeni'vyo vizwalo visondo vilasumwe ku'nguno ya ku'zwala mudu'gu'yo Aloni haki'mo na v'ana v'akwe, ki'gele v'antu'mami'le muli'mo gwa wu'hozya. 5 V'enav'o v'afundi u'v'awi'le v'atu'mi'le zahabu, wu'zi wa langi ya bululu, zambalawo, na yazaa, haki'mo na katani nsoga.

6 "Hangi' v'av'ezye ki'zibao ku' wu'zi wa zahabu na wa langi ya bululu, zambalawo na yazaa, haki'mo na katani nsoga i'yo yi'pelegilwe, na ku'fuumwa ku' wu'tonto. 7 Ki'zibao cheni'cho ki'lav'e na mikwato iv'i'li' zya ku'tungi'la mu mav'ega, ki'la iv'ega mukwato gu'mo u'go gu'sumi'lilwe ku' nsoto. 8 Mukwato gwa ki'zibao gwa wu'lembwe gwa ku'tunga mu muki'mbi'li' gu'lav'eziwe ku' vilwani'lo vyene vivyo, ku' wu'zi wa zahabu, na wa langi ya bululu, zambalawo na yazaa, haki'mo na katani nsoga i'yo yi'pelegilwe, gu'lasumi'li'lwe gu'v'e ki'ntu' ki'mo na ki'zibao cheni'cho.

9 "Hangi' u'lasole mawe av'i'li' ga mupango ga shohamu, na ha igu'lya yago u'latone mina ga v'ana v'a ki'gosya v'amwa Izilaeli. 10 U'latone mina mukaga ku' iwe lya kwandya, na mina mukaga gangi' ku' iwe lya wu'v'i'li'. Mina genago gize gahelwe ku'londana na ku'v'yalwa kwav'o. 11 U'lagatone mina genago ga v'ana v'amwa Izilaeli ha igu'lya na mawe genago av'i'li', ki'ti' i'vyo musuli i'vyo ali'gu'tonaga muhuli. Hangi' u'lagatu'u'le mu vyokazyo vya zahabu vya wu'lembwe. 12 Mawe genago ago gali' mu vyokazyo u'lagatunge ha igu'lya na mikwato zya mu mav'ega ga i'cho ki'zibao, ki'gele gav'e mwizu' ku' V'aizilaeli. Nawe Aloni alagazwale mina genago ku' mav'ega gakwe ha mbele yanne ene Gu'ku' Mulungu ki'ti' mwizu'. 13 U'lav'ezye vyokazyo vyeni'vyo viv'i'li' vya zahabu, 14 na mikufu iv'i'li' zya zahabu nsoso i'zyo zipelegilwe ki'ti' lu'goye, na u'zitunge mikufu zyeni'zyo ku' vyokazyo.

15 "U'lav'ezye kamufuko ka ha ki'kuv'a ku'nguno ya ku'koov'ela wu'yangu' wa v'antu' ku'mwa Mulungu. Kav'eziwe ku' wu'tonto ku' wu'zi wa zahabu, na wa langi ya bululu, zambalawo na yazaa, na katani nsoga i'yo yi'pelegilwe, ki'ti' i'cho ki'zibao. 16 Kalav'e ka mugelani'lo ako kalagondwe kav'e na wu'lihu na wu'gali'nhu wako sentimita maku'mi av'i'li' na iv'i'li'. 17 Kamufuko kenako kalalembwe ku' mihelo ine zya mawe ga mupango. Muhelo gwa kwandya gu'v'e na mawe ga akiki, topazi na bahalamani. 18 Muhelo gwa wu'v'i'li' gu'v'e na mawe ga zumalidi, yakuti na alimasi. 19 Muhelo gwa wu'datu' gu'v'e na mawe ga yasinto, ageti na ametisito. 20 Muhelo gwa wu'ne gu'v'e na mawe ga kilisolito, shohamu na yasipi. Gose gatu'u'lwe mu vyokazyo vya zahabu vya wu'lembwe. 21 Hohene ku'lav'e na mawe iku'mi na av'i'li', ago gatonilwe mina iku'mi na av'i'li' ga v'ana v'amwa Izilaeli. Ki'la li'mo li'tonwe ki'ti' muhuli ki'gele li'v'e na lina li'mo mugati' na mina ga magongo ago iku'mi na av'i'li'.

22 "U'lav'ezye mikufu zya zahabu nsoso i'zyo zipelegilwe ki'ti' lu'goye, ku'nguno ya kamufuko ka ha ki'kuv'a. 23 Vyene vivyo u'lav'ezye pete iv'i'li' zya zahabu ku'nguno ya kamufuko, na ku'zitungi'la ku' mapembo av'i'li' ga ku' igu'lya na kamufuko kenako. 24 U'lazitunge nsoto iv'i'li' zya mikufu ku' pete zyeni'zyo i'zyo zili' ku' mapembo ga kamufuko kenako. 25 Hangi' na i'zyo nsoto zingi' zya mikufu u'lazitunge ku' i'vyo vyokazyo viv'i'li' vya mawe. Vyene vivyo u'lazitungani'zye ku' mikwato zya mu mav'ega ga i'cho ki'zibao ku' lwandi' lwa ku' mbele. 26 U'lav'ezye pete iv'i'li' zya zahabu, na ku'zitu'u'la mu mapembo av'i'li' ga ha nsi'li'li' na kamufuko ku' nnuma yako bi'hi' na ki'zibao. 27 U'lav'ezye pete zingi' iv'i'li' zya zahabu, na u'zidimani'zye ha lwandi' lwa ha nsi'li'li' ya mikwato zya mav'ega, ha lwandi' lwa ku' mbele lwa cheni'cho ki'zibao, bi'hi' na ipi'ndo ha igu'lya hadoo na mukwato gwa mu muki'mbi'li'. 28 Pete zya kamufuko kenako zilatungani'ziwe na pete zya ki'zibao ku' lu'goye lwa langi ya bululu, ki'gele kaleke ku'soka na kikali'le mukwato gwa wu'lembwe gwa mu muki'mbi'li'.

29 "Itungo i'lo Aloni alav'e ali'wingi'la Hantu' Hasondo, alazwalage kamufuko ka ha ki'kuv'a ku'nguno ya ku'v'ezezya wu'yangu' ako kali' na mina ga v'ana v'amwa Izilaeli, ku'v'a mwizu' ku' matungo gose ha mbele yanne ene Gu'ku' Mulungu. 30 Hangi' mu kamufuko kenako u'latu'u'le Ulimu na Sumimu* viv'e ha igu'lya na ki'kuv'a gwamwa Aloni. Nsiku' zyose aho Aloni alav'e ali'wingi'la ha mbele yamwa Gu'ku' Mulungu, vintu' vyeni'vyo alavisombe ha igu'lya na ki'kuv'a gwakwe. I'vi hu' vyene alakowole ku'fumya wu'yangu' ku' V'aizilaeli ha mbele yanne.

31 "Hangi' u'lasume ijoho lya ku'zwali'la ki'zibao ku' ki'tambala cha langi ya bululu. 32 Hagati' u'ladu'le idu'lu'lu' lya ku'v'i'ti'zya mutwe. Ha lwandi' lwa nhingo u'lahapilimye ki'tambala i'cho ki'fuumilwe ki'gele ku'du' li'tandu'ke. 33 Ku' wu'pi'nde walyo wa ha nsi'li'li' ku'pilima lwandi' lose yi'lalembwe ku' masu'mbano ga makomamanga ga langi ya bululu, zambalawo na yazaa. Hagati' na ki'la ikomamanga ku'v'e na muyi'mba gwa zahabu. 34 Zyeni'zyo miyi'mba zya zahabu na makomamanga zilihele ku'li'pilima ipi'ndo lya ijoho lyeni'lo: ikomamanga, muyi'mba, ikomamanga, muyi'mba. 35 Aloni alazwale ijoho lyeni'lo aho alav'e ali'tu'mama muli'mo gwa wu'hozya, na muzwi gwa zyeni'zyo miyi'mba mulagwigwe aho ali'wingi'la Hantu' Hasondo ha mbele yanne na aho ali'fuma, ki'gele aleke ku'fwa.

36 "Hangi' u'lav'ezye ndezi ya zahabu nsoso, na ku'yi'tona ha igu'lya yayo, ki'ti' i'vyo gu'li'tonagwa muhuli, ‘MUSONDO KU'MWA GU'KU' MULUNGU.’ 37 Ndezi yeni'yo u'layi'tunge ha igu'lya na isimangi'la ku' lwandi' lwa ku' mbele ku' lu'goye lwa langi ya bululu. 38 Aloni alayi'zwalage ndezi yeni'yo ha wu'syu' wakwe ku' matungo gose aho alav'e ali'v'ezya muli'mo gwa wu'hozya, na alasombage musango gwa V'aizilaeli u'go v'akowolile ku'v'a v'ahu'v'ile ku' ku'nfumi'zya vitaambo visondo, nanne ndavizumyage vitaambo vyav'o. 39 U'lamufuumi'le Aloni nhanzo ku' katani nsoga, na u'muv'ezezye isimangi'la ku' katani nsoga na mukwato gwa wu'pu'ndwe gwa mu muki'mbi'li'.

40 "U'lav'asumi'le v'ana v'amwa Aloni nhanzo, mikwato zya mu muki'mbi'li' na nkofila, ki'gele v'apandi'ke lu'kumo na wu'soga.

41 "Aho u'lav'e wav'azwi'ka Aloni, muku'lu'yo, haki'mo na v'ana v'akwe vizwalo vyeni'vyo, u'lav'av'ile maguta na ku'v'asondohya na ku'v'asimi'ka, ki'gele v'antu'mami'le muli'mo gwa wu'hozya. 42 Vyene vivyo u'lav'asumi'le vizwalo vya mugati' vya katani, i'vyo vilav'akumbi'le ki'la yu'mo ku'fuma mu muki'mbi'li' mpaka mu matango, ki'gele v'iku'v'i'le miv'i'li' zyav'o. 43 Aloni na v'ana v'akwe yi'lav'adime ku'vizwala ki'la aho v'alav'e v'ali'wingi'la mu Ihema lya Ku'sangi'zya, ninga aho v'alav'e v'ali'lyegela ihozezyo lya vitaambo itungo lya muli'mo gwa wu'hozya ha lu'gu'tu' lwa Ihema Isondo, ki'gele v'ize v'aleke ku'pu'v'ya v'afwe. Yeni'yi' yi'v'e nhama ya nhananhana ku'mwa Aloni na wu'v'yalwa wakwe."