1 Hangi' Gu'ku' Mulungu wamuwi'laga Mose, 2 "Mu lu'siku' lwa kwandya lwa mwezi gwa kwandya, u'lali'ki'ndi'ke Ihema Isondo, yaani Ihema lya Ku'sangi'zya. 3 Mugati' na ihema lyeni'lo u'latu'u'le isandi'ko lya wu'sangi'lwa, hangi' u'lali'ki'ge na muki'ngo. 4 U'laingi'zye meza na ku'hela vintu' ha igu'lya yayo. U'laingi'zye i'cho ki'nala cha ku'tu'u'li'la tala hangi' na ku'zitu'u'la tala zyacho ha igu'lya yacho. 5 Ihozezyo lya zahabu lya ku'zuki'zya wu'bani, u'lali'tu'u'le ha mbele ya isandi'ko lya wu'sangi'lwa. Hangi' u'lenenie muki'ngo ku' wingi'li'lo wa Ihema Isondo. 6 Hangi' ha mbele ya wingi'li'lo wa Ihema Isondo, yaani Ihema lya Ku'sangi'zya, u'latu'u'le i'lo ihozezyo lya ku'zigi'zya vitaambo. 7 Ikalaye u'lali'tu'u'le hagati' ya Ihema lya Ku'sangi'zya na ihozezyo, na ku'lyokazya minzi'. 8 U'lapilimye lu'gu'tu' na ku'enenia muki'ngo ha wingi'li'lo walo.

9 "Hangi' u'lasole maguta ga ku'v'ila na ku'li'v'ila Ihema Isondo haki'mo na vintu' vyalyo vyose. U'lali'sondohye haki'mo na vilwani'lo vyose i'vyo vili' mugati' yalyo, nalyo li'lav'e isondo. 10 Hangi' u'lali'v'ile maguta ihozezyo lya ku'zigi'zya vitaambo haki'mo na vilwani'lo vyalyo vyose, na ku'li'sondohya ihozezyo, nalyo li'lav'e isondo muno. 11 Ikalaye haki'mo na kikali'lo chalyo, u'lali'v'ile maguta na ku'li'sondohya.

12 "U'lav'alete Aloni na v'ana v'akwe v'a ki'gosya bi'hi' na wingi'li'lo wa Ihema lya Ku'sangi'zya, nanho u'lav'akuse na minzi'. 13 Hangi' u'lamuzwi'ke Aloni i'vyo vizwalo visondo, na ku'muv'ila maguta na ku'musondohya, ki'gele antu'mami'le muli'mo gwa wu'hozya. 14 Vyene vivyo u'lav'alete v'ana v'akwe na ku'v'azwi'ka i'zyo nhanzo. 15 Hangi' u'lav'av'ile maguta ki'ti' i'vyo wamuv'ilaga sav'o, ki'gele nav'o v'antu'mami'le muli'mo gwa wu'hozya. Ku'v'ilwa maguta kwenu'ku' ku'lav'ingi'zye mu wu'hozya wa wu'leka ku' wu'v'yalwa wav'o wose."

16 Hohene, Mose wagelani'zyaga ki'la ki'ntu' ki'ti' i'vyo Gu'ku' Mulungu wamulagi'li'zizye.

17 Yav'age mu lu'siku' lwa kwandya lwa mwezi gwa kwandya, mwaka gwa wu'v'i'li' gwa ku'fuma ku' Misili, Ihema Isondo lyaki'ndi'kagwa. 18 Mose watu'u'laga vikali'lo vyalyo na ku'wu'sya felemu zyalyo, wazidimani'zyaga ngito zyalyo na kwi'mi'kya nhi'ngi' zyalyo. 19 Wasagalaga nfundi' ya miki'ngo ha igu'lya na Ihema Isondo, na ku'tu'u'la nfundi' zya ndi'li' ha igu'lya yalyo, ki'ti' i'vyo Gu'ku' Mulungu wamulagi'li'zizye. 20 Hangi' wasolaga ago mav'ale av'i'li' ga mawe ga wu'sangi'lwa na ku'gatu'u'la mu i'lo isandi'ko. Watu'u'laga zyeni'zyo miti' mu pete zya isandi'ko na watu'u'laga nfundi' ya wu'swanano ha igu'lya yalyo. 21 Hangi' wali'tu'u'laga mu ihema na ku'enenia muki'ngo, ki'gele ali'ki'ge isandi'ko lyeni'lo, ki'ti' i'vyo Gu'ku' Mulungu wamulagi'li'zizye.

22 Watu'u'laga meza mu Ihema lya Ku'sangi'zya, ku' lwandi' lwa sukuma lwa ihema, ha ibala na muki'ngo gwenu'go, 23 na ku'hela migate ha igu'lya na meza ha mbele yamwa Gu'ku' Mulungu, ki'ti' i'vyo Gu'ku' Mulungu wamulagi'li'zizye. 24 Watu'u'laga ki'nala cha ku'tu'u'li'la tala mu Ihema lya Ku'sangi'zya, ku' lwandi' lwa dakama, matanda na meza. 25 Hangi' wazihelaga tala ha igu'lya yacho ha mbele yamwa Gu'ku' Mulungu, ki'ti' i'vyo Gu'ku' Mulungu wamulagi'li'zizye. 26 Wali'tu'u'laga ihozezyo lya zahabu mu Ihema lya Ku'sangi'zya, ha mbele na muki'ngo gwa mugati', 27 na ku'zuki'zya wu'bani wu'motu ha igu'lya, ki'ti' i'vyo Gu'ku' Mulungu wamulagi'li'zizye.Mugati' na Hantu' Hasondo: ki'nala cha tala, ihozezyo lya ku'zuki'zya wu'bani na meza ya migate zya wu'sangi'lwa 28 Hangi' weneniaga muki'ngo ha wingi'li'lo wa Ihema Isondo. 29 Wali'tu'u'laga ihozezyo lya ku'zigi'zya vitaambo bi'hi' na wingi'li'lo wa Ihema lya Ku'sangi'zya, na wafumyaga ki'taambo cha ku'zigya na kalu'mbi'lo ka mbutoo vya mu mugu'nda ha igu'lya yalyo, ki'ti' i'vyo Gu'ku' Mulungu wamulagi'li'zizye. 30 Wali'tu'u'laga ikalaye hagati' na Ihema lya Ku'sangi'zya na ihozezyo, na ku'ti'ti'la minzi' ku'nguno ya kwikusa. 31 Hangi' Mose, Aloni na v'ana v'akwe, v'ose v'agatu'mi'laga ku' ku'kusi'la makono na magu'lu' gav'o. 32 Ki'la aho v'av'age v'ali'wingi'la mu ihema, ninga aho v'ali'lyegela ihozezyo, v'ikusage, ki'ti' i'vyo Gu'ku' Mulungu wamulagi'li'zizye Mose. 33 Hangi' Mose waki'ndi'kaga lu'gu'tu' ku'li'pilima ihema lyeni'lo na ihozezyo, na ku'tu'u'la muki'ngo ha wingi'li'lo wa lu'gu'tu'. Hu' i'vyo Mose wagelani'zyaga muli'mo gose.Lu'gu'tu' lwa Ihema Isondo haki'mo na vilwani'lo vyalyo vyose

34 Hangi' ilunde lyali'kumbi'laga i'lo Ihema lya Ku'sangi'zya, na lu'kumo lwamwa Gu'ku' Mulungu lokalaga mu ihema. 35 Ninga Mose akakowolile kwingi'la mu Ihema lya Ku'sangi'zya, ku'nguno i'lo ilunde likalaga ha igu'lya yalyo, na lu'kumo lwamwa Gu'ku' Mulungu lokalaga mwenu'mo. 36 Ku' misi'nzo zyav'o zyose V'aizilaeli itungo ilunde lyeni'lo aho lyawu'siv'agwe ku'fuma ha igu'lya na Ihema Isondo, haho v'awu'kage musi'nzo, 37 ali'vi u'lu' ilunde li'kawu'siv'ilwe, na v'eni'ki'li' v'akawu'kile mpaka lu'siku' u'lo lyawu'siv'agwa. 38 Ku' misi'nzo zyav'o zyose, iv'ilingano lya V'aizilaeli v'ali'wonage i'lo ilunde lyamwa Gu'ku' Mulungu ha igu'lya na Ihema Isondo ha itungo lya lyu'v'a, na u'go moto gwav'akage wu'ziku' mu ilunde lyeni'lo.