Levítico 1

Ki’taambo cha ku’zigya

1 Gu’ku' Mulungu wamwitanaga Mose, na ku’yomba nawe ku’fuma mu Ihema lya Ku’sangi’zya. Wamuwi’laga ati', 2 "U’v’awi’le V’aizilaeli ati', ‘Ki’la muntu' mugati' na inywe u’yo alav’e ali’leta kalu’mbi’lo ka ndimu ku’mwa Gu’ku' Mulungu, yi’lamudime ku’leta ng’ombe, nkolo ninga mbu’li.

3 " ‘U’lu' kalu’mbi’lo kenako ka ki’taambo cha ku’zigya kali' ka ng’ombe, alafumye nzagamba i’yo yi’li' wu’du’hu' wu’lema. Alayi’lete ha wingi’li’lo wa Ihema lya Ku’sangi’zya, ki’gele yi’zumiwe ha mbele yamwa Gu’ku' Mulungu. 4 Hangi' alatu’u’le mukono gwakwe ha igu’lya na mutwe gwa ng’ombe ya ki’taambo cha ku’zigya, nacho ki’lazumiwe ku' ku’muv’ezezya wu’swanano muntu' mwenu’yo. 5 Nawe alayi’si’nze ng’ombe yeni’yo ha mbele yamwa Gu’ku' Mulungu. Hangi' v’ana v’amwa Aloni v’a ki’gosya, av’o v’ahozya, v’alagalete magazi na ku’li’nyanyagi’la ihozezyo ku' ki’la lwandi', i’lo li’li' bi’hi' na wingi’li’lo wa Ihema lya Ku’sangi’zya. 6 Hangi' alayi’v’age yeni’yo ng’ombe ya ki’taambo, na ku’yi’putagu’zya mamonke mamonke. 7 V’ana v’a muhozya Aloni v’alapembe moto ha igu’lya na ihozezyo, na ku’hela nkwi ha igu’lya na moto gwenu’go. 8 Hangi' v’ahozya v’enav’o v’alahele ago mamonke, haki’mo na mutwe na maguta, ga yeni’yo ng’ombe ha igu’lya na nkwi i’zyo zili’v’aka ha igu’lya na ihozezyo. 9 Ali’vi wu’la wayo, na magu’lu' gayo, muntu' mwenu’yo alavikuse na minzi' mbela. Haho muhozya alavizigye vyose ha igu’lya na ihozezyo. Kenako kali' kalu’mbi’lo ka ki’taambo cha ku’zigya ku' moto, ako kali' na wu’motu wa ku’mutogezya Gu’ku' Mulungu.

10 " ‘U’lu' ki’taambo cha ku’zigya ki’li' cha nkolo ninga mbu’li, alafumye ngosya i’yo yi’li' wu’du’hu' wu’lema. 11 Nawe alayi’si’nzi’le bi’hi' na ihozezyo ku' lwandi' lwa sukuma ha mbele yamwa Gu’ku' Mulungu, na v’ana v’amwa Aloni, av’o v’ahozya, v’alanyanyagi’le magazi gayo ku' ki’la lwandi' lwa ihozezyo. 12 Hangi' muntu' mwenu’yo alayi’putagu’zye mamonke mamonke, nawe muhozya alagahele haki’mo na mutwe na maguta gayo ha igu’lya na nkwi i’zyo zili’v’aka ha igu’lya na ihozezyo. 13 Ali’vi wu’la wayo, na magu’lu' gayo na vikono vyayo, alavikuse ku' minzi', nawe muhozya alavizigye vyose ha igu’lya na ihozezyo. Kenako kali' kalu’mbi’lo ka ki’taambo cha ku’zigya ku' moto, ako kali' na wu’motu wa ku’mutogezya Gu’ku' Mulungu.

14 " ‘U’lu' ki’taambo cha ku’zigya i’cho ki’li’fumiwa ku’mwa Gu’ku' Mulungu ki’v’e cha nnoni, alamufumi’zye ipu’u’la ninga ikune lya nkunda. 15 Hangi' muhozya alayi’lete nnoni yeni’yo ha ihozezyo, nawe alayi’nyunsu’le nhingo. Haho mutwe gwayo alagu’zigye ha igu’lya na ihozezyo, na magazi gayo alagatonyekezye mu lu’v’azu lwa ihozezyo. 16 Alali’sinie isolilo haki’mo na wu’chafu walyo, na ku’vitagi’la ku' lwandi' lwa ku' ki’ya bi’hi' na ihozezyo u’ko ku’li' na matunde. 17 Hangi' alayi’dime manana na ku’yi’sasa, ali’vi ku’du' ize ayi’lekanie, nawe muhozya alayi’zigye ha igu’lya na nkwi i’zyo zili’v’aka ha igu’lya na ihozezyo. Kenako kali' kalu’mbi’lo ka ki’taambo cha ku’zigya ku' moto, ako kali' na wu’motu wa ku’mutogezya Gu’ku' Mulungu.