1 Gu'ku' Mulungu wamuwi'laga Mose ati', 2 "U'v'asole Aloni na v'ana v'akwe v'a ki'gosya, u'lete na vizwalo vyav'o visondo, maguta ga ku'v'ila, nzagamba ku'nguno ya ki'taambo cha ku'sini'zya wu'kenagu'zi, ng'ondi iv'i'li' na ki'sege cha migate i'zyo zikatumba. 3 Hangi' u'li'kuminge iv'ilingano lyose bi'hi' na wingi'li'lo wa Ihema lya Ku'sangi'zya." 4 Mose wav'ezyaga ki'ti' i'vyo Gu'ku' Mulungu wamulagi'li'zizye. Iv'ilingano lyose likumingaga ha wingi'li'lo wa Ihema lya Ku'sangi'zya.

5 Mose wali'wi'laga iv'ilingano, "I'li' hu' igambo i'lo Gu'ku' Mulungu walagi'li'zizye li'v'ezyeke." 6 Hohene Mose wav'aletaga Aloni na v'aane ha mbele, na ku'v'akusa na minzi'. 7 Wamuzwi'kaga Aloni nhanzo na ku'mutunga mukwato mu muki'mbi'li', na wamuzwi'kaga ijoho haki'mo na ki'zibao ha igu'lya yalyo na ku'ki'tunga mu muki'mbi'li' ku' mukwato gwacho gwa wu'lembwe. 8 Hangi' watu'u'laga kamufuko ka ha ki'kuv'a ha igu'lya yacho. Mugati' na kamufuko kenako watu'u'laga Ulimu na Sumimu*. 9 Wamuzwi'kaga Aloni isimangi'la ku' mutwe, na ku'tu'u'la ndezi ya zahabu, yaani ndezi nsondo, ku' lwandi' lwa ku' mbele lwa isimangi'la, ki'ti' i'vyo Gu'ku' Mulungu wamulagi'li'zizye.

10 Haho Mose wasolaga maguta masondo na ku'li'v'ila Ihema Isondo haki'mo na ki'la ki'ntu' i'cho ki'li' mugati' yalyo, nawe wavisondohyaga. 11 Wanyanyagi'laga maguta ha igu'lya na ihozezyo kali' mupungati'. Hangi' wali'v'ilaga ihozezyo maguta na vilwani'lo vyalyo vyose haki'mo na ikalaye na kikali'lo chalyo, ki'gele avisondohye. 12 Hangi' wamupu'ngu'li'laga lwandi' lwa maguta genago Aloni ku' mutwe na ku'muv'ila, ki'gele amusondohye. 13 Hangi' wav'aletaga v'ana v'amwa Aloni v'a ki'gosya ha mbele, wav'azwi'kaga nhanzo, na wav'atungaga mikwato haki'mo na masimangi'la, ki'ti' i'vyo Gu'ku' Mulungu wamulagi'li'zizye.

14 Hangi' Mose wayi'fumyaga ng'ombe nzagamba ku'nguno ya ki'taambo cha ku'sini'zya wu'kenagu'zi, nav'o Aloni na v'ana v'akwe v'atu'u'laga makono gav'o ha igu'lya na mutwe gwayo. 15 Haho Mose wayi'si'nzaga yeni'yo ng'ombe na ku'sola lwandi' lwa magazi gayo, hangi' ku' ku'tu'mi'la lyala lyakwe wav'ilaga magazi ku' mapembe ga ihozezyo ki'gele ali'sosohye ihozezyo. Magazi ago gasigali'laga wagiti'laga ha nsi'li'li' na ihozezyo. Ku' nzi'la yeni'yo wali'sondohyaga ihozezyo ki'gele li'zumi'ziwe ku'v'ezezya wu'swanano. 16 Hangi' wasolaga lu'sasa lose, lwandi' lu'soga lwa iti'ma haki'mo na nfigo zyose iv'i'li' na maguta gazyo na wazizigyaga ha igu'lya na ihozezyo. 17 Ali'vi ng'ombe yeni'ki'li', nyama yayo, ndi'li' yayo, haki'mo na wu'se wayo, wavizigyaga ha ibala na nkambi', ki'ti' i'vyo Gu'ku' Mulungu wamulagi'li'zizye.

18 Hangi' Mose wayi'letaga ng'ondi ku'nguno ya ki'taambo cha ku'zigya, nawe Aloni haki'mo na v'ana v'akwe v'atu'u'laga makono gav'o ha igu'lya na mutwe gwayo. 19 Haho Mose wayi'si'nzaga ng'ondi yeni'yo na ku'nyanyagi'la magazi gayo ki'la lwandi' lwa ihozezyo. 20 Wayi'tambagu'zyaga ng'ondi yeni'yo mamonke mamonke na ku'gazigya haki'mo na mutwe na maguta gayo. 21 Hangi' wakusaga wu'la wayo, magu'lu' gayo na vikono vyayo ku' minzi', na ku'yi'zigya yeni'yo ng'ondi ha igu'lya na ihozezyo, ku'v'a ki'taambo cha ku'zigya, i'cho ki'li' na wu'motu wa ku'togezya. Kenako kali' kalu'mbi'lo ka ku'zigya ku'mwa Gu'ku' Mulungu, ki'ti' i'vyo Gu'ku' Mulungu wamulagi'li'zizye.

22 Hangi' Mose waletaga ng'ondi yi'ngi', yeni'yo hu' yi'li' ya ku'v'asimi'ki'la, nawe Aloni haki'mo na v'ana v'akwe v'atu'u'laga makono gav'o ha igu'lya na mutwe gwayo. 23 Haho Mose wayi'si'nzaga yeni'yo ng'ondi, na wasolaga lwandi' lwa magazi gayo na ku'gav'ila ku' nsoto ya itwi lya mulyi'la lyamwa Aloni, na ku' li'nkumwa lya mukono gwa mulyi'la na ku' li'nkumwa lya mugu'lu' gwa mulyi'la. 24 Hangi' wav'aletaga v'ana v'amwa Aloni ha mbele, na ku'v'av'ila magazi ku' nsoto zya matwi gav'o ga mulyi'la, na ku' mankumwa ga makono ga mulyi'la, na ku' mankumwa ga magu'lu' gav'o ga mulyi'la. Hangi' magazi ago gasigali'laga wanyanyagi'laga ki'la lwandi' lwa ihozezyo. 25 Hangi' wasolaga maguta gayo: muki'la gwayo haki'mo na maguta gago, lu'sasa, lwandi' lu'soga lwa iti'ma, nfigo iv'i'li' na maguta gazyo, haki'mo na itango lya ku' mulyi'la.

26 Hangi' ku'fuma ku' ki'sege cha migate i'zyo zikatumba i'cho chav'age ha mbele yamwa Gu'ku' Mulungu, wasolaga mugate gu'mo u'go gu'kaseleganiwa maguta, na mugate gu'mo gwa wu'seleganiwe na maguta ga muzeituni, na mugate mulelemazu gu'mo. Wavitu'u'laga vyeni'vi vyose ha igu'lya na maguta ga ndimu, na ha igu'lya na i'lo itango lya mulyi'la. 27 Mose wavitu'u'laga i'vi vyose mu makono gamwa Aloni haki'mo na v'ana v'akwe, na ku'v'av'ezya v'aviwu'sye ha mbele yamwa Gu'ku' Mulungu ku'v'a lu'manyi'lo lwa ku'fumya kalu'mbi'lo. 28 Haho Mose wavisolaga ku'fuma mu makono gav'o na ku'vizigya ha igu'lya na ihozezyo haki'mo na ki'taambo cha ku'zigya. Kenako kali' kalu'mbi'lo ka ku'simi'ki'la v'ahozya, ka wu'motu wa ku'togezya, ku'v'a kalu'mbi'lo ka ku'zigya ku'mwa Gu'ku' Mulungu. 29 Hangi' wasolaga ki'dali i'cho ki'li' ifungu lyakwe ku'fuma ku' i'yo ng'ondi ya ku'v'asimi'ki'la, na ku'ki'wu'sya ha mbele yamwa Gu'ku' Mulungu ku'v'a lu'manyi'lo lwa ku'fumya kalu'mbi'lo, ki'ti' i'vyo Gu'ku' Mulungu wamulagi'li'zizye. 30 Mose wasolaga lwandi' lwa maguta ga ku'v'ila, na lwandi' lwa magazi ku'fuma ku' ihozezyo, na ku'ganyanyagi'la ku'mwa Aloni na vizwalo vyakwe, na ku' v'ana v'akwe na vizwalo vyav'o. I'vi hu' vyene wamusondohyaga Aloni na vizwalo vyakwe, haki'mo na v'ana v'akwe na vizwalo vyav'o.

31 Hangi' Mose wav'awi'laga Aloni na v'ana v'akwe ati', "Nyama yeni'yo muyi'tekele bi'hi' na wingi'li'lo wa Ihema lya Ku'sangi'zya, na muyi'lyi'le henanho haki'mo na migate ku'fuma mu ki'sege cha kalu'mbi'lo ka ku'simi'ki'la. Muv'ezye vyeni'vyo ki'ti' i'vyo Gu'ku' Mulungu walagi'li'zya ku'v'a lwandi' lwenu'lo Aloni na v'ana v'akwe v'alalye. 32 Hangi' nyama na migate i'zyo zilasigali'le mulazizigye. 33 Ku'du' mwize muhafume ha wingi'li'lo wa Ihema lya Ku'sangi'zya ku' itungo lya nsiku' mupungati', mpaka nsiku' zinywe zya ku'simi'kwa aho zilav'e zyagelani'la, ku'nguno itungo linywe lya ku'simi'kwa li'lav'e nsiku' mupungati'. 34 I'lo lyav'eziv'agwa walelo ndi' lyalagi'li'ziwa na Gu'ku' Mulungu ki'gele ku'v'ezya wu'swanano ku'nguno yinywe. 35 Yi'li'mudima kwikala bi'hi' na wingi'li'lo wa Ihema lya Ku'sangi'zya wu'ziku' na lyu'v'a ku' nsiku' mupungati', na ku'li'doonoka i'lo Gu'ku' Mulungu walagi'li'zya, ki'gele muleke ku'fwa, ku'nguno lyeni'lo hu' i'lo nalagi'li'ziwa." 36 Hohene Aloni na v'ana v'akwe v'av'ezyaga ki'la ki'ntu' i'cho Gu'ku' Mulungu ndi' walagi'li'zya ku'v'i'ti'la ku'mwa Mose.