1 Gu'ku' Mulungu wamuwi'laga Mose, 2 "U'yombe na iv'ilingano lyose lya V'aizilaeli u'v'awi'le ati', ‘Yi'li'mudima muv'e v'asondo, ku'nguno ene Gu'ku' Mulungu, Mulungu winywe, ni' musondo.

3 " ‘Ki'la muntu' mugati' na inywe yi'li'mudima amuku'zye ise na nnina, na yi'li'mudima ku'zidima nsiku' zya ki'suuho i'zyo zili' Sabato zyanne. Ene hu' ni' Gu'ku' Mulungu, Mulungu winywe.

4 " ‘Ku'du' mugalu'ke ku'vilonda vimbulimbuli, ninga ku'du' mwiv'ezezye milungu zya ku'sula. Ene hu' ni' Gu'ku' Mulungu, Mulungu winywe.

5 " ‘Ali'vi aho mulav'e muli'nfumi'zya ene Gu'ku' Mulungu ki'taambo cha kwiswanania, mulafumye ku' nzi'la i'yo yi'li'koov'iwa ki'gele ki'zumiwe. 6 Ki'taambo cheni'cho yi'li'koov'iwa ki'liwe lu'siku' lwene lu'lo u'lo mulav'e mwaki'si'nzaga ninga lu'siku' lwa wu'v'i'li'. Ali'vi ki'ntu' ninga ki'mo cha ki'taambo cheni'cho i'cho ki'lasigali'le mpaka lu'siku' lwa wu'datu' yi'lamudime muki'zigye mu moto. 7 U'lu' ki'taambo cheni'cho kize ki'liwe ninga hadoo ku' lu'siku' lwa wu'datu', ki'lav'e zoma, nacho ki'kasye ki'zumiwe, 8 nawe u'yo alalye nyama yeni'yo alawu'sombe wu'kenagu'zi wakwe, ku'nguno alav'e waki'yagazya ki'ntu' ki'sondo chamwa Gu'ku' Mulungu. Yi'lamudime muntu' mwenu'yo akomwe na iv'ilingano lya V'aizilaeli.

9 " ‘Aho mulav'e muli'wi'mbu'la viliwa ku'fuma ku' nsi' yinywe, ku'du' mwize muv'e muli'wi'mbu'la mpaka ku' lu'v'i'mbi', ninga ku'du' mwize musu'v'e ku'salala nsalazyo. 10 Ku'du' mwize muv'e muli'su'v'a ku'kuminga nsalazyo ya mizabibu zinywe, ninga ku'solela nzabibu i'zyo zigwile ha nsi'. Mulazilekele ku'nguno ya v'api'na na v'ageni v'izi'li'zi. Ene hu' ni' Gu'ku' Mulungu, Mulungu winywe.

11 " ‘Ku'du' wiv'e, ku'du' u'yombe wu'fi, ninga ku'du' muv'e muli'wikonga.

12 " ‘Ku'du' u'lahi'le ku' wu'fi ku' ku'tu'mi'la lina lyanne, na ku'li'yagazya lina lyamwa Mulungu wako. Ene hu' ni' Gu'ku' Mulungu.

13 " ‘Ku'du' u'mwiwonelezye mwiyo ninga ku'mupuzya nsawo yakwe. Wu'tenensya wa musyala wako ku'du' wikale ku' wako wu'ziku'pee mpaka ndiyu'.

14 " ‘Ku'du' u'mutyomokele nkiv'a, ninga ku'pi'ngani'ka ki'ntu' ha mbele ya muhofu, ali'vi yi'li'ku'dima u'mogohe Mulungu wako. Ene hu' ni' Gu'ku' Mulungu wako.

15 " ‘Ku'du' u'nyonganie lole aho u'li'fumya wu'yangu'. Ku'du' u'v'ezye wu'hegela ku' mupi'na ninga ku'muku'zya muntu' muhanya. Ali'vi u'v'ezye wu'yangu' wa lole ku' mwiyo.

16 " ‘Ku'du' u'sambazye mihayo ya wu'songania mugati' na v'antu' v'ako. Ku'du' u'yombe muhayo ninga gu'mo ha iv'anza u'go gu'kowolile ku'mulengela lu'fu muntu' wa lole. Ene hu' ni' Gu'ku' Mulungu.

17 " ‘Ku'du' u'mutu'u'li'le nsika mwiyo mu moyo gwako. Ali'vi yi'li'ku'dima u'muhame ku' katwipandu' ki'gele u'leke ku'v'a mu wu'kenagu'zi wakwe.

18 " ‘Ku'du' wili'pi'ki'zye ninga ku'tu'u'la igundo ku' yu'mo mugati' na v'antu' v'ako, sumbwa yi'li'ku'dima u'mutogwe u'yo ali' bi'hi' nanho ki'ti' i'vyo witogilwe ev'e mweni'ki'li'. Ene hu' ni' Gu'ku' Mulungu.

19 " ‘Yi'li'ku'dima u'zidime nhama zyanne. Ku'du' wize u'zileke mitugo zyako ziliinwe na mitugo zya mukoli gu'ngi'. Ku'du' wize u'hambe mbiyu' zya mikoli iv'i'li' mu mugu'nda gwako. Ku'du' wize u'v'e u'li'zwala ki'zwalo i'cho ki'sumilwe ku' mikoli iv'i'li' zya wu'zi hekeheke.

20 " ‘Hangi' u'lu' muntu' ninga yu'mo alale na muki'ma muzya u'yo akwiv'ilwe na mugosya yu'ngi', nawe akakomolilwe ku' ki'ntu' ninga ki'mo, ninga ku'leku'li'lwa iyagalu'le, yi'lamudime muntu' mwenu'yo afumiwe masumule. Ali'vi ku'du' v'awu'lagwe ku'nguno muki'ma mwenu'yo wali' akaali' ku'leku'li'lwa iyagalu'le. 21 Mugosya mwenu'yo yi'lamudime alete ng'ondi ayi'fumye ku'mwa Gu'ku' Mulungu bi'hi' na wingi'li'lo wa Ihema lya Ku'sangi'zya yi'v'e ki'taambo cha masumule gakwe cha ku'sini'zya musango. 22 Nawe muhozya alamuv'ezezye wu'swanano ku'v'i'ti'la ku' ng'ondi yeni'yo ya ki'taambo cha ku'sini'zya musango ha mbele yamwa Gu'ku' Mulungu, ku'nguno ya wu'kenagu'zi u'wo wawu'v'ezizye, nawe alatondolwe.

23 " ‘Aho mulav'e mwingi'la ku' nsi' i'yo ya Kanaani na ku'hamba mikoli hekeheke zya miti' zya visumo, mulaviv'azye visumo vyazyo ku'v'a vigiziv'ilwe. Ku' itungo lya myaka idatu' miti' zyeni'zyo zilav'e ki'ti' igizyo na visumo vyazyo vikasye viliwe. 24 Ku' mwaka gwa wu'ne visumo vyazyo vyose vilav'e visondo, ku'nguno ya kalu'mbi'lo ka lu'kumo ku'mwa Gu'ku' Mulungu. 25 Sumbwa mwaka gwa wu'tano mukowolile ku'lya visumo vyazyo. Ku' nzi'la yeni'yi' lyi'mbu'la linywe li'lingi'he. Ene hu' ni' Gu'ku' Mulungu, Mulungu winywe.

26 " ‘Ku'du' mwize mulye nyama ninga yi'mo ya wu'su'lu'le magazi. Ku'du' mwize muv'ezye wu'lagu'zi ninga wu'fumu.

27 " ‘Ku'du' musenye nyele mu mpelo na mitwe, ninga ku'senya ndezu mu mpelo mpelo. 28 Ninga ku'du' mwisalange mu miv'i'li' zinywe, ninga kwiola mu miv'i'li' zinywe ku'nguno ya v'afwile. Ene hu' ni' Gu'ku' Mulungu.

29 " ‘Ku'du' u'muyagazye mwaniki' wako ku' ku'muv'ezya mulav'a, ki'gele nsi' ku'du' yize yi'galu'ki'le ku' wu'lav'a na kokala wu'kenagu'zi wu'hanya.

30 " ‘Yi'li'mudima muzidime nsiku' zya ki'suuho na ku'haku'zya hantu' hasondo ha wanne. Ene hu' ni' Gu'ku' Mulungu.

31 " ‘Ku'du' muv'ayi'le v'a mizimu, ninga ku'v'alonda v'alagu'zi, ki'gele v'akamulagu'le, ku'nguno v'alamuv'ezezye zoma. Ene hu' ni' Gu'ku' Mulungu, Mulungu winywe.

32 " ‘U'lu' munamala wa nvwi' av'e ha mbele yako yi'li'ku'dima wi'me ki'gele u'mupe iku'zyo lyakwe, nanho u'mogohe Mulungu wako. Ene hu' ni' Gu'ku' Mulungu.

33 " ‘U'lu' mugeni mwizi'li'zi ikale haki'mo nanho mu nsi' yako, ku'du' u'muv'ezezye mav'i. 34 Mugeni u'yo ikalile haki'mo nanho av'e ki'ti' muv'yalwa wa ku' winywe, na u'mutogwe ki'ti' i'vi witogilwe ev'e mweni'ki'li', ku'nguno na inywe mwav'age muli' v'ageni ku' nsi' ya Misili. Ene hu' ni' Gu'ku' Mulungu, Mulungu winywe.

35 " ‘Ku'du' u'tu'mi'le vipimo vya wu'yengani aho u'li'pima wu'lihu, wu'timbu ninga wingi. 36 Yi'li'ku'dima u'tu'mi'le mizani zya lole na ngelo zya lole*. Ene hu' ni' Gu'ku' Mulungu, Mulungu winywe, u'yo namufumizye ku' nsi' ya Misili.

37 " ‘Yi'li'mudima muzidime nzi'la zyanne zyose na nhama zyanne zyose, na ku'zilonda. Ene hu' ni' Gu'ku' Mulungu.’ "