1 Gu'ku' Mulungu wamuwi'laga Mose ku' lu'gu'lu' lwa Sinai, 2 "U'v'awi'le V'aizilaeli ati', ‘Aho mulav'e mwafika ku' nsi' i'yo nu'mupa inywe, mulalu'ki'ndi'ke lu'siku' lwa ki'suuho ku'nguno ya nsi' ku' ku'muku'zya Gu'ku' Mulungu, ki'gele yi'suuhe ki'la mwaka gwa mupungati'. 3 Myaka mukaga mulahambe migu'nda zinywe, na mulasonzole mizabibu zinywe na ku'yav'a visumo vyazyo. 4 Ali'vi mwaka gwa mupungati' gu'lav'e gwa ki'suuho cha ku'suuhya nsi', yi'li' Sabato ku'mwa Gu'ku' Mulungu. Ku'du' mwize muhambe mbiyu' mu migu'nda zinywe ninga ku'sonzola matambi' ga mizabibu zinywe. 5 Ku'du' mwize mwi'mbu'le magwa ninga ku'gu'lu'la mizabibu i'zyo mukasonzolile. Gwenu'go gu'li' mwaka gwa ku'keeleka migu'nda. 6 Ali'vi muli'zumi'ziwa ku'yav'a viliwa vya mwaka gwa ki'suuho ku'nguno ya ku'tu'mi'la inywe v'eni'ki'li', v'akumba v'inywe v'a ki'gosya na v'a ki'ki'ma, v'asyala na v'ageni v'izi'li'zi av'o v'ikalile na inywe. 7 Hangi' nsi' yi'lalisye mitugo zinywe na ndimu zya mu ipolu i'zyo zili' mu nsi' yinywe.

8 " ‘Mulav'azye myaka mupungati' kali' mupungati' ki'gele visuuho mupungati' viv'e vya myaka maku'mi ane na kenda. 9 Aho zilav'e zyav'i'ta myaka zyeni'zyo, ku' lu'siku' lwa iku'mi lwa mwezi gwa mupungati', haho mulafuule milangale ku' ki'la lwandi'. Mugati' na Lu'siku' lwa Wu'swanano, mulafuule milangale mu nsi' yinywe yose. 10 Mwaka gwa maku'mi atano mulagu'sondohye na ku'tangazya wiyagalu'le mugati' na nsi' ku' v'antu' v'ose. Ki'la yu'mo u'yo ndi' wagu'zya mugu'nda gwa isaalo lyakwe alagu'su'v'i'le, na ki'la yu'mo u'yo ndi' wigu'zya ku'v'a musese alasu'v'e ku' igongo lyakwe. 11 Mwaka gwenu'go gu'lav'e gwa Mwanya gwa Wiyagalu'le. Ku'du' mwize muhambe ninga kwi'mbu'la magwa, ninga ku'gu'lu'la mizabibu i'zyo mukasonzolile. 12 Ku'nguno gu'lav'e mwaka gwa mwanya na musondo ku' winywe. Mulalye viliwa vya magwa mu migu'nda.

13 " ‘Ku' mwaka gwenu'go ki'la yu'mo alali'su'v'i'le isaalo lyakwe. 14 Hangi' u'lu' u'li'gu'la ku' mwiyo mugu'nda, ninga ku'mugu'zi'zya mwiyo, ku'du' mwize mwikope inywe v'eni'ki'li'. 15 U'lagu'gu'le mugu'nda ku' muntu' mwiyo ku' ku'v'azya myaka zya ku'fumi'i'la ku' Mwanya gwa Wiyagalu'le u'go gwav'i'tile. Yaani alagu'gu'zye ku' wako ku'londana na lu'v'alo lwa myaka zya lyi'mbu'la i'zyo zilav'e zyasigalile ku'fika ku' Mwanya gwa Wiyagalu'le gwa ku' mbele. 16 U'lu' myaka ziv'e mingi u'longezye mupango, na u'lu' myaka ziv'e midoo u'lapu'ngu'zye mupango, ku'nguno i'cho alaku'gu'zi'zye nhana ki'lav'e lu'v'alo lwa myaka zya lyi'mbu'la. 17 Ku'du' mwize mwikope, sumbwa mumogohe Mulungu winywe. Ene hu' ni' Gu'ku' Mulungu, Mulungu winywe.

18 " ‘Muzidime nhama zyanne, na ku'zilonda nzi'la zyanne, ki'gele mwikale na ku'hola mu nsi'. 19 Nayo nsi' yi'lafumye viliwa vyayo, na inywe mulalye na kwiku'ta, na mulikale mwenu'mo na ku'hola. 20 Mukowolile kwiwu'zya, "Ku'lalye ki' ha mwaka gwa mupungati' u'lu' ku'kahambile ninga kwi'mbu'la viliwa viswe?" 21 Hohene, ene ndadosye lu'v'ango lu'hanya mu nsi' yinywe ku' mwaka gwa mukaga, nayo yi'lamufumi'zye viliwa vya ku'gelani'la myaka idatu'. 22 Mugati' na mwaka gwa munane mulahambe mbiyu' ku'no muli'lya viliwa vya kale na mulendeleye ku'lya du' mpaka mwaka gwa kenda aho mulalamule hangi' kwi'mbu'la.

23 " ‘Nsi' ku'du' yize yi'gu'ziwe wu'li'ko wu'li'ko, ku'nguno nsi' yi'li' yanne, na inywe muli' v'ageni na v'av'i'tayi'la mu nsi' yanne. 24 Mugati' na nsi' yinywe i'yo yi'lav'e mu makono ginywe mulav'e na ki'ti'le cha ku'zumya ku'komola migu'nda.

25 " ‘U'lu' mwiyo api'nahe, na agu'zye lwandi' lwa mugu'nda gwakwe, hohene mudu'gu'ye wa bi'hi' alahakomole aho wagu'zizye mudu'gu'ye. 26 U'lu' muntu' mwenu'yo ali' wu'du'hu' mudu'gu' wa bi'hi' wa ku'gu'komola, ali'vi apandi'ke nsawo ya ku'kowola ku'gu'komola mugu'nda gwakwe, 27 hohene, alav'azye myaka ku'fumi'i'la aho ndi' wagu'zya na ku'li'pa mupango gwago, nawe akowolile ku'li'su'v'i'la isaalo lyakwe. 28 Ali'vi u'lu' aleke ku'pandi'ka nsawo ya ku'gu'komola, hohene gu'lasigale mu makono ga u'yo wa ku'gu'la mpaka mwaka gwa Mwanya gwa Wiyagalu'le. Ku' mwaka gwenu'go mugu'nda gu'laleku'li'lwe, nawe akowolile ku'li'su'v'i'la isaalo lyakwe.

29 " ‘U'lu' muntu' agu'zye nnumba i'yo yi'li' mugati' na kaya ya ngomwa, akowolile ku'yi'komola mugati' na mwaka gu'mo. Ku' mwaka gwenu'go gu'mo ali' na lole ya ku'yi'komola. 30 U'lu' nnumba yeni'yo ya mu ngomwa akayi'komolile musav'a ku' itungo lya mwaka gu'mo, hohene yi'lav'e nsawo ya wu'li'ko wu'li'ko ku' wa ku'gu'la na ku' wu'v'yalwa wakwe wose. Yi'kasye yi'su'v'iwe ku' mwaka gwenu'go gwa Mwanya gwa Wiyagalu'le. 31 Ali'vi nnumba zya mu magu'ngu'li i'zyo zikav'ile mu ngomwa zilav'aziwe ki'ti' migu'nda. Nnumba zyeni'zyo zikowolile ku'komolwa, nazyo zilasu'v'iwe ku' mwaka gwa Mwanya gwa Wiyagalu'le. 32 Ninga vyeni'vyo, V'alawi v'ali'zumi'ziwa ku'zikomola nnumba zyav'o i'zyo zili' mu kaya zyav'o ku' matungo gose. 33 U'lu' yu'mo mugati' na V'alawi akav'ile ku'yi'tu'mi'la lole yakwe ya ku'yi'komola, hohene nnumba i'yo yagu'ziwa yi'lasu'v'iwe ku' musav'a ku' mwaka gwa Mwanya gwa Wiyagalu'le, ku'nguno nnumba zya mu kaya zya V'alawi v'apiv'ilwe ku'v'a isaalo lyav'o ku'fuma ku' V'aizilaeli. 34 Ali'vi migu'nda zya ku'di'mi'zya zya kaya zya V'alawi, ku'du' zigu'ziwe, ku'nguno yi'li' nsawo yav'o ya wu'leka.

35 " ‘U'lu' mwiyo api'nahe mpaka apotwe kwisu'nga na ali' haki'mo nanho, yi'li'ku'dima u'musu'nge na ku'mugwasya ki'ti' mugeni ninga muv'i'tayi'la. 36 Ku'du' u'sole wu'su'lu' ku' wakwe, sumbwa u'mogohe Mulungu wako, ki'gele mwiyo endeleye kwikala haki'mo nanho. 37 Ku'du' u'mukopisye hela ninga ku'mupa ki'liwa ki'gele u'pandi'ke wu'su'lu'. 38 Ene hu' ni' Gu'ku' Mulungu, Mulungu wako, u'yo naku'fumizye ku' nsi' ya Misili ki'gele nku'pe nsi' ya Kanaani, nanne mbe Mulungu wako.

39 " ‘U'lu' mwiyo api'nahe, nawe ize kwigu'zya ku' wako, ku'du' wize u'mutu'mamye ki'ti' musese. 40 Alikale nanho ki'ti' mutu'mami wa wu'tenensya ninga ki'ti' mugeni mwizi'li'zi. Alaku'tu'mami'le mpaka mwaka gwa Mwanya gwa Wiyagalu'le gwa myaka maku'mi atano. 41 Haho u'lamuleku'li'le iyagalu'le mweni'ki'li' na v'ana v'akwe, nawe alasu'v'e ku' v'antu' v'a igongo lyakwe na ku' nsawo ya v'agu'ku'ye. 42 Ku'nguno V'aizilaeli v'ali' v'akumba v'anne av'o nav'afumizye ku' Misili. Ku'du' v'agu'ziwe ki'ti' v'asese. 43 Ku'du' u'muteme mwiyo ku' wu'kandi, sumbwa u'mogohe Mulungu wako. 44 V'asese v'ako v'a ki'gosya na v'a ki'ki'ma u'lav'agu'le ku'fuma ku' nsi' zya bi'hi' i'zyo ziku'pilimile. 45 Hangi' u'kowolile ku'v'agu'la ku'fuma ku' v'ageni v'izi'li'zi av'o v'ikalile haki'mo nanho, na v'a magongo gav'o av'o v'av'yali'lilwe mu nsi' yinywe, nav'o v'alav'e nsawo yako. 46 V'enav'o u'kowolile ku'v'asaali'kya ku' v'ana v'ako ku'v'a nsawo yav'o ya wu'leka, na u'kowolile ku'v'av'ezya v'asese, ali'vi v'adu'gu'yo V'aizilaeli ku'du' u'v'ateme ku' wu'kandi.

47 " ‘U'lu' mugeni mwizi'li'zi ninga muv'i'tayi'la u'yo ikalile haki'mo nanho adamalu'ke, na mwiyo api'nahe na kwigu'zya ku' mwenu'yo mugeni mwizi'li'zi ninga ku' muv'i'tayi'la, ninga ku' yu'mo mugati' na igongo lyav'o, 48 aho alav'e wigu'zya akowolile ku'komolwa. Yu'mo mugati' na v'adu'gu'ye akowolile ku'mukomola. 49 Ise muhanya ninga mudo, ninga mwana lya mwenu'yo ise, ninga mudu'gu'ye yu'ngi' wa igongo lya bi'hi' akowolile ku'mukomola. Akowolile kwikomola mweni'ki'li' u'lu' apandi'ke nsawo. 50 Mweni'ki'li' na wa ku'mugu'la, v'alav'azye myaka ku'lamuli'la aho ndi' wigu'zya mpaka mwaka gwa Mwanya gwa Wiyagalu'le. Lu'v'alo lwa ku'leku'li'lwa kwakwe lu'lagelani'le na myaka i'zyo watu'mami'la aho wav'age mukumba. Itungo lyeni'lo li'lav'aziwe ki'ti' itungo lya mutu'mami wa wu'tenensya. 51 U'lu' ziv'e zikaali' myaka mingi, yi'lamudime ku'li'pa lu'v'alo lu'hanya ku' ku'komolwa kwakwe, ku'londana na hela i'zyo ndi' wagu'li'lwa. 52 U'lu' ziv'e zyakasigala myaka midoo ku'fiki'la mwaka gwa Mwanya gwa Wiyagalu'le, alafumye lu'v'alo lwa ku'gelani'la ku' ku'komolwa kwakwe. 53 Itungo lyose i'lo alav'e ku'mwa gu'ku' wakwe, alatu'mame ki'ti' mutu'mami wa wu'tenensya. Mwenu'yo wa ku'mugu'la ku'du' ize amuteme ku' wu'kandi ha mbele ya minso ginywe. 54 Ninga u'lu' akakomolilwe mugati' na nzi'la zyeni'zi, mweni'ki'li' na v'ana v'akwe v'alaleku'li'lwe v'iyagalu'le ku' mwaka gwa Mwanya gwa Wiyagalu'le gwa myaka maku'mi atano. 55 Ku'nguno V'aizilaeli v'ali' v'akumba v'anne av'o nav'afumizye ku' nsi' ya Misili. Ene hu' ni' Gu'ku' Mulungu, Mulungu winywe.