Levítico 24

Ku’tu’u’la tala ha mbele ya Hantu' Hasondo Muno

1 Gu’ku' Mulungu wamuwi’laga Mose, 2 "U’v’alagi’li’zye V’aizilaeli v’aku’letele maguta masoso ga muzeituni ago gagongilwe ku’nguno ya mwanga, ki’gele tala ziv’e zili’v’aka nsiku' zyose. 3 Aloni alazitu’u’le tala zyeni’zyo ha ibala na muki’ngo u’go gu’li' mu Ihema lya Ku’sangi’zya, ki’gele ziv’ake ha mbele yamwa Gu’ku' Mulungu ku’fumi’i’la mpi’ndi' mpaka ndiyu' bila ku’zima. Yeni’yi' yi’li' nhama ya nhananhana ku' wu’v’yalwa winywe u’wo wu’lalonde. 4 Alazitu’u’le tala zyeni’zyo ha ki’nala cha zahabu nsoso ziv’e zili’v’aka nsiku' zyose ha mbele yamwa Gu’ku' Mulungu.

5 "U’lasole wu’fuma wu’nelezu na ku’komela migate iku’mi na iv’i’li' ku' ku’tu’mi’la kilo iv’i’li' zya wu’fuma wu’nelezu ku' ki’la mugate. 6 Migate zyeni’zyo zilahelwe mihelo iv’i’li', ki’la muhelo migate mukaga. U’lazitu’u’le ha mbele yamwa Gu’ku' Mulungu ha igu’lya na meza i’yo yi’v’eziv’ilwe ku' zahabu nsoso. 7 Ki’la muhelo u’latu’u’le wu’vumba wu’soso, ki’gele wu’v’e kalu’mbi’lo ka ku’zigya ku’mwa Gu’ku' Mulungu ku’nguno ya migate. 8 Ki’la lu’siku' lwa ki’suuho, Aloni alazihele migate zyeni’zyo ha mbele yanne, ene Gu’ku' Mulungu, ku’nguno ya V’aizilaeli ku’v’a ilagano lya nhananhana. 9 Lwenu’lu' lu’li' lwandi' lwamwa Aloni na v’ana v’akwe v’a ki’gosya. V’alalyi’le migate zyeni’zyo ha hantu' hasondo, ku’nguno lu’li' lwandi' lu’sondo lwa kalu’mbi’lo ku’mwa Gu’ku' Mulungu. Lyeni’lo li’li' ifungu lyav’o lya nhananhana."

Ntyomo na lu’duko lwayo

10 Yav’aga musu’mbana yu’mo u’yo nnina wav’age Muizilaeli na ise wav’age Mumisili. Musu’mbana mwenu’yu' wayaga ha nkambi' ya V’aizilaeli. Lyawu’kaga isola mu nkambi' mugati' na Muizilaeli na musu’mbana mwenu’yo. 11 Hangi' musu’mbana mwenu’yo, u’yo nnina witanagwe Shelomiti, mwaniki' mwana wamwa Dibili wa igongo lya Dani, wali’tyomokelaga lina lyamwa Mulungu na ku’li’fusa. Haho v’antu' v’amufilaga ku’mwa Mose. 12 Nav’o v’amulugali’laga na ku’lindi’la i’vi Gu’ku' Mulungu alayombe.

13 Haho Gu’ku' Mulungu wamuwi’laga Mose, 14 "Mufumye mwenu’yo mutyomoki ha ibala na nkambi', na v’ose av’o v’amwigilwe ali’tyomoka v’atu’u’le makono gav’o ha igu’lya na mutwe gwakwe, hangi' iv’ilingano lyose v’amuwu’lage ku' ku’mugu’ma na mawe. 15 U’v’awi’le V’aizilaeli ati', ‘U’lu' muntu' ninga yu’mo amutyomokele Mulungu wakwe, yi’lamudime awu’sombe wu’kenagu’zi wakwe. 16 Ki’la muntu' u’yo alali’tyomokele lina lyamwa Gu’ku' Mulungu yi’lamudime awu’lagwe. Iv’ilingano lyose li’lamuwu’lage ku' ku’mugu’ma na mawe, av’e mugeni mwizi’li’zi ninga muv’anda. 17 Muntu' u’yo alamuwu’lage muntu' mwiye yi’lamudime nawe ku’wu’lagwa. 18 Muntu' u’yo alawu’lage mutugo gwa muntu' mwiye yi’lamudime ali’pi’ki’ziwe, wu’panga ku' wu’panga. 19 Muntu' u’yo alamuvulazye muntu' mwiye, nawe alali’pi’ki’ziwe vyene vivyo ki’ti' i’vyo wamuvulazyaga mwiye, 20 iguha ku' iguha, linso ku' linso, lino ku' lino. Ki’la muntu' u’yo alamuvulazye mwiye nawe alali’pi’ki’ziwe vyene vivyo. 21 Muntu' u’yo alawu’lage mutugo gwa mwiye alafumye ndi’pi, sumbwa u’yo alawu’lage muntu' nawe yi’lamudime ku’wu’lagwa. 22 Nzi’la yeni’yi' yi’li' ya v’ose, av’e mugeni mwizi’li’zi ninga muv’anda. Ene ni' Gu’ku' Mulungu, Mulungu winywe.’ " 23 Hohene Mose wav’awi’laga V’aizilaeli gose genago. Nav’o v’amufumyaga ha ibala na nkambi' mutyomoki mwenu’yo na ku’muwu’laga ku' ku’mugu’ma na mawe. V’aizilaeli v’av’ezyaga ki’ti' i’vyo Gu’ku' Mulungu wamulagi’li’zizye Mose.