1 Hangi' Gu'ku' Mulungu wamuwi'laga Mose ati', 2 "U'v'awi'le V'aizilaeli ati', ‘U'lu' muki'ma wav'a na mwitungo na kwipeku'la mwana wa ki'gosya, alav'e na zoma nsiku' mupungati' ki'ti' i'vyo ali'v'aga na zoma ku'londana na nsiku' zyakwe i'zyo zili' ku' ki'ti'le cha v'aki'ma. 3 Mwana mwenu'yo alaputwe nyu'nzu' yakwe mu lu'siku' lwa munane. 4 Hangi' na muki'ma mwenu'yo alikale itungo lya nsiku' maku'mi adatu' na idatu', ki'gele ku'sosohiwa zoma ya magazi gakwe. Akasye azumi'ziwe ku'kuumya ki'ntu' ninga ki'mo i'cho ki'li' ki'sondo ninga ku'ya ha lwandi' lwa hantu' hasondo, mpaka aho zilav'e zyagelani'la nsiku' zya ku'sosohiwa kwakwe. 5 Sumbwa u'lu' av'e wipeku'laga mwana wa ki'ki'ma, hohene muki'ma mwenu'yo alav'e na zoma ku' itungo lya mayuma av'i'li' ki'ti' i'vyo yi'li' ku' ki'ti'le cha v'aki'ma. Hangi' alikale nsiku' maku'mi mukaga na mukaga, ki'gele ku'sosohiwa zoma ya magazi gakwe.

6 " ‘Hangi' nsiku' zya ku'sosohiwa ku'nguno ya ku'v'yala kwakwe mwana wa ki'gosya ninga wa ki'ki'ma, aho zilav'e zyagelani'la, muki'ma mwenu'yo alalete kadi'lana ka nkolo ka mwaka gu'mo ku'v'a ki'taambo cha ku'zigya, haki'mo na ipu'u'la ninga ikune lya nkunda ku'nguno ya ki'taambo cha ku'sini'zya wu'kenagu'zi. Alalete bi'hi' na wingi'li'lo wa Ihema lya Ku'sangi'zya, na ku'mupa muhozya. 7 Haho muhozya alavifumye ha mbele yamwa Gu'ku' Mulungu na ku'muv'ezezya wu'swanano, nawe alav'e wasosohiwa zoma ya magazi gakwe.

" ‘Yeni'yo hu' nhama ku' muki'ma u'yo alav'e wav'yalaga mwana wa ki'gosya ninga wa ki'ki'ma. 8 U'lu' muki'ma mwenu'yo wav'a ali' wu'du'hu' nsawo ya ku'pandi'ka kadi'lana ka nkolo, alalete mapu'u'la av'i'li' ninga makune av'i'li' ga nkunda, li'mo ku'nguno ya ki'taambo cha ku'zigya na lya wu'v'i'li' ku'nguno ya ki'taambo cha ku'sini'zya wu'kenagu'zi. Haho muhozya alamuv'ezezye wu'swanano, nawe alav'e wasosoka.’ "