1 Gu'ku' Mulungu wendeleyaga ku'muwi'la ati', "U'lu' muntu' ali'fumya ki'taambo cha kwiswanania, nawe ali'fumya ng'ombe, yi'v'e ngosya ninga nki'ma, yi'lamudime afumye i'yo yi'li' wu'du'hu' wu'lema ha mbele yamwa Gu'ku' Mulungu. 2 Alatu'u'le mukono gwakwe ha igu'lya na mutwe gwa ng'ombe yeni'yo, na ku'yi'si'nzi'la bi'hi' na wingi'li'lo wa Ihema lya Ku'sangi'zya. Haho v'ahozya, v'ana v'amwa Aloni v'a ki'gosya, v'alali'nyanyagi'le ihozezyo magazi gayo ku' ki'la lwandi'. 3 Ku'fuma ku' ki'taambo cheni'cho cha kwiswanania, alafumye kalu'mbi'lo ka ku'zigya ku'mwa Gu'ku' Mulungu: lu'sasa lose na maguta ago gali' mu nda, ga ng'ombe yeni'yo, 4 nfigo iv'i'li' haki'mo na maguta gazyo, ago gali' bi'hi' na muki'mbi'li', na lwandi' lu'soga lwa iti'ma. 5 Hangi' v'ana v'amwa Aloni, v'alavizigye ha igu'lya na ihozezyo, haki'mo na ako kalu'mbi'lo ka ki'taambo cha ku'zigya i'cho ki'li' ha igu'lya na nkwi i'zyo zili'v'aka moto. Kenako kali' kalu'mbi'lo ka ku'zigya ako kali' na wu'motu wa ku'mutogezya Gu'ku' Mulungu.

6 "Aho muntu' alav'e ali'mufumi'zya Gu'ku' Mulungu ki'taambo cha kwiswanania cha nkolo ninga mbu'li, yi'v'e ngosya ninga nki'ma, yi'lamudime afumye i'yo yi'li' wu'du'hu' wu'lema. 7 U'lu' muntu' afumye nkolo ku'v'a kalu'mbi'lo kakwe, haho alakafumye ha mbele yamwa Gu'ku' Mulungu, 8 alatu'u'le mukono gwakwe ha igu'lya na mutwe gwayo, nawe alayi'si'nze ha mbele ya Ihema lya Ku'sangi'zya. Hangi' v'ana v'amwa Aloni v'alanyanyagi'le magazi gayo ku' ki'la lwandi' lwa ihozezyo. 9 Hangi' ku'fuma ku' ki'taambo cheni'cho cha kwiswanania, alamufumi'zye Gu'ku' Mulungu maguta gayo ku'v'a kalu'mbi'lo ka ku'zigya: muki'la gwayo u'go gu'puti'lilwe bi'hi' na muki'mbi'li' haki'mo na maguta gago, lu'sasa lose na maguta gose ago gali' mu nda, 10 nfigo iv'i'li' na maguta gazyo ago gali' bi'hi' na muki'mbi'li' na lwandi' lu'soga lwa iti'ma. 11 Nawe muhozya alavizigye ha igu'lya na ihozezyo ku'v'a kalu'mbi'lo ka ki'liwa ka ku'zigya ku'mwa Gu'ku' Mulungu.

12 "U'lu' kalu'mbi'lo kakwe kav'e ka mbu'li, alakafumye ha mbele yamwa Gu'ku' Mulungu, 13 alatu'u'le mukono gwakwe ha igu'lya na mutwe gwayo, na ku'yi'si'nzi'la ha mbele ya Ihema lya Ku'sangi'zya. Hangi' v'ana v'amwa Aloni v'alanyanyagi'le magazi gayo ku' ki'la lwandi' lwa ihozezyo. 14 Ku'fuma ku' kalu'mbi'lo ako ali'fumya, alamufumi'zye Gu'ku' Mulungu kalu'mbi'lo kakwe ka ku'zigya: lu'sasa lose na maguta ago gali' mu nda, 15 nfigo iv'i'li' na maguta gazyo ago gali' bi'hi' na muki'mbi'li' na lwandi' lu'soga lwa iti'ma. 16 Nawe muhozya alavizigye ha igu'lya na ihozezyo ku'v'a kalu'mbi'lo ka ki'liwa ka ku'zigya ako kali' na wu'motu wa ku'togezya. Maguta gose ga ki'taambo gali' gamwa Gu'ku' Mulungu. 17 Muhayo gwenu'gu' gu'ku'v'a nhama ya nhananhana ku' wu'v'yalwa winywe u'wo wu'lalonde, mu wikalo winywe wose, ku'v'a mukasye mulye ninga hado maguta ga ndimu ninga nyama ya magazi."