Levítico 7

Ki’taambo cha ku’sini’zya musango

1 " ‘I’yi' hu' nhama ku’nguno ya ki’taambo cha ku’sini’zya musango. Cheni’cho ki’li' ki’sondo muno. 2 Yi’li’koov’iwa ki’taambo cha ku’sini’zya musango ki’si’nzi’lwe aho ki’li’si’nzi’lagwa ki’taambo cha ku’zigya, na magazi gacho galanyanyagi’lwe ku' ki’la lwandi' lwa ihozezyo. 3 Maguta gacho gose galafumiwe: maguta ga muki’la na lu’sasa lwacho ago gakumbi’lile lwandi' lwa mugati', 4 nfigo iv’i’li' haki’mo na maguta gazyo ago gali' bi’hi' na muki’mbi’li' na lwandi' lu’soga lwa iti’ma. 5 Muhozya alavizigye ha igu’lya na ihozezyo ku’v’a kalu’mbi’lo ka ku’zigya ku’mwa Gu’ku' Mulungu. Cheni’cho ki’li' ki’taambo cha ku’sini’zya musango. 6 Ki’la mugosya mugati' na mugana gwa v’ahozya akowolile ku’lya ki’taambo cheni’cho, ali’vi ki’lalyi’lwe ha hantu' hasondo. Ki’li' ki’sondo muno. 7 Nhama yeni’yi' ya ki’taambo cha ku’sini’zya musango yi’gelani’lile na i’yo ya ki’taambo cha ku’sini’zya wu’kenagu’zi. Muhozya u’yo ali’v’ezya wu’swanano hu' mwene alaki’sole. 8 Hangi' ninga ku' ki’taambo cha ku’zigya cha ki’la muntu' muhozya u’yo alaki’egezye, hu' mwene alayi’sole ndi’li' ya ndimu i’yo yafumiv’agwa. 9 Ki’la kalu’mbi’lo ka mbutoo ako kakomelilwe mu liko ninga ku’tekwa mu ifuli’la ninga mu ki’kalango, kose kalav’e ka muhozya u’yo ali’kegezya. 10 Ki’la kalu’mbi’lo ka mbutoo ako kakakomelwa, kav’e kaseleganiv’ilwe na maguta ga muzeituni ninga kav’e kakaseleganiwa, kalav’e ka v’ana v’amwa Aloni, na v’ose v’alagawu’lwe ku' ku’gelani’la.

Ki’taambo cha kwiswanania

11 " ‘I’yi' hu' nhama ku’nguno ya ki’taambo cha kwiswanania i’cho muntu' akowolile ku’mufumi’zya Gu’ku' Mulungu. 12 U’lu' muntu' ize afumye ki’taambo cha kwiswanania ku’nguno ya ku’mulu’mbi’la Mulungu, yi’lamudime aki’fumye haki’mo na migate zya mikoli zyeni’zi i’zyo zikatumba: migate zya wu’seleganiwe na maguta ga muzeituni, migate milelemazu zya wu’v’ilwe maguta, na migate zya wu’fuma wu’nelezu u’wo wu’seleganiv’ilwe na maguta. 13 Hangi' alalete kalu’mbi’lo ka migate i’zyo zili' na itumbyo, haki’mo na ki’taambo chakwe cha kwiswanania ku’nguno ya ku’lu’mba. 14 Mugati' na migate zyeni’zyo, alamufumi’zye Gu’ku' Mulungu mugate gu’mo ku' ki’la mukoli. Migate zyeni’zyo zilav’e zya muhozya u’yo ali’nyanyagi’la magazi ga ki’taambo cha kwiswanania ha ihozezyo. 15 Yi’li’koov’iwa nyama ya ki’taambo cha kwiswanania ku’nguno ya ku’lu’mba yi’liwe lu’siku' lwene lu’lo u’lo yi’li’fumiwa. Ku’du' ize alekele ki’ntu' ninga ki’mo mpaka ndiyu'.

16 " ‘Ali’vi mbe ki’taambo chakwe ki’li' ku’nguno ya kalu’mbi’lo ka ki’lu’mbo ninga ka ku’togwa, ki’taambo cheni’cho ki’laliwe lu’siku' lwene lu’lo aho ki’li’fumiwa, sumbwa ki’ntu' i’cho ki’lasigali’le ki’kowolile ku’liwa wangalu’ke. 17 Ali’vi nyama ninga yi’mo ya ki’taambo i’yo yi’lasigali’le mpaka lu’siku' lwa wu’datu' yi’lazigiwe mu moto. 18 Hangi' nyama ninga yi’mo ya ki’taambo cha kwiswanania u’lu' yi’liwe lu’siku' lwa wu’datu', Gu’ku' Mulungu akasye ayi’zumye. Yi’kasye yi’v’aziwe ku' muntu' u’yo wayi’fumyaga, ku’nguno yi’li' zoma. Muntu' u’yo alalye lwandi' lwayo ninga lu’mo yi’lamudime ku’wu’somba wu’kenagu’zi wakwe. 19 Nyama yeni’yo ya ki’taambo i’yo yi’lakuumye ki’ntu' ki’zomalu’ku ku’du' yize yi’liwe. Nyama yeni’yo yi’lazigiwe mu moto. V’ose av’o v’ali' v’asoso v’akowolile ku’lya nyama yi’ngi'. 20 Ali’vi muntu' ninga yu’mo u’yo ali' na zoma u’lu' ize alye nyama ninga yi’mo ya ki’taambo cha kwiswanania chamwa Gu’ku' Mulungu, yi’lamudime muntu' mwenu’yo akomwe na iv’ilingano lya V’aizilaeli. 21 U’lu' muntu' ninga yu’mo akuumye ki’ntu' ki’zomalu’ku, wu’v’e wu’zomalu’ku wa muntu', ninga ndimu i’yo yi’li' zoma, ninga ki’ntu' ki’mo cha igayi’li’zyo i’cho ki’li' zoma, hangi' alye nyama ninga yi’mo ya ki’taambo cha kwiswanania chamwa Gu’ku' Mulungu, yi’lamudime muntu' mwenu’yo akomwe na iv’ilingano lya V’aizilaeli.’ "

Igizyo lya ku’lya maguta na magazi

22 Gu’ku' Mulungu wamuwi’laga Mose ati', 23 "V’awi’le V’aizilaeli ati', ‘Ku’du' mulye maguta ga ndimu, gav’e ga ng’ombe, nkolo ninga mbu’li. 24 Maguta ga ndimu ya wifwi’le yeni’ki’li' ninga yatandagu’lilwe na ndimu ya mu ipolu gakowolile ku’tu’mama ku' muli’mo gu’ngi', ali’vi muzilo ku’du' mwize mugalye. 25 Muntu' u’yo alalye maguta ga ndimu i’yo yafumiv’agwa kalu’mbi’lo ka ku’zigya ku’mwa Gu’ku' Mulungu, yi’lamudime akomwe na iv’ilingano lya V’aizilaeli. 26 Ki’la aho mulakikale ku’du' mwize mulye nyama ya magazi ninga ya ki’ntu' ki’mo, yi’v’e ya nnoni ninga ya ndimu. 27 Muntu' ninga yu’mo u’lu' ize alye nyama ya magazi, yi’lamudime muntu' mwenu’yo akomwe na iv’ilingano lya V’aizilaeli.’ "

Ifungu lya V’ahozya

28 Gu’ku' Mulungu wamuwi’laga Mose ati', 29 "U’v’awi’le V’aizilaeli ati', ‘Muntu' u’yo ali’leta ki’taambo cha kwiswanania ku’mwa Gu’ku' Mulungu, yi’lamudime afumye lwandi' lwacho ku’fuma ku' ki’taambo cheni’cho ku’v’a kalu’mbi’lo ku’mwa Gu’ku' Mulungu. 30 Alalete kalu’mbi’lo ka ku’zigya ku’mwa Gu’ku' Mulungu ku' makono gakwe mweni’ki’li'. Alalete maguta ga yeni’yo ndimu haki’mo na ki’dali, nawe alaki’wu’sye ki’v’e lu’manyi’lo lwa ku’mufumi’zya kalu’mbi’lo Gu’ku' Mulungu. 31 Muhozya alagazigye maguta gose ha igu’lya na ihozezyo, ali’vi ki’dali ki’lav’e chamwa Aloni na v’aane v’a ki’gosya. 32 Itango lya ndimu lya ku' mulyi’la lya ki’taambo cha kwiswanania mulamupe muhozya, 33 yaani mwana wamwa Aloni u’yo alav’e ali’wegezya magazi na maguta ga ki’taambo cha kwiswanania hu' mwene alapiwe itango lyeni’lo lya mulyi’la ku’v’a ifungu lyakwe. 34 Ku’fuma ku' ki’la ki’taambo cha kwiswanania cha V’aizilaeli, ene Mulungu nasolaga ki’dali i’cho chawu’siv’agwa haki’mo na i’lo itango i’lo lyafumiv’agwa, nanne nav’apaga v’ahozya, Aloni na v’aane ku’v’a ifungu lyav’o lya nhananhana ku’fuma ku' V’aizilaeli.’ "

35 Lwenu’lu' hu' lwandi' lwa kalu’mbi’lo ka ku’zigya kamwa Gu’ku' Mulungu u’lo lwakomwa ku’nguno yamwa Aloni na v’aane, ku’fuma lu’siku' u’lo ndi' v’ali’simi’kwa ku’nguno ya ku’mutu’mami’la Gu’ku' Mulungu ku' muli’mo gwa wu’hozya. 36 Lu’siku' u’lo ndi' v’ali’v’ilwa maguta, Gu’ku' Mulungu ndi' walagi’li’zya ati', V’aizilaeli v’av’ape lyeni’li' ku’v’a ifungu lyav’o lya nhananhana ku' wu’v’yalwa wav’o u’wo wu’lalonde. 37 Zyeni’zyo hu' nhama zya ki’taambo cha ku’zigya, kalu’mbi’lo ka mbutoo, ki’taambo cha ku’sini’zya wu’kenagu’zi, ki’taambo cha ku’sini’zya musango, ki’taambo cha ku’simi’ki’la v’ahozya, na ki’taambo cha kwiswanania, 38 i’zyo Gu’ku' Mulungu ndi' wamupa Mose ku' igu’lya na lu’gu’lu' lwa Sinai, lu’siku' u’lo ndi' wav’alagi’li’zya V’aizilaeli v’alete kalu’mbi’lo kav’o ku’mwa Gu’ku' Mulungu, ku' ibalangu' lya Sinai.