1 Hangi' Gu'ku' Mulungu wamuwi'laga Mose, 2 "U'v'awi'le V'aizilaeli ati', ‘I'zi hu' nsiku' zya myanya ku'mwa Gu'ku' Mulungu, i'zyo mulazitangazye ku'v'a nkuti'la nsondo. I'zi hu' zyene natu'u'lile.

3 " ‘Ku'lav'e na nsiku' mukaga zya ku'tu'mama mili'mo, ali'vi lu'siku' lwa mupungati' lu'li' lu'siku' lwa ki'suuho na nkuti'la nsondo. Ku'du' mwize mutu'mame muli'mo ninga gu'mo. Yeni'yo yi'li' Sabato nsondo ku'mwa Gu'ku' Mulungu mugati' na wikalo winywe wose.

4 " ‘I'zi hu' nsiku' zya myanya zyamwa Gu'ku' Mulungu i'zyo mulav'ezye nkuti'la nsondo, i'zyo mulatangazye ku' itungo i'lo li'tu'u'lilwe. 5 Lu'siku' lwa iku'mi na ine lwa mwezi gwa kwandya, Pasaka yamwa Gu'ku' Mulungu yi'lav'e yi'li'lamula mpi'ndi'. 6 Lu'siku' lwa iku'mi na itano lwa mwezi gwenu'go gwa kwandya, gu'lav'e gu'li'lamula Mwanya gwa Migate i'zyo Zikatumba ku'mwa Gu'ku' Mulungu. Yi'li'mudima ku'lya migate zyeni'zyo ku' itungo lya nsiku' mupungati'. 7 Lu'siku' lwa kwandya mulav'ezye nkuti'la nsondo. Lu'siku' lwenu'lo ku'du' mwize mutu'mame mili'mo zya nsiku' zyose. 8 Ku' nsiku' zyeni'zyo mupungati' mulamufumi'zye Gu'ku' Mulungu kalu'mbi'lo ka ku'zigya. Lu'siku' lwa mupungati' mulav'ezye hangi' nkuti'la nsondo, na ku'du' mwize mutu'mame mili'mo zya nsiku' zyose.’ "

9 Gu'ku' Mulungu wamuwi'laga Mose, 10 "U'v'awi'le V'aizilaeli, ‘Aho mulav'e mwafika mu nsi' i'yo namupile na kwi'mbu'la viliwa vya nsi' yeni'yo, ki'la yu'mo alamuletele muhozya isapali lya ntomolwa ya lyi'mbu'la lya kwandya. 11 U'lu' lwav'i'ta lu'siku' lwa ki'suuho, lu'siku' u'lo lu'lalonde nawe alawu'sye isapali lyeni'lo mu igu'lya ha mbele yamwa Gu'ku' Mulungu, ki'gele li'zumiwe ku'nguno yinywe. 12 Lu'siku' lwenu'lo lwa ku'wu'sya isapali, yi'lamudime ku'mufumi'zya Gu'ku' Mulungu ki'taambo cha ku'zigya cha kadi'lana ka nkolo ka mwaka gu'mo, ako kali' wu'du'hu' wu'lema. 13 Haki'mo na ki'taambo cheni'cho, mulafumye na kalu'mbi'lo ka mbutoo, kilo iv'i'li' zya wu'fuma wu'nelezu u'wo wu'seleganiv'ilwe na maguta ga muzeituni, ku'v'a kalu'mbi'lo ka ku'zigya na wu'motu wa ku'mutogezya Gu'ku' Mulungu. Hangi' mulapu'ngu'li'le kalu'mbi'lo ka ki'neneko nsu'pa yi'mo. 14 Ku'du' mwize mulye ki'liwa cha mu mugu'nda, ki'v'e ki'toto, cha ku'kalangwa, ninga migate, u'lu' mukaali' ku'fumya kalu'mbi'lo ku'mwa Mulungu winywe. Yeni'yi' yi'ku'v'a nhama ya nhananhana ku' wu'v'yalwa winywe u'wo wu'lalonde, mu wikalo winywe wose.

15 " ‘Ku'fumi'i'la lu'siku' lwa ku'londa ki'suuho, lu'siku' u'lo ndi' mwaleta isapali lya ku'wu'siwa ku'v'a lu'manyi'lo lwa kalu'mbi'lo, mulav'azye mayuma mupungati'. 16 Mu lu'siku' lwa ku'londa ki'suuho cha yuma ya mupungati', yaani lu'siku' lwa maku'mi atano, mulafumye kalu'mbi'lo ka mbutoo mpya ku'mwa Gu'ku' Mulungu. 17 Ki'la mugana mugati' na wikalo winywe, gu'lalete migate iv'i'li' i'zyo ziv'eziv'ilwe ku' wu'fuma wu'nelezu kilo iv'i'li' u'wo wu'li' na itumbyo, viwu'siwe ku'v'a lu'manyi'lo lwa kalu'mbi'lo ka mbutoo mpya ku'mwa Gu'ku' Mulungu. 18 Haki'mo na migate zyeni'zyo, mulafumye tu'di'lana twa nkolo mupungati' twa mwaka gu'mo u'to tu'li' wu'du'hu' wu'lema, nzagamba na ng'ondi iv'i'li'. Vyeni'vi vilav'e vitaambo vya ku'zigya vya ku'mufumi'zya Mulungu, haki'mo na kalu'mbi'lo ka mbutoo na ki'neneko, ku'v'a kalu'mbi'lo ka ku'zigya kav'e wu'motu wa ku'mutogezya Gu'ku' Mulungu. 19 Hangi' mulafumye ngulati' yi'mo ku'v'a ki'taambo cha ku'sini'zya wu'kenagu'zi, na tu'di'lana tu'v'i'li' twa ng'ondi twa mwaka gu'mo ku'v'a vitaambo vya kwiswanania. 20 Nawe muhozya alaviwu'sye haki'mo na i'zyo migate ku'v'a lu'manyi'lo lwa ku'fumya kalu'mbi'lo ha mbele yamwa Gu'ku' Mulungu, haki'mo na u'to tu'di'lana tu'v'i'li'. Kali' kalu'mbi'lo kasondo ku'mwa Gu'ku' Mulungu, navyo vilav'e vya muhozya. 21 Lu'siku' lwene lu'lo mulatangazye nkuti'la nsondo. Ku'du' mwize mutumame mili'mo zya nsiku' zyose. Yeni'yi' yi'ku'v'a nhama ya nhananhana ku' wu'v'yalwa winywe u'wo wu'lalonde, mu wikalo winywe wose.

22 " ‘Aho mulav'e muli'wi'mbu'la viliwa mu migu'nda, ku'du' mwize muv'e muli'wi'mbu'la mpaka ku' lu'v'i'mbi', ninga ku'du' mwize musu'v'e ku'salala nsalazyo. Zyeni'zyo mulazilekele ku'nguno ya v'api'na na v'ageni v'izi'li'zi. Ene hu' ni' Gu'ku' Mulungu, Mulungu winywe.’ "

23 Hangi' Gu'ku' Mulungu wamuwi'laga Mose, 24 "U'v'awi'le V'aizilaeli ati', ‘Lu'siku' lwa kwandya lwa mwezi gwa mupungati' lu'lav'e lwa ku'lenda, na nkuti'la nsondo na ku'tangazya mwizu' ku' ku'fuula milangale. 25 Ku'du' mwize mutu'mame mili'mo zya nsiku' zyose, sumbwa mulafumye kalu'mbi'lo ka ku'zigya ku'mwa Gu'ku' Mulungu.’ "

26 Gu'ku' Mulungu wamuwi'laga Mose, 27 "Lu'siku' lwa iku'mi lwa mwezi gwenu'go gwa mupungati' lu'li' Lu'siku' lwa Wu'swanano. Mulav'e na nkuti'la nsondo, na ku'hangamyoyo, na inywe mulamufumi'zye Gu'ku' Mulungu kalu'mbi'lo ka ku'zigya. 28 Lu'siku' lwenu'lo ku'du' mwize mutu'mame muli'mo ninga gu'mo, ku'nguno lu'lav'e Lu'siku' lwa Wu'swanano, ki'gele ku'v'ezya wu'swanano ku'nguno yinywe ha mbele yamwa Gu'ku' Mulungu, Mulungu winywe. 29 Muntu' u'yo alaleke ku'hangamoyo lu'siku' lwenu'lo, yi'lamudime akomwe na iv'ilingano lya V'aizilaeli. 30 Muntu' ninga yu'mo u'yo alatu'mame muli'mo ninga gu'mo lu'siku' lwenu'lo ndamuzimangu'zye ku'fuma mugati' na iv'ilingano lya V'aizilaeli. 31 Ku'du' mwize mutu'mame muli'mo ninga gu'mo. Yeni'yi' yi'li' nhama ya nhananhana ku' wu'v'yalwa winywe u'wo wu'lalonde, mu wikalo winywe wose. 32 Lu'siku' lwenu'lo lu'lav'e lwa ku'lenda na ku'hangamyoyo. Ku'lamuli'la mpi'ndi' ya lu'siku' lwa kenda lwa mwezi mpaka wangalu'ke mpi'ndi', mulalu'dime lu'siku' lwa ki'suuho chinywe."

33 Gu'ku' Mulungu wamuwi'laga Mose, 34 "U'v'awi'le V'aizilaeli ati', ‘Lu'siku' lwa iku'mi na itano lwa mwezi gwenu'go gwa mupungati', lu'lav'e lwa ku'lamula ku'muv'ezezya Gu'ku' Mulungu Mwanya gwa Mahema gwa nsiku' mupungati'. 35 Lu'siku' lwa kwandya mulav'ezye nkuti'la nsondo. Ku'du' mwize mutu'mame mili'mo zya nsiku' zyose. 36 Ku' nsiku' mupungati' mulamufumi'zye Gu'ku' Mulungu kalu'mbi'lo ka ku'zigya. Lu'siku' lwa munane mulav'ezye nkuti'la nsondo na ku'mufumi'zya Gu'ku' Mulungu kalu'mbi'lo ka ku'zigya. Nkuti'la yeni'yo yi'li' nsondo. Ku'du' mwize mutu'mame mili'mo zya nsiku' zyose.

37 " ‘Zyeni'zyo hu' myanya zyamwa Gu'ku' Mulungu i'zyo zitu'u'lilwe i'zyo mulatangazye ku'v'a nkuti'la nsondo zya ku'mufumi'zya Gu'ku' Mulungu kalu'mbi'lo ka ku'zigya, vitaambo vya ku'zigya, kalu'mbi'lo ka mbutoo na ki'neneko, haki'mo na vitaambo vingi', ki'la kalu'mbi'lo ku' lu'siku' lwako. 38 Myanya zyeni'zyo zili' haki'mo na lu'siku' lwa ki'suuho chamwa Gu'ku' Mulungu ya nsiku' zyose ya ki'la yuma, hangi' na vipanwa vinywe, na kalu'mbi'lo kinywe ka milahi' zyose, na kalu'mbi'lo kinywe ka ku'togwa, i'vyo muli'nfumi'zyaga ene Gu'ku' Mulungu.

39 " ‘Ku'lamuli'la lu'siku' lwa iku'mi na itano lwa mwezi gwa mupungati', aho mulav'e mwamala lyi'mbu'la mu migu'nda zinywe mulamuv'ezezye Gu'ku' Mulungu Mwanya u'go gwa Mahema ku' nsiku' mupungati'. Lu'siku' lwa kwandya na lu'siku' lwa munane zili' nsiku' zya ku'lenda. 40 Lu'siku' lwa kwandya mulasole matambi' ga miti' zinywe misoga, yaani matambi' ga mitende, matambi' ga madu'tu' mingi na matambi' ga miti' i'zyo zili'melaga mu ngiligili na myongo, na inywe mulagiye ha mbele yamwa Gu'ku' Mulungu, Mulungu winywe, ku' nsiku' mupungati'. 41 Mulav'ezye mwanya gwenu'gu' ku' itungo lya nsiku' mupungati' ku' ki'la mwaka ku'mwa Gu'ku' Mulungu. Yeni'yi' yi'li' nhama ya nhananhana ku' wu'v'yalwa winywe u'wo wu'lalonde, na inywe mulav'e muli'v'ezya ku' ki'la mwezi gwa mupungati'. 42 Ku' itungo lya nsiku' mupungati' mulikale mu mahema. V'av'anda v'ose v'a mu Izilaeli v'alikale mu mahema, 43 ki'gele wu'v'yalwa winywe wize wu'manye ku'v'a aho ndi' nav'afumya V'aizilaeli ku' nsi' ya Misili ndi' nav'av'ezya v'ikale mu mahema. Ene hu' ni' Gu'ku' Mulungu, Mulungu winywe.’ "

44 Nawe Mose wav'atangazi'zyaga V'aizilaeli myanya zyamwa Gu'ku' Mulungu i'vyo zitu'u'lilwe.