1 " ‘Ku'du' mwiv'ezezye ki'mbulimbuli ninga ki'mo, ninga ku'ki'ndi'ka isu'mbano lya ku'pu'nza, ninga nhi'ngi' ya iwe, ninga iwe li'mo lya koola mu nsi' yinywe ki'gele muki'ku'v'i'i'le ninga ki'mo. Ku'nguno ene hu' ni' Gu'ku' Mulungu, Mulungu winywe. 2 Yi'li'mudima muzidime nsiku' zya ki'suuho i'zyo zili' Sabato zyanne na ku'haku'zya hantu' hasondo ha wanne. Ene hu' ni' Gu'ku' Mulungu.

3 " ‘U'lu' muzidime nhama zyanne ku' lu'doono na ku'londa milagi' zyanne, 4 haho ndayi'lete nvula yi'tonye ku' itungo lyayo, ki'gele nsi' yi'fumye viliwa vyayo, na miti' zya mu migu'nda zilapambe visumo vyazyo. 5 Hangi' ku'gu'manga mbutoo ku' winywe ku'lendeleye mpaka ha itungo lya kwi'mbu'la nzabibu, na kwi'mbu'la nzabibu ku'lendeleye mpaka ha itungo lya ku'v'i'v'a mbiyu', na inywe mulalye viliwa vinywe na kwiku'ta, na mulikale na ku'hola mu nsi' yinywe.

6 " ‘Ndamupe ku'hola mu nsi', na mulav'e muli'lala bila ku'kangwa na ki'ntu'. Ndazisinie ndimu ndaki mu nsi' na nsi' yinywe yi'kasye yi'v'e na wu'lu'gu'. 7 Mulav'apeezye v'anisi v'inywe, na mulav'awu'lage ku' lu'panga. 8 V'antu' v'inywe v'atano v'alav'apeezye v'anisi igana, na v'antu' v'inywe igana v'alav'apeezye v'anisi vihu'mbi' iku'mi. V'anisi v'inywe v'alagwe ha mbele yinywe ku' lu'panga.

9 " ‘Ndamudoonoke na ku'muv'ezya muv'e na wu'v'yalwa wingi na kwingi'ha, nanne ndagelani'zye ilagano lyanne ku' winywe. 10 Ha itungo lya kwi'mbu'la mulav'e mukaali' muli'lya viliwa vya mwaka u'go gwav'i'tile, na yi'lamudime ku'visinia viliwa vilaala ki'gele mupandi'ke ha ku'tu'u'la viliwa vipya. 11 Ndatu'u'le wikalo wanne mugati' na inywe, nanne nkasye mmuleke. 12 Nanne ndayu'mbe hagati' yinywe na ku'v'a Mulungu winywe na inywe mulav'e v'antu' v'anne. 13 Ene hu' ni' Gu'ku' Mulungu, Mulungu winywe, u'yo namufumizye ku' nsi' ya Misili ki'gele muleke ku'v'a v'asese v'a V'amisili. Ene nayi'v'i'nzile segeya yinywe na ku'muv'ezya muyu'mbe musanukile.

14 " ‘Ali'vi u'lu' muleke ku'ndegeleka na ku'londa nhama zyanne, 15 na inywe u'lu' muzikaane milagi' zyanne na ku'zigaya nzi'la zyanne, hangi' muleke ku'gelani'zya nhama zyanne na ku'li'v'i'nza ilagano lyanne, 16 haho ndamuv'ezezye igambo i'li': Ndalete wu'kange wu'hanya ha igu'lya yinywe, malwile mahanya, kakenke, homa ya ku'muhofuzya minso ginywe na ku'wu'sinia wu'zuwu'ku winywe hado hado. Mulav'i'v'i'le gele mbiyu' zinywe, ku'nguno v'anisi v'inywe v'alavilye viliwa. 17 Ene ndamupe nkonya, na inywe mulagu'mwe na v'anisi v'inywe. Mulatemwe na av'o v'amugayile, na mulapeele ninga yi'v'e hadu'hu' muntu' u'yo amupeezizye.

18 " ‘U'lu' muv'e mukaali' du' ku'ndegeleka, haho ndamupe lu'duko hangi' kali' mupungati' ku'nguno ya wu'kenagu'zi winywe. 19 Ndazivunagu'le mpaka zinywe na ku'v'ezya chelela i'cho ki'li' ha igu'lya yinywe ki'v'e ki'lambu ki'ti' chu'ma, na nsi' yi'lambe ki'ti' shaba ku'nguno yi'laleke ku'tonyelwa. 20 Mulatu'mi'le nguzu zinywe gele, ku'nguno migu'nda zinywe zikasye zifumye viliwa ninga miti' zya nsi' yinywe zilaleke ku'pamba visumo.

21 " ‘U'lu' mwendeleye ku'nyani'li'zya na ku'kaana ku'ndegeleka, ndamongezezye lu'duko kali' mupungati' ku'nguno ya wu'kenagu'zi winywe. 22 Ndatu'me ndimu ndaki ku' winywe, zilamupuli'le v'ana v'inywe, zilazimangu'zye mitugo zinywe, na ku'dohya lu'v'alo lwa v'antu' v'inywe, ninga nzi'la zinywe zilav'e na ki'nyuli.

23 " ‘Ninga ku' lu'duko lwenu'lo, u'lu' muv'e mukaanile ku'ngalu'ki'la na mwendeleye ku'nyani'li'zya, 24 hohene ndav'e na wanisi na inywe na ku'mupa lu'duko kali' mupungati' ku'nguno ya wu'kenagu'zi winywe. 25 Ndalete wu'lu'gu' ku' winywe, ki'gele ku'li'pi'ki'zya, ku'nguno ya ku'li'v'i'nza ilagano lyanne. Aho mulav'e muli'peelela mu kaya zinywe, ndamuletele malwile madaki mugati' na inywe, na inywe mulatu'u'lwe mu makono ga v'anisi v'inywe. 26 Aho ndav'e namusini'zya ndecha ya viliwa, v'aki'ma iku'mi v'alakomele mugate mu liko li'mo du'. V'alamugawu'le ku' ki'pimo. Mulalye, ali'vi mukasye mwiku'te.

27 " ‘Aho galav'e gamupandi'ka gose genago ali'vi mukaane ku'ndegeleka na mwendeleye ku'nyani'li'zya, 28 haho ndatu'u'le wanisi na inywe ku' ki'sila channe, ene mweni'ki'li' ndamupe hangi' lu'duko kali' mupungati' ku'nguno ya wu'kenagu'zi winywe. 29 Mulalye nyama ya miv'i'li' zya v'ana v'inywe, v'a ki'gosya na v'a ki'ki'ma, ku'nguno ya nzala. 30 Ndahazimangu'zye ha lwandi' lwinywe lwa ku' igu'lya ku' ngu'lu' u'ko muli'zisengaga milungu zinywe. Ndabomolange mahozezyo ginywe ga ku'zuki'zi'zya wu'bani. Ndazitagi'le milambo zinywe ha igu'lya na vimbulimbuli vya milungu zinywe i'zyo zili' wu'du'hu' wu'zuwu'ku, nanne ndamugaye muno. 31 Ndaziv'ezye kaya zinywe ziv'e mapagala, na ku'hav'ipya ha ki'la lwandi' lwinywe lu'sondo, ninga wu'motu wa kalu'mbi'lo kinywe nkasye nkazumye. 32 Nanne ndayi'v'ipye nsi' yi'v'e na ki'nyuli, ki'gele ninga v'anisi vinywe av'o v'alasami'le mwenu'mo v'alakamalwe. 33 Ndamusambazye mugati' na makabi'la, nanne ndalete wu'lu'gu' wu'mulondezye. Nsi' yinywe yi'lav'e na ki'nyuli na kaya zinywe zilav'e mapagala. 34 Haho nsi' yi'latogeziwe na visuuho vyazyo ha itungo i'lo yi'lav'e na ki'nyuli, na inywe aho mulav'e mugati' na nsi' ya v'anisi v'inywe. Nsi' yi'lasuuhe na kwihalali'la visuuho vyazyo. 35 Itungo lyose i'lo nsi' yi'lav'e na ki'nyuli, yi'lasuuhe na kwihalali'la ki'suuho chayo i'cho yav'age yi'kav'ile ku'ki'pandi'ka ku' itungo aho mwav'age mwikalile mwenu'mo.

36 " ‘Mugati' na inywe av'o v'alapu'lu'gu'ke, ndav'atu'u'li'le wov'a mu myoyo zyav'o, mugati' na nsi' zya v'anisi v'av'o, ninga muzwi gwa idu'tu' i'lo li'li'hehemulwa na muyaga li'lav'ezye v'apeele. V'alapeele ki'ti' v'apeelile wu'lu'gu', nav'o v'alagwe ninga i'vi ku'du'hu' u'yo av'apeezizye. 37 V'alav'e v'ali'gwa v'ali'wituli'nkania ki'ti' v'apeela wu'lu'gu' ninga i'vi ku'du'hu' u'yo av'apeezizye. Inywe mukasye muv'e na nguzu zya kwi'ma ha mbele ya v'anisi v'inywe. 38 Mulafwe mugati' na makabi'la, na nsi' zya v'anisi v'inywe zilamulye. 39 Av'o v'alasigale v'alagande ku'nguno ya wu'kenagu'zi wav'o, mugati' na nsi' zya v'anisi v'av'o. V'alagande ku'nguno ya wu'kenagu'zi wav'o na wa v'agu'ku' v'av'o.

40 " ‘Ali'vi u'lu' v'azumye wu'kenagu'zi wav'o na wa v'agu'ku' v'av'o, ku'nguno ya wu'tale u'wo v'ambezezizye ene na i'vyo v'endeleyile ku'nyani'li'zya, 41 hene nav'atu'u'li'lile wanisi na ku'v'afila ku' nsi' ya v'anisi v'av'o, yaani u'lu' myoyo zyav'o milambu mbe zitunie, nav'o v'azumye lu'duko lwa wu'kenagu'zi wav'o, 42 hohene ndalizu'ki'le ilagano lyanne na Abalahamu, Isaka na Yakobo na ku'yizu'ki'la nsi' i'yo nav'alagana. 43 Itungo i'lo v'alav'e ha ibala na nsi' yav'o, nayo yi'latogeziwe na ki'suuho, aho yi'lav'e yalekilwe na ki'nyuli, nav'o v'alalu'zumye lu'duko lwa wu'kenagu'zi wav'o, ku'nguno v'azikaanile milagi' zyanne na myoyo zyav'o zyazitalile nhama zyanne. 44 Ali'vi ninga haki'mo na genago gose, itungo i'lo v'alav'e mu nsi' ya v'anisi v'av'o, ene nkasye mbakaane, ninga ku'v'agaya mpaka ku'fiki'la ku'v'azimangu'zya na ku'li'v'i'nza ilagano lyanne ku' wav'o. Ku'nguno ene hu' ni' Gu'ku' Mulungu, Mulungu wav'o. 45 Ali'vi ku'nguno yav'o ndalizu'ki'le ilagano i'lo nalaganile na v'agu'ku' v'av'o, av'o nav'afumizye ku' nsi' ya Misili ha mbele ya minso ga makabi'la, ki'gele mbe Mulungu wav'o. Ene hu' ni' Gu'ku' Mulungu.’ " 46 Zyeni'zyo hu' nhama, milagi' na nzi'la i'zyo Gu'ku' Mulungu ndi' waki'ndi'ka hagati' yakwe na V'aizilaeli u'ko ku' lu'gu'lu' lwa Sinai ku'v'i'ti'la ku'mwa Mose.