1 Hangi' Gu'ku' Mulungu wav'awi'laga Mose na Aloni ati', 2 "Muyombe na iv'ilingano lya V'aizilaeli, muv'awi'le ati', ‘Itungo i'lo mugosya ninga yu'mo aho alav'e ali'fumya wu'fila mu muv'i'li' gwakwe, wu'fila wenu'wo wu'li' zoma. 3 I'vi hu' vyene yi'li' u'lu' muv'i'li' gwakwe gu'v'e gu'li'fumya wu'fila ninga mbe wu'v'e wu'kiv'ile mugati'. Muntu' mwenu'yo ali' na zoma.

4 " ‘Ki'la wu'li'li' u'wo alawu'lali'le wu'lav'e na zoma, ninga ki'ntu' i'cho alakikali'le ki'lav'e na zoma. 5 Ki'la muntu' wa ku'wu'kuumya wu'li'li' wa muntu' mwenu'yo, yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'. 6 Hangi' ki'la muntu' u'yo alikali'le ki'ntu' ninga ki'mo i'cho wakikali'lile muntu' wa ku'zwa wu'fila yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'.

7 " ‘Ninga u'yo alamukuumye muntu' wa ku'zwa wu'fila, yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'.

8 " ‘Hangi' muntu' u'yo ali'zwa wu'fila u'lu' amutugi'le matye muntu' u'yo ali' musoso, haho muntu' wa ku'tugi'lwa yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'.

9 " ‘Hangi' ki'la chanzwa i'cho alakikali'le muntu' u'yo ali'zwa wu'fila ha itungo lya ku'dami'la ha igu'lya na mutugo, ki'lav'e na zoma. 10 Ki'la muntu' u'yo alaki'kuumye ki'ntu' ninga ki'mo i'cho wakikali'lile muntu' mwenu'yo, alav'e na zoma mpaka mpi'ndi'. Ki'la u'yo alaki'sombe ki'ntu' ninga ki'mo mugati' na vyeni'vyo yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'.

11 " ‘Hangi' ki'la muntu' u'yo ali'zwa wu'fila u'lu' ize amukuumye muntu' yu'ngi' bila ku'kalav'a makono gakwe, u'yo alakuumiwe yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'.

12 " ‘Ki'la ki'seme cha wu'longo i'cho alaki'kuumye muntu' u'yo ali'zwa wu'fila ki'lav'elagu'lwe. Sumbwa ki'la ki'seme cha muti' ki'lakuswe mu minzi'.

13 " ‘Hangi' muntu' u'yo ali'zwa wu'fila u'lu' wapi'la wu'lwile wakwe, yi'lamudime alindi'le nsiku' mupungati' zya ku'sosoka kwakwe, nawe alavikanze vizwalo vyakwe, na koga mu minzi' ga kasela, haho alav'e wasosoka. 14 Lu'siku' lwa munane, yi'lamudime alete mapu'u'la av'i'li' ninga makune ga nkunda av'i'li' ha mbele yamwa Gu'ku' Mulungu bi'hi' na wingi'li'lo wa Ihema lya Ku'sangi'zya, na ku'mupa muhozya. 15 Nawe muhozya alagafumye, li'mo li'v'e ki'taambo cha ku'sini'zya wu'kenagu'zi, na li'ngi' li'v'e ki'taambo cha ku'zigya. Ku' nzi'la yeni'yi' alav'e wamuv'ezezya wu'swanano ha mbele yamwa Gu'ku' Mulungu ku'nguno ya wu'fila wakwe.

16 " ‘Ki'la mugosya u'yo zilamufume mbiyu' zyakwe, yi'lamudime oge muv'i'li' gose mu minzi' nawe alav'e na zoma mpaka mpi'ndi'. 17 Ki'la ki'zwalo ninga ki'la ndi'li' i'yo yi'lakuumiwe na mbiyu' zya ki'gosya vilakanzwe ku' minzi', navyo vilav'e na zoma mpaka mpi'ndi'. 18 U'lu' mugosya alale na muki'ma, na ku'fumya mbiyu' zyakwe, yi'lav'adime v'ose v'av'i'li' v'oge mu minzi', nav'o v'alav'e na zoma mpaka mpi'ndi'.

19 " ‘Ki'la muki'ma u'yo alav'e ali' ku' nsiku' zyakwe, alav'e na zoma ku' itungo lya nsiku' mupungati'. Ki'la muntu' u'yo alamukuumye muki'ma mwenu'yo alav'e na zoma mpaka mpi'ndi'.

20 " ‘Ki'la ki'ntu' i'cho alalali'le ninga ku'kikali'la ku' itungo lya ku' nsiku' zyakwe, ki'lav'e na zoma. 21 Ki'la muntu' u'yo alawu'kuumye wu'li'li' wa muki'ma mwenu'yo, yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'. 22 U'yo alakuumye ki'ntu' ninga ki'mo i'cho muki'ma mwenu'yo wakakikali'la, yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'. 23 Yi'v'e wu'li'li' ninga ki'ntu' ki'mo i'cho wakakikali'la muki'ma mwenu'yo, u'yo alaki'kuumye alav'e na zoma mpaka mpi'ndi'.

24 " ‘U'lu' mugosya alale na muki'ma u'yo ali' ku' nsiku' zyakwe na magazi gamukuumye mugosya mwenu'yo, hohene mugosya mwenu'yo alav'e na zoma ku' itungo lya nsiku' mupungati'. Ki'la wu'li'li' u'wo alawikali'le mwenu'yo wu'lav'e na zoma.

25 " ‘Muki'ma u'yo alav'e ali'fuma magazi gakwe ku' nsiku' nyingi ku'ki'la i'vyo yi'li'v'aga ku' wakwe, ninga ali'fuma magazi ku' itungo ilihu i'lo li'kav'ile lya nsiku' zyakwe, nsiku' zyeni'zyo zyose alav'e na zoma ki'ti' i'vyo ali'v'aga ha itungo lya ku' nsiku' zyakwe. 26 Ki'la wu'li'li' u'wo alav'e ali'lali'la ninga i'cho alav'e ali'wikali'la mu itungo lyeni'lo lya ku'fuma magazi ki'lav'e na zoma, ki'ti' i'vyo yi'li'v'aga ha itungo lya nsiku' zyakwe zya zoma. 27 Muntu' u'yo alavikuumye vintu' vyeni'vyo alav'e na zoma na yi'lamudime avikanze vizwalo vyakwe, na koga mu minzi', nawe alav'e na zoma mpaka mpi'ndi'.

28 " ‘Ali'vi muki'ma mwenu'yo u'lu' magazi galeke ku'fuma, yi'lamudime av'azye nsiku' mupungati', haho alav'e wasosoka. 29 Lu'siku' lwa munane alasole mapu'u'la av'i'li' ninga makune av'i'li' ga nkunda, na ku'mufili'la muhozya bi'hi' na wingi'li'lo wa Ihema lya Ku'sangi'zya. 30 Nawe muhozya alali'fumye li'mo ku'nguno ya ki'taambo cha ku'sini'zya wu'kenagu'zi, na lya wu'v'i'li' ku'nguno ya ki'taambo cha ku'zigya. I'vi hu' vyene muhozya alamuv'ezezye wu'swanano ha mbele yamwa Gu'ku' Mulungu ku'nguno ya zoma ya ku'fuma magazi gakwe.

31 " ‘I'vi hu' vyene mulav'e muli'v'akoma V'aizilaeli ku'fuma ku' zoma yav'o, ki'gele ku'du' v'ali'v'ezezye zoma Ihema lyanne Isondo, i'lo li'li' hagati' nav'o, na ku'fwa ku' zoma yav'o.

32 " ‘Yeni'yo hu' nhama ku'nguno ya mugosya wa ku'fuma wu'fila, na u'yo zili'mufume mbiyu' zyakwe na ku'muv'ezya av'e na zoma, 33 na ku'nguno ya muki'ma u'yo alav'e ali' ku' nsiku' zyakwe. Yaani, av'e mugosya ninga muki'ma u'yo ali'fuma ki'ntu' i'cho ki'li'yela. Hangi' yi'li' ku' u'yo alalale na muki'ma u'yo ali' na zoma ya magazi gakwe.’ "