1 " ‘U'lu' muntu' ninga yu'mo igwe lwito lwa ku'fumya wu'sangi'lwa ha iv'anza ku' igambo i'lo wali'wine ninga ku'ligwa, nawe akaane ku'yomba ki'ntu', hohene yi'lamudime ku'wu'somba wu'kenagu'zi wakwe.

2 " ‘Ninga muntu' u'lu' akuumye ki'ntu' ki'zomalu'ku, gu'v'e mulambo gwa ndimu nzomalu'ku zya mu ipolu ninga mitugo, ninga mulambo gwa vitundwa vingi' vizomalu'ku vya ku'yu'mba ha igu'lya na nsi', ninga av'e akamanya, alapandi'ke zoma na alav'e na musango.

3 " ‘Ninga muntu' u'lu' akuumye ki'ntu' ki'zomalu'ku i'cho ki'fumile ku' muntu'*, ki'ntu' i'cho ki'kowolile ku'muv'ezya av'e na zoma, ninga av'e akamanya, alapandi'ke musango.

4 " ‘Ninga muntu' u'lu' alahi'le ku'v'ezya igambo ninga li'mo bila kwiganika, li'v'e iv'i ninga isoga, ku' ku'lahi'la ku' nzi'la ninga yi'mo ki'ti' i'vyo v'antu' v'ali'v'ezyaga, ninga av'e akamanya, aho alav'e wamanya haho alapandi'ke musango.

5 " ‘Hangi' muntu' mbe av'e na musango gwa igambo li'mo mugati' na genago, yi'lamudime ku'zumya wu'kenagu'zi wakwe u'wo wawu'v'ezizye, 6 na ku' masumule ga wu'kenagu'zi u'wo wav'ezizye yi'lamudime ku'leta ku'mwa Gu'ku' Mulungu nkolo nki'ma ninga mbu'li nki'ma ku'v'a ki'taambo cha ku'sini'zya wu'kenagu'zi. Nawe muhozya alamuv'ezezye wu'swanano ku'nguno ya wu'kenagu'zi wakwe.

7 " ‘Ali'vi muntu' mwenu'yo u'lu' akakowola ku'fumya nkolo ninga mbu'li, hohene alalete mapu'u'la av'i'li' ninga makune av'i'li' ga nkunda ku'mwa Gu'ku' Mulungu ku'v'a masumule ku'nguno ya wu'kenagu'zi wakwe, li'mo ku'nguno ya ki'taambo cha ku'sini'zya wu'kenagu'zi, na lya wu'v'i'li' ku'nguno ya ki'taambo cha ku'zigya. 8 Alagalete ku'mwa muhozya, nawe muhozya alali'fumye li'mo mbela li'v'e ki'taambo cha ku'sini'zya wu'kenagu'zi. Alali'vune nhingo bila ku'li'lekania mutwe gwalyo, 9 nawe alasole lwandi' lwa magazi galyo na ku'ganyanyagi'la mu lu'v'azu lwa ihozezyo. Magazi ago galasigali'le alagatonyekezye ha nsi'li'li' na ihozezyo. Cheni'cho ki'li' ki'taambo cha ku'sini'zya wu'kenagu'zi. 10 Hangi' alali'fumye i'lo lya wu'v'i'li' ku'v'a ki'taambo cha ku'zigya, ku'londana na ki'ti'le. Ku' nzi'la yeni'yo muhozya alamuv'ezezye muntu' mwenu'yo wu'swanano ku' wu'kenagu'zi u'wo wawu'v'ezizye, nawe alatondolwe.

11 " ‘U'lu' agayiwe mapu'u'la av'i'li' ninga makune ga nkunda av'i'li' ku'v'a ki'taambo cha ku'sini'zya wu'kenagu'zi, hohene alalete wu'fuma wu'nelezu kilo yi'mo*. Ali'vi ku'du' ize awu'ti'ti'li'le maguta ninga wu'vumba, ku'nguno kali' kalu'mbi'lo ka ku'sini'zya wu'kenagu'zi. 12 Alalete wu'fuma wenu'wo ku' muhozya, nawe alasole iganza li'mo lya wu'fuma na ku'wu'zigya ha igu'lya na ihozezyo ki'gele wu'v'e ku'nguno ya ako kalu'mbi'lo kose, ha igu'lya ya kalu'mbi'lo kangi' ka ku'zigya ku'mwa Gu'ku' Mulungu. Kenako kali' kalu'mbi'lo ka ku'sini'zya wu'kenagu'zi. 13 Ku' nzi'la yeni'yo muhozya alamuv'ezezye muntu' mwenu'yo wu'swanano ku'nguno ya ku'v'ezya wu'kenagu'zi mugati' na magambo genago, nawe alatondolwe. Wu'fuma u'wo wu'lasigali'le wu'lav'e wa muhozya, ki'ti' i'vyo yi'li' ku' kalu'mbi'lo ka mbutoo.’ "

14 Hangi' Gu'ku' Mulungu wamuwi'laga Mose, 15 "Muntu' ninga yu'mo u'lu' ahu'v'e ku' ku'v'ezya wu'kenagu'zi bila ku'loma mugati' na vintu' visondo ku' ku'leka ku'mufumi'zya Gu'ku' Mulungu, yi'lamudime mwenu'yo muntu' alete ku'mwa Gu'ku' Mulungu ng'ondi i'yo yi'li' wu'du'hu' wu'lema ki'ti' masumule. Ev'e u'lapime mupango gwayo ku'londana na vipimo i'vyo vitu'u'lilwe ha hantu' hasondo. Cheni'cho ki'li' ki'taambo cha ku'sini'zya musango. 16 Hangi' yi'li'mudima ali'pe ku' ago wapotilwe ku'gav'ezya ku' magambo masondo, na kongezya lwandi' lwa wu'tano lwa wu'gu'zi wacho, na ku'lu'fumya lose ku'mwa muhozya, nawe alamuv'ezezye wu'swanano ku' yeni'yo ng'ondi ku'v'a ki'taambo cha ku'sini'zya musango, nawe alatondolwe.

17 "Muntu' u'lu' av'ezye wu'kenagu'zi ku' ku'v'ezya ki'ntu' i'cho ki'giziv'ilwe na nhama yamwa Gu'ku' Mulungu, ninga av'e akamanya, aho alav'e wamanya yi'lamudime ku'wu'somba wu'kenagu'zi wakwe. 18 Alalete ku'mwa muhozya ng'ondi i'yo yi'li' wu'du'hu' wu'lema, yi'v'e na mupango gwa ku'gelani'la, ku'v'a ki'taambo cha ku'sini'zya musango. Nawe muhozya alamuv'ezezye wu'swanano ku' wu'kenagu'zi u'wo wawu'v'ezizye bila ku'loma, nawe alatondolwe. 19 Cheni'cho ki'li' ki'taambo cha ku'sini'zya musango. Nhana mweni'ki'li' ali' na musango ha mbele yamwa Gu'ku' Mulungu."