1 Mu lu'siku' lwa munane, Mose wav'itanaga Aloni na v'ana v'akwe v'a ki'gosya, haki'mo na v'anamala v'a Izilaeli. 2 Wamuwi'laga Aloni, "U'sole ndama ngosya ku'nguno ya ki'taambo cha ku'sini'zya wu'kenagu'zi, na ng'ondi ku'nguno ya ki'taambo cha ku'zigya, zyose iv'i'li' ziv'e zili' wu'du'hu' wu'lema, nazyo u'zilete ha mbele yamwa Gu'ku' Mulungu. 3 Hangi' u'v'awi'le V'aizilaeli ati', ‘Musole mbu'li ngulati' ku'nguno ya ki'taambo cha ku'sini'zya wu'kenagu'zi, na ndama ngosya na kadi'lana ka nkolo, zyose iv'i'li' ziv'e zya musimo gwa mwaka gu'mo, na ziv'e zili' wu'du'hu' wu'lema, ku'nguno ya ki'taambo cha ku'zigya. 4 Hangi' musole ng'ombe na ng'ondi ku'nguno ya ki'taambo cha kwiswanania, ki'gele mufumye ki'taambo ha mbele yamwa Gu'ku' Mulungu, haki'mo na kalu'mbi'lo ka mbutoo ako kaseleganiv'ilwe na maguta ga muzeituni. Ku'nguno walelo Gu'ku' Mulungu aku'mwifumi'i'la.’ "

5 Nav'o v'aviletaga vyeni'vyo vintu' i'vyo Mose wav'alagi'li'zyaga ha mbele ya Ihema lya Ku'sangi'zya, nalyo iv'ilingano lyose likumingaga na kwi'ma ha mbele yamwa Gu'ku' Mulungu. 6 Haho Mose wayombaga ati', "I'li' hu' i'lo Gu'ku' Mulungu walagi'li'zizye muli'v'ezye, ki'gele mulu'wone lu'kumo lwakwe." 7 Henanho Mose wamuwi'laga Aloni ati', "Yaga ku' ihozezyo, u'kafumi'zye henanho ki'taambo chako cha ku'sini'zya wu'kenagu'zi na ki'taambo cha ku'zigya, na u'v'ezye wu'swanano ku'nguno yako na ku'nguno ya v'antu' v'a Izilaeli. Hangi' u'fumi'zye henanho vitaambo i'vyo vyaletagwa na v'antu' ku'nguno ya ku'v'av'ezezya wu'swanano, ki'ti' i'vyo Gu'ku' Mulungu walagi'li'zizye."

8 Hohene Aloni wizaga ha ihozezyo na ku'yi'si'nza i'yo ndama ku'v'a ki'taambo cha ku'sini'zya wu'kenagu'zi ku'nguno yakwe. 9 Hangi' v'ana v'akwe v'amuletelaga magazi gayo, nawe wadobyaga lyala lyakwe mu magazi na ku'gav'ila ku' mapembe ga ihozezyo, na magazi ago gasigali'laga wagiti'laga ha nsi'li'li' na ihozezyo. 10 Ali'vi lu'sasa, nfigo na lwandi' lu'soga lwa iti'ma lwa cheni'cho ki'taambo cha ku'sini'zya wu'kenagu'zi, wavizigyaga ha igu'lya na ihozezyo ki'ti' i'vyo Gu'ku' Mulungu wamulagi'li'zizye Mose. 11 Sumbwa nyama haki'mo na ndi'li', wavizigyaga ha ibala na nkambi'.

12 Hangi' Aloni wasi'nzaga ki'taambo cha ku'zigya. V'ana v'akwe v'amuletelaga magazi gayo, nawe waganyanyagi'laga ki'la lwandi' lwa ihozezyo. 13 V'amuletelaga ki'taambo cha ku'zigya mamonke mamonke, haki'mo na mutwe, nawe wavizigyaga ha igu'lya na ihozezyo. 14 Wawu'kusaga wu'la haki'mo na magu'lu', na wavizigyaga ha igu'lya na ki'taambo cha ku'zigya, ha igu'lya na ihozezyo.

15 Hangi' Aloni waletaga vitaambo i'vyo vyaletagwa na v'antu'. Wasolaga i'yo mbu'li ya ki'taambo cha ku'sini'zya wu'kenagu'zi, wayi'si'nzaga na ku'yi'fumya, ki'ti' i'vyo wav'ezyaga ku' i'yo ya mbele. 16 Aloni waki'letaga ki'taambo cha ku'zigya na ku'ki'fumya ku'londana na ki'ti'le. 17 Hangi' waletaga kalu'mbi'lo ka mbutoo, wasolaga iganza li'mo lya wu'fuma na ku'wu'zigya ha igu'lya na ihozezyo, haki'mo na ki'taambo cha ku'zigya cha ki'la ndiyu'.

18 Hangi' Aloni wasi'nzaga ng'ombe na ng'ondi ku'v'a ki'taambo cha kwiswanania ku'nguno ya v'antu'. V'ana v'akwe v'amupaga magazi gazyo, nawe waganyanyagi'laga ku' ki'la lwandi' lwa ihozezyo. 19 Ali'vi maguta ga i'yo ng'ombe na ng'ondi, muki'la na maguta gago, lu'sasa, nfigo na lwandi' lu'soga lwa iti'ma, 20 vyeni'vi vyose v'avitu'u'laga ha igu'lya na vidali, nawe Aloni wagazigyaga maguta ha igu'lya na ihozezyo. 21 Aloni waviwu'syaga i'vyo vidali haki'mo na matango ga mulyi'la ha mbele yamwa Gu'ku' Mulungu, ku'v'a lu'manyi'lo lwa kalu'mbi'lo, ki'ti' i'vyo Mose walagi'li'zizye.

22 Hangi' Aloni aho wamali'laga ku'fumya ki'taambo cha ku'sini'zya wu'kenagu'zi, ki'taambo cha ku'zigya, na ki'taambo cha kwiswanania, wawu'syaga makono gakwe ku' ku'v'alola v'antu' na ku'v'adosya, haho wasookaga ku'fuma ku' ihozezyo.

23 Hangi' Mose na Aloni v'ingi'laga mu Ihema lya Ku'sangi'zya. Aho v'afumaga ha ibala v'av'adosyaga v'antu', nalo lu'kumo lwamwa Gu'ku' Mulungu lwav'ifumi'i'laga v'antu' v'ose. 24 Moto gwafumi'i'laga ha mbele yamwa Gu'ku' Mulungu, gwaki'zigyaga ki'taambo cha ku'zigya, haki'mo na maguta ago gav'age ha igu'lya na ihozezyo. V'antu' v'ose aho v'awonaga igambo lyeni'li', v'abu'bu'zyaga ku' wu'togwe, v'asukambaga na ku'ku'v'i'i'la.