Levítico 14

Ku’sosohya ku’fuma ku’landi’ki’ziwa malwile ga ndi’li'

1 Hangi' Gu’ku' Mulungu wamuwi’laga Mose ati', 2 "I’yi' hu' nhama ku’nguno ya muntu' wa wu’lwile wa ndi’li', mu lu’siku' lwa ku’sosohiwa kwakwe. Mmola yakwe yi’laletwe ku' muhozya, 3 nawe muhozya alafume ha ibala na nkambi' na ku’mwikomya. U’lu' muntu' mwenu’yo wapi’laga wu’lwile wakwe wa ndi’li', 4 haho muhozya alasemuzye viletwe vintu' i’vi ku’nguno ya muntu' u’yo alasosohiwe: Nnoni iv’i’li' nsoso i’zyo mpanga, ki’pande cha muti' gwa mwelezi, wu’zi wa langi yazaa haki’mo na itambi' lya hisopo. 5 Hohene muhozya alasemuzye mugati' na nnoni zyeni’zyo v’asi’nze nnoni yi’mo ha igu’lya na nnungu' i’yo yi’li' na minzi' masoga ga kasela. 6 Hangi' muhozya alayi’sole i’yo nnoni yi’ngi' mpanga, ki’pande cha muti' gwa mwelezi, wu’zi wa langi yazaa haki’mo na itambi' lya hisopo, na ku’vidobya mu magazi ga i’yo nnoni ya wu’si’nzwe. 7 Nawe alamunyanyagi’le magazi kali' mupungati' mwenu’yo u’yo ali’sosohiwa, na alamutangazye ku’v’a ali' musoso. Hangi' alayi’leku’li’le i’yo nnoni mpanga ki’gele yiyagalu’le.

8 "Haho mwenu’yo muntu' u’yo ali’sosohiwa yi’lamudime avikanze vizwalo vyakwe, asenye nyele zyakwe zyose na koga mu minzi', nawe alav’e wasosoka. Hohene alasu’v’e ha nkambi', ali’vi yi’lamudime kwikala ha ibala na ihema lyakwe ku' itungo lya nsiku' mupungati'. 9 Lu’siku' lwa mupungati' alamoge nyele zyakwe zyose, yaani amoge nyele zya ku' mutwe, ndezu, vikuti na nyele zingi' zyose. Hangi' yi’lamudime avikanze vizwalo vyakwe, na oge mu minzi', haho alav’e wasosoka.

10 "Hangi' lu’siku' lwa munane alalete tu’di’lana twa ng’ondi tu’v’i’li' na kaki’ma kamo, tose tu’v’e na musimo gwa mwaka gu’mo, na tu’v’e tu’li' wu’du’hu' wu’lema, haki’mo na kilo idatu' zya wu’fuma wu’nelezu u’wo wu’seleganiv’ilwe na maguta ga muzeituni ku’v’a kalu’mbi’lo ka mbutoo, na selusi ya lita ya maguta. 11 Muhozya u’yo alamutangazye ku’v’a ali' musoso, hu' mwene alamulete muntu' mwenu’yo haki’mo na kalu’mbi’lo kakwe kose ha mbele yamwa Gu’ku' Mulungu bi’hi' na wingi’li’lo wa Ihema lya Ku’sangi’zya.

12 "Hangi' muhozya alakasole kadi’lana ka ng’ondi kamo mugati' na tu’di’lana twenu’to, na ku’kafumya ki’taambo cha ku’sini’zya musango, haki’mo na maguta genago. Hangi' alaviwu’sye ha mbele yamwa Gu’ku' Mulungu ku’v’a lu’manyi’lo lwa kalu’mbi’lo. 13 Hangi' alakasi’nzi’le kadi’lana kenako ha hantu' hasondo aho v’ali’si’nzi’laga vitaambo vya ku’sini’zya wu’kenagu’zi na vitaambo vya ku’zigya. Ki’ti' ki’taambo cha ku’sini’zya wu’kenagu’zi i’vyo ki’li' cha muhozya, hu' vyene ki’taambo cha ku’sini’zya musango ki’li' nsawo ya muhozya. Nacho ki’li' ki’sondo muno. 14 Haho muhozya mwenu’yo alasole magazi madoo ga ki’taambo cha ku’sini’zya musango na ku’muv’ila mwenu’yo u’yo ali’sosohiwa ku' mpelo na itwi lya mulyi’la na ku' li’nkumwa lya ku' mukono gwakwe gwa mulyi’la na li’nkumwa lya ku' mugu’lu' gwakwe gwa mulyi’la. 15 Hangi' muhozya alasole lwandi' lwa genago maguta na ku’gapu’ngu’li’la mu ki’ganza cha mukono gwakwe gwa mumoso. 16 Hangi' aladobye maguta genago ku' lyala lyakwe lya mukono gwa mulyi’la na ku’nyanyagi’la kali' mupungati' ha mbele yamwa Gu’ku' Mulungu. 17 Muhozya alamuv’ile u’yo ali’sosohiwa lwandi' lwa maguta ago gali' mu ki’ganza ku' mpelo ya itwi lya mulyi’la na ku' li’nkumwa lya ku' mukono gwakwe gwa mulyi’la haki’mo na ku' li’nkumwa lya ku' mugu’lu' gwakwe gwa mulyi’la, mu lwandi' lwene lu’lo u’mo wamuv’ilaga magazi ga ki’taambo cha ku’sini’zya musango. 18 Maguta ago galasigali’le mu ki’ganza chakwe muhozya, alagav’ile ku' mutwe gwa mwenu’yo muntu' u’yo ali’sosohiwa, na ku’v’ezya wu’swanano ku’nguno yakwe ha mbele yamwa Gu’ku' Mulungu. 19 Muhozya alaki’egezye i’cho ki’taambo cha ku’sini’zya wu’kenagu’zi, na ku’v’ezya wu’swanano ku’nguno ya muntu' mwenu’yo. Hangi' alasi’nze kadi’lana ka ki’taambo cha ku’zigya, 20 na ku’kafumya ha igu’lya na ihozezyo, haki’mo na kalu’mbi’lo ka mbutoo, ki’gele ku’mali’zi’zya ku’muv’ezezya wu’swanano, nawe alav’e wasosoka.

21 "Sumbwa muntu' mwenu’yo u’lu' av’e mupi’na, na akakowola ku’pandi’ka vintu' vyeni’vyo, haho alafumye kadi’lana kamo ka ng’ondi ku’v’a ki’taambo cha ku’sini’zya musango, ki’gele ki’wu’siwe ki’v’e lu’manyi’lo lwa kalu’mbi’lo, na ku’muv’ezezya wu’swanano. Hangi' alafumye kilo yi’mo ya wu’fuma wu’nelezu u’wo wu’seleganiv’ilwe na maguta ga muzeituni ku’v’a kalu’mbi’lo ka mbutoo, na selusi ya lita ya maguta. 22 Alalete na mapu’u’la av’i’li' ninga makune av’i’li' ga nkunda, ku’londana na i’vyo alakowole ku’pandi’ka. Li’mo li’lav’e lya ki’taambo cha ku’sini’zya wu’kenagu’zi, na lya wu’v’i’li' lya ki’taambo cha ku’zigya.

23 "Lu’siku' lwa munane alamuletele muhozya vintu' vyeni’vyo bi’hi' na wingi’li’lo wa Ihema lya Ku’sangi’zya ha mbele yamwa Gu’ku' Mulungu, ku’nguno ya ku’sosohiwa kwakwe. 24 Nawe muhozya alakasombe kenako kadi’lana ka ki’taambo cha ku’sini’zya musango, haki’mo na selusi ya lita ya maguta, haho alaviwu’sye viv’e lu’manyi’lo lwa kalu’mbi’lo ha mbele yamwa Gu’ku' Mulungu. 25 Haho alakasi’nze kenako kadi’lana ka ki’taambo cha ku’sini’zya musango. Hangi' alasole lwandi' lwa magazi na ku’muv’ila ku' itwi lya mulyi’la lya muntu' u’yo alav’e ali’sosohiwa, na ku’muv’ila hangi' ku' li’nkumwa lya ku' mukono gwa mulyi’la lya mwenu’yo muntu', haki’mo na ku' li’nkumwa lya ku' mugu’lu' gwa mulyi’la. 26 Hangi' muhozya alasole lwandi' lwa genago maguta na ku’gapu’ngu’li’la mu ki’ganza cha mukono gwakwe gwa mumoso, 27 na alamunyanyagi’le muntu' mwenu’yo maguta genago ku' ku’tu’mi’la lyala lyakwe lya mukono gwa mulyi’la kali' mupungati' ha mbele yamwa Gu’ku' Mulungu. 28 Muhozya alamuv’ile u’yo ali’sosohiwa lwandi' lwa maguta ago gali' mu ki’ganza, ku' itwi lya mulyi’la, ku' li’nkumwa lya ku' mukono gwa mulyi’la, na ku' li’nkumwa lya ku' mugu’lu' gwa mulyi’la, mu lwandi' lwene lu’lo u’mo wamuv’ilaga magazi ga ki’taambo cha ku’sini’zya musango. 29 Maguta ago galasigali’le mu ki’ganza chakwe, muhozya alamuv’ile ku' mutwe muntu' mwenu’yo u’yo ali’sosohiwa, ki’gele ku’v’ezya wu’swanano ku’nguno yakwe ha mbele yamwa Gu’ku' Mulungu. 30 Hangi' muhozya alasole ago mapu’u’la ninga ago makune ga nkunda ku’londana na i’vyo muntu' mwenu’yo akowolile ku’leta. 31 Mugati' nago li’mo li’lav’e ku’nguno ya ki’taambo cha ku’sini’zya wu’kenagu’zi na li’ngi' ku’nguno ya ki’taambo cha ku’zigya, haki’mo na kalu’mbi’lo ka mbutoo. Ku' nzi’la yeni’yi' muhozya alamuv’ezezye muntu' mwenu’yo wu’swanano ha mbele yamwa Gu’ku' Mulungu.

32 "Yeni’yi' hu' nhama ya ki’la muntu' wa wu’lwile wa ndi’li' wa ku’landi’ki’zya u’yo akakowola ku’pandi’ka kalu’mbi’lo ako kali’koov’iwa ka ku’musosohya."

Ndoowu mu magelele ga nnumba

33 Hangi' Gu’ku' Mulungu wav’awi’laga Mose na Aloni ati', 34 "Aho mulav’e mwingi’la mu nsi' ya Kanaani, i’yo nu’mupa muyi’teme, nanne mbe ndete ndoowu mugati' na nnumba yi’mo ya nsi' yeni’yo, 35 hohene musav’a nnumba yeni’yo yi’lamudime ku’ya ku' muhozya na ku’kamuwi’la ati', ‘Nawonaga ki’ntu' ki’mo ku' nnumba yanne kikolile ki’ti' ndoowu.’ 36 Muhozya alalagi’li’zye ku’v’a vifumiwe vintu' vyose mu nnumba yeni’yo, aho akaali' ku’ya ku’kayikomya ndoowu yeni’yo, ki’gele vintu' i’vyo vili' mu nnumba ku’du' vitangaziwe ku’v’a vili' na zoma. Haho muhozya alaingi’le na ku’yikomya nnumba yeni’yo. 37 Nawe alayikomye ndoowu yeni’yo ku' nnumba. U’lu' yingi’lile ku' magelele, nago gali' na madu’lu’lu' madu’lu’lu' ga langi ya lu’du’tu' ninga yazaa na gingi’lile mugati' na magelele, 38 hohene muhozya alafume ha ibala na nnumba yeni’yo, na ku’gu’lugala muzigo gwayo ku' itungo lya nsiku' mupungati'. 39 Lu’siku' lwa mupungati', muhozya alasu’v’e hangi' na ku’yikomya nnumba yeni’yo. U’lu' yi’v’e ndoowu yeni’yo yakalandala ku' magelele ga nnumba yeni’yo, 40 haho muhozya alalagi’li’zye v’agafumye mawe gose ago gali' na ndoowu, na ku’gatagi’la ha lwandi' lu’zomalu’ku ha ibala na kaya. 41 Magelele gose ga mugati' ga nnumba yeni’yo gize gapalangu’lwe ki’la lwandi', na matuntu gose ga malongo genago v’alagazyolele ha ibala na kaya ha lwandi' lu’zomalu’ku. 42 Hangi' v’alasole mawe gangi' na ku’zyenga aho habomolilwe, na ku’yi’si’li’v’a nnumba yeni’yo ku' wu’pya.

43 "Ali’vi aho galav’e gafumiwa mawe genago, na nnumba yeni’yo ku’palangu’lwa na ku’si’li’v’wa wu’pya, na u’lu' ndoowu yeni’yo yigele hangi' mugati' na nnumba yeni’yo, 44 haho muhozya alaingi’le na ku’yikomya. U’lu' ndoowu yeni’yo yalandalaga mu nnumba yeni’yo, sanga yi’li' ndoowu mbi i’yo yi’kali' ku’hangwa. Nnumba yeni’yo yi’li' na zoma. 45 Yi’lamudime muntu' mwenu’yo ayi’bomole nnumba yeni’yo. Mawe gayo, miti' na malongo gayo, vyose alavizyole na ku’vitagi’la ha ibala na kaya ha lwandi' lu’zomalu’ku.

46 "Hangi' ki’la muntu' u’yo alaingi’le mu nnumba yeni’yo ha itungo i’lo yi’lav’e yi’lugalilwe, alav’e na zoma mpaka mpi’ndi'. 47 Ki’la muntu' u’yo alalale ninga ku’lyi’la mu nnumba yeni’yo, yi’lamudime avikanze vizwalo vyakwe.

48 "Ali’vi u’lu' muhozya ize ayikomye na ku’wona ku’v’a ndoowu yi’kalandalile ku' nnumba yeni’yo, ku’fuma aho ndi' yasi’li’v’wa, haho muhozya alayi’tangazye ku’v’a nnumba yeni’yo yi’li' nsoso, ku’nguno ndoowu yakamala. 49 Musav’a nnumba yeni’yo alalete nnoni iv’i’li', ki’pande cha muti' gwa mwelezi, wu’zi wa langi yazaa na itambi' lya hisopo, viv’e ku’nguno ya ku’yi’sosohya nnumba yeni’yo. 50 Nnoni yi’mo alayi’si’nzi’le ha igu’lya na nnungu' i’yo yi’li' na minzi' masoga ga kasela. 51 Hangi' alasole ki’pande cha mwelezi, itambi' lya hisopo, wu’zi wa langi yazaa na i’yo nnoni mpanga, na ku’vidobya mu magazi ga i’yo nnoni ya wu’si’nzwe, na ku' minzi' ago ga kasela, na ku’yi’nyanyagi’la nnumba yeni’yo kali' mupungati'. 52 I’vi hu' vyene alayi’sosohye nnumba yeni’yo ku' magazi ga nnoni, minzi' ga kasela, nnoni mpanga ki’pande cha mwelezi, itambi' lya hisopo, na ku' wu’zi wa langi yazaa. 53 Haho alayi’leku’li’le i’yo nnoni mpanga yiyagalu’le. Ku' nzi’la yeni’yo alav’e wav’ezya wu’swanano ku’nguno ya nnumba yeni’yo, nayo yi’lav’e yasosoka.

54 "Yeni’yi' hu' nhama ku’nguno ya ki’la mukoli gwa wu’lwile wa ndi’li' ninga wa wule, ku’nguno ya mapatu', 55 wule ku' vizwalo, ndoowu ku' magelele, 56 wu’vimbe, wu’landi ninga mabado, 57 ki’gele ku’lagi’la ki’ntu' ki' ki’li' zoma na i’cho ki’li' ki’soso.

"Yeni’yi' hu' nhama ku’nguno ya wu’lwile wa ndi’li' na wule haki’mo na ndoowu."