1 Gu'ku' Mulungu wayombaga na Mose, aho ndi' v'afwa av'o v'ana v'av'i'li' v'amwa Aloni, ha itungo i'lo ndi' v'egela ha mbele yamwa Gu'ku' Mulungu. 2 Wamuwi'laga ati', "Muwi'le mudu'gu'yo Aloni, ku'du' ize av'e ali'wingi'la Hantu' Hasondo Muno ku' itungo i'lo li'kakoov'iwa, ha nnuma na muki'ngo ha mbele ya nfundi' ya wu'swanano, i'yo yi'li' ha igu'lya na isandi'ko lya ilagano, ki'gele ku'du' ize afwe, ku'nguno ene ndav'age nu'wigelisya mugati' na ilunde ha igu'lya na nfundi' yeni'yo ya wu'swanano.

3 "Aloni aho alav'e ali'wingi'la ha Hantu' Hasondo Muno yi'lamudime ku'fumya vintu' i'vi mbela: ng'ombe nzagamba ku'nguno ya ki'taambo cha ku'sini'zya wu'kenagu'zi na ng'ondi ku'nguno ya ki'taambo cha ku'zigya. 4 Aloge minzi' muv'i'li' gose, haho alavizwale i'vyo vizwalo visondo vya katani. Alazwale nhanzo nsondo, vizwalo vya mugati', isimangi'la, na kwitunga mukwato. 5 Hangi' alasole ngulati' iv'i'li' ku'fuma ku' iv'ilingano lya V'aizilaeli ku'nguno ya ki'taambo cha ku'sini'zya wu'kenagu'zi, na ng'ondi yi'mo ku'nguno ya ki'taambo cha ku'zigya.

6 "Aloni alayi'fumye ng'ombe nzagamba ku'v'a ki'taambo cha ku'sini'zya wu'kenagu'zi ku'nguno yakwe mweni'ki'li', na ku'v'ezya wu'swanano ku'nguno yakwe mweni'ki'li' na ku'nguno ya mugana gwakwe. 7 Hangi' alazisole i'zyo ngulati' iv'i'li' na ku'zitu'u'la ha mbele yamwa Gu'ku' Mulungu bi'hi' na wingi'li'lo wa Ihema lya Ku'sangi'zya. 8 Nawe alese kav'ale ha igu'lya na i'zyo mbu'li iv'i'li', yi'mo ku'nguno yamwa Gu'ku' Mulungu na yi'ngi' ku'nguno ya ku'somba wu'kenagu'zi*. 9 Haho Aloni alayi'lete ngulati' i'yo yi'lav'e yagwi'lagwa kav'ale ku'nguno yamwa Gu'ku' Mulungu, na ku'yi'fumya yi'v'e ki'taambo cha ku'sini'zya wu'kenagu'zi. 10 Ali'vi ngulati' i'yo yi'lav'e yagwi'lagwa kav'ale ku'nguno ya ku'somba wu'kenagu'zi yi'laletwe ku'mwa Gu'ku' Mulungu ku'no yi'li' mpanga, ki'gele ku'v'ezya wu'swanano ku' ku'yi'leku'li'la yi'ye ku' ibalangu' ku'no yi'wu'sombile wu'kenagu'zi.

11 "Nawe Aloni alayi'lete ng'ombe nzagamba ku'v'a ki'taambo cha ku'sini'zya wu'kenagu'zi wakwe mweni'ki'li', na ku'v'ezya wu'swanano ku'nguno yakwe na mugana gwakwe, nawe alayi'si'nze yeni'yo ng'ombe ku'nguno ya wu'kenagu'zi wakwe. 12 Hangi' alasole ki'tezo i'cho chokalile makala ga moto ago gafumile ha ihozezyo i'lo li'li' ha mbele yamwa Gu'ku' Mulungu, na viganza viv'i'li' vya wu'bani wu'motu u'wo wu'siv'ilwe, na ku'vifila ha nnuma na muki'ngo gwa mugati'. 13 Hangi' alawu'ti'ti'le wu'bani wenu'wo ha igu'lya na u'go moto ha mbele yamwa Gu'ku' Mulungu, ki'gele lyonsi lya wu'bani wenu'wo li'yi'si'gani'zye nfundi' ya wu'swanano i'yo yi'li' ha igu'lya na isandi'ko lya wu'sangi'lwa, ki'gele ku'du' afwe. 14 Alasole na lwandi' lwa magazi ga i'yo ng'ombe nzagamba ku' lyala lyakwe, na ku'ganyanyagi'la ha mbele ha igu'lya na nfundi' ya wu'swanano, hangi' alanyanyagi'le ha mbele ya nfundi' ya wu'swanano ku' lyala lyakwe kali' mupungati'.

15 "Hangi' alayi'si'nze i'yo ngulati' ya ki'taambo cha ku'sini'zya wu'kenagu'zi ku'nguno ya v'antu' v'ose. Magazi ga ngulati' yeni'yo alagingi'zye mugati' na muki'ngo gwa mugati', na av'ezye ki'ti' i'vyo wav'ezyaga magazi ga i'yo ng'ombe nzagamba, na ku'nyanyagi'la ha igu'lya na nfundi' ya wu'swanano, na ha mbele yalyo. 16 I'vi hu' vyene alahasosohye Hantu' Hasondo Muno, ku'nguno ya zoma ya V'aizilaeli, mahu'v'yo gav'o, na wu'kenagu'zi wav'o wose. Hangi' alav'ezye vyeni'vyo ku'nguno ya Ihema lya Ku'sangi'zya, i'lo li'li' mugati' nav'o av'o v'ali' na zoma. 17 Muntu' ninga yu'mo akazumi'ziwa ku'v'a mu Ihema lya Ku'sangi'zya ha itungo i'lo Aloni alav'e ali'wingi'la Hantu' Hasondo Muno ku'v'ezya wu'swanano, mpaka aho alav'e wafuma ha ibala, aho alav'e wamali'la ku'v'ezya wu'swanano ku'nguno yakwe mweni'ki'li', mugana gwakwe haki'mo na iv'ilingano lyose lya V'aizilaeli.

18 "Haho alafume ha ibala na ihema ha ihozezyo i'lo li'li' ha mbele yamwa Gu'ku' Mulungu, na ku'li'sosohya. Alasole lwandi' lwa magazi ga ng'ombe nzagamba na lwandi' lwa magazi ga ngulati', na ku'v'ila ku' mapembe ga ihozezyo ku' ki'la lwandi'. 19 Hangi' magazi genago alaganyanyagi'le ha igu'lya na ihozezyo lyeni'lo kali' mupungati' ku' ku'tu'mi'la lyala lyakwe, na alali'sosohye na ku'li'sondohya ku'fuma ku' zoma ya V'aizilaeli.

20 "Nawe u'lu' wamali'la ku'hasosohya Hantu' Hasondo Muno, Ihema lya Ku'sangi'zya na ihozezyo, haho alayi'lete i'yo ngulati' mpanga ya ku'somba wu'kenagu'zi. 21 Nawe Aloni alatu'u'le makono gakwe av'i'li' ha igu'lya na mutwe gwa ngulati' yeni'yo mpanga, na ku'v'isu'la ha igu'lya yayo wu'kenagu'zi wose na mahu'v'yo gose ga V'aizilaeli, na ku'tu'u'la wu'kenagu'zi wav'o wose ha igu'lya na mutwe gwa ngulati' yeni'yo. Haho alayi'leku'li'le yi'ye ku' ibalangu' ku' ku'filwa na muntu' u'yo wapiv'ilwe wangali'zi wa muli'mo gwenu'go. 22 Mbu'li yeni'yo yi'lawu'sombe ha igu'lya yayo wu'kenagu'zi wav'o wose, mpaka ku' lwandi' u'lo lu'li' wu'du'hu' v'antu', na muntu' mwenu'yo alayi'leku'li'le yi'ye ku' ibalangu'.

23 "Aloni alaingi'le hangi' mu Ihema lya Ku'sangi'zya, nawe alavizule vizwalo vyakwe vya katani, i'vyo ndi' wazwalaga aho ali'wingi'la Hantu' Hasondo Muno, na ku'vileka mwenu'mo. 24 Aloge mu minzi' mwenu'mo mugati' na lu'gu'tu' lwa Ihema lya Ku'sangi'zya, na ku'zwala vizwalo vyakwe vingi'. Haho alafume na ku'fumya ki'taambo cha ku'zigya ku'nguno yakwe, na ki'taambo cha ku'zigya ku'nguno ya V'aizilaeli, ki'gele ku'v'ezya wu'swanano ku'nguno yakwe na ku'nguno ya v'antu' v'ose. 25 Hangi' maguta ga ki'taambo cha ku'sini'zya wu'kenagu'zi alagazigye ha igu'lya na ihozezyo.

26 "Muntu' u'yo mwangali'zi wa ku'yi'fila i'yo ngulati' ya ku'somba wu'kenagu'zi, yi'lamudime avikanze vizwalo vyakwe na koga mu minzi', haho akowolile kwingi'la mu nkambi'. 27 I'yo ng'ombe nzagamba haki'mo na i'yo ngulati', i'zyo zyafumiwa ku'nguno ya ki'taambo cha ku'sini'zya wu'kenagu'zi, i'zyo magazi gazyo ndi' gafilwa ha Hantu' Hasondo Muno ki'gele ku'v'ezya wu'swanano, yi'li'koov'iwa zifumiwe ha ibala na nkambi'. Ndi'li' zyazyo, nyama zyazyo, haki'mo na wu'se wazyo, vyose vitimwe. 28 Muntu' u'yo alavitime yi'lamudime avikanze vizwalo vyakwe na koga mu minzi', haho akowolile kwingi'la mu nkambi'.

29 "Nhama yeni'yi' yi'ku'v'a ya nhananhana. Lu'siku' lwa iku'mi lwa mwezi gwa mupungati' yi'lamudime ku'hangamyoyo, ku'du' mwize mutu'mame muli'mo ninga gu'mo, inywe, muv'anda ninga mugeni mwizi'li'zi u'yo ikalile mugati' na inywe. 30 Mulav'ezye vyeni'vyo ku'nguno lu'siku' lwenu'lo wu'swanano wu'lav'eziwe ku'nguno yinywe, ki'gele ku'musosohya. Haho mulasosoke wu'kenagu'zi winywe wose ha mbele yamwa Gu'ku' Mulungu. 31 Lwenu'lo lu'li' lu'siku' lwa ku'lenda, na yi'li'mudima ku'hangamyoyo. Nhama yeni'yi' yi'ku'v'a ya nhananhana. 32 Hangi' ki'la muhozya muhanya u'yo asimi'kilwe ki'gele ikali'le isumbi' lya wu'hozya lyamwa ise, alav'ezyage wu'swanano wenu'wo ku'no azwalile vizwalo i'vyo visondo vya katani. 33 Alasosohyage Hantu' Hasondo Muno, Ihema lya Ku'sangi'zya haki'mo na ihozezyo, na ku'v'ezya wu'swanano ku'nguno ya v'ahozya haki'mo na iv'ilingano lyose lya V'aizilaeli. 34 Nhama yeni'yi' yi'ku'v'a ya nhananhana ku' winywe. Wu'swanano wenu'wu' wu'lav'eziv'agwe kali' kamo ku' ki'la mwaka ku'nguno ya wu'kenagu'zi wose wa V'aizilaeli." Haho gav'ezyekaga gose ki'ti' i'vyo Gu'ku' Mulungu wamulagi'li'zizye Mose.