1 Hangi' Gu'ku' Mulungu wav'awi'laga Mose na Aloni ati', 2 "U'lu' muntu' ninga yu'mo av'e na wu'vimbe ku' ndi'li' ya mu muv'i'li' gwakwe, ninga wu'landi, ninga ibado, na ki'ntu' i'cho ki'li'wikola ku'v'a ki'ti' wu'lwile wa ndi'li' mu muv'i'li' gwakwe, haho alaletwe ku'mwa Aloni ninga ku' yu'mo mugati' na v'ana v'akwe v'a ki'gosya v'ahozya. 3 Nawe muhozya alahikomye ha wu'vimbe wenu'wo wa ha igu'lya na ndi'li', na u'lu' wu'yenze wa henanho wagalu'kile na ku'v'a wape, na u'lu' wu'vimbe wingi'lile mugati' na ndi'li', hohene yi'ligelisye ku'v'a yi'li' wu'lwile wa ndi'li'. Muhozya alav'e u'lu' wamali'la ku'mwikomya, haho alamutangazye ku'v'a ali' na zoma. 4 Ali'vi wu'vimbe wenu'wo ninga i'vi wape, u'lu' wu'kingi'la mugati' na ndi'li', na wu'yenze wu'kagalu'kile ku'v'a wape, haho muhozya alamukome muntu' mwenu'yo av'e ha winene ku' itungo lya nsiku' mupungati'. 5 Yi'lav'e lu'siku' lwa mupungati', muhozya alamwikomye hangi' muntu' mwenu'yo, nawe u'lu' wawona ku'v'a wu'vimbe wenu'wo wu'kalandalile ku' ndi'li' yakwe, hohene muhozya alamukome hangi' av'e inene ku' itungo lya nsiku' mupungati' zingi'. 6 U'lu' lwafika lu'siku' lwa mupungati', muhozya alamwikomye hangi'. U'lu' yi'v'e wu'vimbe wenu'wo wadohaga na wu'kalandalile ha igu'lya na ndi'li', haho muhozya alamutangazye ku'v'a wav'aga musoso, na wu'li' wu'vimbe du'. Yi'lamudime muntu' mwenu'yo avikanze vizwalo vyakwe, nawe alav'e wasosoka. 7 Ali'vi u'lu' wu'vimbe wenu'wo wakalandala ku'fuma muntu' mwenu'yo aho ndi' wilagi'la ku' muhozya ku'nguno ya ku'sosohiwa kwakwe, hohene yi'lamudime ku'ya hangi' ku' muhozya. 8 Haho muhozya alamwikomye hangi'. U'lu' wu'vimbe wu'landalile ku' ndi'li' hohene muhozya alamutangazye ku'v'a muntu' mwenu'yo ali' na zoma. Wenu'wo wu'li' wu'lwile wa ndi'li'.

9 "U'lu' muntu' wu'mudime wu'lwile wa ndi'li', alafilwe ku' muhozya. 10 Nawe muhozya alamwikomye na u'lu' ali' na wu'vimbe wape ha igu'lya na ndi'li' na wu'yenze wagalu'kile ku'v'a wape, na wu'vimbe wenu'wo wagalu'kile na ku'v'a ki'londa, 11 wenu'wo sanga wu'li' wu'lwile wa ndi'li' u'wo wu'kakowola ku'pi'la. Haho muhozya alamutangazye ku'v'a ali' na zoma. Yi'lav'e ku'du'hu' nguno ya ku'mukoma ku'nguno ya ku'mwikomya, ku'nguno yigelisyaga ali' na zoma.

12 "Ali'vi wenu'wo wu'lwile wa ndi'li' u'lu' wu'lav'e wigelisyaga ku' ndi'li' ya mulwile, na walandalaga ku' muv'i'li' gose, ku'fuma ku' mutwe mpaka ku' magu'lu', ki'ti' i'vyo muhozya alav'e wamuwonaga, 13 muhozya alamwikomye. U'lu' nhana wu'lwile wa ndi'li' wakalandala mu muv'i'li' gose, hohene alamutangazye ku'v'a muntu' mwenu'yo ali' musoso. Ku'nguno muv'i'li' gwakwe gwakagalu'ka na ku'v'a gwape yi'li'wigela wu'lwile wakav'i'ta. Muntu' mwenu'yo ali' musoso. 14 Ali'vi u'lu' yigele mu muv'i'li' gwa muntu' mwenu'yo ku'li' na ki'londa, hohene muntu' mwenu'yo alav'e na zoma. 15 Muhozya alakikomye cheni'cho ki'londa na ku'mutangazya muntu' mwenu'yo ku'v'a ali' na zoma. Ki'londa cheni'cho ki'li' zoma, ku'nguno wenu'wo wu'li' wu'lwile wa ndi'li'. 16 Sumbwa ki'londa cheni'cho u'lu' ki'galu'ke hangi' na ku'v'a chape, yi'lamudime muntu' mwenu'yo ku'su'v'a ku' muhozya. 17 Nawe muhozya alamwikomye na u'lu' waki'wona ku'v'a nhana chagalu'kaga na ku'v'a chape, hohene alamutangazye muntu' mwenu'yo ku'v'a zoma yamalaga na wav'aga musoso.

18 "Hangi' u'lu' muntu' av'e na ipute ku' ndi'li' yakwe, nalyo li'pi'le, 19 ali'vi aho ndi' hali' na ipute u'lu' hav'e na wu'vimbe wape, ninga wape wa wazaa, yi'lamudime akiyoleche ku' muhozya. 20 Nawe muhozya alahikomye henanho ha wu'vimbe, na u'lu' wingi'lile mugati' na ndi'li', na wu'yenze wagalu'kile ku'v'a wape, haho muhozya alamutangazye ku'v'a ali' na zoma. Wenu'wo wu'li' wu'lwile wa ndi'li' u'wo wakafumi'i'la ku' ipute. 21 Ali'vi muhozya u'lu' wamwikomya muntu' mwenu'yo na ku'wona wu'yenze wa ha lwandi' lwenu'lo wu'kav'ile wape na wu'vimbe wu'kingi'la mugati' na ndi'li', ali'vi hali'pi'li'zya, hohene muhozya alamukome muntu' mwenu'yo av'e ha winene ku' itungo lya nsiku' mupungati'. 22 Hangi' u'lu' wu'vimbe wize wu'v'e wakalandala ha ndi'li', haho muhozya alamutangazye ku'v'a ali' na zoma. Wenu'wo wu'li' wu'lwile. 23 Ali'vi u'lu' wu'vimbe wenu'wo wu'li' vyene vivyo, na wu'kalandala, yi'li' iv'amba lya ipute du'. Muhozya alamutangazye muntu' mwenu'yo ku'v'a ali' musoso.

24 "U'lu' muntu' av'e na lwandi' u'lo ndi' wapya ha ndi'li' yakwe na lu'galu'ke lu'v'e ki'londa cha wape ninga wape wa wazaa, 25 haho muhozya alahikomye. U'lu' awone wu'yenze wa henanho wagalu'kaga na ku'v'a wape na wu'vimbe wingi'lile mugati', wenu'wo sanga wu'li' wu'lwile wa ndi'li' u'wo wakamudima ha wu'pye wa moto. Haho muhozya alamutangazye muntu' mwenu'yo ku'v'a ali' na zoma. Wu'li' wu'lwile wa ndi'li'. 26 Ali'vi muhozya u'lu' ahikomye na ku'wona wu'yenze wa henanho wu'kav'ile wape na wu'vimbe wu'kingi'la mugati' na hapi'li'zizye, haho muhozya alamukome muntu' mwenu'yo av'e ha winene ku' itungo lya nsiku' mupungati'. 27 Lu'siku' lwa mupungati' muhozya alamwikomye hangi', na u'lu' awone wu'vimbe wu'landalile ku' ndi'li', haho muhozya alamutangazye muntu' mwenu'yo ku'v'a ali' na zoma. Wenu'wo wu'li' wu'lwile wa ndi'li'. 28 Ali'vi u'lu' lwandi' lwenu'lo lu'li' vyene vivyo na lu'kalandala, sumbwa hali'pi'li'zya, wenu'wo wu'li' wu'vimbe ku'nguno ya ku'pya moto du'. Haho muhozya alamutangazye muntu' mwenu'yo ku'v'a ali' musoso. Lyeni'lo li'li' iv'amba ku'nguno ya ku'pya moto.

29 "Hangi' muntu' u'yo alav'e na wu'vimbe ku' mutwe ninga ku' ki'lezu, av'e mugosya ninga muki'ma, 30 haho muhozya alawikomye wu'vimbe wenu'wo. Muhozya u'lu' awone wu'vimbe wingi'lile mugati' na ndi'li', na nyele zyakav'a zya njano na zyakanieniengala, haho muhozya alamutangazye muntu' mwenu'yo ku'v'a ali' na zoma. Genago gali' mapatu' na wu'li' wu'lwile wa ndi'li' wa ku' mutwe ninga ku' ndezu. 31 Ali'vi u'lu' muhozya ahikomye ha mapatu' genago nago gigele gakingi'lile mugati' na ndi'li' sumbwa ku'du'hu' nyele nnilawu'zu, haho muhozya alamukome muntu' mwenu'yo ku' itungo lya nsiku' mupungati'. 32 Lu'siku' lwa mupungati' muhozya alagikomye hangi' mapatu' genago. U'lu' gakalandalile na gali' wu'du'hu' nyele zya langi ya njano na gakingi'lile mugati' na ndi'li', 33 yi'lamudime muntu' mwenu'yo amogwe nyele zyakwe, sumbwa ha mapatu' hakasye hamogwe. Haho muhozya alamukome ha winene muntu' mwenu'yo ku' itungo lya nsiku' mupungati' zingi'. 34 Lu'siku' lwa mupungati' muhozya alagikomye hangi' mapatu' genago. U'lu' wawona ku'v'a gakalandalile na gakingi'lile mugati' na ndi'li', haho alamutangazye muntu' mwenu'yo ku'v'a ali' musoso. Muntu' mwenu'yo yi'lamudime ku'vikanza vizwalo vyakwe, nawe alav'e wasosoka. 35 Ali'vi u'lu' mapatu' gize galandale ku'fuma ha itungo lya ku'tangaziwa wu'soso wakwe, 36 muhozya alamwikomye muntu' mwenu'yo. U'lu' gav'e mapatu' nhana galandalile, ku'lav'e ku'du'hu' nguno ya muhozya ku'mwikomya nyele zya njano, ku'nguno muntu' mwenu'yo ali' na zoma. 37 Ninga vyeni'vyo, u'lu' wamwikomya na ku'wona akagalu'kile, na nyele nnilawu'zu zimelile henanho, mapatu' genago sanga gapi'laga na muntu' mwenu'yo akav'ile na zoma. Haho muhozya alamutangazye ku'v'a ali' musoso.

38 "Ki'la muntu' u'yo alav'e na mabado gape ha igu'lya na ndi'li' yakwe, av'e mugosya ninga muki'ma, 39 muhozya alamwikomye muntu' mwenu'yo. U'lu' amuwone ku'v'a mabado genago gali' na wilawu'zu hadoo, sanga wenu'wo wu'li' wu'landi u'wo wu'kav'ile na wu'v'i ku' ndi'li'. Muntu' mwenu'yo ali' musoso.

40 "U'lu' mugosya amele wanga, mwenu'yo ali' musoso. 41 Ninga u'lu' muntu' apenyuke nyele zyakwe ku' lwandi' lwa ku' mbele ninga lwa ku' nnuma lwa mutwe gwakwe, sanga wanga du'. Mwenu'yo ali' musoso. 42 Ali'vi u'lu' ku' mutwe gwa muntu' wa wanga ku'v'e na wu'vimbe wa langi yape ya wazaa, wenu'wo wu'li' wu'lwile wa ndi'li' u'wo wu'li'fumi'i'la ku' wanga wakwe wa ku' mbele ninga wa ku' nnuma. 43 Haho muhozya alamwikomye. U'lu' awone wu'vimbe wu'li' na wape wa wazaa ku' wanga wakwe, na wu'li'wigela ki'ti' wu'lwile wa ndi'li', 44 sanga muntu' mwenu'yo alwalile, na ali' na zoma. Haho muhozya alamutangazye muntu' mwenu'yo ku'v'a ali' na zoma ku'nguno ya wu'vimbe ku' mutwe gwakwe.

45 "Ki'la mulwile wa ndi'li' u'yo ali' na wu'vimbe yi'lamudime azwale vizwalo vya wu'zemuke, na nyele zyakwe alazisalambanie, na mulomo gwakwe alagu'fumbati'zye na ku'liinia muzwi na ku'yomba, ‘Ene ni'na zoma! Ene ni'na zoma!’ 46 Mugati' na nsiku' zyose i'zyo alav'e na wu'lwile wenu'wo mwenu'yo alendeleye ku'v'a na zoma, nawe alikale ku' ku'komwa av'e ha mpelo na nkambi'."

47 "U'lu' ku'li' na mwenda u'go gwakikuumya na wule, gu'v'e gwa wu'zi wa wu'yenze ninga wa katani, 48 ninga gu'v'e gwa wu'fuumwe wa ki'la mukoli ku' katani ninga wu'yenze, ninga gu'v'e gwa ndi'li', ninga ki'v'e ki'ntu' i'cho ki'v'eziv'ilwe ku' ndi'li', 49 na u'lu' wule wenu'wo wu'li' na langi ya lu'du'tu' ninga yazaa ku' mwenda gwenu'go ninga ku' ki'ntu' cha ndi'li', wenu'wo wu'li' wule wu'v'i, na yi'li'koov'iwa ku'lagi'lwa muhozya. 50 Haho muhozya alawikomye wule wenu'wo na ku'gu'koma mwenda ninga ki'ntu' cheni'cho ha mpelo ku' itungo lya nsiku' mupungati'. 51 Mu lu'siku' lwa mupungati' alawikomye, na u'lu' awone wule wenu'wo wu'landalile ku' mwenda ninga ki'ntu' cheni'cho, sanga ki'li' na wule wu'v'i. Ku'nguno yeni'yo ki'ntu' cheni'cho ki'li' na zoma. 52 Hohene muhozya yi'lamudime agu'time moto mwenda ninga ki'ntu' cheni'cho, ku'nguno ki'li' na wule wu'v'i u'wo wu'kakowoleka ku'hangwa.

53 "Ali'vi u'lu' muhozya awikomye na ku'wona ku'v'a wule wenu'wo wu'kalandala ku' mwenda ninga ki'ntu' cheni'cho, 54 haho muhozya alasemuzye ki'kanzwe, nawe alaki'kome ku' itungo lya nsiku' mupungati' hangi'. 55 Hangi' muhozya alagwikomye mwenda gwenu'go ninga ki'ntu' u'lu' chakanzwa. U'lu' yigele wu'kagalu'kile langi ninga i'vyo wu'kalandala, sanga ki'li' na zoma. Mwenda ninga ki'ntu' cheni'cho ki'latimwe, ninga ki'v'e na wu'v'ipiwe wa wule mugati' ninga ha ibala. 56 Ali'vi u'lu' muhozya awone ku'v'a wule walamulaga ku'zimangu'ka ku'fuma aho ndi' chakanzwa, hohene alahazemule aho hakalandi'ki'ziwa na wule ku' mwenda ninga ki'ntu'. 57 Ali'vi u'lu' wule wigele hangi' ku' mwenda ninga ki'ntu' cheni'cho, sanga wu'landalile. Haho yi'li'koov'iwa ku'ki'tima moto. 58 Sumbwa mwenda ninga ki'ntu' cheni'cho i'cho chakanzagwa na ku'siniwa wule, yi'li'koov'iwa ki'kanzwe ka wu'v'i'li', nacho ki'lav'e chasosoka."

59 Yeni'yi' hu' nhama ku'nguno ya wule u'wo wu'fumi'i'lile ku' myenda zya wu'zi wa wu'yenze ninga wa katani, i'zyo zya wu'fuumwe wa ki'la mukoli, ninga ki'ntu' cha ndi'li'. Ku' nzi'la yeni'yi' mulakowole ku'mani'cha mugati' na myenda misoso na zya zoma.