1 Nadabu na Abihu, v'ana v'a ki'gosya v'amwa Aloni, v'asolaga vitezo vyav'o na v'atu'u'laga moto mugati' yavyo na kongezya wu'bani, hangi' v'amufumi'zyaga Gu'ku' Mulungu moto u'go gu'kazumi'ziwa na gu'kagelani'la na ilagi'li'zyo lyamwa Mulungu. 2 Hohene moto gwafumi'i'laga ha mbele yamwa Gu'ku' Mulungu na ku'v'azimangu'zya, nav'o v'afwaga ha mbele yakwe. 3 Hangi' Mose wamuwi'laga Aloni ati', "Igambo lyeni'li' li'li'lagi'la nhana ya mihayo zyamwa Gu'ku' Mulungu ku' i'cho ndi' ali'yomba:

‘Ndasondohiwe ene mugati' na av'o v'ali'nyegela,

nanne ndapandi'ke lu'kumo ha mbele ya v'antu' v'anne v'ose.’ "

Hohene Aloni akayombile ki'ntu'.

4 Mose wav'itanaga Mishaeli na Elisafani, v'ana v'amwa Uzieli v'a ki'gosya, ise mudo lyamwa Aloni. Wav'awi'laga ati', "Izi hano, muzisinie milambo zya v'adu'gu' v'inywe ha mbele ya hantu' hasondo, muzifile ha ibala na nkambi'." 5 Hohene v'izaga na ku'zisinia milambo, ku'no zikaali' zizwalile nhanzo zya ki'hozya, na v'azifilaga ha ibala na nkambi', ki'ti' i'vyo Mose walagi'li'zyaga. 6 Haho Mose wamuwi'laga Aloni haki'mo na v'aane v'angi' v'a ki'gosya, Eleazali na Itamali, ati', "Ku'du' musalambanie nyele zinywe ninga ku'zemula vizwalo vinywe ku' ku'v'ali'la, ku'nguno mukwilengela lu'fu na Gu'ku' Mulungu aku'li'gayi'la iv'ilingano lyose. Ali'vi v'adu'gu' v'inywe, yaani iv'ilingano lyose lya Izilaeli, v'akowolile ku'v'ali'la v'antu' av'o Gu'ku' Mulungu wav'azimangu'zyaga ku' moto. 7 Ku'du' mufume ha ibala na wingi'li'lo wa Ihema lya Ku'sangi'zya, ki'gele muleke ku'fwa, ku'nguno maguta gamwa Gu'ku' Mulungu ga ku'sondohya gali' ha igu'lya yinywe." Haho Aloni na v'ana v'akwe v'av'ezyaga ki'ti' i'vyo Mose wayombaga.

8 Hangi' Gu'ku' Mulungu wamuwi'laga Aloni ati', 9 "Ev'e na v'ana v'ako v'a ki'gosya ku'du' mwize munywe ki'neneko ninga malwa itungo i'lo mulav'e muli'wingi'la mu Ihema lya Ku'sangi'zya, ki'gele muleke ku'fwa. I'yi' yi'ku'v'a nhama ya nhananhana ku' wu'v'yalwa u'wo wu'lalonde. 10 Yi'li'mudima mulekanie mugati' na magambo masondo na ago gakav'ile masondo, mugati' na magambo masoso na ga zoma, 11 na yi'li'mudima muv'ahembeke V'aizilaeli nhama zyose i'zyo Gu'ku' Mulungu ndi' wav'apa ku'v'i'ti'la ku'mwa Mose."

12 Mose wamuwi'laga Aloni haki'mo na v'ana v'akwe v'a ki'gosya av'o ndi' v'asigali'laga, Eleazali na Itamali, "Musole kalu'mbi'lo ka mbutoo ako kasigali'laga ku'fuma ku' kalu'mbi'lo ka ku'zigya ku'mwa Gu'ku' Mulungu, mukalyi'le aho bi'hi' na ihozezyo, na kav'e kav'eziv'agwa bila itumbyo, ku'nguno kali' kasondo muno. 13 Mulakalyi'le ha hantu' hasondo ku'nguno li'li' ifungu lyako na ifungu lya v'ana v'ako v'a ki'gosya lya kalu'mbi'lo ka ku'zigya ku'mwa Gu'ku' Mulungu, ku'nguno i'vi hu' i'vyo nalagi'li'ziwa.

14 "Ali'vi ki'dali i'cho chawu'siv'agwa na itango i'lo lyafumiv'agwa, inywe na v'ana v'inywe v'a ki'gosya na v'a ki'ki'ma mukowolile ku'lya, na mulavilyi'le ha hantu' hasoso. Vintu' vyeni'vyo mwapiv'ilwe inywe na v'ana v'inywe ku'v'a ifungu linywe lya vitaambo vya kwiswanania vya V'aizilaeli. 15 Itango i'lo lyafumiv'agwa na ki'dali i'cho chawu'siv'agwa v'alavilete haki'mo na kalu'mbi'lo ka ku'zigya ka maguta ga ndimu yeni'yo, ki'gele viwu'siwe ku'v'a lu'manyi'lo lwa kalu'mbi'lo ha mbele yamwa Gu'ku' Mulungu. Vyeni'vyo vilav'e vya ku' winywe haki'mo na v'ana v'inywe, ku'v'a ifungu linywe nhananhana ki'ti' i'vyo Gu'ku' Mulungu walagi'li'zizye."

16 Hangi' Mose wayi'koov'aga muno i'yo mbu'li ya ki'taambo cha ku'sini'zya wu'kenagu'zi, nawe wamanyaga ku'v'a kasinaga yakazigiwa! Haho wav'agayi'laga Eleazali na Itamali, v'ana v'amwa Aloni v'a ki'gosya av'o v'asigali'lile, na wav'awu'zyaga, 17 "Ku' ki' mukalyi'lile ki'taambo cha ku'sini'zya wu'kenagu'zi ha lwandi' lwa hantu' hasondo? Ki'li' ki'sondo muno. Mwapiv'ilwe inywe ki'gele ku'sinia musango gwa iv'ilingano ku'nguno ya ku'v'av'ezezya wu'swanano ha mbele yamwa Gu'ku' Mulungu. 18 Lingagi, magazi gayo gakaletilwe mugati' ya Hantu' Hasondo mu ihema. Nhana, yali' yi'li'koov'iwa muyi'lyi'le mbu'li yeni'yo ha lwandi' lwa hantu' hasondo lwa ihema ki'ti' i'vyo nalagi'li'zizye."

19 Aloni wasu'v'yaga ku'mwa Mose ati', "Lingaga, walelo v'ana v'anne v'afumyaga ki'taambo chav'o cha ku'sini'zya wu'kenagu'zi na ki'taambo chav'o cha ku'zigya ha mbele yamwa Gu'ku' Mulungu, ali'vi magambo ki'ti' genaga ganfumi'i'laga ene! Vihe, Gu'ku' Mulungu wali' aku'zumani'zya u'lu' mbe nali' nalyaga ki'taambo cha ku'sini'zya wu'kenagu'zi walelo?" 20 Mose aho wigagwa genago, wazumani'zyaga.