1 Hangi' Gu'ku' Mulungu wamuwi'laga Mose, 2 "U'v'awi'le V'aizilaeli ati', ‘Ki'la muntu' mugati' na V'aizilaeli, ninga mugeni mwizi'li'zi u'yo ikalile mugati' na inywe, u'yo alamufumye mwana wakwe ninga yu'mo na ku'mupa kalu'mbi'lo mulungu Moleki, yi'li'mudima muntu' mwenu'yo awu'lagwe. V'antu' v'a iv'ilingano lyeni'lo v'alamuwu'lage ku' ku'mugu'ma na mawe. 3 Nanne ndamupe nkonya muntu' mwenu'yo, na ku'musinia mu iv'ilingano lya V'aizilaeli. Ku'nguno ku' ku'mufumya yu'mo mugati' na v'ana v'akwe ku'mwa Moleki, alav'e wahav'ezezya zoma hantu' hasondo ha wanne, na ku'li'yagazya lina lyanne isondo. 4 Hangi' u'lu' iv'ilingano li'mulingi'li'lile du' muntu' mwenu'yo, aho ali'mufumya mwana wakwe ninga yu'mo ku'mwa Moleki, nav'o v'aleke ku'muwu'laga, 5 ene mweni'ki'li' ndamupe nkonya muntu' mwenu'yo haki'mo na igongo lyakwe, nanne ndamukome na iv'ilingano lya V'aizilaeli, haki'mo na v'antu' v'enav'o v'ose av'o v'alamulonde ki'gele ku'kav'ezya wu'lav'a na Moleki.

6 " ‘Hangi' u'lu' muntu' ninga yu'mo u'yo alav'ayi'le v'a mizimu na v'alagu'zi ku'kav'ezya wu'lav'a, ndamupe nkonya muntu' mwenu'yo, na ku'mukoma na iv'ilingano lya V'aizilaeli.

7 " ‘Yi'li'mudima mwisondohye, na inywe muv'e v'asondo, ku'nguno ene hu' ni' Gu'ku' Mulungu, Mulungu winywe. 8 Muzidime nhama zyanne na ku'zilonda. Ene hu' ni' Gu'ku' Mulungu wa ku'musondohya.

9 " ‘U'lu' muntu' ninga yu'mo amutyomokele ise ninga nnina, yi'lamudime awu'lagwe. Wamutyomokelaga ise ninga nnina, na magazi gakwe galav'e ha igu'lya yakwe.

10 " ‘U'lu' muntu' asihye na muki' wa muntu' mwiye, v'asihya v'enav'o v'av'i'li' yi'lav'adime v'awu'lagwe.

11 " ‘U'lu' muntu' alale na muki' wamwa ise, sanga wamuv'i'nzi'la isima ise. Mugosya mwenu'yo na muki'ma mwenu'yo v'ose v'av'i'li' yi'li'v'adima v'awu'lagwe, na magazi gav'o galav'e ha igu'lya yav'o.

12 " ‘U'lu' muntu' alale na mukamwane, yi'lav'adime v'ose v'av'i'li' v'awu'lagwe. V'alav'e v'av'ezyaga wu'v'ipya, na magazi gav'o galav'e ha igu'lya yav'o.

13 " ‘U'lu' mugosya alale na mugosya mwiye ki'ti' i'vyo ali'v'ezyaga ku' muki'ma, v'agosya v'enav'o v'alav'e v'av'ezya igayi'li'zyo. Yi'lav'adime v'awu'lagwe na magazi gav'o galav'e ha igu'lya yav'o.

14 " ‘U'lu' muntu' atoole mwaniki' haki'mo na nnina, lyeni'lo li'li' ihu'v'yo. V'ose v'adatu' yi'lav'adime v'atimwe moto, ki'gele ku'du' ku'v'e na wu'kenagu'zi mugati' na inywe.

15 " ‘U'lu' mugosya alale na ndimu, yi'lamudime awu'lagwe, hangi' ninga ndimu yeni'yo nayo yi'lawu'lagwe.

16 " ‘U'lu' muki'ma ifile ha mbele na ndimu ki'gele alale nayo, yi'lamudime awu'lagwe, hangi' na ndimu yeni'yo yi'lawu'lagwe, na magazi gav'o galav'e ha igu'lya yav'o.

17 " ‘U'lu' muntu' ninga yu'mo amutoole ilu'mbu'ye, mwaniki' mwana wamwa ise, ninga wamwa nnina, na kwikala haki'mo, lyeni'lo li'li' igambo lya nsoni. Yi'lav'adime v'akomwe ha minso ga iv'ilingano lya V'aizilaeli. Mugosya mwenu'yo walalaga na ilu'mbu'ye, yi'lamudime ku'wu'somba wu'kenagu'zi wakwe.

18 " ‘U'lu' muntu' alale na muki'ma u'yo ali' ku' nsiku' zyakwe, v'ose v'av'i'li' v'alav'e v'av'isu'la magazi ga ku' nsiku' zyakwe. V'ose yi'lav'adime v'akomwe na iv'ilingano lya V'aizilaeli.

19 " ‘Ku'du' u'lale na sengiyo ninga nnoko muhanya ninga nnoko mudo, ku'nguno v'enav'o v'ali' v'a igongo lya bi'hi' nanho. V'ose av'o v'alav'ezye vyeni'vyo yi'lav'adime ku'wu'somba wu'kenagu'zi wav'o.

20 " ‘U'lu' muntu' alale na muki' lyamwa ise muhanya ninga mudo, sanga wamuv'i'nzi'la isima ise muhanya ninga mudo. V'ose v'av'i'li' yi'lav'adime ku'wu'somba wu'kenagu'zi wav'o, na v'alafwe bila ku'v'yala.

21 " ‘U'lu' muntu' atoole muki' wa muku'lu'ye ninga muki' wa muzunaye, yeni'yo yi'li' zoma, sanga wamuv'i'nzi'la isima mudu'gu'ye. V'ose v'av'i'li' v'akasye v'av'yale.

22 " ‘Muzidime nhama na nzi'la zyanne zyose, na ku'zidoonoka, ki'gele nsi' i'yo nu'mufila ku'du' yi'mulu'ke. 23 Nhana ku'du' mwikale ku' ku'londa ki'ti'le cha v'antu' v'a nsi' av'o nu'v'asaga ha mbele yinywe. Ku'nguno ndi' v'av'ezya magambo gose genaga, na ku'nguno ya genaga hene nav'agayile muno. 24 Ali'vi ene namuwi'lile inywe, mulayi'saale nsi' yav'o, nanne nu'mupa inywe ku'yi'tema nsi' ya lu'tongo i'yo yi'li'keneneka mav'eele na wu'ki'. Ene hu' ni' Gu'ku' Mulungu, Mulungu winywe, u'yo namukomile inywe ku'fuma ku' makabi'la gangi'.

25 " ‘Ku'nguno yeni'yo, yi'li'mudima ku'mani'cha ndimu nsoso na zya zoma, hangi' na nnoni nsoso na zya zoma. Ku'du' mwiv'ezezye zoma ku'nguno ya ndimu ninga yi'mo, ninga nnoni, ninga vitundwa vido vido vya ku'yu'mba ha igu'lya na nsi', i'vyo navikomile ku'v'a vili' zoma ku'nguno yinywe. 26 Mulav'e v'asondo ku' wanne, ku'nguno ene Gu'ku' Mulungu ni' musondo, nanne namukomile inywe ku'fuma ku' makabi'la muv'e nsawo yanne.

27 " ‘Hangi' mugosya ninga muki'ma u'yo ali' na mizimu, ninga mulagu'zi, nhana alawu'lagwe ku' ku'gu'mwa na mawe, na magazi gav'o galav'e ha igu'lya na mitwe zyav'o.’ "