Levítico 27

Kalu’mbi’lo ka ki’lu’mbo na ku’komolwa kwako

1 Gu’ku' Mulungu wamuwi’laga Mose ati', 2 "U’v’awi’le V’aizilaeli, ‘Muntu' u’lu' atu’u’le ki’lu’mbo cha ku’mufumya muntu' ku' mili’mo zyamwa Gu’ku' Mulungu, muntu' mwenu’yo akowolile ku’komolwa ku' ku’li’pa lu’v’alo ku’londana na i’vyo yi’li’koov’iwa: 3 Mupango gwa ku’mukomola mugosya wa musimo gwa myaka maku’mi av’i’li' mpaka maku’mi mukaga, vilav’e vipande maku’mi atano vya feza ku’londana na vipimo i’vyo vitu’u’lilwe ha hantu' hasondo. 4 U’lu' av’e muki’ma mupango gwa ku’mukomola gu’lav’e vipande maku’mi adatu' vya feza. 5 U’lu' muntu' mwenu’yo ali' na musimo gwa myaka itano mpaka maku’mi av’i’li' mupango gwakwe gu’lav’e vipande maku’mi av’i’li' vya feza ku' mugosya, na ku' muki’ma vipande iku’mi vya feza. 6 U’lu' muntu' mwenu’yo ali' na musimo gwa mwezi gu’mo mpaka myaka itano, mupango gwa ku’mukomola gu’lav’e vipande vitano vya feza ku' mugosya, na ku' muki’ma vipande vidatu' vya feza. 7 U’lu' muntu' mwenu’yo ali' na musimo u’go gu’ki’lile myaka maku’mi mukaga, mupango gwakwe gu’lav’e vipande iku’mi na itano vya feza ku' mugosya, na ku' muki’ma vipande iku’mi vya feza. 8 Ali’vi muntu' u’lu' ali' mupi’na na akakowola ku’li’pa mupango u’go gu’tu’u’lilwe, hohene muntu' wa ku’fumiwa alafilwe ku' muhozya, nawe muhozya alatu’u’le mupango ku’londana na wu’pi’na wa u’yo wa ku’mufumya.

9 " ‘U’lu' muntu' watu’u’la ki’lu’mbo cha ku’fumya ndimu i’yo yi’zumi’ziv’ilwe ku’v’a ki’taambo ku’mwa Gu’ku' Mulungu, ndimu yeni’yo yi’li' nsondo. 10 Muntu' ku’du' ayi’kaav’e ndimu yeni’yo, yi’v’e ku' ndimu nsoga ninga mbi. U’lu' ayi’kaav’e ku' yi’ngi', haho ndimu yeni’yo na i’yo yakaav’iv’agwa zyose iv’i’li' zilav’e nsondo ku’mwa Gu’ku' Mulungu. 11 U’lu' ki’lu’mbo ki’li' cha ndimu ya zoma, i’yo yi’kaaniziv’ilwe ku’mufumi’zya ki’taambo Gu’ku' Mulungu, hohene ndimu yeni’yo yi’laletwe ha mbele ya muhozya, 12 nawe muhozya alayangu’le mupango gwa ndimu yeni’yo, ku’londana na wu’soga ninga wu’v’i wayo. Mupango u’go alayangu’le muhozya hu' vyene gu’lav’e. 13 U’lu' musav’a ndimu ali’koov’a ku’yi’komola ndimu yeni’yo, yi’lamudime kongezya lwandi' lwa wu’tano lwa mupango gwayo.

14 " ‘Muntu' u’lu' ayi’sondohye nnumba yakwe ku’v’a ki’ntu' ki’sondo ku’mwa Gu’ku' Mulungu, muhozya alayangu’le mupango gwa nnumba yeni’yo, ku’londana na wu’soga ninga wu’v’i wayo. Mupango u’go alayangu’le muhozya hu' vyene gu’lav’e. 15 U’lu' muntu' mwenu’yo u’yo wayi’fumyaga nnumba yeni’yo ali’koov’a ku’yi’komola, yi’lamudime kongezya lwandi' lwa wu’tano lwa mupango gwayo, nayo yi’lav’e nsawo yakwe hangi'.

16 " ‘Hangi' u’lu' muntu' alu’sondohye lwandi' lwa mugu’nda gwakwe, u’go gu’li' isaalo lyakwe, ku’v’a musondo ku’mwa Gu’ku' Mulungu, hohene mupango gwago gu’lapimwe ku’londana na mbiyu' i’zyo zilav’i’v’we mu mugu’nda gwenu’go. Ku' madebe iku’mi ga mpese zya shayili mupango gwago gu’lav’e vipande maku’mi atano vya feza. 17 U’lu' agu’sondohye mugu’nda gwakwe ku’v’a musondo mugati' na mwaka gwa Mwanya gwa Wiyagalu’le gwa myaka maku’mi atano, mupango gwago gu’lav’e gwenegu’go. 18 Ali’vi u’lu' gwav’i’ta mwaka gwa Mwanya gwa Wiyagalu’le hu' agu’sondohye mugu’nda gwakwe, hohene muhozya alayangu’le mupango ku’londana na myaka i’zyo zyasigali’lile ku’gu’fiki’i’la mwaka gwa Mwanya gwa Wiyagalu’le gwa myaka maku’mi atano, na mupango gwago gu’lapu’ngu’ziwe. 19 U’lu' muntu' mweni’ki’li' u’yo wagu’sondohizye mugu’nda gwakwe nawe akoov’e ku’gu’komola, yi’lamudime kongezya lwandi' lwa wu’tano lwa mupango gwago, na mugu’nda gu’lav’e nsawo yakwe hangi'. 20 Ali’vi u’lu' aleke ku’gu’komola ninga u’lu' amugu’zi’zye muntu' yu’ngi', hohene mugu’nda gwenu’go gu’kasye gu’komolwe hangi'. 21 Mugu’nda gwenu’go gu’lav’e musondo ku’mwa Gu’ku' Mulungu aho gu’lav’e gwaleku’li’lwa mu mwaka gwa Mwanya gwa Wiyagalu’le, ku’v’a musondo nhananhana, nago gu’lav’e nsawo ya muhozya.

22 " ‘U’lu' muntu' agu’sondohye mugu’nda ku’mwa Gu’ku' Mulungu u’go wagu’lile, yaani u’go gu’kav’ile gwa isaalo lyakwe, 23 muhozya alayangu’le mupango gwa mugu’nda gwenu’go ku' ku’londana na myaka i’zyo zyasigali’lile ku’fiki’i’la mwaka gwa Mwanya gwa Wiyagalu’le gwa myaka maku’mi atano, na muntu' mwenu’yo yi’lamudime ku’li’pa mupango gwago ku’v’a ki’ntu' ki’sondo ku’mwa Gu’ku' Mulungu. 24 Ali’vi mwaka gwenu’go gwa Mwanya gwa Wiyagalu’le, mugu’nda gwenu’go gu’lasu’v’iwe ku' musav’a u’yo ndi' wagu’gu’zya, u’yo li’li' isaalo lyakwe. 25 Ki’la mupango gu’lapimwe ku’londana na vipimo vya hantu' hasondo.*27:25 Ki’ebulania ki’li’yomba gela maku’mi av’i’li' zigelani’lile na shekeli yi’mo.

26 " ‘Yi’kazumi’ziwa muntu' ku’ki’sondohya ki’v’yalwa cha mbele cha ndimu, ku’nguno ndimu yeni’yo yi’li' yamwa Gu’ku' Mulungu, yi’v’e ng’ombe ninga nkolo. Yeni’yo yi’li' nsawo yamwa Gu’ku' Mulungu. 27 U’lu' ndimu yi’li' zoma, musav’a ndimu alayi’komole ku’londana na mupango u’go gu’tu’u’lilwe na kongezya lwandi' lwa wu’tano lwa mupango gwayo. U’lu' aleke ku’yi’komola, hohene muhozya alayi’gu’zye ku’londana na mupango u’go gwatu’u’lilwe.

28 " ‘Ali’vi ki’la ki’ntu' i’cho chasondohiwa nhananhana ku’mwa Gu’ku' Mulungu, av’e muntu', ninga yi’v’e ndimu, ninga gu’v’e mugu’nda gwa ku’saala, ki’kasye ki’gu’ziwe ninga ku’komolwa. Ki’la ki’ntu' i’cho chasondohiwa nhananhana ki’li' ki’sondo muno ku’mwa Gu’ku' Mulungu.

29 " ‘Muntu' u’yo wasondohiwa nhananhana ku’mwa Gu’ku' Mulungu ki’gele azimangu’ziwe, akasye akomolwe, sumbwa yi’li’mudima awu’lagwe.

30 " ‘Hangi' lwandi' lwa iku’mi lwa ki’la ki’ntu' ku’fuma ha nsi', viv’e mbutoo ku’fuma ku' migu’nda ninga visumo ku’fuma ku' miti', vyose vili' nsawo yamwa Gu’ku' Mulungu. Lwenu’lo lu’li' lwandi' lu’sondo ku’mwa Gu’ku' Mulungu. 31 U’lu' muntu' ali’koov’a ku’komola ki’ntu' ninga ki’mo cha kalu’mbi’lo kakwe ka lwandi' lwa iku’mi, yi’lamudime ongezye ku’li’pa lwandi' lwa wu’tano lwa mupango gwalo. 32 Ku' lwandi' lwa ndimu, ng’ombe, mbu’li ninga nkolo, aho zilav’e zili’v’aziwa ku' mulanga gwa mudi’mi, i’yo yi’lav’e ya iku’mi hu' yene yi’lav’e nsondo ku’mwa Gu’ku' Mulungu. 33 Ndimu ya iku’mi yi’kasye yi’sogolwe ku’nguno ya wu’soga wayo ninga wu’v’i, nayo yi’kasye yi’kaav’iwe na yi’ngi'. U’lu' yize yi’kaav’iwe ku' yi’ngi', hohene ndimu i’yo ya mbele na i’yo yakaav’iv’agwa, zyose zilav’e nsondo. Ndimu yeni’yo yi’kasye yi’komolwe.’ "

34 Zyeni’zyo hu' nhama i’zyo Gu’ku' Mulungu ndi' wamupa Mose ku' lu’gu’lu' lwa Sinai av’awi’le V’aizilaeli.