1 Gu'ku' Mulungu wamuwi'laga Mose ati', 2 "U'lu' muntu' ninga yu'mo av'ezye wu'kenagu'zi na ku'mutala Gu'ku' Mulungu ku' ku'muyenga muntu' mwiye ku' igambo lya ku'tu'u'li'ziwa ninga lya wu'lindi'li'zi wakwe, ninga ku' ku'puzya, ninga ku' ku'mwiwonelezya mwiye, 3 ninga aku'ge ki'ntu' cha muntu' mwiye i'cho chatagi'kile nawe ayombe ati', akaki'wine, ninga alahi'le ku' wu'fi mugati' na wu'kenagu'zi ninga wu'mo u'wo v'antu' v'ali'wu'v'ezyaga, 4 muntu' mwenu'yo sanga wav'ezizye wu'kenagu'zi na ku'v'a na musango. Ku'nguno yeni'yo yi'lamudime asu'v'ye i'cho wapandi'kile ku' ku'puzya, ninga ku' kwiwonelezya, ninga cha ku'tu'u'li'ziwa, ninga ki'ntu' i'cho chatagi'kile nawe waki'ku'gile, 5 ninga ki'ntu' ki'mo i'cho walahi'lile ku' wu'fi. Yi'lamudime ku'ki'su'v'ya cheni'cho na ki'v'e ki'gelani'lile na kongezya lwandi' lwa wu'tano lwa mupango gwacho. Vyose alamupe musav'a nsawo lu'siku' u'lo alalete ki'taambo chakwe cha ku'sini'zya musango. 6 Hangi' yi'lamudime ku'muletela muhozya ng'ondi i'yo yi'li' wu'du'hu' wu'lema ku'v'a masumule, ki'gele amufumi'zye Gu'ku' Mulungu ki'taambo cha ku'sini'zya musango. Mutugo gwenu'go gu'v'e na mupango gwa ku'gelani'la. 7 Ku' nzi'la yeni'yi' muhozya alav'ezye wu'swanano ku'nguno ya muntu' mwenu'yo ha mbele yamwa Gu'ku' Mulungu, nawe alatondolwe wu'kenagu'zi u'wo wawu'v'ezizye."

8 Gu'ku' Mulungu wamuwi'laga Mose, 9 "U'mupe Aloni na v'ana v'akwe v'a ki'gosya ilagi'li'zyo i'li', ‘I'yi' hu' nhama ku'nguno ya kalu'mbi'lo ka ki'taambo cha ku'zigya. Yi'li'dima kalu'mbi'lo ka ki'taambo cha ku'zigya kikale ha moto ha igu'lya na ihozezyo wu'ziku'pee mpaka ndiyu', na moto gu'lendeleye ku'v'aka ha igu'lya na ihozezyo. 10 Hangi' muhozya alazwale vizwalo vyakwe vya katani vya mugati' na vya ha ibala, nawe alasole matunde ga ki'taambo cha ku'zigya ku'fuma ha ihozezyo na ku'gatu'u'la bi'hi' na ihozezyo. 11 Hangi' alavizule vizwalo vyeni'vyo na ku'zwala vizwalo vingi', alagasole matunde na ku'gafila ha ibala na nkambi' hantu' hasoso. 12 Moto gwa ha ihozezyo yi'li'koov'iwa gwendeleye ku'v'aka ku' matungo gose, ku'du' gwize gu'zime. Ki'la ndiyu' muhozya alav'e ali'wongezya nkwi na ku'hela ki'taambo cha ku'zigya ha igu'lya na moto, na ku'zigya maguta ga ki'taambo cha kwiswanania ha igu'lya yalyo. 13 Moto gu'lendeleye ku'v'aka ha igu'lya na ihozezyo ku' matungo gose, bila ku'zima.

14 " ‘I'yi' hu' nhama ku'nguno ya kalu'mbi'lo ka mbutoo. Yi'li'v'adima v'ana v'amwa Aloni v'a ki'gosya v'alete kalu'mbi'lo kenako hamwa Gu'ku' Mulungu ha mbele ya ihozezyo. 15 Muhozya alasole iganza lya wu'fuma wu'nelezu wa kalu'mbi'lo kenako, haki'mo na lwandi' lwa maguta ga muzeituni, na wu'vumba wose u'wo wu'li' ha igu'lya na kalu'mbi'lo kenako, na alawu'zigye ha igu'lya na ihozezyo ku'v'a ku'nguno ya kalu'mbi'lo kose lwandi', wu'v'e wu'motu wa ku'mutogezya Gu'ku' Mulungu. 16 Wu'fuma u'wo wu'lasigali'le wu'laliwe na Aloni haki'mo na v'aane, ali'vi mugate gwa wu'fuma wenu'wo gu'laliwe bila ku'ti'ti'lwa itumbyo. V'alagu'lyi'le ha hantu' hasondo, ha lu'gu'tu' lwa Ihema lya Ku'sangi'zya. 17 Ku'du' wize wu'komelwe haki'mo na itumbyo. Nav'apile ku'v'a lwandi' lwav'o ku'fuma ku' kalu'mbi'lo kanne ka ku'zigya. Kenako kali' kalu'mbi'lo kasondo muno, ki'ti' i'vyo ki'li' ki'taambo cha ku'sini'zya wu'kenagu'zi na cha ku'sini'zya musango. 18 Ki'la mugosya mugati' na wu'v'yalwa wamwa Aloni akowolile ku'lya. Lyeni'li' li'li' ifungu lyav'o lya nhananhana ku'fuma ku' kalu'mbi'lo ka ku'zigya ku'mwa Gu'ku' Mulungu, ku' wu'v'yalwa winywe wose. Ki'la muntu' u'yo alakakuumye yi'li'mudima av'e musondo.’ "

19 Hangi' Gu'ku' Mulungu wamuwi'laga Mose ati', 20 "Ku'lamuli'la lu'siku' lwa ku'v'ilwa maguta kwamwa Aloni na v'ana v'akwe ku'nguno ya wu'hozya, yi'lav'adime ku'mufumi'zya Gu'ku' Mulungu kilo yi'mo ya wu'fuma wu'nelezu ku'v'a kalu'mbi'lo ka mbutoo ku' ki'la lu'siku'. Nusu ya wu'fuma wenu'wo alawu'fumye ndiyu' na nusu yi'ngi' mpi'ndi'. 21 Wu'fuma wenu'wo wu'laseleganiwe na maguta ga muzeituni na ku'komelwa mu ki'kalango, hangi' wu'laletwe ku'no wu'li' na mav'ale mav'ale na ku'mufumi'zya Gu'ku' Mulungu ku'v'a kalu'mbi'lo ka mbutoo, kav'e na wu'motu wa ku'mutogezya Mulungu. 22 Ki'la muhozya u'yo alav'ilwe maguta na kwikali'la isumbi' lyamwa Aloni mugati' na wu'v'yalwa wakwe, hu' mwene alakegezye. Li'li' ifungu lya nhananhana ku'mwa Gu'ku' Mulungu. Kalu'mbi'lo kose kalazigiwe. 23 Ki'la kalu'mbi'lo ka mbutoo ka muhozya kalazigiwe kose. Nhanayene kakasye kaliwe."

24 Gu'ku' Mulungu wamuwi'laga Mose ati', 25 "U'muwi'le Aloni na v'ana v'akwe v'a ki'gosya ati', ‘I'yi' hu' nhama ku'nguno ya ki'taambo cha ku'sini'zya wu'kenagu'zi. Yi'li'koov'iwa cheni'cho ki'si'nzi'lwe ha mbele yamwa Gu'ku' Mulungu aho ki'taambo cha ku'zigya ki'li'si'nzi'lagwa. Cheni'cho ki'li' ki'sondo muno. 26 Muhozya u'yo alaki'egezye ki'taambo cheni'cho hu' mwene alaki'lye. Alaki'lyi'le ha hantu' hasondo, ha lu'gu'tu' lwa Ihema lya Ku'sangi'zya. 27 Ki'la ki'ntu' i'cho ki'lakuumye nyama ya kalu'mbi'lo yi'li'koov'iwa ki'v'e ki'sondo, na u'lu' genago magazi ganyantu'ki'le ku' ki'zwalo ninga ki'mo, Yi'li'koov'iwa ku'ki'kanzi'la ha hantu' hasondo. 28 Nnungu' i'yo yi'latekele nyama yeni'yo yi'li'koov'iwa yi'v'elwe, ali'vi u'lu' yatekelagwa mu ki'seme cha shaba, ki'seme cheni'cho ki'lakwemwe na ku'ngu'lu'ziwa na minzi'. 29 Ki'la mugosya mugati' na mugana gwa muhozya hu' u'yo akowolile ku'lya nyama yeni'yo. Yi'li' nsondo muno. 30 Ali'vi magazi ga ki'taambo cha ku'sini'zya wu'kenagu'zi u'lu' galetagwa mu Ihema lya Ku'sangi'zya ki'gele ku'v'ezezya wu'swanano ha hantu' hasondo, ki'taambo cheni'cho ki'kasye ki'liwe. Sumbwa ki'lazigiwe.