1 Hangi' iv'ilingano lya V'aizilaeli v'ose v'ayu'mbaga ku'fuma ku' lwandi' lwa Elimu, v'ayaga na ku'fika ku' ibalangu' lya Sini, i'lo lyav'age li'li' hagati' ya Elimu na lu'gu'lu' lwa Sinai. Lu'siku' lwenu'lo lwav'age lwa iku'mi na itano lwa mwezi gwa wu'v'i'li' ku'fuma ku'wu'ka ku' nsi' ya Misili. 2 Hohene V'aizilaeli v'ose aho v'av'age kwenu'ko ku' ibalangu', v'av'isayi'li'li'laga Mose na Aloni. 3 V'aizilaeli v'ayombaga ati', "Ndi' yi'li' visoga Gu'ku' Mulungu aku'wu'lagi'le ku' nsi' ya Misili, u'ko kwav'age kwikalile na ku'lya nyama haki'mo na migate zya kwiku'tya. Ali'vi inywe mwaku'letile ku'no ku' ibalangu', ki'gele muku'wu'lage iv'ilingano lyose lyeni'li' ku' nzala!"

4 Haho Gu'ku' Mulungu wamuwi'laga Mose ati', "Lingaga, ene nku'v'iti'la migate ku'fuma ku' ilunde ki'ti' matonye ga nvula. Ki'la lu'siku' v'antu' v'aku'v'a v'ali'fuma ha ibala na ku'solela viliwa vya ku'v'agelani'la ku' lu'siku' lu'mo. Ku' nzi'la yeni'yi' nku'v'agema mbone u'lu' v'aku'londa nzi'la yanne ninga ng'o. 5 Sumbwa mu lu'siku' lwa mukaga, aho v'alav'e v'ali'wiv'anga ki'liwa cha ku'leta mugati', chene v'alasolele kali' kav'i'li' yakwe, ku'ki'la i'cho v'ali'solelaga nsiku' zingi'." 6 Hohene Mose na Aloni v'av'awi'laga V'aizilaeli v'ose ati', "Mpi'ndi' muku'manya ku'v'a Gu'ku' Mulungu hu' mwene wamufumizye ku'fuma ku' nsi' ya Misili! 7 Hangi' ndiyu' mulalu'wone lu'kumo lwamwa Gu'ku' Mulungu, ku'nguno wigagwa misayo zinywe ku' wakwe. Iswe ku'li' v'a nde mpaka mukwisayi'li'li'le?" 8 Hangi' Mose wayombaga ati', "Mpi'ndi' Gu'ku' Mulungu aku'v'a ali'mupa nyama muli'lya, na ndiyu' aku'v'a ali'mupa migate, muv'e muli'lya na kwiku'ta, ku'nguno wigagwa misayo zinywe zyose ku' wakwe. Iswe ku'li' v'a nde? Ng'o, mwisayi'li'laga ku'mwa Gu'ku' Mulungu."

9 Haho Mose wamuwi'laga Aloni ati', "Li'wi'le iv'ilingano lya V'aizilaeli v'ose ati', ‘Mwikuminge ha mbele yamwa Gu'ku' Mulungu, ku'nguno wigagwa misayo zinywe.’ " 10 Yav'aga itungo i'lo Aloni wav'aga ali'yomba na iv'ilingano lya V'aizilaeli, v'ose v'alingaga ku' lwandi' lwa ibalangu', kasinaga lu'kumo lwamwa Gu'ku' Mulungu lwigelaga mu ilunde! 11 Haho Gu'ku' Mulungu wamuwi'laga Mose ati', 12 "Nigagwa misayo zya V'aizilaeli. Hohene u'v'awi'le ati', ‘Mpi'ndi' muku'v'a muli'lya nyama, na ndiyu' muku'v'a muli'lya migate na kwiku'ta. Haho muku'manya ku'v'a ene hu' ni' Gu'ku' Mulungu, Mulungu winywe.’ "

13 Yav'aga mu lyu'v'a lya mpi'ndi', zizaga nkwale nyingi na ku'yi'kumba nkambi' ya V'aizilaeli, na ndiyu' yayo lwagwaga lu'me ki'la lwandi' ku'yi'pilima nkambi' yav'o. 14 Yav'aga lu'me lwenu'lo aho lwamalaga, kasinaga gigelaga mav'ale mado mado ki'ti' mugate mulelemazu ha nsi' yeni'yo ya ibalangu'. 15 Nav'o V'aizilaeli aho v'awonaga vintu' vyeni'vyo v'akumyaga na kwiwu'zya, "Ki' cheni'chi'?" Nguno v'av'age v'akamanya ku'v'a ki'li' ki'ntu' ki'. Haho Mose wav'awi'laga ati', "Gwenu'gu' gu'li' mugate u'go Gu'ku' Mulungu wamupaga mulye. 16 Muhayo gwenu'gu' hu' u'go Gu'ku' Mulungu walagi'li'zizye: ‘Ki'la muntu' akuminge ki'liwa i'cho akowolile ku'lya, asolele muteko gu'mo ku' ki'la muntu' ku'londana na v'antu' av'o ali' nav'o mu ihema lyakwe.’ "

17 Hohene, V'aizilaeli v'av'ezya vyeni'vyo, ali'vi mugati' nav'o v'amo ndi' v'asolela vingi na v'angi' vidoo. 18 Nav'o aho v'avipimaga i'vyo v'asolelaga mu muteko, ndi' v'awona ku'v'a u'yo ndi' wasolelaga vingi, ndi' akav'ile na cha ku'sigali'la, na u'yo ndi' wasolelaga ki'doo ndi' akadohelilwe. Ki'la yu'mo wasolelaga ki'ti' i'vyo ki'mugelani'lile ku'lya.

19 Hangi' Mose wav'awi'laga ati', "Muntu' ninga yu'mo ku'du' alekele ki'liwa cheni'chi' mpaka ndiyu'."

20 Ali'vi v'antu' ndi' v'akamudegelekile Mose. Mugati' nav'o v'amo v'itu'u'li'zyaga ki'liwa mpaka ndiyu'. Ali'vi ki'liwa cheni'cho i'cho ndi' v'itu'u'li'zyaga ku'fiki'la ndiyu' ndi' chasangwa chagasaga na ku'v'a na magunyo. Haho Mose wav'adaki'laga. 21 Hohene, ki'la ndiyu' v'av'age v'ali'solela ki'liwa, ki'la yu'mo ku'londana na ki'lyi'le chakwe, na yav'age mbe lyu'v'a lyaliina, i'cho ki'liwa ki'ngi' ndi' chayelage.

22 Sumbwa mu lu'siku' lwa mukaga v'akumingage kali' kav'i'li' yakwe, ki'la yu'mo miteko iv'i'li'. Hangi' v'anamala v'a Izilaeli v'ayaga ku'mwa Mose na ku'muwi'la igambo lyeni'lo. 23 Nawe wav'awi'laga ati', "Yeni'yi' hu' nhama yamwa Gu'ku' Mulungu: Igolo lu'li' lu'siku' lwa ku'lenda, u'lo hu' Sabato nsondo ku'mwa Gu'ku' Mulungu. Ku'nguno yeni'yo yagi mukakomele i'vyo muli'koov'a na mukasev'ye i'vyo muli'koov'a walelo, na viliwa i'vyo viku'sigali'la muvitu'u'le mpaka igolo." 24 Hohene, v'avitu'u'laga viliwa vingi', ki'ti' i'vyo Mose wakalagi'li'zyaga. Wangalu'ke yayo ndiyu', v'aviwonaga vipanga. Vikagasile ninga ku'v'a na magunyo. 25 Hangi' Mose wav'awi'laga ati', "Lyagi viliwa vyeni'vyo i'vyo vyakasigali'laga, ku'nguno walelo lu'li' lu'siku' lwa ki'suuho, lwamwa Gu'ku' Mulungu. Walelo mukapandi'ke viliwa vyeni'vyo ha ibala na nkambi'. 26 Ku' itungo lya nsiku' mukaga mulav'e muli'solela viliwa, sumbwa lu'siku' lwa mupungati' lu'li' lwa ki'suuho. Lu'siku' lwenu'lo vikasye vigele."

27 Ninga vyeni'vyo mugati' na v'antu' v'enav'o, v'angi' ndi' v'aya ku'kasolela, ali'vi v'akaviwine. 28 Haho Gu'ku' Mulungu wamuwi'laga Mose ati', "Muku'kaana ku'ziku'zya nhama zyanne na nzi'la zyanne mpaka nanali'? 29 Mumanye ku'v'a Gu'ku' Mulungu wamupile inywe lu'siku' lwa ki'suuho, ku'nguno yeni'yo mu lu'siku' lwa mukaga ali'mupa ki'liwa cha nsiku' iv'i'li'. Ki'la yu'mo yi'li'mudima ku'suuha mu nnumba yakwe lu'siku' lwa mupungati'. Lu'siku' lwenu'lo yi'kakoov'iwa ku'fuma ha ibala, ninga yu'mo." 30 Hohene v'antu' v'enav'o v'asuuhaga lu'siku' lwa mupungati'.

31 Haho V'aizilaeli v'aki'paga lina ki'liwa cheni'cho "Mana*." Nacho ki'liwa cheni'cho chav'age kikolile ki'ti' mbiyu' zya wu'si'ga wape, na wu'semu wacho ki'ti' mugate mulelemazu u'go gu'v'eziv'ilwe ku' wu'ki'. 32 Hangi' Mose wav'awi'laga ati', "U'gu' hu' mulagi' gwamwa Gu'ku' Mulungu: ‘Musole muteko gu'mo gwa mana na ku'yi'tu'u'la, ku'nguno ya wu'v'yalwa winywe u'wo wu'lalonde, ki'gele v'ize v'awone ki'liwa i'cho ndi' namupa mulye ku' ibalangu', aho ndi' mufumizye ku' nsi' ya Misili.’ "

33 Hohene Mose wamuwi'laga Aloni ati', "U'sole muteko gwa mana, u'gu'ti'ti'le mugati' na ki'seme. Hangi' u'ki'tu'u'le ha mbele yamwa Gu'ku' Mulungu, ki'gele ki'su'ngwe ku'nguno ya v'av'yalwa v'inywe av'o v'alalonde."

34 Hohene ha itungo lya mbele Aloni ndi' wayi'tu'u'la mana ha mbele ya isandi'ko lya wu'sangi'lwa ki'gele yi'su'ngwe, ki'ti' i'vyo Gu'ku' Mulungu wafumizye ilagi'li'zyo ku'mwa Mose. 35 Nav'o V'aizilaeli v'alyaga mana yeni'yo ku' itungo lya myaka maku'mi ane, mpaka aho v'afikaga ha lwandi' u'lo ndi' lu'li' na v'antu', yaani v'alyaga mpaka aho v'afikaga ku' lu'v'i'mbi' lwa Kanaani. 36 Muteko gu'mo gu'gelani'lile na kilo yi'mo*.