1 Ku' ku'tu'mi'la wu'zi wa langi ya bululu, zambalawo na yazaa, v'afuumaga visoga vizwalo vya ku'zwala itungo lya ku'v'ezya muli'mo gwa Hantu' Hasondo. V'amusumi'laga Aloni vizwalo visondo ki'ti' i'vyo Gu'ku' Mulungu wamulagi'li'zizye Mose.

2 V'av'ezyaga ki'zibao ku' wu'zi wa zahabu na wa langi ya bululu, zambalawo na yazaa, haki'mo na katani nsoga i'yo yi'pelegilwe. 3 V'ayi'sulaga zahabu ku' nnundo na ku'yi'v'ezya nnieniengazu, na v'ayi'putaga yi'v'e wu'zi ki'gele v'awu'fuume ku' wu'tonto haki'mo na wu'zi wa langi ya bululu, zambalawo na yazaa, na katani nsoga. 4 Ki'zibao cheni'cho v'aki'v'ezezyaga mikwato iv'i'li' zya ku'tungi'la mu mav'ega ki'la iv'ega mukwato gu'mo, u'go gu'sumi'lilwe ku' nsoto. 5 Mukwato gwa ki'zibao gwa wu'lembwe gwa ku'tunga mu muki'mbi'li', gwav'eziv'agwa ku' vilwani'lo vyene vivyo, ku' wu'zi wa zahabu, na wa langi ya bululu, zambalawo na yazaa, haki'mo na katani nsoga i'yo yi'pelegilwe, gwasumi'li'lagwa ku'v'a ki'ntu' ki'mo na ki'zibao cheni'cho. V'av'ezyaga ki'ti' i'vyo Gu'ku' Mulungu wamulagi'li'zizye Mose.

6 V'apu'nzaga mawe av'i'li' ga mupango ga shohamu, na ku'gatu'u'la mu vyokazyo vya zahabu vya wu'lembwe, ago gatonilwe mina ga v'ana v'a ki'gosya v'amwa Izilaeli, ki'ti' musuli i'vyo ali'gu'tonaga muhuli. 7 Mawe genago ago gali' mu vyokazyo v'agatungaga ha igu'lya na mikwato zya mu mav'ega ga i'cho ki'zibao ki'gele gav'e mwizu' ku' V'aizilaeli, ki'ti' i'vyo Gu'ku' Mulungu wamulagi'li'zizye Mose.

8 V'av'ezyaga kamufuko ka ha ki'kuv'a ku' wu'tonto ki'ti' i'cho ki'zibao, ku' wu'zi wa zahabu, na wa langi ya bululu, zambalawo na yazaa na katani nsoga i'yo yi'pelegilwe. 9 Kamufuko kenako kav'age ka mugelani'lo ako ndi' kagondilwe, wu'lihu na wu'gali'nhu wako sentimita maku'mi av'i'li' na iv'i'li'. 10 Kamufuko kenako kalembagwa ku' mihelo ine zya mawe ga mupango. Muhelo gwa kwandya gwav'age na mawe ga akiki, topazi na bahalamani. 11 Muhelo gwa wu'v'i'li' gwav'age na mawe ga zumalidi, yakuti na alimasi. 12 Muhelo gwa wu'datu' gwav'age na mawe ga yasinto, ageti na ametisito. 13 Muhelo gwa wu'ne gwav'age na mawe ga kilisolito, shohamu na yasipi. Gose gatu'u'lagwa mu vyokazyo vya zahabu vya wu'lembwe. 14 Hohene kwav'age na mawe iku'mi na av'i'li' ago gatonilwe mina iku'mi na av'i'li' ga v'ana v'amwa Izilaeli. Ki'la li'mo ndi' li'tonilwe ki'ti' muhuli, na ku'v'a na lina li'mo mugati' na mina ga magongo ago iku'mi na av'i'li'. 15 V'av'ezyaga mikufu zya zahabu nsoso i'zyo zipelegilwe ki'ti' lu'goye, ku'nguno ya kamufuko ka ha ki'kuv'a. 16 Vyene vivyo v'av'ezyaga vyokazyo viv'i'li' vya zahabu vya wu'lembwe na pete iv'i'li' zya zahabu, na ku'zitungi'la ku' mapembo av'i'li' ga ku' igu'lya na kamufuko kenako. 17 V'azitungaga nsoto iv'i'li' zya mikufu ku' pete zyeni'zyo i'zyo zili' ku' mapembo ga kamufuko kenako. 18 Hangi' na i'zyo nsoto zingi' zya mikufu v'azitungaga ku' i'vyo vyokazyo viv'i'li' vya mawe. Vyene vivyo v'azitungani'zyaga ku' mikwato zya mu mav'ega ga i'cho ki'zibao, ku' lwandi' lwa ku' mbele. 19 V'av'ezyaga pete iv'i'li' zya zahabu, na ku'zitu'u'la mu mapembo av'i'li' ga ha nsi'li'li' na kamufuko ku' nnuma yako bi'hi' na ki'zibao. 20 V'av'ezyaga pete zingi' iv'i'li' zya zahabu, na ku'zidimani'zya ha lwandi' lwa ha nsi'li'li' ya mikwato zya mav'ega, ha lwandi' lwa ku' mbele lwa cheni'cho ki'zibao, bi'hi' na ipi'ndo ha igu'lya hadoo na mukwato gwa mu muki'mbi'li'. 21 Pete zya kamufuko kenako zyatungani'ziv'agwa na pete zya ki'zibao ku' lu'goye lwa langi ya bululu, ki'gele kaleke ku'soka na kikali'le mukwato gwa wu'lembwe gwa mu muki'mbi'li', ki'ti' i'vyo Gu'ku' Mulungu wamulagi'li'zizye Mose.

22 Hangi' v'afuumaga ijoho lya ku'zwali'la ki'zibao ku' ki'tambala cha langi ya bululu. 23 Hangi' v'adu'laga idu'lu'lu' lya ku'v'i'ti'zya mutwe. Ha lwandi' lwa nhingo v'ahapilimyaga ki'tambala i'cho ki'fuumilwe ki'gele ku'du' li'tandu'ke. 24 Ku' wu'pi'nde walyo wa ha nsi'li'li' ku'pilima lwandi' lose yalembagwa ku' masu'mbano ga makomamanga ga langi ya bululu, zambalawo na yazaa, na katani nsoga i'yo yi'pelegilwe. 25 Hangi' v'av'ezyaga miyi'mba zya zahabu nsoso, na ku'zidimani'zya ku'pilimya ku' wu'pi'nde wenu'wo. Hagati' ya ki'la ikomamanga v'atu'u'laga muyi'mba. 26 Zyeni'zyo miyi'mba na makomamanga vihelaga ku'li'pilima ipi'ndo lya ijoho lyeni'lo: ikomamanga, muyi'mba, ikomamanga, muyi'mba, ki'ti' i'vyo Gu'ku' Mulungu wamulagi'li'zizye Mose.

27 Hangi' v'av'afuumi'laga nhanzo ku' katani nsoga Aloni haki'mo na v'ana v'akwe, 28 na isimangi'la na nkofila zya katani nsoga, vizwalo vya mugati' vya katani nsoga i'yo yi'pelegilwe, 29 na mukwato gwa mu muki'mbi'li' gwapu'ndagwa visoga ku' katani nsoga i'yo yi'pelegilwe na wu'zi wa langi ya bululu, zambalawo na yazaa. V'av'ezyaga ki'ti' i'vyo Gu'ku' Mulungu wamulagi'li'zizye Mose.

30 Hangi' v'av'ezyaga ndezi nsondo ku' zahabu nsoso, na ku'yi'tona ha igu'lya yayo, ki'ti' i'vyo gu'li'tonagwa muhuli, "MUSONDO KU'MWA GU'KU' MULUNGU." 31 Ndezi yeni'yo v'ayi'tungaga ha igu'lya na isimangi'la ku' lu'goye lwa langi ya bululu, ki'ti' i'vyo Gu'ku' Mulungu wamulagi'li'zizye Mose.Muhozya muhanya na vizwalo vyakwe

32 Hohene, muli'mo gose gwa Ihema Isondo, yaani Ihema lya Ku'sangi'zya, gwamalaga. V'aizilaeli v'av'ezyaga gose ki'ti' i'vyo Gu'ku' Mulungu wamulagi'li'zizye Mose. 33 V'amuletelaga Mose Ihema Isondo haki'mo na vilwani'lo vyalyo vyose, visikizo vyalyo, felemu zyalyo, ngito zyalyo, nhi'ngi' zyalyo na vikali'lo vyalyo, 34 nfundi' ya ndi'li' zya ng'ondi i'zyo ziv'ililwe langi yazaa na nfundi' ya ndi'li' zya ndimu zingi' zya mu nyanza, muki'ngo gwa ku'ki'ga Hantu' Hasondo Muno, 35 isandi'ko lya wu'sangi'lwa, miti' zyalyo na nfundi' ya wu'swanano, 36 meza na vilwani'lo vyayo vyose, migate misondo, 37 ki'nala cha ku'tu'u'li'la tala cha zahabu nsoso, tala zyacho ku' ku'hela, vilwani'lo vyacho vyose haki'mo na maguta ga ku'v'asi'zya, 38 ihozezyo lya zahabu, maguta ga ku'v'ila, wu'bani wu'motu, muki'ngo gwa wingi'li'lo wa ihema, 39 ihozezyo lya shaba haki'mo na wavu walyo wa shaba, miti' zyalyo na vilwani'lo vyalyo vyose, ikalaye na kikali'lo chalyo, 40 miki'ngo zya lu'gu'tu', nhi'ngi' zyalo na vikali'lo vyazyo, muki'ngo gwa wingi'li'lo wa lu'gu'tu', ngoye na mmambo zyose, vilwani'lo vyose vya ku'tu'mi'lwa ku' Ihema Isondo, yaani Ihema lya Ku'sangi'zya, 41 vizwalo vyose i'vyo vifuumilwe visoga ku'nguno ya muli'mo gwa mugati' ha Hantu' Hasondo, vizwalo visondo vya muhozya Aloni, na vizwalo vya v'ana v'akwe ku'nguno muli'mo gwav'o gwa wu'hozya. 42 V'aizilaeli v'agelani'zyaga mili'mo zyose ki'ti' i'vyo Gu'ku' Mulungu wamulagi'li'zizye Mose. 43 Mose walingu'laga ki'la ki'ntu', lingaga, wawonaga ku'v'a v'av'ezyaga visoga ki'ti' i'vyo Gu'ku' Mulungu walagi'li'zya. Haho Mose wav'adosyaga.