1 Iv'ilingano lyose lya V'aizilaeli lyawu'kaga ku'fuma ku' ibalangu' lya Sini, lyayu'mbaga ku'fuma lwandi' lu'mo mpaka lwandi' lu'ngi' ki'ti' i'vyo Gu'ku' Mulungu ndi' walagi'li'zya. V'atu'u'laga nkambi' yav'o ku' lwandi' lwa Lefidimu, ali'vi kwav'age ku'du'hu' minzi' ga ku'nywa v'antu'. 2 Ku'nguno yeni'yo v'antu' v'amubu'bu'zyaga Mose na ku'yomba, "Ku'pe minzi' ga ku'nywa," Nawe Mose wasu'v'yaga ati', "Ku' ki' muli'mbu'bu'zya? Mukav'ile muli'mugema Gu'ku' Mulungu?" 3 Ali'vi v'antu' v'ose v'av'age na nota, v'amwisayi'li'li'laga Mose na ku'yomba ati', "Ku' ki' waku'fumizye ku' Misili na ku'ku'leta ku'no ki'gele ku'fwe na nota, iswe, v'ana v'iswe na mitugo ziswe?"

4 Haho Mose wamuli'li'laga Gu'ku' Mulungu na ku'yomba ati', "Mbav'ezezye ki' v'antu' v'enav'a? Gi'si' v'egela ku'ngu'ma na mawe!" 5 Nawe Gu'ku' Mulungu wamuwi'laga Mose ati', "V'i'ta ha mbele ya v'antu' v'enav'a. U'sole mugati' na v'anamala v'a Izilaeli, muv'e haki'mo nav'o. U'sole na mulanga gwako u'go ndi' wagu'gu'mi'la mongo gwa Naili, u'ye nago. 6 Lingaga, ene nkwi'ma ha mbele yako ku' itale lya bi'hi' na lu'gu'lu' lwa Holebu, nanho u'kali'gu'me itale lyeni'lo na minzi' gaku'fuma, ki'gele v'antu' v'anywe." Hohene Mose wav'ezyaga vyeni'vyo ha mbele ya v'anamala v'a Izilaeli. 7 Nawe Mose wahapaga lina "Masa" na "Meliba," ku'nguno ya V'aizilaeli ndi' v'amubu'bu'zyaga na ku'mugema Gu'ku' Mulungu na ku'yomba ati', "Vihe, nhana Gu'ku' Mulungu ali' niswe ninga ng'o?"

8 Itungo lyeni'lo V'aamaleki v'izaga na kwigu'ma na V'aizilaeli kwenu'ko ku' Lefidimu. 9 Hangi' Mose wamuwi'laga Yoswa ati', "Sogola v'agosya v'amo, muye mukigu'me na V'aamaleki. Igolo ene ndi'me ha nsoto ya kalu'gu'lu', ku'no ndimile mulanga gwamwa Mulungu." 10 Haho Yoswa wav'ezyaga ki'ti' i'vyo Mose wamuwi'laga, wayaga ku'kigu'ma na V'aamaleki. Nav'o Mose, Aloni na Huli v'aliinaga ha nsoto ya kalu'gu'lu'. 11 Yav'aga itungo lyose i'lo Mose wav'age u'lu' wawu'sya makono gakwe mu igu'lya, V'aizilaeli v'akindage, sumbwa u'lu' wasosya makono gakwe V'aamaleki v'akindage. 12 Ali'vi aho lyav'i'taga itungo, makono gamwa Mose gadedaga. Haho Aloni haki'mo na Huli, v'asolaga iwe, v'ali'tu'u'laga bi'hi' na Mose, ki'gele ikali'le. Hangi' Aloni na Huli v'agadimaga makono gamwa Mose na ku'gawu'sya mu igu'lya, yu'mo ku' mumoso na yu'ngi' ku' mulyi'la. I'vi hu' vyene makono gamwa Mose gav'aga na nguzu, na gav'aga mu igu'lya mpaka lyu'v'a aho lyalokaga. 13 Ku'nguno yeni'yo Yoswa wali'kindaga idale lya v'asilikale v'a V'aamaleki.

14 Hangi' Gu'ku' Mulungu wamuwi'laga Mose ati', "U'li'tone igambo lyeni'li' mu ki'tabu, ki'gele gu'v'e mwizu', ku'v'a nhana ndav'azimangu'zye V'aamaleki haki'mo na mwizu' gwav'o gu'leke ku'v'a gu'li'ho mu welelo. Hangi' u'li'yombe mu matwi gamwa Yoswa." 15 Haho Mose wazyengaga ihozezyo na ku'litana "Gu'ku' Mulungu ali' Bendela Yanne*." 16 Mose wayombaga, "Muwu'sye mu igu'lya bendela yamwa Gu'ku' Mulungu*. Gu'ku' Mulungu aku'v'a na wu'lu'gu' na V'aamaleki mugati' na wu'v'yalwa wav'o wose u'wo wu'lalonde!"