1 Aho lyav'i'taga itungo, Mose na Aloni v'ayaga ku'mwa Falao, na v'amuwi'laga ati', "Gu'ku' Mulungu, Mulungu wa Izilaeli ali'yomba i'vi: ‘V'aleku'li'le v'antu' v'anne v'awu'ke, v'akambezezye mwanya ku' ibalangu'.’ " 2 Ali'vi Falao wav'awu'zyaga, "Gu'ku' Mulungu mwenu'yo hu' nde, mpaka muku'zye na ku'v'aleku'li'la V'aizilaeli v'awu'ke? Ene nkamumanya Gu'ku' Mulungu mwenu'yo, na nkav'ile ku'v'aleku'li'la V'aizilaeli v'awu'ke." 3 Haho Mose na Aloni v'amuwi'laga, "Mulungu wa V'aebulania wapomaga niswe. Ku'li'ku'lomba u'ku'leku'li'le ku'yu'mbe musi'nzo gwa nsiku' idatu' mu ibalangu' ku'kamufumi'zye vitaambo Gu'ku' Mulungu, Mulungu wiswe. U'lu' ng'o, iswe alaku'gu'me na malwile ga tauni ninga na lu'panga." 4 Ali'vi mutemi wa Misili wasu'v'yaga ati', "Inywe Mose na Aloni, ku' ki' muv'alekya v'antu' mili'mo zyav'o? Su'v'agi ku' mili'mo zinywe." 5 Hangi' Falao wayombaga, "Lingagi, v'antu' v'enav'a v'ali' v'ingi, na inywe muli'v'ahangi'li'zya ku'tu'mama mili'mo."

6 Lu'siku' lwene lu'lo Falao wav'alagi'li'zyaga v'i'mi'li'zi na v'anyampala na ku'v'awi'la ati', 7 "Ku'lamuli'la walelo, v'antu' v'enav'a ku'du' muv'ape hangi' mawulule ga ku'v'ezezya matofali. V'eni'ki'li' v'av'e v'ali'ya ku'kikoov'ela. 8 Ali'vi lu'v'alo lwa matofali ago gali'v'eziv'agwa nsiku' zyose, lu'v'e lwene lu'lo. Ku'du' lwangi'le ninga hadoo. V'ali'bu'bu'zya ati', ‘Ku'leku'li'le ku'ye ku'kamufumi'zye Mulungu wiswe vitaambo.’ V'ali'yomba vyeni'vyo ku'nguno v'enav'a v'ali' v'avila. 9 V'ezi mili'mo zyav'o ku'v'a milambu muno, ki'gele v'azifumi'zye lu'yi'lo na ku'leka ku'degeleka wu'fi."

10 Hohene v'i'mi'li'zi na v'anyampala v'a v'antu' v'afumaga na ku'v'awi'la V'aizilaeli ati', "Falao ali'yomba i'vi: ‘Nkasye mupe hangi' mawulule. 11 Yagi mukakoov'e mawulule inywe v'eni'ki'li', ku' ki'la lwandi' u'ko mukowolile ku'gapandi'ka. Ali'vi mili'mo zinywe ziku'leka ku'dohiwa ninga hadoo.’ " 12 Hohene v'antu' v'asambalaga hose mu nsi' ya Misili, ki'gele v'akoov'e mawulule ga ku'v'ezezya matofali, ali'vi v'apandi'kaga makung'unti'lwa ga viliwa. 13 Nav'o v'i'mi'li'zi v'av'akang'anti'zyaga na ku'yomba, "Mugelani'zye mili'mo zinywe zya nsiku' zyose ki'ti' itungo i'lo ndi' mwaletelagwe mawulule." 14 V'i'mi'li'zi v'a Ki'misili v'av'agu'maga v'anyampala v'a Ki'izilaeli, av'o v'asogolilwe kwi'mi'li'zya mili'mo, na ku'v'awu'zya, "Ku' ki' mukafikizye lu'v'alo lwinywe lwa nsiku' zyose lwa matofali, igolo na walelo ki'ti' ha mbu'ki'?"

15 Haho v'anyampala v'a Ki'izilaeli v'ayaga ku'kamuli'li'la Falao na ku'yomba ati', "Ku' ki' u'li'ku'v'ezezya vyeni'vi iswe v'asese v'ako? 16 V'asese v'ako ku'kav'ile ku'piwa mawulule, ninga vyeni'vyo v'ali'ku'gahani'zya ku'v'ezya matofali. Lingaga, ku'li'gu'mwa, ali'vi ipu'v'yo li'li' lya v'antu' v'ako." 17 Falao wasu'v'yaga ati', "Inywe muli' v'avila, v'avila v'ahanya, hene muli'yomba, ‘Ku'leku'li'le ku'ye ku'kamufumi'zye Gu'ku' Mulungu vitaambo.’ 18 Gi'si' yagi ku' mili'mo. Mukav'ile ku'piwa mawulule ninga madoo, na matofali muv'ezye ku' lu'v'alo lwene lu'lo." 19 Hohene v'anyampala v'a Ki'izilaeli v'awonaga v'ali' mu lu'duko, aho v'awi'lagwa ati', "Mukav'ile ku'pu'ngu'zya lu'v'alo lwa matofali ga ki'la lu'siku'."

20 Aho v'afumaga ku'mwa Falao, v'apomaga na Mose na Aloni mu nzi'la, aho v'av'age v'av'alindi'lile. 21 Hohene v'av'awi'laga Mose na Aloni ati', "Gu'ku' Mulungu ali'wone igambo lyeni'li', amufumi'zye inywe wu'yangu'! Ku'nguno mwaku'v'ezyaga ku'mufufume Falao na v'akumba v'akwe, na ku'v'apa nguno ya ku'ku'wu'laga."

22 Hangi' Mose wasu'v'aga ku'mwa Gu'ku' Mulungu na wamuwi'laga ati', "Ev'e Gu'ku', ku' ki' wav'aletelile lu'duko v'antu' v'enav'a? Ku' ki' wantu'mile ene? 23 Ku'fuma aho ndi' naya ku'kasu'nsu'mu'la na Falao ku' lina lyako, nawe wav'av'ezezyaga makoye v'antu' v'enav'a, nanho u'kav'ezizye igambo ninga li'mo lya ku'v'akomola v'antu' v'ako!"