1 Hangi' Gu'ku' Mulungu wamuwi'laga Mose ati', "U'pu'nze mav'ale av'i'li' ga mawe ki'ti' ago ga kwandya, nanne nku'gatona mihayo zyanne i'zyo ndi' zili' ku' mawe genago ga kwandya, ago wagav'elile. 2 Wiv'ange igolo ikingilima, wize u'pome nanne ku' nsoto ya lu'gu'lu' lwa Sinai. 3 Muntu' ninga yu'mo ku'du' ize haki'mo nanho, ninga ku'du' egele muntu' ninga yu'mo ku' igu'lya na lu'gu'lu'. Ninga ng'ombe, nkolo na mbu'li ku'du' zidi'mi'le mu ngiligili na lwenu'lo lu'gu'lu'." 4 Hohene Mose wapu'nzaga mav'ale av'i'li' ga mawe ki'ti' ago ga kwandya. Wawu'kaga ikingilima, na waliinaga ku' lu'gu'lu' lwa Sinai, ku'no adimile genago mav'ale mu makono gakwe, ki'ti' i'vyo Gu'ku' Mulungu wakamulagi'li'zyaga. 5 Haho Gu'ku' Mulungu wasookaga mugati' na ilunde, wi'maga haki'mo na Mose, na ku'li'kumalu'sya lina lyakwe, "Gu'ku' Mulungu." 6 Hangi' Gu'ku' Mulungu wav'i'taga ha mbele yamwa Mose na ku'tangazya, "Gu'ku' Mulungu, Gu'ku' Mulungu*, ali' Mulungu wa ki'sa na ki'gongo. Akav'ile mubu'hu wa ki'sila ali'vi okalile chelu' na nhana. 7 Ene nu'lagi'la chelu' ku' wu'v'yalwa mahu'ya, na ku'v'atondola v'antu' ihu'v'yo, wu'kenagu'zi na wu'tale wav'o, ali'vi nkasye ndeke ku'muv'azi'zya ihu'v'yo muntu' wa musango. Nu'v'asali'kya v'ana na v'izu'ku'lu' wu'kenagu'zi wa v'asav'o na v'agu'ku' v'av'o, ninga wu'v'yalwa wa wu'datu' na wa wu'ne."

8 Nawe Mose wangu'haga ku'kundamya mutwe na ku'ku'v'i'i'la. 9 Hangi' wayombaga, "Ev'e Gu'ku', u'lu' napandi'kaga wu'soga ha mbele yako, nu'ku'lomba u'ye haki'mo na iswe, ninga i'vi v'antu' v'enav'a v'ali' na myoyo milambu. Ali'vi u'ku'tondole ihu'v'yo na wu'kenagu'zi wiswe, na u'kwanuku'le ku'v'e isaalo lyako ev'e mweni'ki'li'."

10 Gu'ku' Mulungu wamuwi'laga ati', "Lingaga, nu'v'ezya ilagano na v'antu' v'ako v'ose. Nku'v'ezya migaka ha mbele yav'o i'zyo zikaali' ku'v'eziwa mu welelo yose, ninga mu ki'la nsi'. V'antu' v'ose av'o mwikalile mugati' nav'o v'alawone mili'mo zyanne mihanya, ku'nguno nku'v'ezya igambo lya ku'kumya ku'nguno yako.

11 "U'zidime milagi' i'zyo nu'ku'pa walelo. Lingaga, nku'v'asaga ha mbele yako V'aamoli, V'akanaani, V'ahiti, V'apelizi, V'ahivi na V'ayebusi. 12 Wiangali'le ku'du' wize u'v'ezye ilagano na v'ikazi v'a nsi' i'yo u'yile, ku'nguno lyeni'lo li'lav'e ki'ti' mutego ku' wako. 13 Ali'vi u'lagabomole mahozezyo gav'o, na ku'ziv'elanga nhi'ngi' zyav'o zya mawe zya kwisengela, na ku'gaputanga mavimbulimbuli ga miti' gamwa mulungu wav'o Ashela*. 14 Ku'du' wize u'mwisenge mulungu yu'ngi', ku'nguno ene lina lyanne ni' ‘Wa Iwu'v'a,’ ni' Mulungu wa iwu'v'a. 15 Wiangali'le ku'du' wize u'v'ezye ilagano na v'ikazi v'a nsi' yeni'yo, ku'nguno aho v'alav'e v'ali'zisenga milungu zyav'o zya wu'fi na ku'zifumi'zya vitaambo, v'alaku'kaati'ke nanho u'lalye vitaambo i'vyo v'ali'wisengela milungu zyav'o. 16 U'lahambagale u'li'v'atozya v'asu'mbana v'ako ku' v'aniki' v'av'o, na v'enav'o v'aniki' aho v'alaye ku'kisenga milungu zyav'o zya wu'fi, v'alav'ahu'mbye v'asu'mbana v'ako ku'zisenga milungu zyav'o.

17 "Ku'du' wiv'ezezye milungu zya ku'sula ku' ku'fyatu'la mu ki'seme.

18 "Mudime nsiku' zya Mwanya gwa Migate I'zyo Zikatumba. Mulav'e muli'lya migate i'zyo zikatumba mugati' na nsiku' mupungati', ki'ti' i'vyo namulagi'li'zizye. Mulav'ezye vyeni'vyo ku' itungo i'lo li'tu'u'lilwe lya mwezi gwa Abibu, u'go gu'li' hu' mwezi gwa kwandya, ku'nguno mwezi gwenu'go hu' gwene mwafuma ku' nsi' ya Misili.

19 "Ki'la muv'yalwa wa mbele wa ki'gosya ali' wanne, haki'mo na ki'v'yalwa cha mbele cha ki'gosya cha mitugo zinywe zyose, ki'v'e cha ng'ombe, nkolo ninga mbu'li. 20 Sumbwa ki'v'yalwa cha mbele cha mpunda u'laki'komole ku' ku'li'pa kadi'lana, ali'vi u'yo akaanile ku'ki'komola, alaki'wu'lage lwa ku'ki'vuna nhingo yacho. Hangi' ki'la muv'yalwa wa mbele wa muntu' u'lamukomole. Muntu' ku'du' ize ha mbele yanne ali' makono du'.

21 "Ku' itungo lya nsiku' mukaga u'lav'e u'li'tu'mama mili'mo, ali'vi lu'siku' lwa mupungati' u'lav'e u'li'suuha, ninga yi'v'e itungo lya ili'ma ninga lyi'mbu'la.

22 "Mulav'ezye Mwanya gwa Mayuma ku' ku'fumya kalu'mbi'lo ka viliwa vya ntomolwa vya ngano, na Mwanya gwa Ku'kuminga ku' ndugo ya mwaka. 23 V'agosya v'ose v'alav'e v'ali'wikuminga kali' kadatu' ku' mwaka ha mbele yanne ene Gu'ku' Mulungu, Mulungu wa Izilaeli. 24 Ku'nguno ene ndagasage makabi'la gangi' ha mbele yinywe na ku'zigali'nhya mbi'mbi' zinywe. Ku'du'hu' muntu' u'yo alav'e ali'yigomelwa nsi' yinywe ku' itungo i'lo mulav'e muli'ya ku'kanisenga ene Gu'ku' Mulungu, Mulungu winywe, kali' kadatu' ku' ki'la mwaka.

25 "Ku'du' munfumi'zye magazi ga ki'taambo channe haki'mo na mugate u'go gu'tumbile, ninga ki'taambo cha Mwanya gwa Pasaka ku'du' ki'sigali'le mpaka ndiyu'.

26 "Hangi' ntomolwa ya ntangi'lo ya nsi' yako u'lav'e u'li'yi'leta mu nnumba yanne, ene Gu'ku' Mulungu, Mulungu wako.

"Ku'du' wize u'kasev'ye kadi'lana mu mav'eele gamwa nnina." 27 Hangi' Gu'ku' Mulungu wamuwi'laga Mose ati', "U'tone mihayo zyeni'zi, ku'nguno ku'v'i'ti'la mihayo zyeni'zi nav'ezyaga ilagano nanho, na ku' V'aizilaeli." 28 Itungo lyeni'lo Mose wav'age kwenu'ko ku' lu'gu'lu' haki'mo na Gu'ku' Mulungu nsiku' maku'mi ane, wu'ziku' na lyu'v'a, nawe akalile ki'liwa ninga ku'nywa minzi'. Hangi' wazitonaga mihayo zyeni'zyo zya ilagano, i'zyo nhama iku'mi, ku' mav'ale genago.

29 Yav'aga Mose aho wasookaga ku' lu'gu'lu' lwa Sinai ku'no ali' na mav'ale av'i'li' ga wu'sangi'lwa mu makono gakwe, ndi' akamanyile ku'v'a wu'syu' wakwe wu'li'kelema ku'nguno ya ku'su'nsu'mu'la na Gu'ku' Mulungu. 30 Hohene Aloni haki'mo na V'aizilaeli v'ose aho ndi' v'amuwona Mose, kasinaga wu'syu' wakwe wu'li'kelema, haho v'ogohaga ku'mwegela. 31 Ali'vi Mose wamwitanaga Aloni na v'atongelezi v'a iv'ilingano lya V'aizilaeli, nav'o v'asu'v'aga ku' wakwe, nawe wayombaga nav'o. 32 Haho V'aizilaeli v'ose v'amwegelaga, nawe wav'awi'laga milagi' zyose i'zyo Gu'ku' Mulungu wamuwi'lile ku' lu'gu'lu' lwa Sinai. 33 Yav'aga Mose aho wamali'laga ku'yomba nav'o, wikumbi'laga ki'tambala ki'ti' shela. 34 Ali'vi yav'age ki'ti'le chamwa Mose, ki'la itungo i'lo wav'age ali'ya ku'kasu'nsu'mu'la na Gu'ku' Mulungu mu Ihema lya Ku'sangi'zya, waki'siniage ki'tambala cheni'cho mpaka u'lu' wafuma ha ibala. Nawe wav'age u'lu' wafuma wav'awi'lage mihayo zyose i'zyo walagi'li'ziv'agwa. 35 Haho V'aizilaeli v'awu'wonage wu'syu' wakwe wu'li'kelema. Nawe Mose wikumbi'lage hangi' ki'tambala ku' wu'syu' wakwe, mpaka aho wav'age mbe ali'ya ku'kasu'nsu'mu'la na Gu'ku' Mulungu.