1 Haho Gu'ku' Mulungu wamuwi'laga Mose, "Yaga ku'mwa Falao, u'kamuwi'le ati', ‘Gu'ku' Mulungu, Mulungu wa V'aebulania, ali'yomba i'vi: "V'aleku'li'le v'antu' v'anne v'awu'ke, ki'gele v'akanyisenge. 2 U'lu' u'kaanile ku'v'aleku'li'la v'awu'ke, na u'lu' wendeleye ku'v'adimi'li'la, 3 nhana, ndawu'sye mukono gwanne na ku'leta malwile ga tauni ku' mitugo zinywe zyose: falasi, mpunda, ntwangawu'lende, ng'ombe, nkolo na mbu'li. 4 Ali'vi ndazikome mitugo zya V'aizilaeli na mitugo zya V'amisili, ki'gele ndimu zya V'aizilaeli ku'du' yi'fwe ninga yi'mo." ’ "

5 Hangi' Gu'ku' Mulungu watu'u'laga itungo lya ku'v'ezya na wayombaga, "Igolo ene Gu'ku' Mulungu ndali'v'ezye igambo lyeni'li' mu nsi' ya Misili." 6 Wangalu'ke Gu'ku' Mulungu wav'ezyaga ki'ti' i'vyo wakayombaga. Mitugo zyose zya V'amisili zyafwaga, ali'vi ku'du'hu' mutugo ninga gu'mo gwa V'aizilaeli u'go gwafwaga. 7 Falao wawu'zi'li'zyaga, nawe wawi'lagwa ati', lingaga, ku'du'hu' mutugo ninga gu'mo gwa V'aizilaeli u'go gwafwaga! Ali'vi Falao wendeleyaga ku'v'a na moyo mulambu, wakaanaga ku'v'aleku'li'la V'aizilaeli v'awu'ke.

8 Gu'ku' Mulungu wamuwi'laga Mose na Aloni ati', "Soli matunde ha itanuli mu viganza, nawe Mose agapepemule mu igu'lya ha mbele yamwa Falao. 9 Matunde genago galav'e lu'wuwu lu'bu'hu ha igu'lya na nsi' yose ya Misili. Lu'wuwu lu'lalenge mapute ago galatunyu'ke na ku'v'a malonda ku' v'antu' na ku' ndimu, mu nsi' yose ya Misili." 10 Hohene v'asolaga matunde ga ha itanuli, na v'i'maga ha mbele yamwa Falao. Nawe Mose wagapepemulaga matunde mu igu'lya, nago galengaga mapute ga ku'vindi'zya na ku'tunyu'ka ku' miv'i'li' zya v'antu' na ku' ndimu. 11 Nav'o v'afumu v'aki'i'mile ha mbele yamwa Mose, ku'nguno na v'ene v'apandi'kaga mapute mu miv'i'li' zyav'o, ki'ti' V'amisili v'angi' v'ose. 12 Ali'vi Gu'ku' Mulungu wagu'v'ezyaga moyo gwamwa Falao ku'v'a mulambu, nawe akav'adegelekile Mose na Aloni, ki'ti' i'vyo Mulungu wamuwi'lile Mose.

13 Hangi' wamuwi'laga Mose ati', "Igolo wipune ndiyu', u'ki'i'me ha mbele yamwa Falao, u'muwi'le ati', ‘Gu'ku' Mulungu, Mulungu wa V'aebulania, ali'yomba i'vi: "V'aleku'li'le v'antu' v'anne v'awu'ke, ki'gele v'akanyisenge. 14 Ku'nguno itungo i'li' ndalete vigu'mo vidaki ku' wako, ku' v'akumba v'ako na v'antu' v'ako. Haho u'lamanye ku'v'a hadu'hu' yu'ngi' ki'ti' ene mu welelo yose. 15 Itungo lyeni'li' nali' mbe nagololile mukono gwanne ku'ku'gu'ma ev'e na v'antu' v'ako ku' malwile ga tauni, inywe mwali' muku'v'a mwazimangu'kile mu welelo. 16 Ali'vi namulekile inywe muv'e na wikalo ku' ndaka yeni'yi', ki'gele mulagi'le wu'kowozi wanne, na lina lyanne li'kumu'kiwe mu welelo yose. 17 Ali'vi u'kaali' u'li'wiku'li'li'zya ku' v'antu' v'anne, na u'kaanile ku'v'aleku'li'la v'awu'ke. 18 Lingaga, igolo itungo ki'ti' lyeni'li' ndalete nvula ya mawe nhanya muno, i'yo yi'kaali' yi'tonyage mu nsi' ya Misili, ku'fumi'i'la aho yakatundi'lwa mpaka walelo. 19 Ku'nguno yeni'yo u'fumye ilagi'li'zyo, mitugo zyako zyose ziku'fume ku' idi'ma, na vintu' vyako vyose i'vyo vili' ku' migu'nda vitu'u'lwe ha wu'salama. Ku'nguno nvula ya mawe yi'lamutonyele ki'la muntu' na ki'la ndimu. U'yo alasangwe akav'ile ha lu'go alafwe." ’ "

20 Mugati' na v'akumba v'amwa Falao av'o ndi' v'ogoha muhayo gwamwa Gu'ku' Mulungu v'av'ezyaga wangu' ku'v'aleta v'asese v'av'o na mitugo zyav'o mu nnumba mu wu'salama. 21 Ali'vi av'o v'akogohile muhayo gwamwa Gu'ku' Mulungu v'av'alekaga v'asese v'av'o na mitugo zyav'o ku' migu'nda.

22 Haho Gu'ku' Mulungu wamuwi'laga Mose, "Golola mukono gwako mu igu'lya mu ilunde ki'gele nvula ya mawe yi'tonye mu Misili yose. Yi'v'atonyele v'antu', ndimu na mimelo zyose zya mu migu'nda." 23 Mose aho wawu'syaga mulanga gwakwe mu igu'lya mu ilunde, nawe Gu'ku' Mulungu waletaga ngilimo na nvula ya mawe. Moto gwa nku'v'a gwameku'laga mpaka ha nsi'. I'vi hu' vyene Gu'ku' Mulungu waletaga nvula ya mawe mu nsi' ya Misili. 24 Hohene nvula nhanya ya mawe yatonyaga, na nku'v'a yameku'laga hose. Yav'aga li'tete ihanya i'lo li'kaali' ligelage mu nsi' yose ya Misili, ku'fumi'i'la aho yakatundi'lwa mpaka walelo. 25 Nvula ya mawe yeni'yo yav'ipyaga ki'la ki'ntu' mu nsi' yose ya Misili i'cho chav'age mu migu'nda. Yagu'maga ndimu haki'mo na v'antu' av'o v'av'age mu migu'nda. Nvula yeni'yo ya mawe yav'ipyaga mimelo na ku'vunagu'la ki'la muti'. 26 Igambo lyeni'lo lyav'ezyekaga mu nsi' yose ya Misili, sumbwa ku' Gosheni u'ko v'av'age v'ikalile V'aizilaeli nvula ya mawe ndi' yi'katonyile.

27 Hohene Falao wav'itanaga Mose na Aloni, na wav'awi'laga, "Lu'gendo u'lu' nav'ezyaga wu'kenagu'zi. Gu'ku' Mulungu ali' wa lole, ene na v'antu' v'anne kwahu'v'ile. 28 Mumulombe Gu'ku' Mulungu, ku'nguno ngilimo na nvula yeni'yi' ya mawe zyalenga! Ene nku'muleku'li'la muwu'ke. Ku'du' mwendeleye kwikala henanha." 29 Nawe Mose wasu'v'yaga ati', "Nku'v'a du' mbe nafuma ha ibala na kaya, nku'wu'sya makono na ku'mulomba Gu'ku' Mulungu. Ngilimo na nvula ya mawe viku'leka. Haho u'ku'manya ku'v'a welelo yi'li' yamwa Gu'ku' Mulungu. 30 Ali'vi manyile ku'v'a ev'e na v'akumba v'ako mukaali' ku'mogoha Gu'ku' Mulungu."

31 Katani na shayili vyose vyav'ipaga, ku'nguno shayili yasangwa yi'li' na ngala na katani yav'age yi'li' na malawu', 32 ali'vi ngano na mimelo zingi' zya mpese zikav'ipile ku'nguno ndi' zikaali' ku'komeela.

33 Haho Mose wahafumaga hamwa Falao, wayaga ha ibala na kaya. Hohene wawu'syaga makono gakwe ku'mulomba Gu'ku' Mulungu. Ngilimo na nvula ya mawe zyadugaga, na nvula yalekaga ku'tonya mu nsi'. 34 Ali'vi Falao aho wawonaga ku'v'a nvula, ngilimo na nvula ya mawe zyadugaga, wasu'v'i'laga hangi' wu'kenagu'zi wakwe. Mweni'ki'li' na v'akumba v'akwe v'av'aga na myoyo milambu. 35 Hohene moyo gwamwa Falao gwendeleyaga ku'v'a mulambu. Wakaanaga ku'v'aleku'li'la V'aizilaeli v'aye, ki'ti' i'vyo Gu'ku' Mulungu wayombile ku'v'i'ti'la mulomo gwamwa Mose.