1 Gu'ku' Mulungu wendeleyaga ku'muwi'la Mose ati', "U'lav'ezye ihozezyo li'ngi' lya ku'zuki'zi'zya wu'bani ku' mbawo zya mugu'nga. 2 Ihozezyo lyeni'lo li'v'e lya mugelani'lo, wu'lihu na wu'gali'nhu walyo sentimita maku'mi ane na itano, na wi'i'ma walyo sentimita maku'mi kenda. U'lali'v'ezye li'v'e na mapembe ga mu igu'lya ki'gele gav'e ki'ntu' ki'mo na ihozezyo lyeni'lo. 3 U'lali'kumbi'le lyeni'lo ihozezyo ku' igu'lya na mu mbazu zyalyo haki'mo na mapembe galyo ku' zahabu nsoso, na u'lali'v'ezezye lu'ki'go lwa zahabu lu'li'pilime. 4 Hangi' u'lav'ezye pete iv'i'li' zya zahabu na ku'zitu'u'la ha nsi'li'li' na lu'ki'go mu mbazu zyalyo, ku' ki'la lwandi' pete yi'mo yi'mo, ku'nguno ya ku'dimi'li'la miti' itungo lya ku'li'somba. 5 U'lav'ezye miti' iv'i'li' zya mugu'nga na ku'zikumbi'la zahabu. 6 Ihozezyo lyeni'lo u'lali'tu'u'le ha mbele ya muki'ngo gwa mugati' u'go gu'li' ha mbele ya isandi'ko lya wu'sangi'lwa na nfundi' ya wu'swanano, aho ndav'age nu'sangi'zya nanho. 7 Ki'la lu'siku' ndiyu' aho Aloni alav'e ali'zisu'nga tala i'zyo zili'ho henanho, alazuki'zye wu'bani wu'motu ha igu'lya na ihozezyo lyeni'lo. 8 Hangi' alazuki'zye wu'bani ha itungo lya mpi'ndi' aho ali'v'asya tala. Kwisenga kwenu'ku' ha mbele yanne ku'lav'e kwa matungo gose ku' wu'v'yalwa winywe wose. 9 Ha ihozezyo lyeni'lo, muzilo, ku'du' mwize muzuki'zye wu'bani u'wo wu'kav'ile wu'sondo, ninga ku'fumya ki'taambo cha ku'zigya, ninga kalu'mbi'lo ka mbutoo, ninga ku'pu'ngu'li'la ha igu'lya yalyo kalu'mbi'lo ka ki'neneko. 10 Aloni yi'lamudime ku'v'ezya wu'swanano ha igu'lya na mapembe ga ihozezyo lyeni'lo kamo ku' ki'la mwaka. Alav'ezye wu'swanano ku' magazi ga ki'taambo cha ku'sini'zya wu'kenagu'zi kamo ku' ki'la mwaka, ku' wu'v'yalwa winywe wose. Ihozezyo lyeni'lo li'li' isondo muno ku' wanne ene Gu'ku' Mulungu."

11 Gu'ku' Mulungu wamuwi'laga Mose, 12 "Ki'la aho u'lav'e u'li'v'asolozya V'aizilaeli, ki'la mugosya alali'pe mpenzi ku'nguno ya wu'panga wakwe ha mbele yanne, ki'gele ku'du' ku'v'e na ki'gu'mo mugati' nav'o ha itungo lya ku'v'asolozya. 13 Ki'la yu'mo u'yo alasoloziwe yi'lamudime ali'pe ki'pimo cha feza gilamu mukaga*, ku'londana na vipimo i'vyo vitu'u'lilwe ha hantu' hasondo. Kenaka hu' kalu'mbi'lo kakwe ako alanfumi'zye. 14 Ki'la muntu' u'yo alasoloziwe, ku'lamuli'la wa musimo gwa myaka maku'mi av'i'li' na kwendeleya, alanfumi'zye kalu'mbi'lo kenako ene Gu'ku' Mulungu. 15 Musav'i ku'du' ize afumye nyingi ku'ki'la ki'pimo cheni'cho cha feza gilamu mukaga, ninga mupi'na ku'du' ize afumye ndoo i'zyo zikafika ki'pimo cheni'cho cha feza. Mulav'e muli'fumya kalu'mbi'lo kenako ki'gele muv'ezye wu'swanano ku'nguno ya wu'panga winywe. 16 Nanho u'lapokele feza zyeni'zyo zya wu'swanano ku' V'aizilaeli, na u'lazitu'mi'le ku' mili'mo zya Ihema lya Ku'sangi'zya, nago gu'v'e mwizu' ku' V'aizilaeli ha mbele yanne, mpenzi ya wu'panga winywe."

17 Gu'ku' Mulungu wamuwi'laga Mose ati', 18 "U'lav'ezye ikalaye lya shaba lya kwikusi'la i'lo li'li' na kikali'lo cha shaba. Ikalaye lyeni'lo u'li'tu'u'le hagati' ya Ihema lya Ku'sangi'zya na ihozezyo lya ku'zigi'zya vitaambo, na u'li'ti'ti'li'le minzi' mugati' yalyo, 19 ki'gele Aloni na v'ana v'akwe v'akusi'le makono gav'o na magu'lu' gav'o mwenu'mo. 20 Itungo i'lo v'alav'e mbe v'ali'wingi'la mu Ihema lya Ku'sangi'zya, ninga aho v'alav'e mbe v'ali'wegela ha ihozezyo ki'gele v'atu'mame ku' ku'leta kalu'mbi'lo ka ku'zigya ku'mwa Gu'ku' Mulungu, v'alikusage minzi' ki'gele ku'du' v'afwe. 21 Yi'lav'adime ku'kusa makono gav'o na magu'lu' gav'o ki'gele ku'du' v'afwe. Yeni'yi' yi'lav'e nhama ya nhananhana ku'mwa Aloni na wu'v'yalwa wakwe, haki'mo na wu'v'yalwa u'wo wu'lalonde ku' wav'o."

22 Gu'ku' Mulungu wamuwi'laga Mose ati', 23 "U'lasole visanjo i'vi visoga: wisu'lyu' wa manemane mbi'si' kilo mukaga, mudalasini mumotu kilo idatu', maguv'a mamotu kilo idatu', 24 haki'mo na mudalasini u'go gu'ngi' kilo mukaga. Vipimo vyose vyeni'vyo vilapimwe ku'londana na vipimo i'vyo vitu'u'lilwe ha hantu' hasondo. Hangi' u'lasole maguta ga muzeituni nsu'pa ine. 25 U'laviv'ezye visanjo vyeni'vyo viv'e maguta masondo ga ku'v'ila ga wu'motu wu'soga u'wo wu'seleganiv'ilwe ku' wu'tonto. Genago galatu'mame muli'mo gwa ku'sondohezya. 26 Hangi' u'lav'ile maguta genago ku' Ihema lya Ku'sangi'zya, isandi'ko lya wu'sangi'lwa, 27 meza na vilwani'lo vyayo vyose, ki'nala cha ku'tu'u'li'la tala na vilwani'lo vyacho, ihozezyo lya ku'zuki'zi'zya wu'bani, 28 ihozezyo lya ku'zigi'zya vitaambo na vilwani'lo vyalyo vyose, na ikalaye haki'mo na kikali'lo chalyo. 29 U'lavisondohye ki'gele viv'e visondo muno, na ki'la i'cho ki'lavikuumye ki'lav'e ki'sondo. 30 Hangi' ev'e u'lav'av'ile maguta Aloni haki'mo na v'ana v'akwe na ku'v'asondohya, ki'gele v'antu'mami'le ku' muli'mo gwa wu'hozya. 31 U'lav'awi'le V'aizilaeli ati', ‘Aga gaku'v'a maguta ganne masondo ga ku'v'ila ku' wu'v'yalwa winywe wose. 32 Ku'du' mwize mugapu'ngu'li'le ha igu'lya na miv'i'li' zya v'antu', ninga ku'du' mwize muv'ezye maguta gangi' ga wikole na genaga. Maguta genaga gali' masondo na yi'lamudime mugawone ku'v'a gali' masondo. 33 Muntu' u'yo alav'ezye maguta ki'ti' genaga, ninga ku'muv'ila muntu' u'yo akav'ile muhozya, yi'lamudime muntu' mwenu'yo akomwe ku'le na iv'ilingano lya V'aizilaeli.’ "

34 Hangi' Gu'ku' Mulungu wamuwi'laga Mose ati', "U'lasole visanjo vya wu'motu wu'soga i'vi: wisu'lyu' wa natafi, shekeleti, kelibena na wu'vumba wu'soga. Vyose vyeni'vi viv'e na ki'pimo ki'mo. 35 U'laseleganie vintu' vyeni'vi ku'v'ezya wu'bani wu'motu ku' muli'mo gwa mumanyi u'yo ali'v'ezyaga vintu' vya wu'motu. Wu'lati'ti'lwe munyu ki'gele wu'v'e wu'soga na wu'sondo. 36 Hangi' mugati' na wenu'wo u'sole wu'ngi' u'wu'sye na ku'wu'v'ezya wu'fuma wu'nelezu, ki'gele wu'tu'u'lwe mu Ihema lya Ku'sangi'zya ha mbele ya isandi'ko lya wu'sangi'lwa, aho ndasangi'zyage nanho. Wenu'wo wu'lav'e wu'vumba wu'sondo muno ku' winywe. 37 Muzilo, ku'du' mwize muv'ezye wu'bani wa ku'selegania ki'ti' wenu'wo ku' ku'tu'mi'la inywe v'eni'ki'li', ku'nguno wu'vumba wenu'wo muwu'wone ku'v'a wu'li' wu'sondo ku'nguno yanne." 38 Muntu' u'yo aliv'ezezye wu'vumba ki'ti' wenu'wo, na ku'wu'tu'mi'la mweni'ki'li' ku' wu'motu wawo, yi'lamudime muntu' mwenu'yo akomwe ku'le na iv'ilingano lya V'aizilaeli.