1 "Ku'du' wize u'v'e u'li'sambazya mmola zya wu'fi. Ku'du' wize u'v'e haki'mo na mukenagu'zi na ku'v'a musangi'lwa wa wu'fi. 2 Ku'du' wize u'v'e u'li'wilonda na idale lya v'antu' mu ku'v'ezya wu'kenagu'zi. Ninga ku'du' wize wisangye na idale lya v'antu' aho u'li'fumya wu'sangi'lwa ha iv'anza ku' muhayo ninga gu'mo ki'gele ku'nyongania wu'yangu'. 3 Hangi' ku'du' wize u'v'e na wu'hegela ku' mihayo zya mupi'na.

4 "U'lu' u'yi'sange ng'ombe ninga mpunda ya mwanisi wako yi'tagi'kile, yi'laku'dime ku'yi'su'v'ya ku' wakwe. 5 U'lu' u'yi'wone mpunda yakwe u'yo aku'gayile yi'gwile ha nsi' ku'no yi'li' na muligo gwayo, ku'du' wize u'yi'leke haho yi'gwile. Yi'laku'dime u'mugwasye.

6 "Ku'du' wize u'nyonganie wu'yangu' u'wo wu'li'koov'iwa ku' mupi'na mugati' na musango gwakwe. 7 Wilige ku'le na mihayo zya wu'fi, ninga ku'du' u'v'awu'lage av'o v'ali' wu'du'hu' musango na v'a lole, ku'nguno ene nkasye mmuv'azi'zye lole u'yo mukenagu'zi. 8 Ku'du' wize u'zumye ku'pokela ihongo, ku'nguno ihongo li'li'v'ahofuzya minso av'o v'ali'wona, na ku'nyongania mihayo zya v'antu' v'a lole.

9 "Ku'du' wize u'mwiwonelezye mugeni mwizi'li'zi, ku'nguno inywe v'eni'ki'li' mumanyile i'vyo yi'li' ku' mugeni mwizi'li'zi, ku'nguno ndi' muli' v'ageni ku' nsi' ya Misili.

10 "U'lahambe mbiyu' ha nsi' yako ku' itungo lya myaka mukaga, na ku'pandi'ka viliwa vyayo. 11 Ali'vi mwaka gwa mupungati' u'laleke ku'gali'ma malale ki'gele gasuuhe, na v'antu' v'api'na mugati' na inywe v'asalale viliwa ku'fuma mu malale genago, nazyo ndimu zya mu ipolu zidi'me u'mo v'alav'e v'ali'lekela. U'lav'e u'li'v'ezya vyene vivyo mu migu'nda zyako zya mizabibu na zya mizeituni.

12 "Ku' itungo lya nsiku' mukaga u'lav'e u'li'tu'mama mili'mo zyako. Ali'vi lu'siku' lwa mupungati' u'lav'e u'li'suuha, ki'gele ng'ombe yako na mpunda yako ziv'e zili'suuha, nawe mwana wa muzya u'yo wav'yali'lilwe ha lu'go lwako, haki'mo na mugeni, v'apandi'ke ki'suuho. 13 U'yi'dime yose i'yo naku'wi'lile. U'leke ku'gakania ninga hadoo mina ga milungu zingi', ninga galeke ku'degelekwa ku'fuma ku' mulomo gwako."

14 Mulungu wendeleyaga ku'yomba ati', "Mulav'e muli'mbezezya mwanya kali' kadatu' ku' ki'la mwaka. 15 Muzidime nsiku' zya Mwanya gwa Migate I'zyo Zikatumba, na mulav'e muli'lya migate i'zyo zikatumba mugati' na nsiku' mupungati' ki'ti' i'vyo namulagi'li'zizye. Mulav'ezye vyeni'vyo ku' itungo i'lo li'tu'u'lilwe lya mwezi gwa Abibu, u'go gu'li' mwezi gwa kwandya, ku'nguno mwezi gwenu'go hu' gwene mwafuma ku' Misili. Ku'du' ize igele muntu' ninga yu'mo ha mbele yanne ali' makono du'. 16 Hangi' mulav'ezye Mwanya gwa Lu'siku' lwa Lyi'mbu'la, ku' ntomolwa ya mili'mo zya mu migu'nda zinywe. Mulav'ezye Mwanya gwa Lu'siku' lwa Ku'kuminga ku' ndugo ya mwaka, aho mulav'e muli'kuminga viliwa vya makono ginywe. 17 V'agosya v'ose v'alav'e v'ali'wikungania ha mbele yamwa Gu'ku' Mulungu kali' kadatu' ki'la mwaka.

18 "Ku'du' munfumi'zye magazi ga ki'taambo channe haki'mo na mugate u'go gu'tumbile, ninga maguta ga mutugo gwa lu'siku' lwa mwanya gwanne ku'du' mwize muv'e muli'wu'lekela mpaka ndiyu'.

19 "Hangi' ntomolwa ya ntangi'lo ya nsi' yako u'lav'e u'li'yi'leta mu nnumba yanne, ene Gu'ku' Mulungu, Mulungu wako.

"Ku'du' wize u'kasev'ye kadi'lana mu mav'eele gamwa nnina.

20 "Lingagi, ene nu'mutu'ma malaika amutongelele av'e ku' mbele yinywe, ki'gele amusu'nge mu nzi'la na ku'mufila mpaka ku' lwandi' u'lo nakamwiv'aga. 21 Mulamuku'zye na ku'mudegeleka i'cho alav'e ali'yomba. Ku'du' mwize mumutale, ku'nguno akasye amutondole wu'kenagu'zi winywe, ku'nguno namutu'mile ku' lina lyanne. 22 Ali'vi mbe mwize mumudegeleke visoga muzwi gwakwe, na ku'v'ezya gose ago nu'yomba, haho ene ndav'e ni' mwanisi wa v'anisi v'inywe, na ndav'api'i'nge av'o v'ali'mupi'i'nga.

23 "Malaika wanne alamutongelele ku' mbele yinywe na ku'mufikya ku' nsi' ya V'aamoli, V'ahiti, V'apelizi, V'akanaani, V'ahivi na V'ayebusi, nanne ndav'azimangu'zye v'ose v'enav'o. 24 U'leke ku'ziku'v'i'i'la milungu zyav'o ninga ku'zitu'mami'la, na ku'londa ki'ti'le chav'o. Ali'vi u'lazibomolange kabisa, na nhi'ngi' zyav'o zya mawe zya kwisengela u'laziv'elange mav'ale mav'ale. 25 Na inywe mulantu'mami'le ene Gu'ku' Mulungu, Mulungu winywe, nanne ndavidosye viliwa vinywe na minzi' ginywe. Hangi' ndamusini'zye malwile mugati' na inywe. 26 Ku'kasye ku'v'e na muki'ma wa ku'v'ipya mwitungo ninga mugu'mba mu nsi' yinywe. Nanne ndamuyali'le muv'e na wikalo wu'lihu.

27 "Ndafile wov'a ha mbele yinywe, na ku'zihahya ki'la kabi'la i'zyo mulav'e muzifiki'i'la. Ndav'av'ezye v'anisi v'inywe v'ose v'agalu'ke na ku'mupeela. 28 Ndatongezye mawugu ha mbele yinywe, ago galav'apeezye V'ahivi, V'akanaani na V'ahiti. 29 Ali'vi nkasye mbasage v'antu' v'enav'o ku' itungo lya mwaka gu'mo, ku'nguno nsi' yi'lasigale yi'li' wu'du'hu' ki'ntu' na ndimu zya mu ipolu zilingi'he na ku'mutusya. 30 Ndav'asage hado hado mpaka aho mulav'e mwingi'ha na ku'gelani'la ku'yi'tema nsi' yeni'yo. 31 Nanne ndamutu'u'li'le lu'v'i'mbi' lwinywe ku'lamuli'la ku' Nyanza ya Shamu mpaka ku' Nyanza ya Meditelania*, na ku'fumi'i'la ku' ibalangu' mpaka ku' mongo gwa Efulate. Ndav'atu'u'le v'ikazi v'a nsi' yeni'yo mu makono ginywe, na inywe mulav'asage v'ahafume ha mbele yinywe. 32 Ku'du' u'tu'u'le ilagano ninga li'mo nav'o ninga na milungu zyav'o. 33 Ku'du' mwize muv'azumi'zye kwikala mu nsi' yinywe, ku'nguno u'lu' muzitu'mami'le milungu zyav'o, nhana yi'lav'e ki'ti' mutego ku' winywe, na v'alamuv'ezye mumbezezye wu'kenagu'zi ene."