1 Mose wasu'v'yaga ati', "Yi'lav'e vihe u'lu' v'ize v'aleke ku'nsani'zya, ninga ku'ndegeleka, v'ayombe ati', ‘Gu'ku' Mulungu akaku'fumi'i'lile’?" 2 Haho Gu'ku' Mulungu wamuwu'zyaga Mose ati', "U'dimile ki' mu makono gako?" Mose wasu'v'yaga ati', "Mulanga." 3 Gu'ku' Mulungu wamuwi'laga, "Gu'tagi'le ha nsi'." Mose wagu'tagi'laga ha nsi', nago gwagalu'kaga ku'v'a nzoka! Mose wayi'peelaga. 4 Hangi' Gu'ku' Mulungu wamuwi'laga, "Golola mukono gwako u'yi'dime ku' muki'la." Mose wagololaga mukono gwakwe wayi'dimaga, nayo nzoka yagalu'kaga ku'v'a mulanga mu makono gakwe. 5 Gu'ku' Mulungu wayombaga ati', "I'vi hu' vyene V'aizilaeli v'alasani'zye ku'v'a Gu'ku' Mulungu, Mulungu wa v'agu'ku' v'av'o, Mulungu wamwa Abalahamu, Isaka, na Yakobo wakwifumi'i'lile."

6 Hangi' Gu'ku' Mulungu wamuwi'laga Mose, "Ingi'zya mukono gwako mugati' na nhanzo, mu ki'kuv'a chako." Mose wav'ezyaga vyeni'vyo, ali'vi aho wagu'fumyaga mukono, kasinaga gwav'aga na mbizi, gwape ki'ti' nswakala! 7 Hangi' Mulungu wamuwi'laga ati', "Gu'su'v'ye hangi' mukono mugati' na nhanzo, mu ki'kuv'a chako." Mose wav'ezyaga vyeni'vyo, na aho wagu'fumyaga, kasinaga gwav'aga mupanga ki'ti' viv'alango vingi' vya muv'i'li' gwakwe. 8 Haho Gu'ku' Mulungu wamuwi'laga Mose ati', "U'lu' v'aleke ku'ku'sani'zya ninga ku'lawa lu'manyi'lo lwa mugaka gwa kwandya, v'alasani'zye lu'manyi'lo lwa wu'v'i'li'. 9 Ali'vi u'lu' v'aleke ku'sani'zya lu'manyi'lo lwa migaka zyeni'zi iv'i'li', ninga ku'sani'zya mihayo zyako, hohene u'ladahye minzi' ga mongo gwa Naili, na u'gite ha nsi' nkazu. Minzi' genago galav'e magazi ha igu'lya na nsi' nkazu."

10 Mose wamuwi'laga Gu'ku' Mulungu ati', "Ev'e Gu'ku' wanne, ene nkakowola ku'yomba visoga ku'fuma kale, ninga ku' itungo i'li' wav'aga u'li'yomba nanne mukumba wako. Lu'li'mi lwanne lu'li' lu'timbu ku'su'nsu'mu'la." 11 Gu'ku' Mulungu wamuwu'zyaga, "Ali' nde u'yo watunda mulomo gwa muntu'? Ali' nde u'yo ali'muv'ezya muntu' ku'v'a kameme ninga nkiv'a? Ali' nde u'yo ali'muv'ezya muntu' ku'wona ninga wu'hofu? Vihe, nkav'ile ene Gu'ku' Mulungu? 12 Ev'e yaga, nanne ndagu'londole mulomo gwako na ku'ku'hembeka igambo lya ku'yomba."

13 Ali'vi Mose wasu'v'yaga, "Ev'e Gu'ku' wanne, nu'ku'lomba chaki'sa, u'mutu'me muntu' yu'ngi' ku'v'ezya muli'mo gwenu'go." 14 Haho ki'sila chamwa Gu'ku' Mulungu chapanki'laga ku'mwa Mose, na wamuwu'zyaga, "Vihe, ali'hadu'hu' muku'lu'yo Aloni, Mulawi? Manyile ku'v'a mwene akowolile ku'yomba visoga. Lingaga, nawe ali' mu nzi'la izile ku'ku'su'ngana, na aho aku'ku'wona aku'togwa mu moyo gwakwe. 15 U'ku'su'nsu'mu'la nawe na ku'mutu'u'li'la mihayo mu mulomo gwakwe. Ene nku'v'a haki'mo na inywe na nku'mugwasya ku'yomba, na nku'muhembeka igambo lya ku'v'ezya. 16 Aloni alasu'nsu'mu'le na V'aizilaeli na mwene alav'e muyombi wako, nanho u'v'e ki'ti' Mulungu wakwe, ku' ku'mupa mihayo zya ku'yomba. 17 Gi'si' u'sole mulanga gwenu'gu' mu makono gako ki'gele u'gu'tu'mi'le ku'v'ezezya lu'manyi'lo lwa migaka."

18 Haho Mose wasu'v'aga ku'mwa Yetilo mukwiye, wamuwi'laga ati', "Chaki'sa nu'lomba u'nzumi'zye nsu'v'e ku' Misili ku' v'adu'gu' v'anne, nkav'awone u'lu' v'akaali' v'ali'zuwu'ka." Yetilo wasu'v'yaga, "Yaga na ku'hola."

19 Mose aho wav'age akaali' ali' mu nsi' ya Midiani, Gu'ku' Mulungu wamuwi'laga ati', "Su'v'a ku' Misili ku'nguno v'ose av'o v'akoov'age ku'ku'wu'laga v'amalile ku'gulala." 20 Hohene Mose wamusolaga muki' wakwe na v'ana v'akwe. Wav'aliiniaga ha igu'lya na mpunda, na walamulaga musi'nzo gwa ku'su'v'a ku' Misili. Hangi' wasolaga mulanga u'go walagi'li'ziwa na Mulungu ku'somba mu makono gakwe.

21 Gu'ku' Mulungu wamuwi'laga Mose ati', "Aho u'lav'e wasu'v'a ku' Misili wize witeege ku'v'ezya migaka zyose i'zyo naku'pile wu'kowozi wa ku'v'ezya, ali'vi ndagu'v'ezye moyo gwamwa Falao gu'v'e mulambu, nawe akasye av'aleku'li'le V'aizilaeli ku'wu'ka. 22 Hangi' u'muwi'le Falao, ‘Gu'ku' Mulungu ali'yomba i'vi: "Izilaeli ali' mwana wanne, muv'yalwa wanne wa mbele wa ki'gosya! 23 Nanne nu'ku'wi'la, muleku'li'le mwana wanne awu'ke, ki'gele antu'mami'le. U'lu' u'kaane ku'muleku'li'la, nhana, ndamuwu'lage muv'yalwa wako wa mbele wa ki'gosya." ’ "

24 Mose aho wav'age ali' mu nzi'la ku'su'v'a ku' Misili, aho wafikaga ha lwandi' lwa ku'lala, Gu'ku' Mulungu wamwifumi'i'laga na ku'koov'a ku'muwu'laga ku'nguno ya mwane ndi' akaputwa nyu'nzu'. 25 Haho Zipola wasolaga iwe lyu'gi', na waputaga nyu'nzu' ya mwane na wamukumi'ki'zyaga Mose ku' magu'lu'. Wayombaga ati', "Nhana ev'e u'li' mugosi wanne ku'nguno nitaga magazi genaga." 26 Haho Mulungu wamulekaga. Hohene Zipola wamwitanaga Mose, "Mutozi wa magazi," ku'nguno ya ku'puta yeni'yo nyu'nzu'.

27 Gu'ku' Mulungu wamuwi'laga Aloni ati', "Yaga ku' ibalangu' u'kamusu'ngane Mose." Hohene Aloni wayaga na wapomaga na Mose ku' lu'gu'lu' lwa Mulungu, na wamusu'naga. 28 Nawe Mose wamuwi'laga Aloni mihayo zyose zyamwa Gu'ku' Mulungu, haki'mo na lu'manyi'lo lwa migaka zyose i'zyo walagi'li'ziv'ilwe ku'ziv'ezya. 29 Hangi' Mose na Aloni v'ayaga, na v'av'akunganiaga v'anamala v'ose v'a V'aizilaeli. 30 Nawe Aloni wav'awi'laga mihayo zyose zyamwa Gu'ku' Mulungu i'zyo wamuwi'lile Mose. Hangi' wav'ezyaga lu'manyi'lo lwa migaka ha mbele ya v'antu' v'ose. 31 Hohene v'antu' v'asani'zyaga. Aho v'igagwa ku'v'a Gu'ku' Mulungu wav'izi'i'laga V'aizilaeli, na ku'v'a walu'wonaga lu'duko lwav'o, v'ose v'akundamyaga mitwe zyav'o na ku'ku'v'i'i'la.